Ne ‘Tumau a Ia Ato Hoko ke he Fakaotiaga’

I LOTO he vitio he 1993 ne fakakite ke he tau tagata fou he tau matapatuaga he Tau Fakamoli a Iehova, ne fakailoa e Lyman Alexander Swingle e tau manatu hana ke fekafekau ki a Iehova: “Mate mo e tau sevae he tau hui!” *

Ti fakamoli ni he Matakainaga Swingle ne hivagofulu e tau he moui e mena ne fakamafana e ia falu ke taute. Ne ‘tumau a ia ato hoko ke he fakaotiaga.’ (Mataio 24:13) Pete he gagao lahi e tino, he Aho Lotu, Mati 7, ne finatu a ia ke he feleveiaaga he Kau Fakatufono he Tau Fakamoli a Iehova, ko ia taha he kau ia. He Aho Ua hake ne holo ki mua e gagao hana ti he 4:26 a.m., Mati 14, ne mate ai a ia he talahau he ekekafo hana.

Ne kamata e fekafekau ha Lyman Swingle he matapatu fale he lalolagi he Tau Fakamoli a Iehova i Brooklyn, New York, ia Aperila 5, 1930. Ne gahua a ia i ai ke teitei 71 e tau. Fakamua ne kotofa a Lyman ke pega e tau tohi, ti ke he poko lomi, mo e lagomatai foki a ia ke taute e tau vai lomi. Ti, kua 25 e tau ne gahua e Matakainaga Swingle he poko taute vai lomi.Ne gahua foki a ia ke kavi 20 e tau mo taha ne gahua tohitohi he matapatuaga. Ke he tau tau 17 ne toe he moui hana, ne gahua a ia he Ofisa Leveki Tupe.

Ko Lyman ko e tagata fakapuloa malolo he Kautu he Atua. He tau tau fakamua hana i Brooklyn, ne mahani a ia ke fano fenoga mo e kapitiga ne nofo mo ia, ko Arthur Worsley, he poti he taha he Tau Fakamoli he Hudson River. He fakaaoga e tau kanavaakau leo taogo, ne loga e tau matahiku fahi tapu ne gahua a laua ke fakapuloa e fekau he Kautu ke he tau maga ikiiki i uta.

Ne fanau e Matakainaga Swingle ia Novema 6, 1910, i Lincoln, Nebraska, ka e nakai leva ne hiki e magafaoa ki Salt Lake City, Utah. I ai, he 1913, ne eke e tau matua hana mo tau Tagata Fakaako he Tohi Tapu, ne ui aki e Tau Fakamoli a Iehova he magaaho ia. Ke he tau tau loga, ne leveki he magafaoa Swingle e tau tagata lauga ahiahi mai he tau matapatu fale he Tau Fakamoli i Brooklyn, ti omoomoi mitaki e tau tagata nei ki a Lyman. He 1923, he 12 e tau he moui, ne papatiso a ia ke fakamailoga e tukuleleaga hana ke he Atua.

He molea e 26 e tau he fekafekau i Brooklyn mo tagata nofo tokotaha, ne uho lahi e moui ha Lyman he magaaho ne mau e ia a Crystal Zircher ia Iuni 8, 1956. Ne nakai mavehevehe a laua, he fakalataha tokoua he fekafekauaga ato mate a Crystal he 1998. Kavi ke tolu e tau fakamua, ne gagao fakalutukia a Crystal ti kulikuli ai a ia. Ko e leveki ha Lyman ki a Crystal ke he tau aho oti kua eke mo fakafifitakiaga he fakamoliaga ne hohofi lahi ki a lautolu ne iloa a laua, mahomo atu ki a lautolu ne kitia a Lyman ne omoi e nofoa taveli he paka puhala tu he tuuta kaina ka e foaki e Crystal e The Watchtower mo e Awake! ki a lautolu ne o fano.

Ko e tagata fakamoli, loto mafana a Matakainaga Swingle ne hofihofi e fakahele ki a lautolu nukua iloa a ia. Tuga e matua tane mo e matua fifine hana, ne ha ha ia ia e amaamanakiaga fakave ke he Tohi Tapu he moui mo Iesu Keriso i luga he Kautu he lagi, ko e amaamanakiaga ne iloa moli e tautolu kua mailoga tuai e ia he mogonei.—1 Tesalonia 4:15-18; Fakakiteaga 14:13.

[Matahui Tala]

[Fakatino he lau 29]

Ne kavi ke 25 e tau ne fekafekau e Matakainaga Swingle ke he poko taute vai lomi

[Fakatino he lau 29]

Ne nakai mavehevehe a Lyman mo Crystal