Olioli he Iloilo ki a Iehova

“Mua e monuina he tau tagata ka fanogonogo ke he kupu he Atua mo e omaoma ki ai.”—LUKA 11:28.

1. I ne fe ne kamata matutaki a Iehova mo e tau tagata?

KUA fakaalofa a Iehova ke he tau tagata mo e kua hokulo e fiafia hana ke he tau manako ha lautolu. Nakai ofo ai mogoia, kua matutaki a ia mo lautolu. Ko e matutakiaga nei ne kamata he kaina ko Etena. Hagaao ke he Kenese 3:8, ko e taha “magaaho hauhau” he aho, ne logona [e Atamu mo Eva] e leo a Iehova ko e Atua.” Kua talahau he falu e mena nei ko e aga ha Iehova ke matutaki mo Atamu ke he magaaho nai, liga he tau aho oti. Ko e mena ni ne tupu, kua fakamahino he Tohi Tapu ne fai magaaho e Atua ke foaki e tau fakaakoaga ke he tagata tane fakamua ti pihia foki ke fakaako a ia ke he mena ne lata ke iloa e ia ke maeke ke taute e tau matagahua hana.—Kenese 1:28-30.

2. Vevehe kehe fefe he hoa fakamua a laua mai he takitakiaga ha Iehova, ti ko e heigoa e fua?

² Ne foaki age e Iehova e moui ki a Atamu mo Eva, ti pule ai ke he tau manu mo e ke he lalolagi katoa. Ka e taha e fakatapuina—nakai maeke ia laua ke kai e akau ke iloa e mitaki mo e kelea. Fakaohooho ai e Satani, ati liuliu a Atamu mo Eva ke he poakiaga he Atua. (Kenese 2:16, 17; 3:1-6) Ne fifili a laua ke tu kehe, he fifili ni e laua e mena kua hako mo e mena kua hepe. He taute pihia, ne goagoa a laua he vevehe kehe mai a laua he takitakiaga he Tufuga fakaalofa ha laua. Ko e fua ne matematekelea lahi ma laua mo e ha laua a hologa nakai la fanau ia. Ne fuakau a Atamu mo Eva ti fakahiku mamate mo e nakai fai amaamanakiaga ke liu tu mai. Ne moua he tau hologa ha laua e agahala ti ko e fua, mamate.—Roma 5:12.

3. Ko e ha ne matutaki a Iehova mo Kaino, ti tali atu fefe a Kaino?

³ Pete ni e totokoaga he kaina i Etena, ne fakatumau a Iehova ke matutaki mo e hana tau mena moui ko e tagata. Ko Kaino, ko e tama uluaki ha Atamu mo Eva, ne hagahagakelea he kaumahala ke he agahala. Ne hataki a Iehova ki a ia hane haga atu a ia ke he matematekelea mo e tomatoma ki a ia ke “mahani mitaki.” Ne fakaheu e Kaino hana tomatoma fakaalofa mo e kelipopo hana matakainaga. (Kenese 4:3-8) Ti ko e tau tagata tokotolu fakamua he lalolagi ne fakaheu oti e hatakiaga mahino ne foaki e ia ne mai ki a lautolu e moui, ko e Atua nukua foaki e fakaakoaga ke he hana tau tagata ke liga maeke ia lautolu ke aoga ai ni a lautolu. (Isaia 48:17) Ko e fakamamahi ha ia he mena nei ki a Iehova!

Fakakite e Iehova a Ia ke he Tau Tagata i Tuai

4. Hagaao ke he hologa ha Atamu, ko e heigoa e mauokafua ha Iehova, ti ko e heigoa e fekau he amaamanakiaga ne talahau e ia mo e mena ne tokaloto e ia?

⁴ Pete he ha ha ia ia e tonuhia ke mumutu kehe e matutakiaga mo e tau tagata, ne nakai taute pihia e Iehova. Ne mauokafua a ia ko e falu he tau hologa ha Atamu to omaoma fakapulotu Hana hatakiaga. He fakapuloa e fakahala ki a Atamu mo Eva, ma e fakatai, ne talahau tuai e Iehova e hauaga he “tega” ke totoko e Gata Tuai, ko Satani ko e Tiapolo. Fai magaaho ni, to tatuki a Satani ke he ulu. (Kenese 3:15, NW) Ko e perofetaaga nei ko e fekau olioli lahi he amaamanakiaga ke he “tau tagata ka fanogonogo ke he kupu he Atua mo e omaoma ki ai.”—Luka 11:28.

5, 6. Ko e heigoa e tau puhala ne matutaki a Iehova mo e hana tau tagata ato hoko e senetenari fakamua V.N., ti aoga fefe e mena nei ki a lautolu?

⁵ Ne matutaki e Iehova hana finagalo ke he tau tupuna tua fakamoli i tuai, tuga a Noa, Aperahamo, Isaako, Iakopo, mo Iopu. (Kenese 6:13; Esoto 33:1; Iopu 38:1-3) Fakamui, ne fakatoka  mai e ia he puhala ia Mose e fakatokaaga he tau matafakatufono oti ma e motu ha Isaraela. Ne loga e puhala ne aoga e Fakatufono faka-Mose ki a lautolu. He omaoma ai, ne vevehe kehe a Isaraela mai he falu motu mo tau tagata uho he Atua. Ne mavehe e Atua ke he tau Isaraela kaeke ke omaoma a lautolu ke he Fakatufono, to fakamonuina e ia a lautolu fakatino ti pihia foki fakaagaga he eke a lautolu mo tau ekepoa he kautu, ko e motu tapu. Ne foaki foki he Fakatufono e tau poakiaga ke he tau puhala kai mo e fakameaaga nukua fakatolomaki e malolo tino mitaki. Pete ia, ne hataki foki e Iehova e tau fua mamahi ka moua mai he mahani liuliu.—Esoto 19:5, 6; Teutaronome 28:1-68.

⁶ Fai magaaho, ne lafi e falu tohi mai he agaga ke he tau matafakatufono he Tohi Tapu. Ko e tau fakamauaga tuai ne talahau e tau fehagaiaga a Iehova mo e tau motu mo e tau tagata. Ne fakamaama he tau tohi ku e tau mahani hana. Ne talahau tuai he tau tohi fakaperofeta e gahuahua anoiha he finagalo ha Iehova. Ne kumikumi fakamitaki mo e fakaaoga he tau tagata tane tua fakamoli i tuai e tau tohi nei mai he agaga. Ne tohi he taha: “Ko e hāu a kupu ko e hulu ia ke he haku tau hui, mo e maama ke he haku puhala.” (Salamo 119:105) Kia lautolu ne makai ke fanogonogo, ne foaki e Iehova e fakaakoaga mo e fakamaamaaga.

Kikila Fakahaga e Maama

7. Pete ni e taute e Iesu e tau mana, ko e heigoa kua talahaua lahi ai a ia, ti ko e ha?

⁷ He senetenari fakamua, ne lafi he tau matakau fakalotu Iutaia e tau aga tuai he tagata ke he Fakatufono. Ne fakaaoga hehe ai e Fakatufono, ti nakai ko e punaaga he maama, ka kua mamafa ai he tau aga toka tuai. (Mataio 23:2-4) Pete ia, he 29 V.N., ne hau ai a Iesu ko e Mesia. Ko e fekau hana ne nakai ke foaki ni hokoia he hana moui ke lata mo e tau tagata ka e pihia foki ke ‘talahau e kupu moli.’ Pete ne taute e ia e tau mana, ne talahaua lahi a ia ko e “akoako.” Ko e fakaakoaga hana kua tuga e maama ne kikila ke he pouligia fakaagaga ne puipui aki e tau manamanatuaga he tau tagata. Ne talahau ni e ia ko Iesu: “Ko au nai ko e maama he lalolagi.”—Ioane 8:12; 11:28; 18:37.

8. Ko e heigoa e tau tohi he agaga ne tohia he senetenari fakamua V.N., ti aoga fefe ke he tau Kerisiano fakamua?

⁸ Fakamui ti lafi mai e tau Evagelia, fa e fakamauaga nukua tohi ke he moui ha Iesu, mo e tohi ha Gahua, ko e fakamauaga tuai ne holofa he faka-Kerisiano he mole e mate ha Iesu. Ne ha ha i ai foki e tau tohi he agaga ne tohia he tau tutaki ha Iesu, ti pihia foki mo e tohi fakaperofeta ha Fakakiteaga. Ko e tau tohi nei, ne lalafi mo e tau Tohiaga Tapu Heperu, ti katoa ai e fakatufono he Tohi Tapu. Mo e lagomatai he tohi katoa nei mai he agaga, ke maeke he tau Kerisiano “ke iloa tonuhia . . . mo e tau tagata tapu oti kana, po ke heigoa e laulahi, mo e loa, mo e hokulo, mo e tokoluga” he kupu moli. (Efeso 3:14-18) Maeke ia lautolu ke moua e “finagalo a Keriso.” (1 Korinito 2:16) Moha, nakai iloa katoa he tau Kerisiano fakamua ia e tau puhala oti he tau finagalo ha Iehova. Ne tohi e aposetolo ko Paulo ke he tau tagata tua: “Ko e vaha nai kua kitia taumaleku ai e tautolu ke he fakaata.” (1 Korinito 13:12) To fakakite he fakaata pihia e fakatokaaga ka e nakai fakamatafeiga. Ko e maamaaga katoa he Kupu he Atua kua nakai la hoko mai ia.

9. Ko e heigoa e maamaaga ne tupu he “tau aho fakamui”?

⁹ He vaha nei, kua nonofo a tautolu he magahala ne higoa ko e “tau aho fakamui” ko e magahala ne fakamailoga he “tau aho uka.” (2 Timoteo 3:1) Na talahau tuai mai he perofeta ko Tanielu ke he magahala nei “to tupu lahi ai foki e mahani iloilo.” (Tanielu 12:4) Ti, ko Iehova, ko e Matutaki ne Mua, kua lagomatai a lautolu ne loto moli ke maama e kakano he hana Kupu. Tokologa e tau tagata he magaaho nei ne maama kua fakapatuiki a Keriso Iesu he lagi he 1914. Kua iloa foki e lautolu to ta mai mafiti foki e ia e fakaotiaga ke he tau mahani kelea oti mo e fakafou e lalolagi ke he lalolagi parataiso. Ko e puhala aoga nai he tala mitaki he Kautu kua fakamatala he magaaho nei ke he lalolagi oti.—Mataio 24:14.

10. Tali mai he tau senetenari, fefe e tali atu he tau tagata ke he tomatomaaga ha Iehova?

¹⁰ E, tali mai he fakamauaga tuai ne matutaki age e Iehova hana finagalo mo e amaamanakiaga ke he tau tagata he lalolagi. Ne fakamaama he fakamauaga he Tohi Tapu e tokologa ne  fanogonogo, fakagahua e pulotu mahani Atua, ti kua fakamonuina ai. Kua talahau foki ki a lautolu ne fakaheu e tomatomaaga fakaalofa he Atua, he muitua e puhala kelea ha Atamu mo Eva. Ne fakatata e Iesu e tuaga nei he vagahau a ia ke he ua e puhala fakatai. Taha ne pu atu ke he malaia. Kua pulahi mo e laulahi, kua o atu ai e tokologa ne fakaheu e Kupu he Atua. Ko e taha puhala kua pu atu ke he moui tukulagi. Pete he pukilu, ko e hala he tokogahoa ne talia e Tohi Tapu, ko e Kupu he Atua, mo e moui fakatatau ki ai.—Mataio 7:13, 14.

Fakaaue ke he Mena kua Moua e Tautolu

11. Ko e iloilo ha tautolu mo e taofiaga he Tohi Tapu kua fakamoli e heigoa?

¹¹ Ko koe nakai taha ia lautolu ne fifili e puhala ke he moui? Ka pihia, to nakai fakauaua a koe ke manako ke nofo mau i ai. Taute fefe e koe e mena ia? He kikite tumau mo e loto fakaaue ke he tau monuina he iloa e tau kupu moli he Tohi Tapu ne ta mai ke he moui hau. Ha kua tali atu a koe ke he tala mitaki ko e fakamoli a ia he fakamonuina he Atua. Kua fakakite e Iesu e mena nei he liogi ke he hana Matua ke he tau kupu nei: “Hoku Matua na e, kua fakaaue au kia koe, ko e Iki he lagi mo e lalolagi, he ufiufi e koe e tau mena nai he tau tagata iloilo mo e loto matala, ka kua fakakite atu ai ke he tau tama mukemuke.” (Mataio 11:25) Ko e tau tagata takafaga ika mo e tau tagata oko tukuhau ne matala ke he fakaakoaga ha Iesu, ka e nakai pihia e tau takitaki lotu pulotu. Ne lafi atu e Iesu: “Nakai maeke ia taha ke hau kia au, ka nakai futia mai he Matua ne fakafano mai au.” (Ioane 6:44) Ka iloa e koe e Tohi Tapu ti talitonu a koe ki ai mo e muitua hana tau fakaakoaga, kua fakamoli e mena nei kua futiaki mai e Iehova a koe. Ko e kakano ma e olioli.

12. Ko e heigoa e tau puhala kua fakamaama mai he Tohi Tapu?

¹² Kua toka he Kupu he Atua e tokanoaaga he tau kupu moli mo e kua foaki mai e maamaaga. Ko lautolu ne momoui fakatatau ke he iloilo he Tohi Tapu kua ataina mai he tau matakutaku aitu, tau fakaakoaga fakavai, mo e nakai maama ne ha ha he tau momoui he tau tagata miliona. Ma e fakatai, he iloa e kupu moli hagaao ke he tuaga he tagata mate, kua fakatokanoa a tautolu mai he ha matakutaku to fakamamahi he tau tagata mamate a tautolu po ke kua matematekelea a lautolu e tau fakahelehele ha tautolu. (Esekielu 18:4) Ko e iloa e kupu moli ke he tau agelu kelea kua lagomatai a tautolu ke fehola kehe mai he  tau hagahaga kelea he matutakiaga fakataulatua. Ko e fakaakoaga he liu tu mai kua mafanatia ki a lautolu ne galo e tau fakahelehele ke he mate. (Ioane 11:25) Ko e tau perofetaaga he Tohi Tapu kua fakakite ki a tautolu e matakavi kua nonofo a tautolu i ai mo e foaki mai e mauokafua ki a tautolu ke he tau maveheaga he Atua ma e vaha anoiha. Kua fakamalolo ai foki ha tautolu a amaamanakiaga he momoui tukulagi.

13. Aoga fefe e omaoma ke he Kupu he Atua ki a tautolu fakatino?

¹³ Ko e tau matapatu fakaakoga mahani Atua he Tohi Tapu kua fakaako a tautolu ke momoui ke he puhala kua ta mai e tau aoga fakatino. Ma e fakatai, kua ako e tautolu ke tiaki e tau gahua ne fakakelea aki e tau tino ha tautolu, tuga e fakaaoga hehe he tapaka mo e falu tulaki. Kua tiaki e tautolu e fakaaoga hehe he kava. (2 Korinito 7:1) He omaoma ke he tau fakatufono mahani mitaki he Atua kua eke mo puipuiaga mai he tau gagao pikitia he mahani fakatane mo e fifine. (1 Korinito 6:18) He manatu e tomatomaaga he Atua ke tiaki e manako lahi ke he tau tupe, kua nakai moumou e tautolu e mafola he manamanatuaga ha tautolu, tuga e tokologa, ne tutuli e muhu koloa. (1 Timoteo 6:10) Ko e heigoa e tau puhala ne aoga fakatino a koe ha ko e fakagahua e Kupu he Atua he moui hau?

14. Ko e heigoa e omoomoiaga he agaga tapu ne gahua he tau momoui ha tautolu?

¹⁴ Ka momoui fakatatau a tautolu ke he Kupu he Atua, moua e tautolu e agaga tapu ha Iehova. Feaki e tautolu e aga tuga he Keriso, he fakakite e tau fua futiaki tuga e fakaalofa noa mo e fakaalofa hofihofi noa. (Efeso 4:24, 32) Gahuahua foki e tau fua he agaga he Atua i loto ia tautolu—ko e fakaalofa, fiafia, mafola, fakauka, totonu, mahani mitaki, tua, mahani molu, mo e manako fakalatalata. (Kalatia 5:22, 23) Fakatolomaki ki mua he tau mahani nei e tau fakafetuiaga fiafia mo e kakano lahi mo e falu, putoia ai e tau tagata he magafaoa. Moua e tautolu e malolo he loto ne lagomatai a tautolu ke fakamalolo he fehagai mo e tau mena uka. Maama nakai e koe e puhala ne fakalagalaga he agaga tapu e moui hau ke he mitaki?

15. He fakatatau e tautolu e tau momoui ha tautolu mo e finagalo he Atua, aoga fefe a tautolu?

¹⁵ He fakatatau e tau momoui ha tautolu mo e finagalo he Atua, kua fakamalolo e tautolu e fakafetuiaga ha tautolu mo Iehova. Kua tupu e mauokafua ha tautolu kua maama e ia a tautolu ti ofania e ia a tautolu. Ako e tautolu mai he mena tupu kua lalago e ia a tautolu he tau magaaho uka. (Salamo 18:18) Kua iloa e tautolu kua fanogonogo moli a ia ke he tau liogi ha tautolu. (Salamo 65:2) Kua maeke ke falanaki a tautolu ke he hana takitakiaga, mauokafua ai to aoga ai a tautolu. Ti ha ha ia tautolu e amaamanakiaga homo ue atu he nakai leva to ta mai he Atua a lautolu kua tua fakamoli ke he mitaki katoatoa mo e foaki ki a lautolu hana mena fakaalofa he moui tukulagi. (Roma 6:23) “Kia fakatata atu a mutolu ke he Atua, ti fakatata mai ai  a ia kia mutolu,” ne tohi he tutaki ko Iakopo. (Iakopo 4:8) Logona hifo kia e koe kua malolo e fakafetuiaga hau mo Iehova he fakatata atu a koe ki a ia?

Ko e Koloa Uho Nakai Fai Fakatataiaga

16. Ko e heigoa e tau hikiaga ne taute he falu Kerisiano he senetenari fakamua?

¹⁶ Ne fakamanatu age e Paulo ke he tau Kerisiano fakauku he agaga he senetenari fakamua ko e falu ia lautolu he taha magahala ko e tau tagata mahani feuaki, tau tagata faivao, tau tagata fakasotoma, tau tagata kaiha, tau tagata lotokai, tau tagata konahia, tau tagata tafeauhi, mo e tau tagata fofo mena. (1 Korinito 6:9-11) Ne fakatupu he kupu moli he Tohi Tapu a lautolu ke taute e tau hikihikiaga lalahi; he “koukou tuai” a lautolu. Lali ke manamanatu ko e fefe la e moui hau ka nakai iloa e koe e tokanoaaga he kupu moli ne ako e koe mai he Tohi Tapu. Moli ko e kupu moli ko e koloa uho kua nakai fai fakatataiaga. Ko e fiafia ha ia ha tautolu kua matutaki a Iehova mo tautolu!

17. Fagai fakaagaga fefe e Tau Fakamoli a Iehova he tau feleveiaaga Kerisiano?

¹⁷ Lafi atu ki ai, manamanatu ke he monuina kua ha ha ia tautolu e tau matakainaga lanu kehekehe! Ne foaki he “fekafekau fakamoli mo e loto matala” e tau mena kai fakaagaga he tau magaaho tonu, putoia e tau Tohi Tapu, tau mekasini, mo e falu tohi ke he tau vagahau loga. (Mataio 24:45-47) He tau feleveiaaga he fakapotopotoaga he tau 2000, ko e Tau Fakamoli a Iehova he tau motu loga ne liu fakamanatu e tau manatu aoga mai he valu e tohi lalahi he tau Tohiaga Tapu Heperu. Ne manamanatu fakahokulo a lautolu ke he tau momoui he tau tagata toko 40 he Tohi Tapu nukua fakatutala he Insight on the Scriptures. Ne tutala a lautolu ke he kavi ke taha mai he fa e tohi The Greatest Man Who Ever Lived mo e teitei oti e tohi Pay Attention to Daniel’s Prophecy! Tolugofulu ma ono e vala tala ne moua mai he mekasini Kolo Toko ti lafi ke he 52 e vala tala fakaako. Lafi atu, ne fakatupuola e tau tagata ha Iehova aki e 12 e fufuta he Ha Tautolu  a Fekafekauaga he Kautu mo e tau lauga ma e tau tagata he tau fahitapu takitaha ke he tau matapatu tala Tohi Tapu kehekehe. Ko e mautu ha ia he iloilo fakaagaga ne kua fakatoka mai!

18. Ko e heigoa e tau puhala nukua lagomatai a tautolu i loto he fakapotopotoaga Kerisiano?

¹⁸ He lalolagi katoa, molea e 91,000 he tau fakapotopotoaga ne foaki e lalagoaga mo e fakamaloloaga he puhala he tau feleveiaaga mo e feoakiaga. Kua olioli foki e tautolu e lalagoaga he tau Kerisiano momotua nukua makai ke lagomatai a tautolu fakaagaga. (Efeso 4:11-13) E, kua aoga lahi a tautolu he moua e iloilo he kupu moli. Ko e olioli ke iloa mo e fekafekau ki a Iehova. Ko e moli ha ia he tau kupu he salamo ne tohi: “Uhoaki e motu kua eke a Iehova mo Atua ha lautolu.”—Salamo 144:15.

Manatu Nakai e Koe?

• Ko hai ne matutaki a Iehova ki ai he tau vaha fakamua to Kerisiano?

• Maeke fefe e maama fakaagaga ke kikila lahi he senetenari fakamua? he vaha fou nei?

• Ko e heigoa e tau monuina kua moua he moui fakatatau ke he iloilo ha Iehova?

• Ko e olioli he ha a tautolu ke he ha tautolu a iloilo he Atua?

[Tau Huhu he Fakaakoaga]

[Tau Fakatino he lau 20]

Ne matutaki e Iehova hana finagalo ki a Mose, Noa, mo Aperahamo

[Fakatino he lau 21]

He vaha nei ha tautolu, ne foaki e Iehova e maama ke he hana Kupu

[Tau Fakatino he lau 22]

Manamanatu ke he monuina kua moua e tautolu he tau matakainaga lanu kehekehe ha tautolu!