Tau Akau ne Fakauka ke he Vaha Loa

Kua nakai mitaki e feutu ke eke mo kaina hau, ti kelea lahi ka haia i luga he tau mouga. Ka e, pete ni ko e tau tutuaga hagahaga kelea, kua pili fefeke falu akau paina ke he tau mata maka pihia, he fakauka ke he makalili aisa he vaha makalili mo e fakauka ke he velagia he la he vaha mafana.

KA KUA nakai ofoofogia e tau akau nei tuga falu akau tatai pihia. Kua mavikoviko e tau matapatu ha lautolu ti kua nakai lalahi a lautolu. Kua helehele kehe he matagi kelea e tau lau ha lautolu mo e he tama vala kelekele ne tutupu ai a lautolu.

He tupu uka a lautolu he taha he tau matakavi hagahaga kelea he lalolagi, liga piko ni a koe kua nakai moui loa e tau akau pihia. Ka kua nakai moli. He talahau he falu, ko e akau ne ui ko Metusela, ko e paina fua fotofoto kua tupu ke loa ke 3,000 mita he White Mountains ha California, kua 4,700 e tau tau he moui. Ne tohi he The Guinness Book of Records 1997 ko e akau nei ko e akau mai i tuai tigahau he palaneta. Ne fakamaama e Edmund Schulman, ne kumikumi ke he tau akau tuai nei: “Ko e tau paina fua fotofoto . . . kua liga moui ni ha ko e tuaga hagahaga kelea. Ko e falu foki [tau akau paina] he White Mountains kua tutupu ke tetei 3,000 e mita he malamalaega magomago mo e makamaka.” Kitia foki e Schulman ko e tau akau tuai lalahi he falu a paina kua tutupu foki pihia he tau tutuaga kelea.

Pete kua lata ia lautolu ke kautu ke he tuaga hagahaga kelea, ko e tau akau tupu uka nei kua moua e lagomatai mai he tau mena ua ne ha ha ia lautolu. Ko e tuaga malamalaega ha lautolu, ne fiha ni e tama akau ne tutupu ai, kua puipui a lautolu mai he afi ka vela e vaouhi, ko e taha mena kelea lahi ma e tau akau lalahi. Mo e tau vakavaka ha lautolu kua pili nivaniva ke he mata maka ti ko e mafuike ni ka huhuo ai.

I loto he Tohi Tapu ne fakatai e tau fekafekau fakamoli he Atua ke he tau akau. (Salamo 1:1-3; Ieremia 17:7, 8) Liga fehagai foki a lautolu mo e tuaga hagahaga kelea ha ko e tau tutuaga ne ha ha  ai a lautolu. Favaleaga, tino gagao, po ke mativa kelea ka kamatamata e tua ha lautolu, mua atu ka holo atu e tau kamatamata ke he taha tau ke he taha tau. Ka e pete he pihia, ko e Tufuga ha lautolu, ne talaga e tau akau ke moui ke he tau tuaga hagahaga kelea, kua fakamoli ke he tau tagata tapuaki hana to lalago e ia lautolu. Ne mavehe e Tohi Tapu ki a lautolu ne tutu mauokafua: ‘To fakatumau mo e fakamalolo e ia a mutolu.’—1 Peteru 5:9, 10.

Ke ‘tu mauokafua, ke fakatumau, po ke fakamanava loa’ ko e manatu a ia i tua he kupu Heleni ne fakaliliu “fakauka” i loto he Tohi Tapu. Tuga e tau akau paina, ko e vakavaka mitaki ko e kei ke he fakaukaaga a ia. Ka ke he tau Kerisiano, kua lata ia lautolu ke mauniva e tau vaka ia Iesu Keriso ke maeke ke fakatumau. “Tuga ne talia e mutolu a Keriso Iesu,” he tohia e Paulo, “ko e Iki, kia o fano ai a mutolu ia ia. Kua fai vaka a mutolu ia ia, mo e ati hake kia ia, ti fakatumau ke he tua, tuga ne fakaako ai a mutolu mo e fakaaue.”—Kolose 2:6, 7.

Kua maama e Paulo e manako ma e tau vaka malolo fakaagaga. Kua fetului foki a ia mo e “mena mahukihuki ke he tino,” mo e fakauka a ia ke he tau favaleaga fakalialia he fekafekauaga katoa hana. (2 Korinito 11:23-27; 12:7) Ka e mailoga e ia ha ko e malolo he Atua kua maeke ia ia ke fakauka. “Kua maeke ia au e tau mena oti kana ke he fakamalolo mai [he Atua] kia au,” he talahau e ia.—Filipi 4:13, fakatatai NW.

Tuga e fakafifitakiaga ne fakakite e Paulo, ke kautu e Kerisiano he fakauka kua nakai falanaki ke he tau tutuaga mitaki. Tuga e tau akau paina ne tupu uka he tau matagi afa ke he tau senetenari loga, kua maeke ia tautolu ke tutu mauokafua kaeke vakavaka a tautolu ia Keriso mo e falanaki ke he malolo ne mai he Atua. Mua atu, kaeke fakauka a tautolu ke he fakahikuaga, to ha ha ia tautolu e amaamanakiaga ke kitia ni ma tautolu e fakamoliaga he taha maveheaga faka-Atua: “Kua tuga ne tau aho he akau e tau aho he haku motu.”—Isaia 65:22; Mataio 24:13.