Kia Eke mo Tau Tagata Fiafia he Gahua Helehele!
Kia Eke mo Tau Tagata Fiafia he Gahua Helehele!
“Kua loga e tau saito ke helehele, ka ko e tau gahua, kua tokogaogao a lautolu. Ko e mena ia, kia olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito ke helehele.”—MATAIO 9:37, 38.
1. Ko e heigoa ka lagomatai a tautolu ke fakauka he taute e finagalo he Atua?
HE MANATU e tautolu e aho ne papatiso a tautolu mo taha he tau fekafekau a Iehova, pete he fiha e tau tau po kua leva tuai, liga ni kua tuga laia ne afi. Kua eke ai mo matapatu he moui tukulele ha tautolu ke fakaheke ki a Iehova. He fakaaoga e tautolu e aho ke lagomatai falu ke logona mo e liga talia e fekau he Kautu, kua tupetupe lahi ai a tautolu ke fekafekau fiafia ki a Iehova. (Efeso 5:15, 16) Tali mai ke he aho nei, ne mailoga e tautolu kua mafiti e tau magaaho ka lahi e lavelave ha tautolu, he “fakamakai nakai noa ke he gahua he Iki.” (1 Korinito 15:58) Pete kua fehagai a tautolu mo e tau mena vihi, to fakaohooho atu ki mua a tautolu he fiafia he taute e finagalo ha Iehova.—Nehemia 8:10.
2. Ko e heigoa ne lafi ke he fiafia ne moua e tautolu he gahua helehele saito fakatai?
2 Ko e tau Kerisiano, kua fakafita a tautolu ke he gahua helehele saito fakatai. Ne fakatai e Iesu Keriso e fakapotopoto he tau tagata takitaha ma e moui tukulagi ke he helehele saito. (Ioane 4:35-38) Ha kua fakalataha a tautolu ke he gahua helehele pihia, to fakamalolo lahi ke kumikumi e fiafia he tau Kerisiano fakamua atu ne gahua helehele. To liu kikite atu a tautolu ke he tau mena tolu ne lafi ke he fiafia ne iloa e tautolu he gahua helehele he vaha nei. Ko e tau mena nei ko e (1) ha tautolu a fekau he amaamanakiaga, (2) ha tautolu a kautu he kumikumi, mo e (3) aga taute mafola ha tautolu ko e tau tagata gahua helehele.
Fakafano Atu mo Tau Tagata Gahua Helehele
3. Ko e heigoa ne moua ai he tau tutaki fakamua ha Iesu e fiafia?
3 Ko e hiki ha ia he tau momoui he tau tagata gahua helehele fakamua atu—mua atu ke he tau tutaki 11 ha Iesu—he aho 33 V.N. he magaaho ne o a lautolu ke he mouga ko Kalilaia ke feleveia mo e Keriso ne liu tu mai! (Mataio 28:16) Liga ‘tokolima e teau e tau matakainaga’ ne ha ha ai he magaaho ia. (1 Korinito 15:6) Ko e poakiaga ne age e Iesu ki a lautolu kua taogo he tau teliga ha lautolu. Ne pehe a ia ki a lautolu: “Kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu. Ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20) Pete ko e favaleaga mania, ne moua e lautolu e fiafia he gahua helehele he kitia e lautolu e tau fakapotopotoaga he tau tutaki he Keriso kua fakatu he tau matakavi kehekehe. Fai magaaho, “ne fakamatala atu ke he tau tagata oti ke he lalolagi.”—Kolose 1:23; Gahua 1:8; 16:5.
4. I lalo he tau tutuaga fefe ne fakafano atu e tau tutaki he Keriso?
4 He fakapa he fekafekauaga hana i Kalilaia, ne hea e Iesu e tau tutaki 12 mo e fakafano a lautolu ke fakamatala pauaki: “Kua tata mai tuai e kautu he lagi.” (Mataio 10:1-7) Ka ko ia kua “haele fano . . . ke he tau māga [Kalilaia] oti, mo e tau magamotu, kua fakaako ke he tau sunako ha lautolu, mo e fakamatala e vagahau mitaki he kautu, kua fakamalolo foki e ia e tau gagao oti, mo e tau tagata mamahi oti he motu.” Ne fakaalofa a Iesu ke he moto tagata “ne fakafita a lautolu, mo e tiaki atu ai, tuga e tau mamoe nakai fai leveki a lautolu.” (Mataio 9:35, 36) Kua momoko lahi, ne tala age a ia ke he tau tutaki hana: “Kua loga e tau saito ke helehele, ka ko e tau tagata gahua, kua tokogaogao a lautolu. Ko e mena ia, kia olelalo atu ai a mutolu ke he Iki hana e tau saito ke helehele [ko Iehova ko e Atua], kia fakafano mai e ia e falu ke gahua ke he tau saito hana ke helehele.” (Mataio 9:37, 38) Kua tatai e fuafuaaga ha Iesu ke he manako ma e tau tagata gahua helehele i Iutaia he ono ni e mahina ne toe he fekafekauaga hana. (Luka 10:2) He tau magaaho ua ia, ne fakafano e ia e tau tutaki hana mo tau tagata gahua helehele.—Mataio 10:5; Luka 10:3.
Ha Tautolu a Fekau he Amaamanakiaga
5. Ko e heigoa e fekau ne fakapuloa e tautolu?
5 Ko e tau fekafekau ha Iehova he vaha fou nei, kua fiafia a tautolu ke tali e poakiaga ma e tau tagata gahua helehele. Taha puhala ne lafi mahaki ke he fiafia ha tautolu he kua uta e tautolu e fekau he amaamanakiaga ke he tau titagata mo e tau tagata holoilalo. Ke tuga e tau tutaki he senetenari fakamua ha Iesu, ko e kotofaaga ha ia ha tautolu ke fakamatala e tala mitaki—ko e fekau moli he amaamanakiaga—ki a lautolu ne ‘fakafita mo e tiaki tuga e tau mamoe nakai fai leveki’!
6. Ko e heigoa e gahua ne fakafita e tau aposetolo ki ai he senetenari fakamua?
6 He lotouho he senetenari fakamua, nukua lavelave e aposetolo ko Paulo he fakamatala e tala mitaki. Ti kua lauia mitaki foki e gahua helehele hana, ha kua tohia ke he tau Kerisiano i Korinito he kavi he 55 V.N., ne pehe a ia: “Ko e tau matakainaga na e, kua fakailoa atu e au kia mutolu e vagahau mitaki ne fakamatala atu ai au kia mutolu, ne talia ai foki e mutolu, kua tumau foki a mutolu ki ai.” (1 Korinito 15:1) Ko e tau aposetolo mo e falu Kerisiano fakamua atu kua makutu lahi ke he gahua helehele. Pete he nakai talahau he Tohi Tapu ki a tautolu ko e fiha e aposetolo ne moui he magahala he tau mena tutupu lalahi ne fakahiku he fakaotiaga ha Ierusalema he 70 V.N., ne iloa e tautolu kua fakamatala agaia e aposetolo ko Ioane ke kavi 25 e tau he mole.—Fakakiteaga 1:9.
7, 8. Ko e heigoa e fekau he amaamanakiaga ne fa e fakapuloa fakamafiti lahi he tau fekafekau a Iehova he mogonei?
7 Ati hoko mai e tau senetenari ne pule e tau akoako Kerisitenitome, ko e “tagata [tiaki taofiaga] he hala.” (2 Tesalonia 2:3) Ka e, he fakahikuaga he senetenari ke 19 aki, ko lautolu ne kumi ke fakatatai e tau momoui ha lautolu ke he puhala Kerisiano fakamua, kua oma e lautolu e fekau he amaamanakiaga, he fakapuloa e Kautu. Ti tali mai he fufuta fakamua (Iulai 1879), ne putoia ke he mataulu he mekasini nei e tau kupu “Fakapuloaaga he Ha Ha Hinei he Keriso,” “Fakapuloa he Kautu he Keriso,” po ke “Fakapuloaaga he Kautu a Iehova.”
8 Nukua fakatu e Kautu he lagi he Atua he tau lima ha Iesu Keriso he 1914, ti he mogonei kua mafiti lahi e fakapuloaaga ha tautolu he fekau he amaamanakiaga ke he vaha ia. Ko e ha? Ha kua fakalataha ke he tau monuina he pule Kautu, ko e fakaotiotiaga hane tatali ke he fakatokaaga kelea he vaha nei. (Tanielu 2:44) Ko e heigoa e fekau mitaki ne ha ha ai foki? Mo e fai fiafia lahi foki kia ne moua e tautolu he fakalataha ke he fakapuloaaga he Kautu ato hoko e ‘matematekelea lahi’?—Mataio 24:21; Mareko 13:10.
Ko e Kumikumiaga Kautu
9. Ko e heigoa e fakaakoaga ne foaki e Iesu ke he tau tutaki hana, mo e fefe e tau tagata ke he fekau he Kautu?
9 Taha puhala foki ne lafi ke he fiafia ha tautolu ko e tau tagata gahua helehele, ko e kautu ha tautolu he kumi a lautolu nukua eke mo tau tutaki mo e fakalataha mai mo tautolu ke he gahua helehele. He 31-32 V.N., ne hataki e Iesu e tau tutaki hana: “Ko e māga, po ke magamotu ke hohoko atu a mutolu ki ai, kia hūhū po ko hai ha i ai kua lata.” (Mataio 10:11) Nakai lata e tau tagata oti, tuga ne fakakite he tali ha lautolu ke he fekau he Kautu. Pete he pihia, ne fakamakamaka e tau tutaki ha Iesu ke fakamatala e tala mitaki ke he ha matakavi ni ne ha ha ai e tau tagata.
10. Tutuli fefe e Paulo e kumikumi hana ki a lautolu ne kua lata?
10 He mole e matulei mo e liu tu mai ha Iesu, ne au atu e malolo ke kumi a lautolu ne lata. Ne tutala a Paulo ke he tau Iutaia he tau sunako ha lautolu mo e ke he tau tagata ne ha ha ai he male i Atenai. He fakamatala a ia he Areopako he maga i Heleni, “kua pipiki mai e falu a tagata kia ia, mo e tua; ha i ai a Taionesio ko e tagata Areopako, mo e fifine kua higoa ko Tamari, mo e falu foki fakalataha mo laua.” Ke he ha mena ni ne fano ki ai a Paulo, kua talahaua mitaki a ia he fakamatala ‘ki mua he tau tagata he taha fale mo e taha fale.’—Gahua 17:17, 34; 20:20.
11. Ko e heigoa e tau puhala he fekafekauaga ne fakaaoga he tau tau i tuai?
11 He magahala fakahiku he tau hogofulu tau he senetenari ke 19 aki, ne fakafita fakamakai e tau Kerisiano fakauku he kumi a lautolu ne lata. I loto he vala tala ne mataulu “Fakauku ke Fakamatala,” ne pehe e Zion’s Watch Tower ia Iulai/Aokuso1881: “Ko e fakamatala he tala mitaki . . . kua fakahako atu ‘ke he tau tagata mahani molu’—ko lautolu ne fakamakai mo e maeke ke logona, ke moua mai ia lautolu e kau ha Keriso, ko e tau hakega fakalataha.” Ne fa mahani e tau tagata gahua helehele he Atua ke fakafeleveia ke he tau tagata ne o mai laia he tapu mo e foaki ki a lautolu e tau tuleke ne tohi ai e tau fekau he Tohi Tapu ne talaga ke fakaalaala aki e tali fiafia ia lautolu ne lata. He mole e manamanatu ke he puhala lauia mitaki nei he fakamatalaaga, ne fakamafana he Watch Tower ia Me 15, 1903, e tau tagata gahua helehele ke tufatufa e tau tuleke “ke he taha fale mo e taha fale, he pale la he tau Aho Tapu.”
12. Kua fakatolomaki fefe e tautolu e lauiaaga mitaki he gahua fakamatala ha tautolu? Fakamaama.
12 He tau tau ne mole laia, ne fakalaulahi e tautolu e fekafekauaga ha tautolu he tutala ke he tau tagata he tau matakavi kehe mai he tau kaina ha lautolu. Nukua lauia mitaki e puhala nei ke he tau motu ne uta he tau tutuaga tupe mo e he tau matagahua okioki e tau tagata mai he tau kaina ha lautolu he magaaho ne fa mahani a tautolu ke aahi atu. He kitia he taha Fakamoli i Igilani mo e hoa hana e tau tagata ahiahi ne liliu tumau he pasi he mole e fiafia ke he fahi tahi, ne fakamalolo a laua ke o ke he tau pasi mo e foaki e tau lagaki he The Watchtower mo e Awake! ke he tau tagata i loto. Ti he taha ni e mahina, ne tufatufa e laua 229 e lagaki. Ne hokotaki e laua: “Ne nakai matakutaku a maua ke fakamatala he fahi tahi, he matakavi pisinisi, po ke ha paleko foki ka fehagai mo maua ha kua iloa e maua kua haia tumau a Iehova mo maua.” Ne fakatu e laua e fakaholoaga mekasini, ti kamata ai e fakaakoaga Tohi Tapu, mo e fakalataha tokoua a laua ke he fekafekauaga paionia fakaku.
13. Ko e heigoa e hikiaga he fekafekauaga ha tautolu ne taute he mogonei ke he falu a matakavi?
13 He fakatumau ke kumi a lautolu ne lata, liga mitaki ke fuafua fakaeneene e fekafekauaga ha tautolu he falu a matakavi. Pete he tokologa e Tau Fakamoli ne mahani ke fakamatala he taha fale ke he taha fale he tau pogipogi Tapu, ka he falu matakavi ne mailoga e lautolu kua nakai mitaki lahi ka o tuai a lautolu ke he tau kaina he tau tagata ha kua momohe agaia e tau tagata. He hiki e tau setulu ha lautolu, tokologa e Tau Fakamoli he mogonei ne kumikumi he fakahiku he aho, liga he mole e feleveiaaga Kerisiano. Mo e kua fua mitaki moli e kumikumi nei. Ko e numera he tau tagata fakapuloa he Kautu he tau kua mole kua malikiti ke 2.3 e pasene. Kua fakamatalahi he mena nei e Iki he heleheleaga mo e ta mai e fiafia ke he tau loto ha tautolu.
Fakatumau e Mafola he Gahua Helehele ha Tautolu
14. Ko e heigoa e aga he foaki e tautolu e fekau ha tautolu, mo e ko e ha?
14 Taha kakano ma e fiafia ha tautolu nukua matutaki ke he aga taute mafola ne fakakite e tautolu he gahua helehele. “Ka hūhū atu a mutolu ke he taha magafaoa,” he tala age e Iesu, “kia fakaalofa atu a mutolu ki ai. Kaeke foki kua lata e magafaoa ia, to hoko atu ki ai ha mutolu a fakamonuina.” (Mataio 10:12, 13) Ko e fakafeleveiaaga faka-Heperu mo e kupu Heleni he Tohi Tapu kua tatai e tau kakano ‘Kia monuina a koe.’ Kua takitaki he manatu nei e fakafehagaiaga ha tautolu mo e tau tagata he magaaho ka fakamatala e tautolu e tala mitaki. Ko e amaamanakiaga ha tautolu ke tali mitaki a lautolu ke he fekau he Kautu. Ma lautolu ne tali fiafia, kua ha ha ai e amaamanakiaga ke fakafeilo mo e Atua he tokihala a lautolu he tau hala ha lautolu, liu tua, mo e taute e finagalo hana. Ko e mena ka moua, to takitaki atu e mafola mo e Atua ke he moui tukulagi.—Ioane 17:3; Gahua 3:19; 13:38, 48; 2 Korinito 5:18-20.
15. Maeke fefe ia tautolu ke fakatumau e aga mafola he magaaho ka feleveia mo e aga vale he gahua fakamatala ha tautolu?
15 Maeke fefe a tautolu ke fakatumau e mafola ha tautolu he magaaho ka nakai mitaki e tali mai? Ne hataki e Iesu: “Kaeke foki kua nakai lata [e magafaoa], ti liliu mai ai kia mutolu ha mutolu a fakamonuina.” (Mataio 10:13) Ko e fakamauaga ha Luka ke fakafano e tau tutaki 70 kua putoia ki ai e talahauaga ha Iesu: “Kaeke ko e tagata he monuina ha i ai, to hoko kia ia ha mutolu a fakamonuina; ka nakai, ti liuaki mai ai kia mutolu.” (Luka 10:6) He fakamatala e tautolu e tala mitaki ke he tau tagata, kua taute e tautolu aki e aga fiafia mo e mafola. Ko e tali fakahanoa, ko e gugu, po ke tali nakai totonu he tagata he fale kua taute ni ke ‘liuaki mai ki a tautolu’ e fekau mafola ha tautolu. Ka e nakai uta kehe he tau mena nei mai ia tautolu e mafola, ko e fua he agaga tapu ha Iehova.—Kalatia 5:22, 23.
Ko e Foliaga Mitaki ma e Tau Tagata Gahua Helehele
16, 17. (a) Ko e heigoa e foliaga ha tautolu ka taute e tau aahi atu? (e) Lagomatai fefe e tautolu a lautolu ne fai huhu faka-Tohi Tapu?
16 Ko e tau tagata gahua helehele kua fiafia lahi a tautolu ke fai vala he fakapotopoto mai e tau tagata ma e moui tukulagi. Mo e fiafia ha ia ha tautolu kaeke ko e tagata ne fakamatala a tautolu ki ai kua tali fiafia mai, manako ke fai mena foki ka iloa, mo e eke mo “tagata he monuina”! Liga loga e tau huhu faka-Tohi Tapu hana mo e nakai maeke ia tautolu ke tali oti e tau huhu ia he aahi atu fakamua. Ha kua liga nakai mitaki ke nofo loa he aahi fakamua, ko e heigoa kua lata ke taute? Maeke ia tautolu ke fai foliaga foki tuga ne fakamafana mai he 60 e tau kua mole.
17 “Kua lata e Tau Fakamoli a Iehova ke mautauteute ke takitaki e tau fakaakoaga he Tohi Tapu.” Ko e talahauaga ia kua toka i loto he tohi tolu he tau tohi fakaako ikiiki Model Study ne lomi fakailoa mai he 1937 ke he 1941. Ne fakaholo ke talahau: “Kua lata e tau tagata fakapuloa oti [he Kautu] ke fakalotomatala he lagomatai e tau tagata loto fiafia ne fakakite e fiafia ke he fekau he Kautu, ke he tau puhala oti nukua fahia ki ai. Kua lata ke taute e tau liliu aahi atu ke he tau tagata nei, tali e tau huhu kehekehe . . . , ti kamata agataha mogoia e fakaakoaga.” E, ko e foliaga ha tautolu he taute e tau liliu aahi atu ke kamata e fakaakoaga Tohi Tapu he kaina mo e takitaki tumau ai foki. * Kua omoi he aga fakakapitiga mo e tupetupe fakaalofa ma e tagata fiafia a tautolu ke tauteute mo e takitaki fakamitaki e fakaakoaga.
18. Lagomatai fefe e tautolu a lautolu ne fou ke eke mo tau tutaki ha Iesu Keriso?
18 Mo e lagomatai he tohi Iloilo ne Takitaki Atu ke he Moui Tukulagi mo e tau porosua tuga e Ko e Heigoa e Manako he Atua ma Tautolu?, kua maeke ia tautolu ke takitaki e tau fakaako Tohi Tapu he kaina mo e fakalataha ke lagomatai a lautolu ne fiafia fou ke eke mo tau tutaki. He fakatumau a tautolu ke fifitaki e Faiaoga ne Mua, ko Iesu Keriso, liga foki ni to ako foki e tau tagata fakaako Tohi Tapu pihia ha ko e aga mafola mo e olioli ha tautolu, ha tautolu a mahani fakamoli, mo e fakalilifu ha tautolu ma e tau tutuaga mo e tau takitakiaga ha Iehova. He lagomatai e tautolu he tali e tau huhu ha lautolu ne fou, kia lagomatai foki e tautolu a lautolu ke tali ni e lautolu e tau huhu he falu ki a lautolu. (2 Timoteo 2:1, 2; 1 Peteru 2:21) Ko e tau tagata gahua helehele saito fakatai, kua olioli moli a tautolu ha kua takitaki fakaavelesi 4,766,631 e tau fakaako Tohi Tapu he kaina ke he lalolagi katoa he tau fekafekau nei kua mole. Kua mua atu e olioli kaeke auloa a tautolu mo e tau tagata gahua helehele ne fai vala ke he gahua fakaako Tohi Tapu he kaina.
Kia Fakatumau ke Olioli ke he Heleheleaga
19. Ko e ha ne ha ha ai e tau kakano mitaki ke fiafia he heleheleaga he magahala he fekafekauaga ha Iesu mo e he mole fakatote atu?
19 Ha i ai e tau kakano mitaki ke fiafia he heleheleaga he magahala he fekafekauaga ha Iesu mo e he mole fakatote atu. Tokologa ne tali fiafia he mogoia ke he tala mitaki. Kua mahomo ki mua e olioli he Penetekoso 33 F.V., ha kua kavi 3,000 ne tali ke he fakatonutonuaga ha Peteru he mogoia, moua e agaga tapu ha Iehova, ti eke mo vala he motu ko Isaraela fakaagaga he Atua. Moli, kua tolomaki ki luga e numera ha lautolu, mo e lahi mahaki e olioli he “lafilafi he Iki ke he ekalesia ke he taha aho mo e taha aho a lautolu kua fakamomoui.”—Gahua 2:37-41, 46, 47; Kalatia 6:16; 1 Peteru 2:9.
20. Ko e heigoa ne ta mai e fiafia mahaki ke he gahua helehele ha tautolu?
20 He magaaho ia, ne kitia moli ai e perofetaaga ha Isaia: “Kua fakatokologa e koe [Iehova] e motu kua fakalahi ai e koe ha lautolu a fiafia, kua fiafia a lautolu ki mua hāu, tuga ne fiafia ka helehele ai e saito, ke tuga ne olioli ai a lautolu kua tufatufa e tau mena ne fofo he tau.” (Isaia 9:3) Pete kua kitia e tautolu he mogonei hane teitei katoatoa e “motu kua fakalahi” ha lautolu ne fakauku, kua olioli lahi a tautolu he mailoga e tautolu e numera he falu tagata gahua helehele nukua tupu ki mua he tau tau oti.—Salamo 4:7; Sakaria 8:23; Ioane 10:16.
21. Ko e heigoa ka tutala ki ai a tautolu he vala tala ka mui mai?
21 Kua ha ha moli ia tautolu e kakano mitaki ke fakatumau ke olioli he gahua helehele. Ko e ha tautolu a fekau he amaamanakiaga, ha tautolu a kumikumi ki a lautolu kua lata, mo e aga taute mafola ha tautolu—ko e tau mena oti nei kua ta mai e fiafia ki a tautolu ko e tau tagata gahua helehele. Pete ia, kua moua e lautolu e aga vale mai he tokologa. Ne hoko e mena nei ke he aposetolo ko Ioane. Ne fakapagota a ia he motu ko Patamo “ha ko e kupu he Atua, mo e talahauaga kia Iesu Keriso.” (Fakakiteaga 1:9) Maeke fefe, mogoia, ia tautolu ke fakatumau e fiafia ha tautolu ka fehagai mo e favale mo e totokoaga? Ko e heigoa ka lagomatai a tautolu ke fahia ke he aga mao niniva he tokologa ne fa e fakamatala a tautolu ki ai? To foaki he vala tala ka mui mai e lagomatai faka-Tohiaaga Tapu ke tali e tau huhu nei.
[Matahui Tala]
^ para. 17 Fakamua ne fakatokatoka e tau fakaakoaga he tau matakavi ne tolo ki ai e matakau tagata ne fiafia mai. Ka e nakai leva, kua takitaki foki e tau fakaakoaga mo e tau tagata takitokotaha mo e tau magafaoa.—Kikite Jehovah’s Witnesses—Proclaimers of God’s Kingdom, lau 574, lomi fakailoa he Tau Fakamoli a Iehova.
To Tali Fefe e Koe?
• Ko e heigoa e gahua helehele saito fakatai?
• Ko e fekau fe ne fakapuloa e tautolu?
• Ko e ha ne kautu e kumi tutaki ha tautolu?
• Fakatumau fefe e tautolu e mafola he gahua helehele?
• Ko e ha ne fakatumau a tautolu ke olioli he heleheleaga?
[Tau Huhu he Fakaakoaga]
[Tau Fakatino he lau 8, 9]
Fakamatala he senetenari ke 1 aki mo e ke 20 aki
[Tau Fakatino he lau 9]
Tuga a Paulo, kua lali e tau tagata gahua helehele he vaha fou nei ke hokotia ke he tau tagata he tau matakavi oti
[Fakatino he lau 9]
Fakapuloa e tala mitaki mo e aga fifia