Tonuhia Hau Ke Talitonu

Liga uho ki a koe e tonuhia hau ke talitonu ke he ha mena kua manako a koe ke talia. Ti pihia foki e laulahi he tau tagata. He fakagahua e tonuhia nei, ko e ono e piliona he tau tagata he lalolagi ne moua e tau talitonu kehekehe ofoofogia. Tuga e kehekehe he tau lanu, lahi, talagaaga, kamata, hohogo, mo e leo kua moua e tautolu he tufugatiaaga, ko e tau talitonu kehekehe kua lafi ki ai e manako, fiafia, mo e olioli he moui. Ko e kehekeheaga pihia, moli, ke fiofio aki e moui.—Salamo 104:24.

KA E lata ke fakaeneene. Ko e falu talitonu nakai ni kehe ka e hagahaga kelea foki. He mataulu he senetenari 20 aki, ma e fakatai, ne talitonu falu tagata ko e tau Iutaia mo e tau Freemason ne pulega ke “moumou e holoaga mitaki faka-Kerisiano mo e fakatu e fakatufono he lalolagi i lalo he pule kaufakalataha ha laua.” Ko e taha punaaga he talitonu nei ko e tuleke totoko faka-Semite ne mataulu Protocols of the Learned Elders of Zion. Ne totoku he tuleke e tau pulega ia fakalataha mo e tau tukuhau lalahi, fakatolomaki e tauteaga he tau kanavaakau tau, fakamalolo e pule ke he falu pisinisi ke maeke he ‘mautu he tau Motu Kehe ke malona mafiti.’ Kua putoia foki e tau fakatokaaga he fakaako ke maeke ke ‘fuluhi e tau Tagata Motu Kehe ke manamanatu manu,’ ti talaga foki e tau hala lelue hala kelekele ke matutaki mo e tau taone lalahi ke maeke he tau motua Iutaia ke fakamate ha tagata totoko he utakehe a lautolu.’

Ko e tau mena nei moli, ko e tau pikopiko—ne talaga ke hokoti e tau logonaaga faka-Semiti totoko. ‘Ko e tala fakavai nei,’ he talahau e Mark Jones he British Museum, ‘ne holofa mai i Rusia,’ ne tohia fakamua i ai he vala tala nusipepa he 1903. Ne lolomi he The Times i London ia Me 8, 1920. Taha e tau he mole, ne fakatapakupaku he The Times e tala kua nakai moli. He magaaho ia, ne fita he tupu e hagahagakelea. ‘Tau pikopiko tuga anei,’ he talahau e Jones, ‘kua uka ke ufiufi.’ Ka talia he tau tagata, ne taute e lautolu falu talitonuaga fakafualoto, kona, mo e hagahagakelea—fa mahani ke fua malaia, tuga he fakakite he fakamauaga tala he senetenari 20 aki.—Tau Fakatai 6:16-19.

Talitonu ke he Kupu Moli

Moli, nakai ko e tau pikopiko pauaki ke fakatolomaki e tau talitonu hehe. He tau magaaho, kua nakai maama e tautolu e tau manatu. Tokofiha e tagata kua feleveia e mate fakaofo he taute e mena ne talitonu a lautolu kua nakai hako? Pihia foki, kua fa talitonu a tautolu ke he manatu ha kua manako a tautolu ke talitonu ki ai. Talahau ai he taha porofesa ko e tau saienetisi foki “fa matalahi ke he tau iloaaga ha lautolu.” Kua ufitia he tau talitonu  ha lautolu e fakafiliaga uka ha lautolu. Ti liga fakaaoga e lautolu e moui katoa he lali teao ke lalago e tau talitonu hehe.—Ieremia 17:9.

Tau mena taha ia ne tupu ke he tau talitonu fakalotu—nukua tupu ai e tau fekehekeheaki lalahi. (1 Timoteo 4:1; 2 Timoteo 4:3, 4) Taha e tagata kua tua malolo ke he Atua. Talahau ai he taha ko e tagata kua “moua ni e tua mai he tau ata noa.” Kua talia he taha kua moua e koe e solu nakai mate ne hao mai he mate. Ko e taha talitonu ka mate a koe kua nakai maeke tuai a koe ke moui. Maali ai, ko e tau talitonu nakai tatai pehenei kua nakai moli tumau. Nakai kia pulotu mogoia, ke iloa moli, kua molioli e mena kua talitonu a koe ki ai ti nakai ko e manako noa hau ke talitonu ai? (Tau Fakatai 1:5) Taute fefe e koe e mena ia? Ko e vala tala ka mui mai ka kumikumi e matakupu nei ki ai.

[Fakatino he lau 3]

He 1921 e tuleke totoko “Protocols of the Learned Elders of Zion”