Kua Fakaako Mai he Pama

“KUA TUPU tokoluga hake mo e fakafuluola.” Ko e talahauaga a ia ke he pama vine he taha enesaikolopetia Tohi Tapu. Ha i ai he tau vaha Tohi Tapu mo e vaha nei, ne fakamanaia he tau pama vine e Vailele Naila ki Aikupito, mo e fakamalu fakahauhau ai e lautolu e tau vaipuna ha ha ia he Negeb Desert.

Tuga foki ke he falu faga pama, ne tu tokoluga hake e pama vine. Tutupu loloa hake e falu ke 30 mita ti fua ke 150 e tau tau. E, ko e pama vine nakai ni kua mitaki he kitia ka e fua olaola mitaki foki. He tau tau takitaha ne fua mai e tau fuhi vine. Moua mai he taha fuhi molea atu ke 1,000 e tau fua vine. Ke he tau fua vine, kua tohia e tagata iloilo: “Ko lautolu . . . ne iloa noa e fua vine mai he faga fua pakupaku ha ha he fale koloa, ne felega e humelie ka kai he mogo tau fou.”

Ko e mena ia, ne fakatai he Tohi Tapu e falu tagata ke he tau pama. Ke moua e tuaga mitaki ki mua he Atua, tuga e pama ne fua mitaki, lata ai e tagata ke mahani tututonu mo e tumau ke taute e tau fua mitaki. (Mataio 7:17-20) Ko e kakano ia, ne ta e tau fakatino he tau pama ke fakamanaia aki e faituga ha Solomona mo e faituga he fakakiteaga ha Esekielu. (1 Patuiki 6:29, 32, 35; Esekielu 40:14-16, 20, 22) Haia, ke talia he Atua e tapuakiaga he tagata, lata lahi ia ia ke ha ha i ai e tupuaga mitaki tuga e pama vine. Ne fakamaama mai he Kupu he Atua: “To tupu hake e tagata tututonu tuga ne pama.”—Salamo 92:12.