Lagomatai Fefe e Koe e Tama “Moumou Koloa”?
Lagomatai Fefe e Koe e Tama “Moumou Koloa”?
“Kolikoli a . . . ne galo foki a ia, ka kua moua.”—LUKA 15:32.
1, 2. (a) Tali atu fefe e falu fanau ikiiki ke he kupu moli faka-Kerisiano? (e) Liga fefe e logonaaga he tau matua mo e tau fanau ke he tuaga ia?
“TIAKI fai e au e kupu moli!” Ko e ofo ha ia ke he tau matua matakutaku Atua ne lali fakalahi ke feaki hake e tau fanau ha lautolu ke he puhala Kerisiano ke logona e tau kupu nei mai he tama! Kua “tafia kehe” falu fuata ka e nakai talahau e tau manatu ha lautolu. (Heperu 2:1) Tokologa ia lautolu nei kua tatai ke he tama tane moumou koloa he fakatai ha Iesu, ne toka e ia e fale he matua tane hana mo e moumou ai hana tufaaga he motu mamao.—Luka 15:11-16.
2 Pete tokologa he Tau Fakamoli a Iehova ne nakai moua e lekua nei, ma lautolu kua moua, nakai fai kupu mafanatia ke utakehe katoatoa e maanu ha lautolu. Ti nakai fakaheu e nakai fiafia ka moua e ia ni ko e fuata liuliu. He hana loto, kua tupetupe e loto manamanatu hana. He fakatai a Iesu, kua fakahiku e tama moumou koloa ke “matala ai hana loto,” nukua olioli ai hana matua tane. Lagomatai fefe he tau matua mo e falu he fakapotopotoaga a lautolu kua fakahanoa ke ‘matala ha lautolu a tau loto.’—Luka 15:17.
Kakano kua Tiaki he Falu e Kupu Moli
3. Ko e heigoa falu kakano ne fifili ai a lautolu kua ikiiki ke toka e fakapotopotoaga Kerisiano?
3 Totou teau afe a lautolu kua ikiiki hane fekafekau fiafia ki a Iehova he fakapotopotoaga Kerisiano. Ka ko e ha kua tiaki ai he falu fanau ikiiki? Kua liga logona e lautolu kua to noa a lautolu ke he tau mena ne foaki he lalolagi. (2 Timoteo 4:10) Po kua manamanatu a lautolu kua puipui kaka e fakatokatokaaga ha Iehova. Ko e loto agahala, ko e manako malolo ke he tagata tino kehe, po ke manako ke talia he tau kapitiga kua fakatupu foki e fuata mui ke tafia kehe mai he fuifui a Iehova. Kua liga fakaoti he fuata e fekafekauaga ke he Atua ha kua liga fakatupua e tau mahani he tau matua po ke falu Kerisiano.
4. Ko e heigoa e kamataaga ne tafia kehe a lautolu ne ikiiki?
4 Ko e aga mo e mahani totoko he tama ko e tau fakamailoga he mahani lolelole fakaagaga, ko e tau fakakiteaga he mena kua toka he loto hana. (Tau Fakatai 15:13; Mataio 12:34) Ko e ha kakano ni kua tafia kehe e fuata, ko e vaka he lekua kua fa fakave ke he hana nakai fai “maama mitaki he kupu moli.” (2 Timoteo 3:7) He nakai tapuaki teao noa ni ki a Iehova, nukua aoga lahi ki a lautolu ke feaki e fakafetuiaga tata fakatagata mo ia. Ko e heigoa ka lagomatai a lautolu ke taute pihia?
Fakatata Atu ke he Atua
5. Ko e heigoa kua latatonu ma e tagata fuata ke feaki e fakafetuiaga fakatagata mo e Atua?
5 ‘Fakatata atu ke he Atua,’ he tohi he tutaki ko Iakopo, “ti fakatata mai ai a ia kia mutolu.” (Iakopo 4:8) Ke taute pihia, kua lata e tagata fuata mui ke lagomatai ke feaki e manako ma e Kupu he Atua. (Salamo 34:8) Kamata aki ke lata a ia mo e “huhu”—ko e tau matapatu fakaakoaga he Tohi Tapu. Ka e he fiafia a ia ke he Kupu he Atua mo e manako lahi ma e “tau mena kakano”—tau vala tala fakaagaga hokulo—to tata lahi a ia ke he motua fakaagaga. (Heperu 5:11-14; Salamo 1:2) Ne talahau he fuata kua hufia lahi a ia ke he puhala he lalolagi nukua kamata ke ofania e tau aoga fakaagaga. Ko e heigoa ne lagomatai a ia ke fuluhi kehe mai ai? He talia ke he lagomataiaga ke totou e Tohi Tapu katoa, ne fakatumau a ia ke he setulu totou Tohi Tapu tumau. E, ko e totou tumau he Kupu he Atua kua aoga ma e feakiaga he pipiaga tata mo Iehova.
6, 7. Lagomatai fefe he tau matua e tau fanau ha lautolu ke feaki e manako ma e Kupu he Atua?
6 Ko e aoga ha ia ma e tau matua ke lagomatai e fanau ha lautolu ke feaki e manako ma e Kupu he Atua! Pete ni e fakaako tumau fakamagafaoa, taha e tama fifine tote ne fio mo e tau tama moumou matafakatufono. Hagaao ke he fakaako fakamagafaoa hana, ne talahau e ia: “Ka huhu he Matua tane e tau huhu, ne talahau ni e au e tau tali, nakai ono ke he fofoga hana.” He nakai taute holo e tohi he fakaakoaga fakamagafaoa, ne fakaaoga he tau matua pulotu e puhala he fakaako atu. (2 Timoteo 4:2) Ma e fuata ke olioli e fakaakoaga, kua lata ia ia ke putoia hana manamanatuaga. Ko e ha he huhu e tau huhu fakalagalaga mo e toka a ia ke talahau hana manatu? Fakamalolo a lautolu ne ikiiki ke taute e tau fakagahuaaga aoga he vala tala kua kumikumi ki ai. *
7 Lafi ki ai, fakaalaala e fakatutalaaga faka-Tohiaga Tapu. Ka latatonu, kia taute e lautolu ne ikiiki e tau mena ne tupu mo e tau taute tala faka-Tohi Tapu. Lagomatai a lautolu ke kitia he loto e matakavi mo e motu ne hohoko ai e tau mena kua fakatutala ki ai. Fakaaoga ai e tau mepe mo e tau fakafonua ke lagomatai aki. E, mo e tokaloto, na maeke e fakaako fakamagafaoa ke fakaalaala mo e fakakehekehe. Kua lata foki he tau matua ke kumikumi e fakafetuiaga ni ha lautolu mo Iehova. He fakatata tumau a lautolu ki a Iehova, maeke ia lautolu ke lagomatai e fanau ke taute pihia.—Teutaronome 6:5-7.
8. Lagomatai fefe he liogi e taha ke fakatata ke he Atua?
8 Lagomatai foki he liogi e tagata ke fakatata ke he Atua. Ko e tama fifine tote ne kapaletu ke he puhala moui Kerisiano mo e feoaki mo e tau kapitiga hana ne nakai fakalataha mo e tau talitonu hana. (Iakopo 4:4) Ko e heigoa ne taute e ia? “Ke he magaaho fakamua la ia,” ne talahau e ia, “ne liogi moli au ki a Iehova hagaao ke he puhala ne logona hifo e au.” Ne fakahiku e ia kua tali tuai e liogi hana he magaaho ne moua fakahiku e ia e kapitiga he fakapotopotoaga Kerisiano nukua maeke ia ia ke tutala ki ai. He logona hifo kua takitaki e Iehova a ia, kua kamata agataha a ia ke ati hake e fakafetuiaga fakatagata mo e Atua. Lagomatai he tau matua e tau fanau ha lautolu he fakatolomaki e fai kakano he tau liogi ha lautolu ni. Ka liogi mo e magafaoa, lata he tau matua ke fakakite katoatoa ha lautolu a tau loto ke maeke he tau fanau ha lautolu ke logona e pipiaga fakatagata he vahaloto he tau matua mo Iehova.
Kia Fakauka ka e Mauokafua
9, 10. Ko e heigoa e fakafifitakiaga ne fakatoka e Iehova he fakamanavalahi ke he tau Isaraela liuliu?
9 Ka kamata e fuata ke tafia kehe, kua lali a ia ke tu tokotaha mo e totoko e tau laliaga mai he hana tau matua ke he fakatutalaaga fakaagaga mo ia. Ko e heigoa mogoia he tau matua ka lali ke taute he tau tutuaga pihia? Manamanatu la ke he mena ne taute e Iehova mo Isaraela i tuai. Ne fakauka a ia ke he tau Isaraela “mao e tau ua” ke molea e 900 tau ato tiaki a lautolu ke he puhala liuliu ha lautolu. (Esoto 34:9; 2 Nofoaga he Tau Patuiki 36:17-21; Roma 10:21) Pete ne liu foki ‘kamatamata e lautolu a ia,’ kua “fakaalofa hofihofi” a Iehova ki a lautolu. “Kua mafoki kehe lagaloga e ia hana ita, nakai fakatupu foki e ia hana ita katoatoa.” (Salamo 78:38-42) Ka e tututonu e Atua he hana tau fehagai mo lautolu. Fifitaki he tau matua fakaalofa a Iehova ti kua fakauka foki ka nakai talia mafiti he tama ha lautolu a tau laliaga ke lagomatai a ia.
10 Ko e fakauka, nakai kakano ke “fakamanava lahi”; ka kua fakakite e matauka ke nakai mahala oti e amanakiaga ke fakamitaki e fakafetuiaga nukua kelea. Ne fakatoka e Iehova e fakafifitakiaga ke he puhala he fakamanavalahi. Ne fakailoilo mua a ia he ‘liu fakafano’ e tau tagata uta fekau ke he tau Isaraela. Ne “fakaalofa a [Iehova] ke he hana motu,” pete ni he “fakafiufiu e lautolu kia lautolu ne fakafano mai he Atua, mo e fakavihia e lautolu hana tau kupu.” (2 Nofoaga he Tau Patuiki 36:15, 16) Ne ole a ia ke he tau Isaraela, pehe: “Kia takitaha a mutolu mo e liu mai he hana puhala kelea.” (Ieremia 25:4, 5) Ka e, nakai fakahui e Iehova hana tau matapatu fakaakoaga. Ne fakaako e tau Isaraela ke “liu mai” ke he Atua mo e ke he hana tau puhala.
11. Fakamanavalahi fefe e tau matua ka e mauokafua he fehagai mo e tama liliu kehe?
11 Fifitaki he tau matua a Iehova he fakamanavalahi he nakai mafiti ke tiaki e tama liuliu. He nakai galo e amaamanakiaga, maeke ia lautolu ke fakailoilo mua ke hafagi e matutakiaga mitaki po ke liu ati hake e matutakiaga. He pipiki mau ke he tau matapatu fakaakoaga, maeke ia lautolu ke “liu foki” ole ke he tama ke liu mai ke he puhala he kupu moli.
Ka Tuku ki Tua e Tama
12. Ko e heigoa e matagahua he tau matua ke he tama kua nofo mo laua ka e tuku kehe mai he fakapotopotoaga?
12 Ka e kua ka nofo e tama mo e tau matua hana ne putoia he mahani kelea muikau ti ko e aga nakai tokihala hana ati tuku kehe mai he fakapotopotoaga? Ha kua nofo e tama mo e hana tau matua, kua fakalago agaia ki a laua ke fakaako mo e akonaki a ia lagotatai mo e Kupu he Atua. Maeke fefe e mena nei ke taute?—Tau Fakatai 6:20-22; 29:17.
13. Lali fefe e tau matua ke hokotia ke he tau loto he fanau liuliu?
13 Liga lata—moli, to mitaki lahi—ke taute e tau fakaakoaga mo e akonakiaga pihia he fakaako mo ia tokotaha ke he Tohi Tapu. Kua lata e matua ke nakai fakafili e aga kafilo he tama mo e lali ke kitia e mena he hana loto. Ko e heigoa e mailogaaga katoatoa he hana gagao fakaagaga? (Tau Fakatai 20:5) Maeke nakai ke hokotia ke he vala tetotonu he hana loto? Ko e heigoa e tau kupu tohi ka fakaaoga fakalahi? Kua fakamafana mai he aposetolo ko Paulo: “Ko e kupu he Atua kua moui ia, mo e gahua malolo, kua mua foki hana matila ke he tau pelu oti kana kua matila fakafahiua, kua tuina foki ato vevehe tuai ai e loto mo e agaga, ko e tau fatia mo e tau uho hui, kua fakafili foki e tau manatu mo e tau fakafiliaga he tau loto.” (Heperu 4:12) E, lahi atu e mena kua lata ke taute he tau matua he nakai ni tala age ke he tama ha laua ke nakai liu putoia he taute mena kelea. Lali a laua ke kamata mo e tuafu e puhala fakamalolo.
14. Ko e heigoa e lakaaga fakamua ka taute he fuata hepehepe ke liuaki mai hana fakafetuiaga mo Iehova, ti lagomatai fefe he tau matua e tama ke taute e lakaaga ia?
14 Kua lata e fuata hepehepe ke liuaki mai hana fakafetuiaga mo Iehova. Ko e lakaaga fakamua kua lata ia ia ke taute ko e “tokihala . . . mo e mafokifoki.” (Gahua 3:19; Isaia 55:6, 7) He lagomatai e fuata he kaina ha lautolu ke tokihala, kua lata e tau matua ke ‘nakai taufetoko, kia akonaki atu mo e mahani molu’ ke he tama kua totoko mai. (2 Timoteo 2:24-26) Kua lata a lautolu ke “akonaki” a ia ke he puhala faka-Tohi Tapu. Ko e kupu Heleni ne talahau “akonaki” kua maeke foki ke fakaliliu “fakailoa atu.” (Fakakiteaga 3:19; Ioane 16:8) Ke akonaki, mogoia, kua putoia ai e fakakite he fakamoliaga lahi ke liliuina e tama agahala he hana puhala. Ke talahau ai, he taute pihia kua nakai mukamuka. Ka maeke he tau matua ke hokotia ke he hana loto, he fakaaoga e tau puhala kua latatonu faka-Tohi Tapu ke liliuina aki a ia. Kua lata ia lautolu ke lali ke lagomatai a ia ke maama e tonu he ‘fakavihia e kelea, ka e manako ke he mitaki.’ (Amosa 5:15) Neke liu a ia ‘ala mai he hele he tiapolo.’
15. Ko e heigoa e matagahua he liogi kua taute ke liuaki mai e fakafetuiaga hana ne hepehepe mo Iehova?
15 Ke liuaki mai e fakafetuiaga he tagata mo Iehova, kua latatonu e liogi. Moli, nakai fai tagata kua lata ke “ole atu” hagaao ke he agahala muikau nukua maaliali ke taute ka e nakai tokihala e ia ne fakalataha he taha magahala mo e fakapotopotoaga Kerisiano. (1 Ioane 5:16, 17; Ieremia 7:16-20; Heperu 10:26, 27) Ka e, maeke he tau matua ke ole ki a Iehova ke foaki age ki a lautolu e pulotu ke fehagai mo e tuaga. (Iakopo 1:5) Kaeke ke fakakite he fuata tuku ki tua e fakatokihala ka e nakai moua e “fakamalolo ki mua he Atua,” kia liga liogi e tau matua kaeke ke moua he Atua e fakaveaga ma e fakamagaloaga ke he hehe he tama, ke fakahoko Hana finagalo. (1 Ioane 3:21) He logona ai e tau liogi nei kua lata ke lagomatai e fuata ke kitia a Iehova ko e Atua fakaalofa hofihofi. *—Esoto 34:6, 7; Iakopo 5:16.
16. Lagomatai fefe e tautolu e tau tagata he magafaoa he tau fanau kua tuku ki tua?
16 Kaeke ke tuku ki tua e fuata papatiso, amanaki ke he tau tagata he fakapotopotoaga ke “aua neke feoaki” mo ia. (1 Korinito 5:11; 2 Ioane 10, 11) Fakahiku ai e mena nei ke lagomatai a ia ke “matala ai hana loto” ti liu mai ke he lotopa puipui he Atua. (Luka 15:17) He liu mai a ia po ke nakai, kia fakamalolo he tau tagata he fakapotopotoaga e magafaoa he fuata ne tuku ki tua. Igatia a tautolu mo e kumi ma e tau puhala ke fakakite e “feofanaki” mo e ke “hofihofi noa e fakaalofa” ki a lautolu.—1 Peteru 3:8, 9.
Puhala ke Lagomatai he Falu
17. Ko e heigoa kua lata he tau tagata he fakapotopotoaga ke manatu ka lali ke lagomatai e tama tafia kehe?
17 Ka e kua e fuata kua nakai tuku ki tua he fakapotopotoaga Kerisiano ka e lolelole e tua? “Kaeke foki ke mamahi e taha fahi tino,” he tohi he aposetolo ko Paulo, “ti mamahi fakalataha ai e tau fahi tino oti [mo ia].” (1 Korinito 12:26) Kia malolo e fiafia he falu ke he fuata pihia. Moli, kua lata ke fakaeneene, ha ko e fuata gagao fakaagaga ka fakaohooho kelea e falu fuata ne toe. (Kalatia 5:7-9) He taha fakapotopotoaga, ko e tau fuata manamanatu mitaki ne manako ke lagomatai e falu fuata ne lolelole fakaagaga, ne uiina a lautolu ke he feoakiaga ke fakatagi auloa e tau leo kofe mahuiga. Ha kua talia tuai mo e olioli he tau fuata e tau magaaho pihia, ko e fakaohoohoaga ha lautolu ke he falu kua hiku ai takitaki a lautolu ke fakaoti e feoakiaga mo e fakapotopotoaga. (1 Korinito 15:33; Iuta 22, 23) Ko e mena ka lagomatai e tama gagao fakaagaga, nakai ko e tau fakalatahaaga fakafiafia kua nakai fai takitakiaga fakaagaga, ka ko e feoakiaga kua lagomatai a ia ke feaki e manako ma e tau mena fakaagaga. *
18. Fifitaki fefe e tautolu e aga he matua tane he tama moumou koloa he fakataiaga ha Iesu?
18 Ka eke ke liu mai e fuata ne toka e fakapotopotoaga ke he Fale he Kautu po ke hau ke he toloaga, manamanatu la e puhala kua liga logona hifo e ia. Nakai kia fakakite e tautolu e aga fakafeleveia mitaki he matua tane he tama moumou koloa he fakatai ha Iesu? (Luka 15:18-20, 25-32) Ko e fuata mui ne toka e fakapotopotoaga Kerisiano ti fakahiku hau ke he fonoaga fahimotu ne pehe: “Manatu au to fakaheu he tau tagata oti e tagata tuga au, ka kua o mai e tau matakainaga mo e fakafeleveia mai ki a au. Kua mafanatia lahi au.” Ne kamata a ia ke liu fakaako e Tohi Tapu mo e nakai leva ti papatiso.
Ua Fakalolelole
19, 20. Kua lata he ha ke mauokafua a tautolu ke aga mitaki hagaao ke he fakahanoa?
19 Ko e lagomatai he tama “moumou koloa” ‘ke matala ai hana loto’ kua lata e fakauka mo e ko e paleko ke he tau matua mo e falu. Ka e ua fakalolelole. “Kua nakai mule mai e Iki ke he mena kua talahaua mai, tuga he manatu he falu ke he mule; ka e fakauka mai a ia kia tautolu, he nakai finagalo a ia ke malaia taha, ka kia hohoko oti kana ke he tokihala.” (2 Peteru 3:9) Ha ha ia tautolu e fakamoliaga faka-Tohi Tapu kua manako a Iehova ke he tau tagata ke tokihala ti momoui. Mahomo atu, kua fakailoilo mua a ia ke taute e fakatokatokaaga ke fakafeilo e tau tagata ki a ia. (2 Korinito 5:18, 19) Ko e hana fakauka ne taute ai ke maeke he tau miliona ke matala ai ha lautolu a tau loto.—Isaia 2:2, 3.
20 Nakai kia maeke he tau matua, mogoia, ke fakaaoga e tau puhala faka-Tohiaga Tapu oti ke lagomatai e tama fakahanoa ke matala hana loto? He fifitaki a Iehova, kia fakamanavalahi he taute e koe e tau lakaaga ke lagomatai e tama hau ke liu mai ki a Iehova. Pipiki mauokafua ke he tau matapatu fakaakoaga Tohi Tapu, ti lali ke fakaata e tau fua ha Iehova he fakaalofa, fakafili tonu, mo e pulotu ka e liogi agataha a koe ki a ia ma e hana lagomatai. Tuga ni e tokologa he tau tagata totoko kafilo ne talia e uiina fakaalofa ha Iehova ke liliu mai, ko e tama tane po ke tama fifine liuliu hau ka maliu mai ke he lotopa malu he Atua—Luka 15:6, 7.
[Tau Matahui Tala]
^ para. 6 Ma e falu vala tala foki ke he puhala ke fakaako fakamitaki a lautolu kua ikiiki, kikite The Watchtower, Iulai 1, 1999, lau tohi 13-17.
^ para. 15 Ko e tau liogi pihia kua nakai lata ke taute he toloaga i loto he tau feleveiaaga he fakapotopotoaga ma e tama tuku ki tua, ha kua nakai mailoga he falu e tuaga he tagata tuku ki tua.—Kikite The Watchtower, Oketopa 15, 1979, lau tohi 31.
^ para. 17 Ma e tau lagomataiaga pauaki, kikite Awake! Iuni 22, 1972, tau lau 13-16; Sepetema 22, 1996, tau lau 21-3.
Manatu Nakai e Koe?
• Ko e heigoa e tupuaga he lekua ka toka he tau fuata e fakapotopotoaga?
• Lagomatai fefe e tau fanau fuata ke feaki e fakafetuiaga fakatagata mo Iehova?
• Kua lata he ha e tau matua ke fakamanavalahi ka e mauokafua he lagomatai e tama liuliu?
• Lagomatai fefe e lautolu he fakapotopotoaga e fuata liuliu ke liu mai?
[Tau Huhu he Fakaakoaga]
[Fakatino he lau 25]
Ko e totou e Kupu he Atua kua aoga ke feaki e pipiaga tata mo Iehova
[Fakatino he lau 25]
Kua lagomatai he tau liogi mai he loto he tau matua e fanau ha lautolu ke logona hifo e pipiaga fakatagata he vahaloto he tau matua mo Iehova
[Fakatino he lau 27]
Fakafeleveia e tama liuliu ka “matala ai hana loto”
[Fakatino he lau 28]
Taute e tau lakaaga mitaki ke lagomatai e tama hau ke liu mai ki a Iehova