Maeke ia Koe ke Moua e Tua Moli

He 19 e tau moui ha Sarah Jayne, ne iloa e ia kua moua tuai a ia he kanesa he fua fakafalefale hana. He oti e iihi, kua mitaki e logona hifo hana, ti mitaki foki e onoaga ke he vaha anoiha. Ha kua mitaki lahi, moli, he tu e 20 tau hana he moui, ne fakatutane a ia mo e kamata ke taute e tau pulega ma e hana mau. He tau taha ia ni ne liu e kanesa tupu, ti iloa e ia ko e gahoa ni e tau fahitapu ke moui a ia. Ne mate a Sarah Jayne ia Iuni 2000, teitei tu e 21 hana.

KO E nava he tau tagata ahiahi atu ke he paka mohega ha Sarah Jayne he fale gagao ha ko e hana mauokafua totoka hagaao ke he vaha anoiha, fakalataha mo e hana tua hokulo ke he Atua mo e hana Kupu, ko e Tohi Tapu. Pete ne fehagai a ia mo e mamahi lahi, ne falanaki moli a ia ke he amaamanakiaga he liu tu mai—to liu kitia e ia e tau kapitiga oti hana. (Ioane 5:28, 29) “To kitia oti e au a mutolu he lalolagi fou he Atua,” he talahau e ia.

Ne talahau he falu e tua pihia ko e fakavaia. “Ko e talitonu ke he moui ka mole atu kua nakai fai fakaveaga,” he huhu e Ludovic Kennedy, “ke he leo fakahiku to ha ha ai e tau keke mo e tau kava mo e fuafua ika mo e tau ulo pu foki, ke he falu fakamanaia lau akau i Etena ka fakalataha auloa a lautolu ke he tau magaaho fiafia mo lautolu kua mamate fakamua mo lautolu ka mamate he magaaho fakamui?” Ke he talahauaga ia, kua lata ia tautolu ke fakatu e huhu totoko. Ha fe e mena kua tonu—ke talitonu ko e “moui na nei ma tautolu, ti kua mitaki ni ke fakaaoga katoatoa ai e tautolu,” tuga he talahau e Kennedy, po ke talitonu ke he Atua mo e hana  maveheaga he liu tu mai? Ne fifili a Sarah Jayne ke he vala fakahiku. Feaki fefe e ia e tua pihia?

‘Kumi e Iki mo e Kitia a Ia’

Ke feaki e tua mo e falanaki ke he taha tagata, kua lata ia koe ke iloa a ia mo e ke ako e puhala kua manamanatu mo e gahuahua a ia. Ko e tauteaga nei kua putoia e loto mo e manamanatuaga. Kua tatai moli ke he feakiaga he tua moli ke he Atua. Kua lata ia koe ke iloa a ia, ke iloa hana tau mahani mo e hana aga fakatagata, ke moua e fakamoliaga ke he mahani fakamoli mo e falanaki ke he tau mena oti ne talahau mo e taute e ia.—Salamo 9:10; 145:1-21.

Ne logona hifo he falu kua nakai maeke e mena nei. Ne pehe a lautolu, ko e Atua kua mamao lahi, galo lahi—po kua moui foki a ia. “Ka moli e Atua ke he tau Kerisiano tuga a Sarah Jayne,” he huhu he tagata fakauaua, “ko e ha ne nakai fakailoa ai a ia ki a tautolu oti ne toe?” Ka kua mamao moli kia e Atua mo e nakai maeke ke moua? He vagahau ke he tau tagata pulotu mo e tau ako i Atenai, ne pehe e aposetolo ko Paulo “ko e Atua ne eke e lalolagi mo e tau mena oti kana ha ha i ai” kua foaki foki e tau mena oti nukua lata ke ‘kumi e Iki mo e kitia a ia.’ Ti, pehe a Paulo: “Ka e nakai ni mamao a ia mo tautolu takitokotaha.”—Gahua 17:24-27.

Maeke fefe, mogoia, a koe ke ‘kumi e Iki mo e kitia a ia’? Ne taute he falu e mena nei he kumikumi ke he lalolagi mo e lagi katoatoa kua viko takai ia lautolu. Ke he tokologa, ko e lalolagi mo e lagi ia kua foaki e fakamoliaga lahi ke fakalaga a lautolu ko e mena fai Tufuga. * (Salamo 19:1; Isaia 40:26; Gahua 14:16, 17) Ne logona hifo a lautolu tuga e aposetolo ko Paulo, ko e “tau mena [he Atua] kua nakai kitia, tali mai he vaha ne eke e lalolagi, kua kitia ia he manamanatu e tau mena ne eke, ko e hana mana haia kua tukulagi, mo e hana Atua.”—Roma 1:20; Salamo 104:24.

Lata a Koe mo e Tohi Tapu

Ke atihake e tua ke he Tufuga, kua lata a koe ma e taha mena foki kua foaki e ia. Ko e heigoa a ia? Ko e Tohi Tapu—ko e Kupu mai he agaga he Atua, nukua fakakite e ia hana finagalo mo e amanakiaga. (2 Timoteo 3:16, 17) “Fakatali la,” ka talahau he falu, “maeke fefe a koe ke talitonu ha mena kua talahau he Tohi Tapu ka e kitia e koe e tau mena kelea ne taute he tau tagata kua talahau ke muitua ke he Tohi Tapu?” Moli, ha ha he Kerisitenitome e fakamauaga matakutakuina he fakatupua, favale, mo e mahani feuaki. Ka ko e tagata manamanatu kua kitia e fakatupua hokoia ha Kerisitenitome he muitua e tau matapatu fakaakoaga he Tohi Tapu.—Mataio 15:8.

Ne hataki mai ni he Tohi Tapu to tokologa e tau tagata ka talahau ke tapuaki ke he Atua, ka kua “fakatikai e Iki ne fakafua mai a lautolu.” “Ha ko lautolu ni,” he talahau he aposetolo ko Peteru, “to eke fakakelea ai e puhala he kupu moli.” (2 Peteru 2:1, 2) Ne talahau e Iesu Keriso a lautolu nei ko “[l]autolu ne eke e tau mahani kelea” ka kitia mitaki ha ko e tau gahua kelea ha lautolu. (Mataio 7:15-23) Ke tiaki e Kupu he Atua he fakave ke he fakamauaga he Kerisitenitome kua tuga e liti he tohi ke he vao mai he kapitiga falanaki, kakano ni ha ko e tagata fakateaga ne ta mai ai.

Ane nakai fai Kupu he Atua, kua nakai maeke ke atihake e tua moli. Mai ni he tau lau he Tohi Tapu kua fakakite mai e Iehova hana tau manatu. Ne fakakite e ia e tali ke he tau huhu tumau tuga e kakano ne fakaata e ia e matematekelea mo e mamahi mo e mena ka taute e ia ke he tuaga ia. (Salamo 119:105; Roma 15:4) Ne talitonu a Sarah Jayne ke he Tohi Tapu na ko e Kupu mai he agaga he Atua. (1 Tesalonia 2:13; 2 Peteru 1:19-21) Fefe? Nakai ni ha kua tala age pihia he tau matua hana, ka e fakaaoga e ia e magaaho ke kumikumi matafeiga e tau fakamoliaga oti nukua fakakite mai he Tohi Tapu ke eke mo fakakiteaga mua ue atu mai he Atua. (Roma 12:2) Ne kumikumi e ia, ma e fakatai, e omoomoiaga malolo he Tohi Tapu ke he tau momoui ha lautolu kua pipiki ai ke he tau matapatu fakaakoaga. Mo e lagomatai he tau tohi pihia tuga The Bible—God’s Word or Man’s?, * ne kumikumi matafeiga foki e ia e tau fakamoliaga loga kua fakamoli aki e omoomoiaga faka-Atua.

 “Tupu Mai e Tua Mai he [Logona]”

Nakai koenaia, ke moua e Tohi Tapu po ke talia foki na mai he agaga. Ko e “tua” he tohi he aposetolo ko Paulo, kua “tupu mai . . . he [logona].” (Roma 10:17) He logona e Tohi Tapu, nakai ni he moua e Tohi Tapu, ko e atihakeaga he tua. “Logona” e koe e mena kua talahau he Atua he totou mo e fakaako hana Kupu. Maeke foki ia lautolu ne ikiiki ke taute e mena nei. Pehe a Paulo “tali mai . . . he vaha tote” ne fakaako a Timoteo ke he “tau Tohi Tapu” mai he hana matua fifine mo e tupuna fifine. Ka kua talahau mai kia e mena nei mo mena fakaohooho fakavaia? Nakai! Ai fakahehe po ke fakavaia a Timoteo ke he ha puhala. Kua fakalagalaga a ia ke “iloa tonuhia” e mena ne logona e ia mo e totou ki ai.—2 Timoteo 1:5; 3:14, 15.

Ne fakalagalaga a Sarah Jayne ke he puhala taha. Tuga e tau Perea he senetenari fakamua, ko ia “kua talia e [ia mai he tau matua mo e falu faiaoga hana] e kupu mo e loto makutu.” He vaha tote, nakai fakauaua a ia ke tuku e falanaki pauaki ke he mena ne tala age he tau matua hana kia ia. Fakahiku, he lahi hake a ia, ne nakai talia pouli po ke teao e ia e tau mena oti ne fakaako ki a ia. Kua “kumikumi [a ia] ke he tau Tohi ke he taha aho mo e taha aho, po ke moli e tau mena ia.”—Gahua 17:11.

Maeke ia Koe ke Atihake e Tua Moli

Maeke foki ia koe ke atihake e tua moli—ko e tua ia nukua fakamaama mai he aposetolo ko Paulo he tohi hana ke he tau Kerisiano Heperu. Ko e tua pihia, he talahau e ia, “ko e falanaki haia ke he tau mena kua amaamanaki ki ai, ko e fakamoli he tau mena nakai kitia atu.” (Heperu 11:1) He moua e tua ia, to iloa moli katoatoa e koe, ko e tau amaamanakiaga mo e talifaki oti hau, putoia e maveheaga he Atua he liu tu mai, to fakamoli. To iloa e koe ko e tau amaamanakiaga pihia kua fakave ke he tau fakamoliaga moolioli, nakai ko e manamanatu noa he manako. To iloa e koe kua nakai kaumahala a Iehova ke fakatumau hana tau maveheaga. (Iosua 21:45; 23:14; Isaia 55:10, 11; Heperu 6:18) Ko e lalolagi fou ne mavehe mai he Atua ka moli ki a koe he tuga kua fita i hinei. (2 Peteru 3:13) Ti to kitia maali e koe aki e tau mata hau he tua nukua moli oti a Iehova ko e Atua, Iesu Keriso, mo e Kautu he Atua, nakai fakavai.

Nakai toka tokotaha a koe ke atihake hau ni a tua moli. He fakatoka noa mai hana Kupu, ne  foaki mai foki e Iehova e fakapotopotoaga Kerisiano he lalolagi ne taute ke lagomatai e tau tagata loto hako ke atihake e tua ke he Atua. (Ioane 17:20; Roma 10:14, 15) Talia e tau lagomataiaga oti kua foaki e Iehova mai he fakatokatokaaga ia. (Gahua 8:30, 31) Ha ko e tua ko e fua he agaga tapu he Atua, liogi tumau ma e agaga ke lagomatai a koe ke feaki e tua moli.—Kalatia 5:22.

Aua neke tukumuli ha ko e tau tagata fakauaua kua vaiga ke he ha tagata kua talahau e tua ke he Atua mo e hana Kupu. (1 Korinito 1:18-21; 2 Peteru 3:3, 4) Ko e tua moli ko e lagomataiaga makimaki he fakamalolo hau a tuaga ke he tau fakahaupo pihia. (Efeso 6:16) Ne mailoga pihia moli e Sarah Jayne, ti fakamalolo tumau e ia a lautolu kua ahiahi atu ki a ia he fale gagao ke atihake ha lautolu ni a tua. “Eke e kupu moli ma hau ni,” he talahau e ia. “Fakaako e Kupu he Atua. Nofo fakatata ke he fakatokatokaaga he Atua. Liogi fakamakai. Gahuatia ke he fekafekauaga a Iehova.”—Iakopo 2:17, 26.

He mailoga hana tua ke he Atua mo e he liu tu mai, taha he tau nosi hana ne pehe: “Kua talitonu moli na koe ke he mena nei.” He huhu ko e heigoa ne foaki ki a ia e onoonoaga mitaki pete ni hana tau kamatamata, ne tali a ia: “Ko e moua e tua ki a Iehova. Ko e kapitiga moli a ia ki a au, ti ofania lahi e au a ia.”

[Tau Matahui Tala]

[Fakatino he lau 6]

“Tali mai . . . he vaha tote” ne fakaako a Timoteo ke he “tau Tohi Tapu” mai he hana matua fifine mo e tupuna fifine

[Fakatino he lau 6]

Ne nava ke he tau Perea he kumikumi e tau Tohiaga Tapu he tau aho takitaha

[Credit Line]

Mai he “Photo-Drama of Creation,” 1914

[Tau Fakatino he lau 7]

Ko e logona mo e omaoma ke he Tohi Tapu, nakai ni ko e fai Tohi Tapu hokoia, ke atihake e tua

[Fakatino he lau 7]

“To kitia oti e au a mutolu he lalolagi fou he Atua”