Ko Iehova ko e Atua Fakamanavalahi
Ko Iehova ko e Atua Fakamanavalahi
“Ko Iehova, ko e Atua fakaalofa hofihofi, mo e fakaalofa noa; kua fakatuai hana ita, to lahi e fakaalofa.”—ESOTO 34:6.
1, 2. (a) Ko hai i tuai ne aoga mai he fakamanavalahi ha Iehova? (e) Ko e heigoa e kakano he kupu “fakamanavalahi”?
KO E tau tagata he vaha ha Noa, ne o hui e tau Isaraela he tutakale mo Mose, ne momoui e tau Iutaia he magaaho ne nofo a Iesu he lalolagi—nukua momoui oti ke he tau tutuaga kehekehe. Ka e aoga oti mai he mahani totonu taha ha Iehova—ko e fakamanavalahi. Ma e falu, ko e fakamouiaga ha lautolu haia. Ti ko e fakamanavalahi ha Iehova kua kakano ko e fakamouiaga ha tautolu foki.
2 Ko e heigoa e fakamanavalahi? Magaaho fe ne fakakite ai e Iehova, mo e ko e ha? Ko e “fakamanavalahi” nukua kakano ko e “fakauka fakatekiteki he kelea po ke ita, fakalataha mo e matauka ke mahala e amaamanaki ke fakaholo ki mua e fakafetuiaga tupetupe.” Kua fai kakano, mogoia, e mahani nei. Kua onoono pauaki ke he tuaga he tagata ne fakatupu e aga nakai talia. Pete ia, nakai kakano e fakamanavalahi ko e tiaki he kelea. Ka fakakatoatoa e kakano he fakamanavalahi po ke nakai maeke ke fakauka tumau, nukua fakaoti foki e fakamanavalahi.
3. Ko e heigoa e kakano he fakamanavalahi ha Iehova, mo e ko e heigoa e kaupaaga hana?
3 He maeke e tau tagata ke fakamanavalahi, ko Iehova e fakafifitakiaga mua ue atu he mahani nei. He tau tau tali mai he fakatauhele he agahala e fakafetuiaga ha Iehova mo e hana tau tagata ne tufugatia, ne fakakite he Tufuga ha tautolu e fakauka fakatekiteki ti fakatokatoka ai e tau puhala ke maeke he tau tagata tokihala ke fakaholo ki mua e fakafetuiaga ha lautolu mo ia. (2 Peteru 3:9; 1 Ioane 4:10) Ka maeke he hana fakamanavalahi ke fakamoli hana finagalo, to fakagahuahua e Atua ke he tau tagata mahani kelea pauaki, he ta mai e fakatokaaga kelea nei ke he moumouaga.—2 Peteru 3:7.
Fakatumau mo e Tau Matapatu Mahani he Atua
4. (a) Fakakite fefe e manatu ke fakamanavalahi he tau Tohiaga Tapu Heperu? (Kikite foki e matahui tala.) (e) Fakamaama fefe he perofeta ko Nahuma a Iehova, ti ko e heigoa kua fakakite mai he mena nei hagaao ke he fakamanavalahi ha Iehova?
4 He tau Tohiaga Tapu Heperu, ko e manatu he fakamanavalahi nukua fakakite mai ke he ua e kupu Heperu kua kakano ko e “loloa he tau pu ihu” ti talahau ki ai ko e ‘fakatuai ke he ita’ he New World Translation. * He tutala ke he fakamanavalahi he Atua, ne pehe e perofeta ko Nahuma: “Ko Iehova kua fakatuai hana ita ka e lahi hana malolo; nakai toka noa e ia a lautolu kua hala.” (Nahuma 1:3) Ti, ko e fakamanavalahi ha Iehova nakai ko e fakakiteaga he lolelole ti nakai fai fakakaupaaga. Ko e moli ne mafiti e Atua Mua ue Atu ke fakatuai ke ita mo e malolo lahi nukua maeke foki ke fakakite mai e fua he hana fakamanavalahi ko e fakauka fai kakano. Ha ha ia ia e malolo ke fakahala, ka e kalo kehe pauaki a ia mai he mafiti ke fakahala ke foaki ke he tagata taute mahani kelea e magaaho ke hiki. (Esekielu 18:31, 32) Ko e mena ia, he fakamanavalahi ha Iehova, ko e fakakiteaga he fakaalofa hana, mo e fakatata ai e pulotu hana he fakaaoga hana malolo.
5. Fakalautatai fefe e puhala he fakamanavalahi ha Iehova mo e hana fakafili tonu?
5 Kua lagotatai foki e fakamanavalahi ha Iehova mo e hana fakafili tonu mo e tututonu. Ne fakakite e ia a ia ki a Mose ko e “Atua fakaalofa hofihofi, mo e fakaalofa noa; kua fakatuai hana ita [“fakamanavalahi”], to lahi e fakaalofa, to fakamoli.” (Esoto 34:6) He tau tau fakamui, ne lologo a Mose ke he fakahekeaga ha Iehova: “Kua tonu hana tau puhala oti ni? ko e Atua kua fakamoli, nakai ha ha ia ia ha mahani kelea, ko e mahani tututonu mo e mahani hakohako ni a ia.” (Teutaronome 32:4) E, ko e fakaalofa hofihofi, fakamanavalahi, mo e mahani tututonu mo e mahani hakohako ha Iehova kua gahuahua tatai oti.
Fakamanavalahi ha Iehova Fakamua Ato Fakapuke
6. Ko e heigoa e fakamoliaga mua ue atu he fakamanavalahi kua fakatata e Iehova ke he fanau ha Atamu mo Eva?
6 Ko e totokoaga ha Atamu mo Eva i Etena ne fakakelea tukumalagi e fakafetuiaga uho ha laua mo e ha laua a Tufuga fakaalofa, ko Iehova. (Kenese 3:8-13, 23, 24) Ko e o kehe nei ne lauia e fanau ha laua, ne moua e agahala, nakai mitaki katoatoa, mo e mate. (Roma 5:17-19) Pete ni ko e tau tagata agahala taute pauaki e hoa fakamua, ne fakaata e Iehova a laua ke fanafanau. Fakamui, ne foaki fakaalofa e ia e tau puhala ke maeke he tau ohi ha Atamu mo Eva ke fakafeilo mo ia. (Ioane 3:16, 36) Ne fakamaama he aposetolo ko Paulo: “Kua fakakite mai he Atua hana fakaalofa kia tautolu he matulei a Keriso ke hukui aki a tautolu, ka ko e tau tagata hala agaia a tautolu. Hanai, ha kua talahaua tututonu ainei a tautolu ke he hana toto, ti nakai kia fakamoui he ha e ia a tautolu mai he ita? Ha ko e mena kaeke kua fakafeilo a tautolu mo e Atua ke he matulei he Tama hana, ka ko e tau fi a tautolu, ti nakai kia fakamomoui he ha a tautolu ke he moui hana, ka kua fakafeilo tuai a tautolu mo ia?”—Roma 5:8-10.
7. Fakakite fefe e Iehova e fakamanavalahi fakamua to Fakapuke, ti ko e ha kua tonuhia ai e moumouaga ke he hau fakamua ato Fakapuke?
7 Ne kitia e fakamanavalahi ha Iehova ke he vaha ha Noa. He tau senetenari fakamua to Fakapuke, “kua kitekite e Atua ke he lalolagi, kitiala, kua kelea tuai, ha ko e tau tagata oti kana kua kelea ia lautolu ni ha lautolu a mahani ke he lalolagi.” (Kenese 6:12) Pete ia, he fakaata agaia e magaaho tote, ne fakakite e Iehova e fakamanavalahi ke he tau tagata. Ne pehe a ia: “Nakai taufetoko tukulagi haku Agaga mo e tau tagata, ha ko lautolu foki ko e tau tagata ni; ka ko e tau aho ha lautolu ko e taha teau he tau tau ia, ti uafulu ni e tau.” (Kenese 6:3) Ko e 120 he tau tau ia ne fakaata a Noa tua fakamoli ke fanafanau mo e—he magaaho ne tala age e poakiaga he Atua ki a ia—ke ta e vaka mo e hataki e tau tagata oti ke he Fakapuke ka hoko mai. Ne tohi he aposetolo ko Peteru: “He fakatalitali mai e fakauka [ko e fua tatai ke he fakamanavalahi] he Atua i tuai ke he vaha kia Noa, ka kua taute ai e vaka, ne hao ai ke he vai e tau tagata tokogaogao, ko e tokovalu ni.” (1 Peteru 3:20) Moli, ko lautolu i fafo he magafaoa ha Noa ne “nakai iloa” ke he hana fakamatala. (Mataio 24:38, 39) Ka e he talaga e Noa e vaka mo e fekafekau he liga ke he tau hogofulu tau “ko e ogo he tututonu,” ne foaki age e Iehova ke he tau tagata he vaha ha Noa e magaaho lahi ke fakatokihala he tau puhala favale ha lautolu mo e liliu mai ke fekafekau ki a Ia. (2 Peteru 2:5; Heperu 11:7) Ko e moumouaga fakahiku he hau mahani kelea nei ne kua tonu vilivili.
Fifitakiaga Fakamanavalahi ki a Isaraela
8. Fakakite fefe e Iehova e fakamanavalahi ke he motu ha Isaraela?
8 Ko e fakamanavalahi ha Iehova ki a Isaraela ne tumau ai ke molea e 120 e tau. He molea e 1,500 he tau tau he ha lautolu a fakamauaga tuai mo tau tagata fifili he Atua, fai magahala ne nakai kamatamata he tau Isaraela e fakamanavalahi he Atua. Fai fahitapu he mole atu e fakahaoaga fakamana ha lautolu mai i Aikupito, ne haga atu a lautolu ke he tapuakiaga tupua, he fakakite e nakai fakalilifu katoatoa ke he Fakamoui ha lautolu. (Esoto 32:4; Salamo 106:21) He tau hogofulu tau fakamui, ne gugu e tau Isaraela ke he tau mena kai ne foaki fakamana e Iehova he tutakale, loma ki a Mose mo Arona, vagahau kelea ki a Iehova, mo e taute e mahani faivao mo e tau motu pouliuli, ti fakalataha foki ke he tapuakiaga Paala. (Numera 11:4-6; 14:2-4; 21:5; 25:1-3; 1 Korinito 10:6-11) Na kua ha ha ia Iehova e tonuhia ke moumou hana tau tagata, ka kua fakagahua e ia e fakamanavalahi.—Numera 14:11-21.
9. Fakamoli fefe a Iehova ke eke mo Atua fakamanavalahi he vaha he Tau Fakafili mo e magahala pule fakapatuiki?
9 He magahala he tau Fakafili, ne mokulu tumau e tau Isaraela ke he tapuaki tupua. He pihia a lautolu, ne toka atu e Iehova a lautolu ke he tau fi ha lautolu. Ka ko e magaaho ne tokihala a lautolu mo e ui ki a ia ma e lagomatai, ne fakagahuahua e ia e fakamanavalahi mo e fakatu e tau fakafili ke laveaki a lautolu. (Tau Fakafili 2:17, 18) He leva e pule fakapatuiki, ne tokogahoa e patuiki ne fakakite e tapuakiaga katoatoa ki a Iehova. Pihia foki i lalo he tau patuiki tua fakamoli, ne fa fiofio he tau tagata e tapuaki mea mo e fakavai. He fakatu e Iehova e tau perofeta ke hataki mai ia lautolu ne nakai fakamoli, ne mahani e tau tagata ke fakateliga ni ke he tau ekepoa kolokolovao mo e tau perofeta fakavai. (Ieremia 5:31; 25:4-7) Moli, ne favale e tau Isaraela ke he tau perofeta tua fakamoli ha Iehova mo e kelipopo foki falu ia lautolu. (2 Nofoaga he Tau Patuiki 24:20, 21; Gahua 7:51, 52) Pete ia, ne fakatumau a Iehova ke fakakite e fakamanavalahi.—2 Nofoaga he Tau Patuiki 36:15.
Tumau Hololoa e Fakamanavalahi a Iehova
10. I ne fe ne hokotia e fakamanavalahi ha Iehova ke he kaupaaga?
10 Fakakite mai he fakamauaga tala kua fai kaupaaga e fakamanavalahi he Atua. He 740 F.V.N., ne fakaata e ia e tau Asuria ke fakakaumahala e kautu he magafaoa tokohogofulu ha Isaraela mo e uta fakapaea ai e motu. (2 Tau Patuiki 17:5, 6) He matahiku he senetenari hake, ne fakaata e ia e tau Papelonia ke feoho atu ke he kautu ne ua ha Isaraela mo e moumou a Ierusalema mo e faituga i ai.—2 Nofoaga he Tau Patuiki 36:16-19.
11. Fakaata fefe e Iehova e fakamanavalahi pete ni he magaaho ne fakahoko e ia e fakafiliaga?
11 He fakahoko foki hana fakafiliaga ki a Isaraela mo Iuta, ne nakai nimo e Iehova hana fakamanavalahi. Puhala mai he hana perofeta ko Ieremia, ne talahau tuai e Iehova e fakafouaga he hana tau tagata fifili. Ne pehe a ia: “Ka fakakatoatoa ai e tau tau ne fitugofulu i Papelonia, ti ahi e au a mutolu, mo e fakamoli ai e au haku a kupu mitaki kia mutolu, ke liuaki mai e au a mutolu ke he mena nai. . . . To moua ai e mutolu au; ti liu aki e au ha mutolu a paeaaga, mo e fakapotopoto e au a mutolu mai he tau motu oti, mo e tau mena oti kua vega e au a mutolu ki ai.”—Ieremia 29:10, 14.
12. Fakamoli fefe e liliuaga he tau Iutaia ne toe ke eke mo takitakiaga mo e fakalilifu he hauaga he Mesia?
12 Ko lautolu ne toe mai he tau Iutaia fakapaea ne liliu moli ki Iuta mo e liu fakatu e tapuakiaga ha Iehova he liu ati e faituga i Ierusalema. He gahuahua e finagalo ha Iehova, to eke a lautolu nei ne toe ke tuga e “hahau mai ia Iehova,” nukua ta mai e totoka mo e monuina. To malolo foki a lautolu mo e mao tuga e ‘leona he tau manu favale he uho vao.’ (Mika 5:7, 8) Ko e talahauaga fakamui nei na liga fakamoli he magahala he tau Makapi he nonofo e tau Iutaia i lalo he magafaoa he tau Makapi ne utakehe e tau fi ha lautolu mai he Motu he Maveheaga mo e liu tukulele e faituga, nukua takiva fakamua. Ati fakahao ai e kelekele mo e faituga ke maeke ia lautolu ne toe kua tua fakamoli ke fakafeleveia fakamitaki e Tama he Atua ka hau a ia ko e Mesia.—Tanielu 9:25; Luka 1:13-17, 67-79; 3:15, 21, 22.
13. Mole atu e kelipopo he tau Iutaia hana Tama, fakatumau fefe a Iehova ke fakakite e fakamanavalahi ki a lautolu?
13 Pete ne kelipopo he tau Iutaia hana Tama, ne fakatumau ni a Iehova ke fakakite e fakamanavalahi ki a lautolu ke tolu mo e hafa atu foki e tau, he foaki ki a lautolu e magaaho lahi ke ui ke fai vala he tega fakaagaga ha Aperahamo. (Tanielu 9:27) * Fakamua mo e fakamui he tau 36 V.N., ne talia he falu Iutaia e uiaga nei, ti tuga he talahau e Paulo he magaaho fakamui, ko e “falu kua toe kua lata mo e fifiliaga he fakaalofa noa.”—Roma 11:5.
14. (a) He 36 V.N., fakalaulahi atu ki a hai e kotofaaga he eke mo vala he tega fakaagaga ha Aperahamo? (e) Fakakite fefe e Paulo hana tau logonaaga ke he puhala ne fifili aki e Iehova e tau tagata he Isaraela fakaagaga?
14 He 36 V.N., ko e kotofaaga he eke mo vala he tega fakaagaga ha Aperahamo ne fakalaulahi atu fakapa ki a lautolu ne nakai ko e tau Iutaia po ke tau tagata liliuina. Ko lautolu ne talia kua eke foki mo tau tagata nukua moua e fakaalofa noa mo e fakamanavalahi ha Iehova. (Kalatia 3:26-29; Efeso 2:4-7) He fakakite e loto fakaaue hokulo ma e pulotu mo e finagalo i tua he fakaalofa noa fakamanavalahi ha Iehova, he puhala ne taute e ia e numera katoa ha lautolu ne ui ke fakakatoatoa e Isaraela fakaagaga, ne fakapuloa e Paulo: “Oi, oi! Ko e hokulo he tanakiaga he iloilo mo e fioiaaga he Atua! Kua nakai maeke ni ia taha ke kumi hana tau fakafiliaga; kua nakai maeke foki ke iloa hana tau haeleaga.”—Roma 11:25, 26, 33; Kalatia 6:15, 16.
Fakamanavalahi ke Lata mo e Higoa Hana
15. Ko e heigoa e matapatu kakano ma e fakamanavalahi faka-Atua, ti ko e heigoa e matakupu kua lata ke fai magaaho ke fakatotoka ai?
15 Ko e ha kua fakagahua e Iehova e fakamanavalahi? Matapatu ai ke fakatokoluga hana higoa tapu mo e fakamatalahi hana pule katoatoa. (1 Samuela 12:20-22) Ko e matakupu mahani ne fakatu e Satani ke he puhala kua fakaaoga e Iehova Hana pule katoatoa nukua lata ke fai magaaho ke fakatotoka fakamitaki ki mua he tau tufugatia oti kana. (Iopu 1:9-11; 42:2, 5, 6) Ti, ko e magaaho ne favale ke he tau tagata hana i Aikupito, ne tala age a Iehova ki a Farao: “Ko e mena ia ni kua fakatu ai e au a koe, kia fakakite e au haku mana kia koe, kia talahaua ai foki haku a higoa ke he lalolagi oti.”—Esoto 9:16.
16. (a) Maeke fefe he fakamanavalahi ha Iehova ke tauteute e tau tagata ma hana? (e) Fakatokoluga fefe e higoa ha Iehova mo e fakamatalahi fefe e pule katoatoa hana?
16 Ko e tau kupu ha Iehova ki a Farao ne fatiaki he magaaho ne fakamaama he aposetolo ko Paulo e matagahua he fakamanavalahi he Atua ke he fakahekeaga he Hana higoa tapu. Ti tohi mogoia e Paulo: “Po ke fefe kia kaeke kua fakauka e Atua, mo e fakamanavalahi ke he tau kapiniu he ita kua fakalata ke malaia ai he finagalo a ia ke fakakite mai ai hana ita, mo e fakailoa ai hana mana, Ke fakailoa mai foki e lahi ue atu he hana lilifu ke he tau kapiniu he fakaalofa, ne taute tuai e ia ke hoko ke he monuina? Ko tautolu foki ia kua ui mai ai a ia, nakai kuenaia ko e tau tagata Iutaia, ka e katoa foki mo e tau motu kehe. Tuga foki he tala mai a ia ke he Tohi a Hosea, To talahaua e au ko e haku a motu a lautolu nakai ko e haku a motu tuai.” (Roma 9:17, 22-25) Ha kua fakagahuahua e Iehova e fakamanavalahi, ne maeke foki a ia ke fifili mai he motu e “tau tagata māna.” (Gahua 15:14) I lalo he ha lautolu a Ulu, ko Iesu Keriso, ko e “tau tagata tapu” nei ko e tau hakega he Kautu ka fakaaoga e Iehova ke fakatokoluga aki Hana higoa lahi mo e ke fakamatalahi aki Hana pule katoatoa.—Tanielu 2:44; 7:13, 14, 27; Fakakiteaga 4:9-11; 5:9, 10.
Tau Fua he Fakamanavalahi ha Iehova ma e Fakamouiaga
17, 18. (a) Ko e taute he heigoa ka tuhituhi fakakelea e tautolu a Iehova ma e hana fakagahuahua he fakamanavalahi? (e) Kua fakamalolo fefe a tautolu ke onoono ke he fakamanavalahi ha Iehova?
17 Tali mai he matematekelea lahi fakamua he tagata ke he agahala ke hoko mai mogonei, ne fakakite e Iehova a ia ko e Atua fakamanavalahi. Ko e fakamanavalahi hana ato Fakapuke ne fakaata e magaaho ma e hatakiaga fakahiku ke talahau mo e puhala ke atihake e fakamouiaga. Ka e fakakaupa ai hana fakauka, ti hoko mai e Fakapuke. Pihia foki he vaha nei, kua fakakite e Iehova e fakamanavalahi mahaki, mo e kua leva tigahau e mena nai nakai tuga he manatu he falu. Pete ia, nakai kakano e mena ia ke fakalolelole. To tatai ai ke he tuhituhi e Atua ha ko e hana fakamanavalahi. Ne huhu a Paulo: “Kua fakateaga kia a koe ke he lahi ue atu he hana mahani totonu, mo e hana fakamanavalahi, mo e hana fakauka; he nakai iloa e koe kua takitaki he mahani totonu he Atua a koe ke he tokihala?”—Roma 2:4.
18 Nakai fai ia tautolu ke iloa e katoatoaaga kua lata a tautolu mo e fakamanavalahi he Atua ke iloa tonu nukua moua e tautolu e taliaaga ma e fakamouiaga. Ne tomatoma e Paulo a tautolu ke ‘gahua ni a tautolu mo e matakutaku mo e vivivivi, kia momoui ai a tautolu.’ (Filipi 2:12) Ne tohia he aposetolo ko Peteru ke he tau matakainaga Kerisiano: “Kua nakai mule mai e Iki ke he mena kua talahaua mai, tuga he manatu he falu ke he mule; ka e fakauka mai a ia kia tautolu, he nakai finagalo a ia ke malaia taha, ka kia hohoko oti kana ke he tokihala.”—2 Peteru 3:9.
19. Ke he puhala fe ke fakaaoga e tautolu e fakamanavalahi ha Iehova?
19 Ti, kia nakai fakatepetepe a tautolu ke he puhala ha Iehova he fakatotoka e tau matakupu. Ka kia mumuitua e tautolu e tomatoma ha Peteru mo e ‘manatu e fakauka he Iki ha tautolu, ko e fakamouiaga haia.’ Ha hai e fakamouiaga? Ha tautolu mo e, tokologa foki he falu kua lata agaia ke logona e “tala mitaki nai he kautu.” (2 Peteru 3:15; Mataio 24:14) Lagomatai he mena nei a tautolu ke loto fakaaue ke he mahani fakamokoi lahi he fakamanavalahi ha Iehova mo e omoi a tautolu ke fakamanavalahi he tau fehagai ha tautolu mo e falu.
[Tau Matahui Tala]
^ para. 4 He faka-Heperu, ko e kupu ma e “ihu” po ke “pu ihu” (ʼaph) kua fa fakatai ai hagaao ke he ita. Kakano ko e fafagu vale po ke fagufagu he tagata favale.
^ para. 13 He laulahi atu e fakamaamaaga he perofetaaga nei, kikite e tohi Pay Attention to Daniel’s Prophecy!, tau lau tohi 191-4, lomi fakailoa he Tau Fakamoli a Iehova.
Maeke Nakai a Koe ke Fakamaama?
• Ko e heigoa e kakano he Tohi Tapu ke he kupu “fakamanavalahi”?
• Fakakite fefe e Iehova e fakamanavalahi hana ato Fakapuke, he mole e fakapaea he tau Papelonia, mo e he senetenari fakamua V.N.?
• Ko e heigoa e tau kakano aoga ne fakatata e Iehova e fakamanavalahi?
• Kua lata ke fefe e onoonoaga ha tautolu ke he fakamanavalahi ha Iehova?
[Tau Huhu he Fakaakoaga]
[Fakatino he lau 24]
Mole e veli ha Papelonia, ne aoga e tau Iutaia mai he fakamanavalahi ha Iehova
[Fakatino he lau 25]
He senetenari fakamua, ko e tau Iutaia mo lautolu nakai ko e tau Iutaia ne aoga mai he fakamanavalahi ha Iehova
[Tau Fakatino he lau 26]
Fakaaoga fakamitaki he tau Kerisiano he vaha nei e fakamanavalahi ha Iehova