Puipui e Loto Manamanatu Hau

KO E manatu ke heke he vakalele mo e komopiuta ne hepe e fakaholoaga nukua matakutakuina. Manamanatu la, nukua fai tagata ne kunuene e tau fakatokaaga fakaholo he vakalele po ke ne fakahehe pauaki e vala tala! He fakataiaga, ko e mena tuai ia ni kua lali taha tagata ke taute ke he loto manamanatu hau. Kua lali a ia ke moumou e fakatokaaga he takitakiaga mahani mitaki hau. Ko e foliaga hana ke fakafeoka e puhala hau mo e Atua!—Iopu 2:2-5; Ioane 8:44.

Ko hai e tagata moumou vale lahi nei? He Tohi Tapu, ne ui a ia ko e “gata tuai haia, kua higoa ko e tiapolo, ko Satani foki ia, ko ia kua fakahehe e lalolagi oti.” (Fakakiteaga 12:9) Kua taute e ia e mena nei he kaina i Etena he fakaaoga e fakamaamaaga fakavai, he magaaho ne fakaohooho e ia a Eva ke fakaheu e mena ne iloa e ia kua hako mo e ke totoko e Atua. (Kenese 3:1-6, 16-19) Tali mai ai, ne fakatoka e Satani e kamataaga he tau fakatokatokaaga oti he fakavaia ke takitaki aki e tau tagata ke faitaua mo e Atua. Ko e totokoaga mahomo atu he tau fakatokatokaaga nei ko e lotu fakavai.—2 Korinito 11:14, 15.

Takiva he Lotu Fakavai e Loto Manamanatu

He tohi ha Fakakiteaga he Tohi Tapu, kua kitia ai e lotu fakavai ko e fakataiaga he fifine fakataka ne ui ko Papelonia Lahi. Kua fakakeukeu he hana tau fakaakoaga e tau mahani mitaki he tau tagata tokologa mo e kua fakatupu a lautolu ke vihiatia mo e mahani favale ki a lautolu kua kehe e tau talitonu. Hagaao pehe e Fakakiteaga, kua taofi he Atua e lotu fakavai mo matapatu lagoaga ke he toto ha “lautolu oti ne kelipopo ke he lalolagi,” putoia ai foki e tau tagata tapuaki he Atua.—Fakakiteaga 17:1-6; 18:3, 24.

Ne hataki fakalahi e Iesu hana tau tutaki to fakakeukeu he lotu fakavai e tau mahani mitaki he falu, he talahau a ia: “To hoko mai foki e vaha ka kelipopo e taha a mutolu ti manatu e ia kua eke e ia e poa ke he Atua.” Ko e mahani pouli ha ia he tau tagata favale ia! Ne pehe a Iesu: “Ha kua nakai iloa e lautolu e Matua mo au.” (Ioane 16:2, 3) Nakai leva he vagahau e Iesu e tau kupu ia, ne kelipopo a ia ha ko e poaki he falu takitaki lotu, ne kua maeke ke fehikitaki e matahavala ha lautolu aki e loto manamanatu ha lautolu. (Ioane 11:47-50) Kehe ai, ne pehe a Iesu ko e tau tutaki moli hana kua kitia ai ke he fefakaalofaaki ha lautolu. Ka kua fakalaulahi atu agaia e fakaalofa ha lautolu, ha kua fakagahua ai foki ke he tau fi foki ha lautolu.—Mataio 5:44-48; Ioane 13:35.

Ko e taha puhala foki ne moumou he lotu fakavai e loto manamanatu he tokologa kua fakateaga ke he ha mahani, po kua nakai fai, nukua eke mo mena mahuiga. He talahau tuai e mena nei, ne pehe e aposetolo ko Paulo: “Ko e mena to hoko mai e vaha nakai maeke ai ia lautolu  ke talia e kupu tonu ka e lata ni mo e tau manako lahi ha lautolu, ke fakapotopoto ai e tau akoako ma lautolu, ha kua magiho e tau teliga ha lautolu.”—2 Timoteo 4:3.

Kua fakamagiho he tau takitaki lotu he vaha nei e tau teliga he tau tagata he talahau kua liga talia he Atua e mahani fakatane mo e fifine i fafo he fakamauaga. Kua fakaata he falu e tau mahani sotoma. Ti eke falu akoako mo tau tagata mahani sotoma malolo. Ne talahau he nusipepa Peritania The Times “ko e hogofulu ma tolu e akoako mahani sotoma talahaua” ne fifili ke he General Synod he Lotu Igilani. He tiaki he tau takitaki lotu e mahani he Tohi Tapu ti tote e mena ne taute he tau lotu ki ai, ko e heigoa mogoia e tau tutuaga kua lata he tau ako fakamatala ke moua? Ko e mena ia ni kua totou miliona ne lahi e fakagogoa.

Ko e mitaki ha ia ke takitaki he mahani tuga e maamateka mo e tau kupu moli fakaagaga ne fakaako he Tohi Tapu! (Salamo 43:3; Ioane 17:17) Ma e fakatai, kua fakaako he Tohi Tapu ‘nakai moua [he tau tagata feuaki mo e faivao] e kautu he Atua.’ (1 Korinito 6:9, 10) Nukua talahau mai ki a tautolu ko e tau tagata tane mo e fifine kua “fehikitaki e lautolu e mahani kua lata, mo e mahani kua nakai lata” ti ‘feekeaki e mena ke ma ai’ ke he fofoga he Atua. (Roma 1:26, 27, 32) Ko e tau mahani moli nei ko e mena nakai fakatoka he tau tagata nakai mitaki katoatoa; ka ko e tau tutuaga omoomoi he agaga he Atua, ne nakai tiaki e ia. (Kalatia 1:8; 2 Timoteo 3:16) Ka e ha ha ia Satani falu puhala ke moumou aki e loto manamanatu.

Kia Fifili e Fakafiafiaaga

Ko e mena kelea ke omoi taha ke taute e mahani kelea, ka e mahomo atu e kelea ke omoi a ia ke manako ke taute e mahani ia. Haia e foliaga he “iki he lalolagi nei,” ko Satani. Ke fakamau e manatu fakalialia hana ke he tau manamanatuaga mo e tau loto he tagata goagoa po ke tuaha—mua atu ki a lautolu kua fuata—nukua fakaaoga e ia e tau puhala he tau tohi kiva, tau kifaga, tau leo kofe, tau pele komopiuta, mo e tau fahi telefua he Internet.—Ioane 14:30; Efeso 2:2.

Ko e tau tagata fuata [he Tau Fahi Kaufakalataha] ne mailoga e katoatoaaga he 10,000 he tau mahani vale he tau tau takitaha,” ne talahau e hokotaki he senolo Pediatrics, “mo e fakaholoaga he tau fanau kua mua atu e vale.” Kua fakakite foki he hokotaki ke he “tau tau takitaha, kua kitekite he tau fuata mui teitei 15,000 he tau tohi mahani fakatane mo e fifine, tau moki mo e tau vaiga.” Pihia foki ke he fakaholoaga afiafi he televisoni, ne talahau, “kua toka ai molea e 8 he tupuaga mahani feuaki ke he taha e tula, molea e taki laga fa he tokoluga ke he 1976.” Nakai ofo ai, kua moua foki he fakaakoaga e “vagahau pilo kua tupu lahi mahaki foki.” Ka kua hataki mai he Tohi Tapu mo e tau kumikumiaga fakasaiene loga ko e fakaaoga lahi he tau koloa pihia kua hiki e tau tagata ke tupu lahi mahaki e mahani kelea. Ti ka manako moli a koe ke fakafiafia e Atua mo e moua e aoga ma hau ni, omaoma ke he Tau Fakatai 4:23, nukua talahau:  “Leveki e koe e loto hāu ke he tau mena oti kua leveki ai; ha kua tupu mai ai e mahani.”—Isaia 48:17.

Ko e loga he tau leo kofe mahuiga kua fakakelea foki e loto manamanatu. Ko e tagata uhu lologo ne loga e tau lologo ne talahaua lahi he tau motu Fahi Lalo kua taute e “laliaga pauaki ke fakaofoofo,” he hataki he talahau he nusipepa Ausetalia The Sunday Mail. Kua talahau he vala tala ko e “tau lologo hana kua fakaheke ke he tau tulaki, mahani tiki mo e fakapilo pulenoa” ati “lologo foki a ia ke he kelipopo he hana hoana mo e liti hana tino ke he namo.” Ko e falu kupu ne totoku kua kelea lahi ke fatiaki. Ka e, moua e ia e taui lilifu lahi ha ko e hana tau leo kofe. Manako nakai a koe ke gana he loto hau e tau manatu kelea muikau pihia tuga a ia na kua totoku, ti pihia foki kaeke ke fakafulufuluola e leo kofe? Amaamanaki ke nakai pihia, ha ko lautolu kua taute e puhala pihia kua fakakelea e lautolu e tau loto manamanatu ha lautolu ti mua ue atu kua fakatupu e lautolu e “loto kelea” he eke a lautolu mo tau fi he Atua.—Heperu 3:12; Mataio 12:33-35.

Ti pulotu ke he hau a fifiliaga he fakafiafiaaga. Kua fakamafana he Tohi Tapu a tautolu: “Ko e tau mena oti kua moli, kua fulufuluola, ko e tau mena oti kua talahaua mitaki, ko e tau mahani mitaki oti ne toka ai mo e tau mahani ke nava ki ai, kia manamanatu a mutolu ke he tau mena ia.”—Filipi 4:8.

Lauia e Loto Manamanatu Hau he Tau Feoakiaga

He magaaho ne ikiiki, ne fiafia e Neil mo Franz e feoakiaga atihake mo e tau Kerisiano fakamoli. * Ka e nakai leva he talahau e Neil, “ne kamata agataha au ke fio mo e matakau hepe.” Ko e fakahikuaga, ke he tokihala hana, ko e matahavala mo e fale pouli. Pihia foki e tala ha Franz. “Manatu au to nakai lauia au he fio mo e tau tagata fuata he lalolagi,” he fakamanava e ia. “Ka e talahau he Kalatia 6:7, ‘nakai fakavai e taha e Atua; ha ko e mena kua gana he tagata, ko e mena ia ni ke helehele mai ai e ia.’ Ne feleveia au mo e tau mena uka ti hepe au, hako a Iehova. Kua fehagai au mo e fakahala tukulagi ma e hepe ne taute e au.”

Nakai amanaki e tau tagata tuga a Neil mo Franz ti mahani matahavala; fakamua, to tafea fakahaga ha laua a tau manatu. Ne tupu fakapapahi e tafea fakahaga ia, kamata mua ke he feoakiaga kelea. (1 Korinito 15:33) Mui mai mogoia e tau tulaki po ke kava. Kua lautonu e fakamaama ke he loto manamanatu tuga ko e “vala he aga fakatagata nukua hufia ke he kava.” Mai he mena ia, ko e lakaaga tote ni ke he mahani matahavala po ke mahani feuaki.

Ti ko e taute he ha e lakaaga fakamua ia? Ka kia feoaki mo e tau tagata pulotu kua fakaalofa moli ke he Atua. To lagomatai e lautolu a koe ke malolo e loto manamanatu hau ke maeke ke takitaki fakamitaki a koe, fakahao mai a koe he tau mamahi loga. (Tau Fakatai 13:20) Pete ni he haia agaia ke he fale pouli, kua kitia e  Neil mo Franz mogonei e loto manamanatu ha laua ko e mena fakaalofa faka-Atua nukua lata ke feaki fakamitaki mo e, ke ofania moli ai. Mua atu, kua gahua malolo a laua ke atihake e fakafetuiaga mitaki mo e ha laua a Atua, ko Iehova. Kia pulotu, ti ako mai he tau hepehepe ha laua.—Tau Fakatai 22:3.

Leveki e Loto Manamanatu Hau

Fakakite e tautolu kua manako a tautolu ke leveki e tau loto manamanatu ha tautolu ka atihake e tautolu e fakaalofa mo e tua ke he Atua, fakalataha mo e matakutaku mitaki ki a ia. (Tau Fakatai 8:13; 1 Ioane 5:3) Kua fakakite he Tohi Tapu ko e loto manamanatu kua tiaki e tau fakaohoohoaga nei kua galo ai e mauokafua he mahani mitaki. Tuga anei, kua vagahau e Salamo 14:1 ki a lautolu kua talahau ke he tau loto ha lautolu: “Nakai fai Atua.” Lauia fefe e nakai fai tua nei ke he mahani ha lautolu? Kua matutaki atu e kupu: “Kua kelea ni a lautolu; kua fakalialia ha lautolu a tau mahani.”

Ko e tau tagata ne nakai fai tua moli ke he Atua kua nakai mauokafua foki e amaamanakiaga ma e vaha mitaki anoiha. Ti, kua hagahaga ni a lautolu ke moui ma e vaha nei ni hokoia, he fakamakona e tau manako fakatino ha lautolu. Ko e pulotu ha lautolu: “Kia kai mena a tautolu mo e inu, ha ko e mena mamate a tautolu a pogipogi.” (1 Korinito 15:32) Ke he taha fahi, ko lautolu kua tokamata ke he palepale he moui tukulagi kua nakai fakavaivai ai ke he puhala he tau fiafiaaga fakaataata he lalolagi. Tuga ni e komopiuta fakaholo hako, ko e tau loto manamanatu feaki ha lautolu kua fakatumau a lautolu ke he puhala hako he omaoma fakamoli ke he Atua.—Filipi 3:8.

Ma e loto manamanatu hau ke tumau e malolo mo e tonu, kua lata ke moua e takitakiaga tumau mai he Kupu he Atua. Kua talahau mai he Tohi Tapu ko e takitakiaga pihia kua maeke ke he vagahau ne kitia mata, kua pehe: “To logona foki he tau teliga ha mutolu e kupu ki tua ha mutolu, ka afe age a mutolu ke he fahi matau po ke afe age a mutolu ke he fahi hema.” (Isaia 30:21) Ti fakatoka e magaaho ke totou tumau e Tohi Tapu. To fakamalolo he mena nei a koe ka taufetului a koe ke taute e mena kua hako po ke ka maluia a koe he tau tupetupe mo e tau kapaletu. Kia mafanatia to takitaki e Iehova a koe ke he tau mahani mitaki mo e fakaagaga kaeke ke falanaki katoatoa a koe ki a ia. E, kia fifitaki e salamo ne tohi: “To tuku atu e au a Iehova ki mua haku nakai noa; ha ko e mena ha he tapa matau haku a ia, nakai fagahuatia ai au.”—Salamo 16:8; 55:22.

[Matahui Tala]

[Tau Fakatino he lau 5]

Kua fakamaama he Tohi Tapu e lotu fakavai, ko ‘Papelonia Lahi’ nukua lago ke he fakatolomuli he tau loto manamanatu he tokologa

[Credit Line]

Priest blessing troops: U.S. Army photo

[Tau Fakatino he lau 6]

He kitia e vale mo e mahani feuaki ka moumou e loto manamanatu hau

[Fakatino he lau 7]

Ko e takitaki tumau mai he Kupu he Atua ka puipui e loto manamanatu hau