Ko Iehova ha Tautolu a Kolo
Ko Iehova ha Tautolu a Kolo
“Ha ko koe Iehova na e, ko e haku a kolo a koe; . . . nakai hoko kia koe ha mena kelea.”—SALAMO 91:9, 10.
1. Ko e ha ne talahau e tautolu ko Iehova ha tautolu a kolo?
KO E kolo moli a Iehova ma e tau tagata hana. Kaeke ke tukulele katoatoa a tautolu ki a ia, liga to ‘matematekelea a tautolu ke he tau mena oti, ka e nakai fakaatukehe; kua fakahakuhaku, ka e nakai mahalohalo noa; kua favale mai, ka e nakai tiaki; kua palu hifo, ka e nakai mahaikava.’ Ko e ha? Ha kua tuku mai e Iehova ki a tautolu e ‘malolo lahi ue atu.’ (2 Korinito 4:7-9) E, kua lagomatai he ha tautolu a Matua he lagi a tautolu ke tutuli e moui mahani Atua, ti kua lata ia tautolu ke tokaloto e tau kupu he salamo: “Ha ko koe Iehova na e, ko e haku a kolo a koe; kua eke e koe a ia ne Mua ue atu mo mena ke nofo ai a koe. Nakai hoko kia koe ha mena kelea.”—Salamo 91:9, 10.
2. Ko e heigoa kua lata ke talahau hagaao ke he Salamo 91 mo e mena ne mavehe mai ai?
2 Liga ko Mose ne tohia e tau kupu ia he Salamo 91. Ne talahau i luga he mataulu, ko ia ne fati e Salamo ke 90 aki, ti nakai talahau foki he Salamo 91 ne mui mai ha talahauaga ke he taha tagata tohia foki. Fakalata ni kua uhu fakaatuatu e Salamo 91; pehe a ia, liga taha e tagata ne lologo (91:1, 2), ti tali he vahega lologo (91:3-8). Ti liga logona mai e leo he tagata tokotaha (91:9a) mo e tali he matakau lologo (91:9e-13). Ti liga taha mogoia e tagata ne lologo e tau kupu fakahiku (91:14-16). Ke he ha puhala ni, ne mavehe he Salamo ke 91 aki e haohao mitaki fakaagaga ke he tau Kerisiano fakauku ko e vahega mo e foaki e fakamoliaga pihia foki ma e tau faihoani tukulele ha lautolu ko e matakau. * Kia manamanatu a tautolu ke he salamo nei mai he kitiaaga he tau fekafekau oti pihia ha Iehova.
Haofia Mitaki he ‘Mena Galo he Atua’
3. (a) Ko e heigoa e “mena galo ha i ai e Mua ue atu”? (e) Ko e heigoa ne mailoga e tautolu he ‘nonofo ke he malu hana ha i ai e malolo oti kana’?
3 Ne lologo e salamo: “Ko ia kua nofo ke he mena galo ha i ai e Mua ue atu, to nofo a ia ke he malu hana ha i ai e malolo oti kana. To pehe atu au kia Iehova, Ko e haku a kolo, mo e haku a taue; ko e haku a Atua kua falanaki au kia ia.” (Salamo 91:1, 2) “[Ko e] mena galo ha i ai e Mua ue atu” ko e mena fakatai ke puipui aki a tautolu, mo e mua atu ki a lautolu ne fakauku, ne tau pauaki atu e Tiapolo ki ai. (Fakakiteaga 12:15-17) To fakaotioti e ia a tautolu oti ane mai nakai ha ha ia tautolu e puipuiaga ne olioli e tautolu ko e tau tagata ne nonofo mo e Atua mo tau tagata uiina fakaagaga. He ‘nonofo ke he malu hana ha i ai e malolo oti kana,’ kua moua e tautolu e puipui malu he Atua. (Salamo 15:1, 2; 121:5) Kua nakai fai kolo haohao mitaki po ke taue mauokafua foki ke he ha tautolu a Iki Pule Katoatoa, ko Iehova.—Tau Fakatai 18:10.
4. Ko e heigoa e tau lagatau ne fakaaoga he “tagata takafaga,” ko Satani, mo e laveaki mai fefe a tautolu i ai?
4 Ne lafi he salamo: “Ko ia ni [Iehova] ke laveaki a koe mai he hele he tagata takafaga, mo e tatalu ke mate ai.” (Salamo 91:3) Kua fa mahani e tagata takafaga i Isaraela tuai ke tapaki e tau manu lele he fakaaoga e tau matahele. Ha ha he tau matahele he “tagata takafaga,” ko Satani, ko e fakatokaaga kelea mo e “tau lagatau” hana. (Efeso 6:11, matahui tala, NW) Kua tuku i mua he puhala ha tautolu e tau matahele galo ke futiaki a tautolu ke he mahani kelea mo e tamai e moumou fakaagaga. (Salamo 142:3) Ha kua fakaheu e tautolu e mahani hepehepe, ‘kua tuga ne manu lele a tautolu ne fehola mai he matahele.’ (Salamo 124:7, 8) Ko e loto fakaaue ha ia ha tautolu he laveaki e Iehova a tautolu mai he “tagata takafaga” kelea!—Mataio 6:13.
5, 6. Ko e heigoa e “tatalu” ne fakatupu e “mate,” ka ko e ha ne nakai kaumahala e tau tagata ha Iehova ki ai?
5 Ne totoku he salamo e “tatalu ke mate ai.” Ke tuga e gagao pikitia kelea, kua fai mena ne fakatupu e “mate” ke he magafaoa he tagata mo e ki a lautolu ne lalago e pule katoatoa ha Iehova. Hagaao ke he mena nei, ne tohia he tagata fakamau tala tuai ko Arnold Toynbee: “Tali mai he fakahikuaga he Felakutaki II he Lalolagi, nukua fakafahiua he fakahakehake fakamotu e numera he tau motu tu tokotaha . . . Ko e mahani he tau tagata he mogonei kua tolomaki ki luga e mavehevehe.”
6 Mai he tau senetenari loga, nukua iliili he falu pule malolo e puho he taufetuluiaki fakamavehevehe he tau motu. Kua manako foki a lautolu ke foaki ni ki a lautolu e fakalilifu po ke ke he tau tupua po ke tau fakataiaga kehekehe. Ka kua nakai toka e Iehova e tau tagata hana ke kaumahala ke he “tatalu” pihia. (Tanielu 3:1, 2, 20-27; 6:7-10, 16-22) Ko e tau matakainaga fefakaalofaaki he lalolagi katoa, kua foaki e tautolu ki a Iehova e tapuaki katoatoa, tumau ke tu uho faka-Tohi Tapu, mo e fakailoa ke he tau tagata oti ko e “tau tagata he tau motu oti kana ne matakutaku [ke he Atua] mo e mahani tututonu, kua talia ai e ia.” (Gahua 10:34, 35; Esoto 20:4-6; Ioane 13:34, 35; 17:16; 1 Peteru 5:8, 9) Pete he matematekelea a tautolu ke he “mate” he puhala he favale ha ko e tau Kerisiano, kua fiafia a tautolu mo e nakai haofia fakaagaga he “mena galo ha i ai e Mua ue atu.”
7. Puipui fefe e Iehova a tautolu “ke he hana tau tapakau”?
7 Ha ko Iehova ha tautolu a kolo, kua moua e tautolu e mafanatia mai he tau kupu: “To ufiufi e ia a koe ke he hana tau tapakau, to malu a koe ki lalo he hana tau tapakau, to eke hana fakamoli mo akau punuti mo mena ke puipui aki a koe.” (Salamo 91:4) Kua puipui he Atua a tautolu, ti pihia foki e matua manu lele ne felelelele fano ke puipui e punua hana. (Isaia 31:5) ‘To ufiufi e ia a tautolu ke he hana tau tapakau.’ Ti ko e tau tapakau hana ne fakamalu aki he manu lele e tau punua hana, he puipui a lautolu mai he tau manu favale. Ke tuga e tau punua lele fou, kua nakai haofia a tautolu i lalo he tau tapakau fakatai ha Iehova ha kua moua e tautolu e kolo i loto he fakatokatokaaga Kerisiano moli hana.—Ruta 2:12; Salamo 5:1, 11.
8. Eke fefe e “fakamoli” ha Iehova mo akau punuti lahi mo e puipuiaga?
8 Kua falanaki a tautolu ke he “fakamoli,” po ke tua fakamoli. Kua tuga e akau punuti he vaha i tuai, ne lahi tuga ne gutuhala mo e maluia ai e tino katoa he tagata. (Salamo 5:12) He mauokafua ke he puipuiaga pihia ka fakatokanoa a tautolu mai he matakutaku. (Kenese 15:1; Salamo 84:11) Ke tuga ne tua ha tautolu, ko e fakamoliaga he Atua e akau punuti puipui lahi ne taofi aki e tau fana kaka mo e uta kehe e tau lagatau he fi. (Efeso 6:16) Ko e puipuiaga foki, ko e pa malolo ne tutu mauokafua ai a tautolu.
‘Nakai Matakutaku a Tautolu’
9. Ko e ha ne eke e po mo magaaho matakutakuina, ka ko e ha ne nakai matakutaku a tautolu?
9 He mailoga e puipuiaga he Atua, ne pehe e salamo: “Nakai matakutaku a koe ke he mena fakamatakutaku ke he po, mo e fana kua lele ke he aho. Mo e tatalu kua evaeva ke he pouli, mo e malaia kua moumou ke he tupou la.” (Salamo 91:5, 6) Ha kua loga e tau mena kelea ne taute he pouli he po, kua eke ai e po mo magaaho matakutakuina. I loto he pouligia fakaagaga ne ufitia ai e lalolagi he mogonei, kua taute mau he tau fi ha tautolu e tau gahua fakahehe he lali ke moumou ha tautolu a tuaga fakaagaga mo e ke taofi ha tautolu a gahua fakamatala. Ka kua ‘nakai matakutaku a tautolu ke he mena fakamatakutaku he po’ ha kua leveki e Iehova a tautolu.—Salamo 64:1, 2; 121:4; Isaia 60:2.
10. (a) Ko e tuga e heigoa e “fana kua lele ke he aho,” mo e fefe e aga ha tautolu ki ai? (e) Ko e heigoa e foliga he “tatalu kua evaeva ke he pouli,” ti ko e ha ne nakai matakutaku a tautolu ki ai?
10 Ko e “fana kua lele ke he aho” kua tuga e tau vagavagahau fakakelea. (Salamo 64:3-5; 94:20) He foaki tumau e tautolu e tau fakailoaaga moli, nukua kaumahala ai e tau totokoaga mahino pihia ke he ha tautolu a fekafekauaga tapu. Mua atu, kua nakai matakutaku a tautolu ke he “tatalu kua evaeva ke he pouli.” Ko e mate fakatai anei ne feaki hake he pouli he lalolagi mahani kelea mo e gagao fakalotu nei ne ha ha he malolo ha Satani. (1 Ioane 5:19) Kua fakatupu ai e tuaga mate he tau manamanatuaga mo e loto, ti toka e tau tagata he pouligia hagaao ki a Iehova, hana tau finagalo, mo e hana tau foakiaga fakaalofa. (1 Timoteo 6:4) He pouligia nei, kua nakai matakutaku a tautolu, ha kua olioli e tautolu e maama fakaagaga ne mua atu.—Salamo 43:3.
11. Ko e heigoa ne tupu ki a lautolu nukua fakafita ke he ‘moumouaga he tupou la’?
11 Kua nakai fakamatakutaku foki he “malaia kua moumou ke he tupou la” a tautolu. Ko e “tupou la” kua tuga e maama fakavai he lalolagi. Ko lautolu ne mahala atu ke he tau puhala muhukoloa kua moua e moumouaga fakaagaga. (1 Timoteo 6:20, 21) He fakapuloa fakamalolo e tautolu e fekau he Kautu, kua nakai matakutaku a tautolu ke he tau fi ha tautolu, ha ko Iehova e Puipui ha tautolu.—Salamo 64:1; Tau Fakatai 3:25, 26.
12. Ko e fahi ha hai ne “veveli” e totou afe ki ai, mo e ke he puhala fe?
12 Ne fakaholo atu e salamo: “To veveli e taha afe ke he tapa hāu, ti afe mo afe ke he fahi matau hāu, ka e nakai fakatata mai kia koe. To kitekite noa hāu a tau mata ki ai, to kitia e koe e taui he tau tagata mahani kelea.” (Salamo 91:7, 8) Ha kua kaumahala ke eke a Iehova mo ha lautolu a kolo, kua “veveli” e tokologa ke he mate fakaagaga he “tapa” ha tautolu. Kua tuga, “afe mo afe” kua veveli ke he “fahi matau” he tau Isaraela fakaagaga he vaha nei. (Kalatia 6:16) Ka e pete ko e tau Kerisiano fakauku a tautolu po ke tau faihoani tukulele ha lautolu, kua nakai haofia a tautolu he “mena galo” he Atua. Kua ‘kitekite noa [a tautolu] mo e kitia e taui he tau tagata mahani kelea,’ hane moua e tau hagahaga kelea he puhala fakatupe, fakalotu, mo e falu a puhala foki.—Kalatia 6:7.
‘Nakai Hoko kia Tautolu e Mena Kelea’
13. Ko e heigoa e tau matematekelea ne nakai moua e tautolu, mo e ko e ha?
13 Pete kua malolo hifo e nakai haofia he lalolagi nei, kua tuku fakamua e tautolu e Atua mo e moua e malolo mai he tau kupu he salamo: “Ha ko koe Iehova na e, ko e haku a kolo a koe; kua eke e koe a ia ne Mua ue atu mo mena ke nofo ai a koe; nakai hoko kia koe ha mena kelea, ti nakai tata ha malaia ke he hau a fale ie.” (Salamo 91:9, 10) E, ko Iehova ko e kolo ha tautolu. Ti kua taute foki e tautolu e Mua ue Atu mo ‘nofoaga ha tautolu,’ mena ka moua e tautolu i ai e fakahaoaga. Kua fakaheke e tautolu a Iehova ko e Pule he Lagi mo e Lalolagi Katoatoa, ti kua ‘nonofo’ ia ia ko e ha tautolu a Punaaga he nakai haofia, mo e fakapuloa e tala mitaki he hana Kautu. (Mataio 24:14) Ko e mena ia, to ‘nakai hoko kia tautolu ha mena kelea’—tau mena kelea ne fakamaama fakamua mai he salamo nei. Pete ni he fakafita auloa a tautolu mo e falu ke he tau mena kelea tuga e tau mafuike, tau afa, tau fakapuke, tau hoge, mo e tau matematekelea he felakutaki, kua nakai moumou he tau mena nei ha tautolu a tua po ke ha tautolu a nakai haofia fakaagaga.
14. Ko e tau fekafekau ha Iehova, ko e ha kua nakai pikitia a tautolu he tau malaia mamate?
14 Ko e tau Kerisiano fakauku kua tuga e tau tagata nonofo he tau fale ie ne kehe mai he fakatokaaga nei. (1 Peteru 2:11) ‘Ti nakai tata ha malaia ke he fale ie ha lautolu.’ Pete ni ko e amaamanakiaga ha tautolu ke he lagi po ke lalolagi, nakai ko e tau tagata he lalolagi a tautolu, ti nakai pikitia a tautolu he tau malaia mate fakaagaga ne tuga e mahani feuaki, manako koloa, lotu fakavai, mo e tapuaki ke he “manu favale” mo e hana “fakatino,” ko e Tau Motu Kaufakalataha.—Fakakiteaga 9:20, 21; 13:1-18; Ioane 17:16.
15. Ko e tau puhala fe ne olioli e tautolu e lagomatai fakaagelu?
15 Hagaao ke he puipuiaga ne moua e tautolu, ne lafi he salamo: “Ko e mena fekau e [Iehova] hana tau agelu kia koe, ke leoleo kia koe ke he hāu a tau puhala oti kana. Ke toto haku a koe he tau lima ha lautolu neke hakina e hui hāu ke he maka.” (Salamo 91:11, 12) Kua foaki ke he tau agelu e malolo ke puipui aki a tautolu. (2 Tau Patuiki 6:17; Salamo 34:7-9; 104:4; Mataio 26:53; Luka 1:19) Kua leoleo e lautolu a tautolu ke he “tau puhala oti kana” ha tautolu. (Mataio 18:10) Kua olioli e tautolu e leoleo mo e levekiaga fakaagelu ko e tau tagata fakapuloa he Kautu, ti nakai fakalolelole fakaagaga ai. (Fakakiteaga 14:6, 7) Pihia foki e “maka” ne tuga tautaofi e tau gahua ha tautolu, kua nakai fakalolelole a tautolu mo e veli kehe mai he fiafia faka-Atua.
16. Kehe fefe e tau tauaga he “punua leona” mo e “asipi,” mo e fefe e aga ha tautolu ki ai?
16 Ne fakaholo atu e salamo: “To taholi e koe e leona mo e asipi; to taholi foki e koe e punua leona mo e tanimo.” (Salamo 91:13) Ke tuga ne punua leona ne tau fakahako mai, kua fakakite foki he falu fi ha tautolu e totokoaga mahinohino he taute e tau matafakatufono ne talaga ke taofi aki e gahua fakamatala ha tautolu. Ka ko e tau tauaga fakagalogalo pihia tuga he asipi kua taute foki ki a tautolu. He taute fakamumuli e tau mena, ne tau mai foki he falu magaaho e tau akoako ki a tautolu he puhala he tau tagata taute matafakatufono, tau iki fakafili, mo e falu foki. Ka e, mo e lagomatai ha Iehova, ne kumi e tautolu e mafola he tau fale hopo, ti kua ‘fakatonu atu katoa mo e fakamoli ke he vagahau mitaki.’—Filipi 1:7; Salamo 94:14, 20-22.
17. Taholi fefe e tautolu e “punua leona”?
17 Ne talahau mai he salamo ke taholi e “punua leona mo e tanimo.” Kua maeke foki e punua leona ke vale lahi, ti eke foki e tanimo mo gata mahaki foili. (Isaia 31:4) Pete ko e lahi fefe e vale he punua leona he magaaho ka tau fakahako mai, kua tuga taholi ai e tautolu he omaoma ke he Atua ka e nakai ke he tau tagata po ke tau fakatokatokaaga tuga e tau leona. (Gahua 5:29) Ti kua nakai fakamatematekelea fakaagaga he “leona” vale a tautolu.
18. Ko hai ne fakamanatu mai he “tanimo” ki a tautolu, mo e heigoa kua lata ia tautolu ke taute kaeke kua tau mai ki a tautolu?
18 He Greek Septuagint, ne ui e “tanimo” ko e “tarako.” Kua fakamanatu mai he mena nei ki a tautolu “e tarako lahi, ko e gata tuai haia, kua higoa ko e tiapolo, ko Satani.” (Fakakiteaga 12:7-9; Kenese 3:15) Kua tuga e gata makimaki a ia ne maeke ke pepela mo e folofua hana hele. (Ieremia 51:34) He magaaho ka lali a Satani ke viviko a tautolu he tino hana, pepela a tautolu aki e tau peehiaga he lalolagi nei, mo e folofua a tautolu, kia fakatokanoa ai e tautolu a tautolu mo e taholi e “tanimo” nei. (1 Peteru 5:8) Kua lata ke taute ai e lautolu ne fakauku e mena nei kaeke ke fai vala a lautolu he fakamoliaga ia Roma 16:20.
Iehova—Ko e ha Tautolu a Punaaga he Fakamouiaga
19. Ko e ha kua moua e tautolu e kolo ia Iehova?
19 Hagaao ke he tagata tapuaki moli, ne fakakite he salamo e Atua ke talahau: “Ha kua manako lahi mai a ia kia au, ko e mena ia ke fakamoui ai e au a ia; to fakalilifu e au a ia ha kua iloa e ia haku a higoa.” (Salamo 91:14) Ko e tau kupu “ke fakamoui e au a ia” kua kakano “ke fakatokoluga ai e au a ia,” pehe a ia, kua nakai maeke ke hokotia ki ai. Kua moua e tautolu e kolo ia Iehova ha ko e tau tagata tapuaki hana, mua atu ha kua ‘manako lahi a tautolu ki a ia.’ (Mareko 12:29, 30; 1 Ioane 4:19) He taute pihia, ne ‘fakamoui he Atua a tautolu’ mai he tau fi ha tautolu. To nakai tafia kehe a tautolu mai he lalolagi. Ka e to hao a tautolu ha kua iloa e tautolu e higoa faka-Atua mo e ui atu ki ai mo e tua. (Roma 10:11-13) Ti kua fakamalolo a tautolu ke ‘o ke he higoa a Iehova tukulagi tukumuitea.’—Mika 4:5; Isaia 43:10-12.
20. He fakahiku e Salamo 91, ko e heigoa ne mavehe e Iehova ke he tau fekafekau tua fakamoli hana?
20 He fakahiku e Salamo 91, ne talahau a Iehova hagaao ke he tau fekafekau tua fakamoli hana: “To ui mai a ia kia au, ti fanogonogo atu e au kia ia; ti fakalataha a maua mo au ke he matematekelea; to laveaki e au a ia mo e fakatupu hana lilifu. Ko e moui loa ke fakamakona aki e au a ia; to fakakite e au haku a fakamouiaga kia ia.” (Salamo 91:15, 16) He magaaho ne ui a tautolu ke he Atua he liogi he puhala he finagalo hana, ne tali e ia a tautolu. (1 Ioane 5:13-15) Kua fita he hohoko ki a tautolu e tau matematekelea loga ha ko e favale ne fakatupu e Satani. Ka kua tauteute he tau kupu “ti fakalataha a maua mo au ke he matematekelea” a tautolu ma e tau kamatamata i mua mo e fakamoli ki a tautolu to leveki he Atua a tautolu he magaaho ka fakaotioti e fakatokaaga kelea nei.
21. Puhala fe nukua fita he fakalilifu a lautolu ne fakauku?
21 Pete ni ko e totokoaga velagia ha Satani, ko e fakakatoatoaaga ha lautolu ne fakauku nukua ha ha ia tautolu to fakaheke ke he lagi he magaaho a Iehova—he mole e “moui loa” he lalolagi. Ka kua fita he tamai he tau laveakiaga mua ue atu he Atua e lilifu fakaagaga ki a lautolu ne fakauku. Ti lilifu ha ia ha lautolu he uta e takitakiaga ko e Tau Fakamoli a Iehova he lalolagi he tau aho fakamui nei! (Isaia 43:10-12) Ko e laveakiaga lahi a Iehova ke he tau tagata hana to mailoga ai he magahala he felakutaki lahi i Amaketo, he magaaho ka fakatokoluga e ia e pule katoatoa hana mo e fakamatalahi hana higoa tapu.—Salamo 83:18; Esekielu 38:23; Fakakiteaga 16:14, 16.
22. Ko hai ka ‘kitia e fakamouiaga mai ia Iehova’?
22 Pete ko e tau Kerisiano fakauku a tautolu po ke tau faihoani tukulele ha lautolu, kua hahaga atu a tautolu ke he Atua ma e fakamouiaga. He magahala he “aho a Iehova kua lahi mo e matakutakuina,” ko e tau tagata ne fekafekau fakamoli ke he Atua to fakamoui. (Ioelu 2:30-32) Ka ko lautolu ia tautolu ka eke mo “moto tagata tokologa” ne hao atu ke he lalolagi fou he Atua mo e tumau ke tua fakamoli he magahala he kamatamata fakahiku to ‘fakamakona e ia he moui loa’—ko e moui nakai fai fakaotiaga. To liu fakatutu mai foki e ia e tokologa. (Fakakiteaga 7:9; 20:7-15) To fiafia moli a Iehova he ‘taute a tautolu ke kitia e fakamouiaga’ he puhala ia Iesu Keriso. (Salamo 3:8) Mo e tau amaamanakiaga homo pihia i mua ha tautolu, kia fakatumau a tautolu ke hahaga atu ke he Atua ma e lagomatai he totou ha tautolu a tau aho ke he hana lilifu. Ha ko e tau kupu mo e tau gahua ha tautolu, kia fakatumau a tautolu ke fakamoli ko Iehova ha tautolu a kolo.
[Matahui Tala]
^ para. 2 Ko e tau tagata tohia he tau Tohiaga Tapu Kerisiano Heleni kua nakai tutala hagaao ke he Salamo 91 mai he puhala he perofetaaga faka-Mesia. Ka kua eke moli a Iehova mo kolo mo e taue ma e tagata ko Iesu Keriso, ti pihia ni a Ia ma e tau tutaki fakauku ha Iesu mo e tau faihoani tukulele ha lautolu ko e matakau he “vaha ke fakahiku” nei.—Tanielu 12:4.
To Tali Fefe e Koe?
• Ko e heigoa e “mena galo ha i ai e Mua ue atu”?
• Ko e ha kua nakai matakutaku a tautolu?
• Ko e puhala fe kua ‘nakai hoko kia tautolu e mena kelea’?
• Ko e ha kua maeke ia tautolu ke talahau ko Iehova ha tautolu a punaaga he fakamouiaga?
[Tau Huhu he Fakaakoaga]
[Fakatino he lau 15]
Iloa nakai e koe e puhala ka eke e fakamoli ha Iehova mo akau punuti ma tautolu?
[Tau Fakatino he lau 16]
Ne lagomatai e Iehova e tau fekafekau hana ke taute e gahua fakamatala ha tautolu pete ko e favaleaga mo e tau totokoaga
[Credit Line]
Cobra: A. N. Jagannatha Rao, Trustee, Madras Snake Park Trust