Matakutaku ki a Iehova mo e Omaoma ke he Hana Tau Fakatufono
Matakutaku ki a Iehova mo e Omaoma ke he Hana Tau Fakatufono
“Kia matakutaku a ke he Atua, mo e omaoma ke he hana tau fakatufono; ha ko e mena ia kua lata ke eke he tau tagata oti kana.”—FAKAMATALAAGA 12:13.
1, 2. (a) Maeke fefe e matakutaku ke puipui a tautolu fakatino? (e) Ko e manako he ha e tau matua pulotu ke to e matakutaku mitaki he tau fanau ha lautolu?
“TUGA he fakahagahaga kelea he malolo e moui, kua puipui atu ai he matakutaku,” he talahau e Leonardo da Vinci. Kua fakapouli he malolo goagoa e tagata ke he hagahaga kelea, ka kua fakamanatu he matakutaku ki a ia ke fakaeneene. Ma e fakatai, ka tata atu a tautolu ke he tila feutu mo e kitia e mamao ka to hifo a tautolu, kua mafiti a tautolu ke unu ki tua. Tatai ai, ko e matakutaku mitaki nakai ni fakatolomaki e fakafetuiaga mitaki mo e Atua, tuga he ako e tautolu he vala tala fakamua, ka e lagomatai foki a tautolu ke puipui mai he pakia.
2 Ko e matakutaku ke he tau hagahaga kelea he vaha fou nei, nukua lata ke ako. Ha kua nakai mataala e tau fanau ke he tau hagahaga kelea he hila po ke apiapi he puhala tu, kua mukamuka lahi a lautolu ke pakia kelea. * Kua lali e tau matua pulotu ke to e matakutaku mitaki he tau fanau ha lautolu, he hataki tumau a lautolu ke he tau hagahaga kelea he takatakaiaga. Iloa he tau matua ko e matakutaku nei kua fakahao moli e tau momoui he fanau ha lautolu.
3. Ko e ha mo e ko e heigoa ne hataki e Iehova a tautolu mai he hagahaga kelea fakaagaga?
3 Manamanatu pihia foki a Iehova ma e tau momoui ha tautolu. Ko e Matua fakaalofa, kua fakaako e ia a tautolu puhala mai he hana Kupu mo e hana fakatokatokaaga ke aoga ai a tautolu. (Isaia 48:17) Ko e vala he fakaholoaga fakaako faka-Atua nei kua putoia e hatakiaga kua “fakafano mai” tumau ki a tautolu hagaao ke he tau matahele fakaagaga ke maeke ia tautolu ke feaki e matakutaku malolo ke he hagahaga kelea pihia. (2 Nofoaga he Tau Patuiki 36:15; 2 Peteru 3:1) Tali mai he fakamauaga tala kua loga e tau hagahaga kelea fakaagaga nukua maeke ke kalo kehe mai ai mo e fehola kehe mai he matematekelea ‘ane mai ke ha ha he tau tagata na e tau loto ke matakutaku ke he Atua, mo e omaoma ai ke he hana a tau poaki.’ (Teutaronome 5:29) He “tau aho uka” nei, maeke fefe a tautolu ke feaki e tau loto ha tautolu ke matakutaku ke he Atua mo e fakamamao mai he hagahaga kelea fakaagaga?—2 Timoteo 3:1.
Hahaga Kehe Mai he Kelea
4. (a) Ko e heigoa e vihiatia kua lata he tau Kerisiano ke feaki? (e) Fefe e logonaaga ha Iehova hagaao ke he mahani agahala ha tautolu? (Kikite e matahui tala.)
4 Kua fakamaama he Tohi Tapu “ko e matakutaku kia Iehova ko e fakavihia ke he mahani kelea haia.” (Tau Fakatai 8:13) Kua fakamaama he tohi fakakakano kupu he Tohi Tapu e fakavihia nei ko e “aga he loto ke he tau tagata mo e tau mena nukua totoko, vihiatia, teteki mo e tau manako he taha ke nakai matutaki po ke fakafetui ki ai.” Ti kua putoia he matakutaku mahani Atua e fakamamao he loto po ke vihiatia ke he tau mena oti kua kelea ki mua ha Iehova. * (Salamo 97:10) Kua fakamalolo a tautolu ke hahaga kehe mai he kelea, tuga ni ka une mamao a tautolu mai he tila feutu ka fakaofoofo mai e matakutaku hopoate ha tautolu. “Ko e matakutaku foki kia Iehova kua kalo kehe ai e tau tagata mo e mahani kelea,” he talahau he Tohi Tapu.—Tau Fakatai 16:6.
5. (a) Fakamalolo fefe e tautolu e matakutaku mahani Atua mo e ha tautolu a fakavihia ma e mena kua kelea? (e) Ko e heigoa he fakamauaga tala he motu ha Isaraela kua fakaako ki a tautolu hagaao ke he mena nei?
5 Peehi malolo e tautolu e matakutaku mitaki nei mo e fakavihia e mena kelea he manamanatu ke he tau fua hagahaga kelea mai he agahala. Kua fakamafana mai he Tohi Tapu to helehele e tautolu e mena kua gana e tautolu—he gana e tautolu ke he tino po ke agaga. (Kalatia 6:7, 8) Ma e kakano nei ne fakamaama fakamahino e Iehova e tau fua mamahi moli he tiaki hana tau fakatufono mo e tiaki e tapuakiaga moli. Ane mai ai fai puipui faka-Atua, to pule katoa e tau katofia favale mo e malolo ke he motu tote mo e kaumahala ko Isaraela. (Teutaronome 28:15, 45-48) Ko e fakahiku mamahi he nakai omaoma ha Isaraela ne fakamau matafeiga mai he Tohi Tapu “mo tomatomaaga” ke maeke ia tautolu ke ako mai ai mo e feaki e matakutaku mahani Atua.—1 Korinito 10:11.
6. Ko e heigoa falu fakafifitakiaga faka-Tohiaga Tapu kua manamanatu a tautolu he ako e matakutaku mahani Atua? (Kikite e matahui tala.)
6 Kehe mai he mena ne tupu ke he motu katoa ha Isaraela, kua moua mai he Tohi Tapu e tau tala moli ke he moui he tau tagata ne mahani mahekeheke, mahani faivao, lotokai, po ke fakatokoluga. * Ko e falu he tau tagata nei ne fekafekau ki a Iehova ke he loga e tau tau, ka e he taha magaaho ni he tau momoui ha lautolu, ko e matakutaku ha lautolu ke he Atua kua potake, ti helehele e lautolu e fua mamahi. Ko e manamanatu ke he tau fakafifitakiaga faka-Tohi Tapu ia kua fakamalolo e fifiliaga ha tautolu ke nakai taute e tau hehe pihia. Ko e momoko ha ia kaeke kua leo a tautolu ke moua e malaia ato uta e hatakiaga he Atua ke he tau loto! Kehe mai he mena kua fa talitonu, ko e mena iloa—mahomo atu ke he manako fakatagata—nakai ko e takitakiaga ne mua.—Salamo 19:7.
7. Ko hai kua uiina e Iehova ke he fale uta fano fakatai hana?
7 Ko e taha kakano malolo ma e feakiaga he matakutaku mahani Atua ko e manako ha tautolu ke puipui e fakafetuiaga ha tautolu mo e Atua. Kua matakutaku a tautolu ke fakaita a Iehova ha kua ofania e tautolu hana tuaga kapitiga. Ko hai ne manamanatu e Atua ki ai ke eke mo kapitiga, ko e taha kia ka uiina e ia ke he hana fale uta fano fakatai? Ko ia ni kua “fano mo e mahani hako, mo e tututonu.” (Salamo 15:1, 2) Ka tokiofa e tautolu e fakafetuiaga uho nei mo e Tufuga ha tautolu, to mataala a tautolu ke o fakahakohako ki mua hana.
8. Uta fakateaga fefe he falu Isaraela he vaha ha Malaki e tuaga kapitiga mo e Atua?
8 Momoko ai, ne uta fakateaga he falu Isaraela he vaha ha Malaki e tuaga kapitiga mo e Atua. He nakai matakutaku mo e nakai fakalilifu a Iehova, ne foaki e lautolu e tau manu gagao mo e kulikuli ke he fatapoa hana. Ko e nakai matakutaku mahani Atua ha lautolu ne fakaata foki he tau aga ha lautolu ke he fakamauaga. He maeke ke mau e tau tamafine, ne tiaki e lautolu e tau hoana ne mau e lautolu he vaha fuata ma e tau kakano nakai aoga. Ne tala age a Malaki ki a lautolu na vihiatia e Iehova e “tiaki hoana” mo e ko e aga fakavaia ha lautolu ne o kehe mai i mua he Atua ha lautolu. Maeke fefe e Atua ke fiafia ke he tau poa ha lautolu he magaaho ka puke e fatapoa he tau hihina mata—ko e tau hihina mata mamahi he tau hoana ne tiaki e lautolu? Ko e nakai fakalilifu fakalialia pihia ma e hana tau tutuaga ne omoi a Iehova ke huhu: “Ko fe kia haku a lilifu?”—Malaki 1:6-8; 2:13-16.
9, 10. Fakakite fefe e tautolu e aoga he kapitiga mo Iehova?
9 He vaha nei, kua kitia pihia e Iehova e loto malipilipi he tokologa he tau hoa fakamoli mo e fanau ne kua mamahi ha ko e tau tane mo e tau matua tane po ke tau hoana mo e tau matua fifine mahani lotokai mo e feuaki. Kua fakamamahi moli a ia. Ko e kapitiga he Atua ka kitia e tau mena he puhala kua kitia he Atua ki ai mo e to ukufakina ke fakamalolo hana a fakamauaga, tiaki e manamanatuaga fakalalolagi kua fakateaga e aoga he pipi he fakamauaga, mo e “fehola kehe . . . he feuaki.”—1 Korinito 6:18.
10 Ke he fakamauaga mo e falu fahi foki he tau momoui ha tautolu, ko e vihiatia ma e tau mahani kelea oti ke he fofoga ha Iehova, mo e loto fakaaue kua hokulo ma e hana tuaga kapitiga, ka tamai e fiafia mo e talia ha Iehova. Ne talahau fakamalolo he aposetolo ko Peteru: “Ko e moli, kua iloa e au nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.” (Gahua 10:34, 35) Ha ha ia tautolu loga e fakataiaga faka-Tohi Tapu nukua fakakite e puhala kua omoomoi he matakutaku mahani Atua e tau tagata ke taute e mena ne hako ke he tau tutuaga kamatamata kehekehe.
Tokotolu ne Matakutaku ke he Atua
11. Ke he tau tutuaga fe ne talahau ai a Aperahamo ko e “matakutaku Atua”?
11 Ha ha i ai taha e tagata he Tohi Tapu ne fakamaama e Iehova ko e kapitiga hana—ko e tupuna ko Aperahamo. (Isaia 41:8) Kua kamatamata e matakutaku mahani Atua ha Aperahamo he magaaho ne tala age e Atua ki a ia ke poa hana tama, ko Isaako, ka fakamoli he Atua hana maveheaga to eke e fanau ha Aperahamo mo motu lahi. (Kenese 12:2, 3; 17:19) To kautu nakai e “kapitiga he Atua” mai he kamatamata mamahi nei? (Iakopo 2:23) He magaaho ne lagaki e Aperahamo e titipi ke keli aki a Isaako, ne pehe e agelu ha Iehova: “Tokai, neke hoko hāu a lima ke he tama, aua foki neke eke e koe ha mena kia ia; ha kua iloa tuai e au kua matakutaku a koe ke he Atua, ha kua nakai lamakai a koe he tama hau, ko e hau a tama tokotaha, ka e tuku mai ni e koe a ia kia au.”—Kenese 22:10-12.
12. Ko e heigoa ne omoi e matakutaku mahani Atua ha Aperahamo, ti fakakite fefe e tautolu e aga pihia?
12 Pete ni kua fita he fakamoli a Aperahamo mo tagata matakutaku ki a Iehova, he magaaho ia ne fakakite e ia e matakutaku mahani Atua hana ke he puhala mua ue atu. Ko e manako hana ke poa a Isaako ne mahomo atu mai he fakakite e omaoma fakalilifu. Kua omoomoi ai he falanaki katoatoa a Aperahamo ko e to fakamoli he Matua hana he lagi e maveheaga Hana he fakaliu tu mai a Isaako. Ne tohi e Paulo, ko Aperahamo kua “mau foki hana manatu kua maeke [he Atua] ke eke e mena ne talahau mai e ia.” (Roma 4:16-21) Kua mautali nakai a tautolu ke taute e finagalo he Atua pete kua lata mo e tau foakiaga lalahi? Ha ha nakai ia tautolu e mauokafua katoatoa to tamai he omaoma pihia e tau aoga tukulagi, he iloa ko Iehova e “taui mai a lautolu kua kumi fakamakutu kia ia”? (Heperu 11:6) Ko e matakutaku moli haia ke he Atua.—Salamo 115:11.
13. Ko e latatonu he ha e fakamaama a Iosefa ki a ia ni ko e tagata ‘matakutaku ke he Atua moli’ ia?
13 O mai la tautolu ke kumikumi taha fakataiaga foki he matakutaku mahani Atua—ha Iosefa ia. Ko e fekafekau he fale ha Potifara, ne feleveia mau a Iosefa mo e kamatamata ke he mahani faivao. Nakai fai puhala ke fakamamao a ia mai he femataaki mo e hoana he iki hana, ne fakatumau ke feaki atu e mahani feuaki ki a ia. Fakahiku ai, ti ‘toto atu ai ke he hana tapulu,’ ne ‘hola, kua fano ni a ia ki fafo.’ Ko e heigoa e mena ne fakaohooho a ia ke mafiti e liliu kehe mai he mahani kelea? Nakai fakauaua ai, ko e matapatu puhala ko e matakutaku ke he Atua, ko e manako ke fakamamao mai he taute e “mena kelea lahi ia mo e hala . . . ke he Atua?” (Kenese 39:7-12) Ne latatonu mogoia e fakamaamaaga ha Iosefa ko e tagata “matakutaku ke he Atua.”—Kenese 42:18.
14. Fakakite fakaalofa fefe e Iosefa e matakutaku moli ke he Atua?
14 He tau tau hake ne fakafehagai a Iosefa mo e tau matakainaga hana, ne fakafua fakakelea a ia ke he tupaaga. Na kua mukamuka ia ia ke fakaaoga e manako lahi ha lautolu ke he tau mena kai mo magaaho ke taui atu ha lautolu a mahani kelea ki a ia. Ka ko e taute fakakelea e tau tagata kua nakai fakakite e matakutaku ke he Atua. (Levitika 25:43) Ti ko e magaaho ne kitia e Iosefa e fakamoliaga lahi kua hiki e tau loto he tau matakainaga hana, ne fakamagalo fakaalofa e ia a lautolu. Tuga a Iosefa, ko e matakutaku mahani Atua ha tautolu ka omoi a tautolu ke kautu e mahani mitaki ke he mahani kelea, ti taofi foki a tautolu he mokulu ke he kamatamata.—Kenese 45:1-11; Salamo 130:3, 4; Roma 12:17-21.
15. Fakafiafia he ha he mahani ha Iopu e loto ha Iehova?
15 Ko Iopu taha fakafifitakiaga mitaki ne matakutaku ke he Atua. Ne pehe a Iehova ke he Tiapolo: “Kua manamanatu nakai a koe ke he fekafekau haku ko Iopu, kua nakai ha ha i ai taha ke tatai mo ia ke he lalolagi, ko e tagata mahani hakohako mo e mahani tonu, kua matakutaku a ia ke he Atua mo e kalo kehe mo e tau mena kelea?” (Iopu 1:8) Ke he tau tau loga, ko e mahani tututonu ha Iopu ne fakafiafia e loto he hana Matua he lagi. Ne matakutaku a Iopu ke he Atua ha kua iloa e ia ko e mena tonu haia ke taute mo e ko e puhala mitaki lahi ke moui ai. “Kitiala, ko e matakutaku ke he Iki, ko e iloilo ni haia,” ne talahau e Iopu, “ko e kalo kehe mo e mahani kelea, ko e pulotu ni haia.” (Iopu 28:28) Ko e tagata fai hoana, ne nakai manako loto a Iopu ke he tau tamafine, po ke feaki e tau lagatau faivao he hana loto. Pete ni ko e tagata monuina, ne matauka a ia ke tua ke he tau koloa, ti tiaki foki e ia e tau puhala kehekehe he tapuaki tupua.—Iopu 31:1, 9-11, 24-28.
16. (a) Ke he tau puhala fe ne fakagahuahua e Iopu e ofania? (e) Fakakite fefe e Iopu kua nakai taofi e ia e fakamagaloaga?
16 Ko e matakutaku ke he Atua, kua kakano ko e taute e mena kua mitaki ti pihia mo e hola kehe mai he mena kelea. Ti, tupu e momokoina ha Iopu ke he tau matapouli, kulikuli, mo e mativa. (Levitika 19:14; Iopu 29:15, 16) Ne maama e Iopu “kua lata ke ofania a ia ne lolelole he hana kapitiga; neke tiaki e ia e matakutaku kia ia Hana e malolo oti kana.” (Iopu 6:14) Ko e taofi e ofania kua maeke ke taofi foki e fakamagalo po ke fakafualoto. He puhala he Atua, ne liogi a Iopu ke lata mo e tau kapitiga tokotolu hana, ne fakatupu e mamahi lahi ki a ia. (Iopu 42:7-10) Maeke nakai a tautolu ke fakakite e aga fakamagalo pihia ke he tau matakainaga talitonu kua fakamamahi a tautolu ke he tau puhala kehekehe? Ko e liogi moli mai he loto ke lata mo ia kua fakaita mai nukua lahi e mena kua lagomatai a tautolu ke kautu mai he ita. Ko e tau monuina ne olioli e Iopu ma e matakutaku mahani Atua hana kua foaki mai ki a tautolu e fakakiteaga fakamua he ‘lahi mitaki he totonu ha Iehova kua taute ma lautolu kua matakutaku kia ia.’—Salamo 31:19; Iakopo 5:11.
Matakutaku ke he Atua mo e Matakutaku ke he Tagata
17. Ko e heigoa ka taute he matakutaku ke he tau tagata ki a tautolu, ka ko e ku he ha e matakutaku pihia?
17 Ha kua omoi he matakutaku ke he Atua a tautolu ke taute e mena kua hako, kua maeke he matakutaku ke he tagata ke fakalolelole e tua ha tautolu. Ma e kakano nei, he fakamalolo e tau aposetolo ke eke mo tau tagata fakamatala makai he tala mitaki, ne tala age a Iesu ki a lautolu: “Aua foki neke matakutaku a mutolu kia lautolu ke kelipopo e agaga; ka e mitaki ke matakutaku a mutolu kia ia kua maeke ke fakaoti e agaga katoa mo e tino i Kehena.” (Mataio 10:28) Na ku e kitiaaga he matakutaku ke he tau tagata, he fakamaama e Iesu, ha kua nakai maeke he tau tagata ke moumou e amaamanakiaga ha tautolu ma e moui anoiha. Lafi ki ai, kua matakutaku a tautolu ke he Atua ha kua mailoga e tautolu hana malolo homo ue atu, he fakatatai mo e malolo he tau motu oti kana kua tote lahi. (Isaia 40:15) Tuga a Aperahamo kua mauokafua katoatoa a tautolu ke he malolo ha Iehova ke fakaliu tu mai e tau fekafekau fakamoli Hana. (Fakakiteaga 2:10) Ti, kua talahau a tautolu mo e mauokafua: “Kaeke ke kau e Atua mo tautolu, ko hai kia taha ke paleko mai kia tautolu?”—Roma 8:31.
18. Ko e tau puhala fe ne palepale e Iehova a lautolu kua matakutaku ki a ia?
18 Kaeke kua totoko e tagata mai he magafaoa ha tautolu po ke tama pule kelea he aoga, to moua e tautolu ko e “matakutaku kia Iehova, ha ha i ai e mena tumau ke tua ki ai.” (Tau Fakatai 14:26) Liogi a tautolu ke he Atua ma e malolo, he iloa to logona e ia a tautolu. (Salamo 145:19) Nakai nimo e Iehova a lautolu kua matakutaku ki a ia. Puhala he perofeta hana ko Malaki, kua fakamafana e ia a tautolu: “Ti fevagavagahau aki a lautolu ne matakutaku kia Iehova; kua hagao mai foki a Iehova mo e fanogonogo mai; ti tohi ai e tohi ke fakamanatu ai ki mua hana, ma lautolu ne matakutaku kia Iehova, mo e manamanatu ai ke he hana higoa.”—Malaki 3:16.
19. Ko e heigoa e tau vahega matakutaku ka fakahiku, ka e kua a lautolu ka tumau tukulagi?
19 Kua tata mai e magaaho ka tapuaki he tau tagata oti he lalolagi a Iehova mo e to galo e matakutaku ke he tagata. (Isaia 11:9) To galo tukulagi foki e hoge, gagao, matahavala, mo e felakutaki. Ka ko e matakutaku ke he Atua to tumau tukulagi ia he fakatumau e tau fekafekau fakamoli hana he lagi mo e lalolagi ke fakakite ki a ia e fakalilifu, omaoma, mo e lilifu kua latatonu. (Fakakiteaga 15:4) Ato hoko atu ki ai, kia tokaloto e tautolu e tomatomaaga fakalagalaga ha Solomona: “Aua neke mahekeheke e loto hāu ke he tau tagata hala; ka kia matakutaku a koe kia Iehova ke he aho katoa. Ko e mena fai fakahikuaga ni, ti nakai noa hāu a amaamanaki.”—Tau Fakatai 23:17, 18.
[Tau Matahui Tala]
^ para. 2 Kua galo he falu tagata lalahi ha lautolu a matakutaku he hagahaga kelea ka matutaki mau e gahua ha lautolu mo e tau tutuaga hagahaga kelea. Ka huhu ko e ha ne tokologa e tau tagata talaga fale ne galo e matalima, kua tali ai he tagata talaga makaka: “Kua hopoate a lautolu he tau hele hila mafiti.”
^ para. 4 Kua logona foki e Iehova e vihiatia nei. Ma e fakatai, kua fakamaama he Efeso 4:29 e vagahau kelea ko e “kupu kelea.” Ko e kupu Heleni ne fakaaoga ma e “kelea” kua hagaao ke he fua akau popo, ika, po ke vala manu kua namu. Ko e tau kupu pihia kua fakatino malolo e teteki kua lata ke moua e tautolu ke he vagahau ekefakakelea po ke kiva. Tuga a ia, kua fa fakamaama e tau tupua he tau Tohiaga Tapu ko e [“pilo,” NW].” (Teutaronome 29:17; Esekielu 6:9) Ko e haga kehe pauaki mai ha tautolu he pilo, po ke otaota, kua lagomatai a tautolu ke maama e logonaaga vihiatia he Atua ke he ha faga tapuakiaga tupua.
^ para. 6 He puhala he fakafifitakiaga, manamanatu ke he tau talahauaga faka-Tohi Tapu ki a Kaino (Kenese 4:3-12); Tavita (2 Samuela 11:2–12:14); Kehasi (2 Tau Patuiki 5:20-27); mo Usia (2 Nofoaga he Tau Patuiki 26:16-21).
Manatu Nakai e Koe?
• Ako fefe e tautolu ke vihiatia e mena kua kelea?
• Uta fakateaga fefe he falu Isaraela he vaha ha Malaki e kapitiga mo Iehova?
• Ko e heigoa ka ako e tautolu mai ia Aperahamo, Iosefa, mo Iopu hagaao ke he matakutaku ke he Atua?
• Ko e heigoa e matakutaku ka nakai utakehe tukumalagi, mo e ko e ha?
[Tau Huhu he Fakaakoaga]
[Fakatino he lau 25]
To he tau matua pulotu e matakutaku mitaki he tau fanau ha lautolu
[Fakatino he lau 26]
Tuga ni e matakutaku ka utakehe a tautolu mai he matematekelea, kua uta kehe foki he matakutaku a tautolu mai he mena kua kelea