Tau Monuina he Tala Mitaki
Tau Monuina he Tala Mitaki
“Kua fakauku e Iehova au ke fakamatala e vagahau mitaki kia lautolu kua matematekelea; kua fakafano mai e ia au ke pipi e tau loto ne malipilipi . . . ke fakamafana a lautolu oti kua tagi.”—ISAIA 61:1, 2.
1, 2. (a) Kua fakakite e Iesu a ia ke eke mo heigoa, mo e fefe? (e) Ko e heigoa e tau monuina ne tamai he tala mitaki ne fakapuloa e Iesu?
KO E taha aho Sapati he mataulu he hana fekafekauaga, ko Iesu haia he sunako i Nasareta. Hagaao ke he fakamauaga, “ti tuku age kia ia e tohi he perofeta ko Isaia. Kua fofola e ia e tohi, ati moua ai e mena ne tohi ai, Ha ha i luga ia au e Agaga he Iki, ha kua fakauku e ia a au ke fakamatala e vagahau mitaki.” Ne matutaki a Iesu ke totou atu foki he tohi fakaperofeta. Ti nofo hifo a ia mo e pehe: “Ko e aho nai kua fakamoli ai e tohi nai he fanogonogo ki ai a mutolu.”—Luka 4:16-21.
2 He puhala nei, ne fakakite e Iesu a ia ko e tagata fakamatala ne kua mavehe mai, ko e tagata talahau he tala mitaki mo e tagata hahamo he mafanatia. (Mataio 4:23) Ti ko e tala mitaki moli haia ma Iesu ke talahau! Ne tala age a ia ke he hana tau tagata fanogonogo: “Ko au nai ko e maama he lalolagi; ko ia ke mui mai kia au, nakai fano a ia ke he pouli, ka e moua e ia e maama he moui.” (Ioane 8:12) Ne tala age foki a ia: “Kaeke ke tumau fakaoti a mutolu ke he haku a kupu, ko e tau tutaki moli haku a mutolu. To iloa foki e mutolu e mena moli, ko e mena moli foki ke toka noa ai a mutolu.” (Ioane 8:31, 32) E, ha ha ia Iesu e “tau kupu he moui tukulagi.” (Ioane 6:68, 69) Ko e maama, moui, toka noa—ko e tau monuina moli anei ke tokiofa!
3. Ko e heigoa e tala mitaki ne fakamatala he tau tutaki ha Iesu?
3 He mole e Penetekoso 33 V.N., ne matutaki he tau tutaki e gahua fakamatala ha Iesu. Ne fakamatala e lautolu “e tala mitaki . . . he kautu” ke he tau Isaraela mo e ke he tau tagata he tau motu. (Mataio 24:14; Gahua 15:7; Roma 1:16) Ko lautolu ne talia ne iloa a Iehova ko e Atua. Kua o mai kehe a lautolu he tupaaga fakalotu mo e fai vala he motu fakaagaga fou, ko e “Isaraela he Atua,” kua ha ha ia lautolu e amaamanakiaga he pule tukulagi he lagi mo e ha lautolu a Iki, ko Iesu Keriso. (Kalatia 5:1; 6:16; Efeso 3:5-7; Kolose 1:4, 5; Fakakiteaga 22:5) Ko e tau monuina uho moli a ia!
Fakaevagelia he Vaha Nei
4. Ko e heigoa e puhala nukua fakamoli aki e poakiaga ke fakamatala e tala mitaki he vaha nei?
4 He vaha nei, ko e tau Kerisiano fakauku, ne lalago he “moto tagata tokologa” tupu ki mua he ‘tau mamoe kehe,’ kua fakatumau ke fakamoli e poakiaga fakaperofeta ne foaki fakamua ki a Iesu. (Fakakiteaga 7:9; Ioane 10:16) Ko e fua, ko e tala mitaki hane fakamatala fakalaulahi kua nakai la kitia ia pihia fakamua. He 235 he tau motu mo e tau vala fonua, ne o atu e Tau Fakamoli a Iehova ke “fakamatala e vagahau mitaki kia lautolu kua matematekelea . . . ke pipi e tau loto ne malipilipi, ke fakamatala ai e tokanoaaga ke he kau mahala, mo e vetevete ai a lautolu ne lili. Ke ogoogo ai e tau ke fakaalofa mai ai a Iehova, mo e aho ke lalago ai he Atua ha tautolu; ke fakamafana ai a lautolu oti kua tagi.” (Isaia 61:1, 2) Ti, ko e gahua fakamatala Kerisiano kua matutaki ke ta mai e tau monuina ke he tokologa mo e mafanatia moli ki a “lautolu ha i ai ha matematekelea.”—2 Korinito 1:3, 4.
5. Hagaao ke he fakamatala e tala mitaki, kehe fefe e Tau Fakamoli a Iehova mai he tau lotu he Kerisitenitome?
5 Kua moli na fakatu he tau lotu he Kerisitenitome e tau puhala kehekehe he fakaevagelia. Tokologa ne fakafano atu e tau misionare ke liliuina e tau tagata he falu motu. Ma e fakatai, kua hokotaki he The Orthodox Christian Mission Center Magazine e gahua he tau misionare Ofotoko i Madagascar, Aferika toga, Tanzania, mo Zimbabwe. Pete ia, ko e Lotu Ofotoko, ke tuga e falu lotu he Kerisitenitome, kua laulahi he tau tagata i ai ne nakai fai vala he gahua pihia. Kehe ai, ko lautolu oti e Tau Fakamoli a Iehova ne tukulele kua eketaha ke taute e gahua fakamatala. Kua mailoga e lautolu ko e fakapuloa he tala mitaki ko e fakakiteaga he moliaga he tua ha lautolu. Ne pehe a Paulo: “Ko e loto ke talia ai, ke hoko mai ai e tututonu; ka ko e gutu ke talahau ai, ke hoko mai ai e fakamouiaga.” Ko e tua kua nakai omoi e taha ke he tau gahua, kua mate ni.—Roma 10:10; Iakopo 2:17.
Tala Mitaki kua Tamai e Tau Monuina Tukumalagi
6. Ko e heigoa e tala mitaki hane fakamatala he vaha nei?
6 Fakamatala he Tau Fakamoli a Iehova e tala mitaki nukua fahia ki ai. Kua hafagi e lautolu e tau Tohi Tapu ha lautolu mo e fakakite ki a lautolu kua talia na poa e Iesu hana moui ke foaki ke he tau tagata e puhala ke o atu ke he Atua, fakamagalo e tau hala, mo e amaamanakiaga he moui tukulagi. (Ioane 3:16; 2 Korinito 5:18, 19) Kua fakailoa e lautolu nukua fita he fakatu e Kautu he Atua ki luga he lagi i lalo hifo he Patuiki fakauku, ko Iesu Keriso, ti nakai leva to moumou e mahani kelea he lalolagi mo e matakite e fakafouaga he Parataiso. (Fakakiteaga 11:15; 21:3, 4) He fakamoli e perofetaaga ha Isaia, kua tala age a lautolu ke he tau katofia ha lautolu ko e magaaho anei he “tau ke fakaalofa mai ai a Iehova” nukua maeke agaia he tau tagata ke talia e tala mitaki. Nukua hataki foki e lautolu kua nakai leva to hoko mai e “aho ke lalago ai he Atua ha tautolu” ka tamai e Iehova e fakatulakiaga ke he tau tagata mahani kelea nakai tokihala.—Salamo 37:9-11.
7. Ko e heigoa e mena tupu kua fakatata e fakalatahaaga he Tau Fakamoli a Iehova, mo e ko e ha kua olioli e lautolu e kaufakalatahaaga pihia?
7 He lalolagi kua takatakai he tau matematekelea mo e tau mena fakalutukia, ko e tala mitaki ni hanei mo e tau aoga tukumalagi. Ko lautolu kua talia ai kua fai vala he fakamatakainaga auloa he tau Kerisiano he lalolagi katoa nukua nakai fakaata e tau kehekeheaga fakamotu, fakamagafaoa, po ke fakatupe ke vehe aki a lautolu. Kua ha ha ia lautolu e “fakaalofa ko e pipi haia ke fakamaopoopo ai.” (Kolose 3:14; Ioane 15:12) Ne kitia e mena nei he tau kua mole he falu motu i Aferika. He taha pogipogi ko e taone lahi ne aala ai ha ko e tau pa fana. Ko e latau fakalutukia ia ne tupu fakahaga. He magaho ne hagaaki atu ai ke he hikiaga he matakau fakamotu, ne tutuhia e magafaoa Fakamoli he fakahao e tau matakainaga Fakamoli he matakau fakamotu kehe. Ne tali he magafaoa: “Ko e Tau Fakamoli a Iehova ni kua nonofo he kaina ha mautolu.” Kia lautolu, ko e tau fekehekeheaki fakamotu ne nakai aoga; ko e fakaalofa Kerisiano—he fakamafana a lautolu ne manako lahi—kua aoga. Ko e taha he magafaoa nakai Fakamoli ne talahau: “Ko e tau tagata he tau lotu oti ne afokau e tau tagata tapuaki ha lautolu. Ko e Tau Fakamoli ni a Iehova ne nakai pihia.” Loga e tau mena tutupu pihia ne hokotaki mai he tau motu ne mavehevehe ha ko e latau fetokoaki kua fakakite ko e Tau Fakamoli a Iehova ni kua “fakaalofa ke he tau matakainaga.”—1 Peteru 2:17.
Kua Hiki he Tala Mitaki e Tau Tagata
8, 9. (a) Ko e heigoa e tau hikihikiaga nukua taute e lautolu kua talia e tala mitaki? (e) Ko e heigoa e tau mena tutupu ne fakakite aki e malolo he tala mitaki?
8 Ko e tala mitaki kua felauaki mo e mena ne fakahigoa e Paulo ko e “mouiaga nai katoa mo ia kua tatali.” (1 Timoteo 4:8) Kua nakai ni foaki e amaamanakiaga homo ue atu moli ma e vaha anoiha ka e tamai foki e fakatupu ki mua ke he “mouiaga nai.” Ko e tau tagata takitaha, kua takitaki he Kupu he Atua, ko e Tohi Tapu e Tau Fakamoli a Iehova he tamai e tau momoui ha lautolu ke lagotatai mo e finagalo he Atua. (Salamo 119:101) Ko e tau aga ha lautolu kua fakafou he feaki e lautolu e tau mahani tuga e tututonu mo e mahani fakamoli.—Efeso 4:24.
9 Onoono la ke he fakataiaga ha Franco. Ha ha ia ia e lekua he mahani ita. Ka fai mena ne hepe, kua hopo a ia ke he favale lahi mo e moumou e tau koloa. Ne fakaako he hoana hana e Tohi Tapu mo e Tau Fakamoli a Iehova, ti ko e fakafifitakiaga Kerisiano ha lautolu kua lagomatai fakahaga a Franco ke kitia na kua lata a ia ke hiki. Ne fakaako e ia e Tohi Tapu mo lautolu mo e fakahiku kua maeke ke fakakite e tau fua he agaga tapu he mafola mo e mahani fakalatalata. (Kalatia 5:22, 23) Ko ia taha he 492 ne papatiso i Belgium he tau he fekafekauaga 2001. Manamanatu foki ki a Alejandro. Ko e tama fuata tane ia ne hufia lahi ke he tau tulaki ne fakahiku ke moui he toloaga veve, mo e tatanaki ni ha mena ne moua ke fakafua ke totogi aki hana hufia he tulaki. He tu e 22 e tau ha Alejandro he moui, ne uiina he Tau Fakamoli a Iehova a ia ke fakaako e Tohi Tapu mo lautolu, ti talia e ia. Kua totou e ia e Tohi Tapu he tau aho takitaha mo e fano he tau feleveiaaga Kerisiano. Ne fakamea fakamafiti e ia e moui hana ti nakai la katoa e ono mahina, ne maeke a ia ke fakalataha ke he gahua fakamatala —ko e taha he 10,115 kua taute pihia he tau kua mole i Panama.
Ko e Tala Mitaki—Fakamonuina ki a Lautolu kua Mahani Molu
10. Ko hai kua talia e tala mitaki, ti hiki fefe e onoonoaga ha lautolu?
10 Ne perofeta e Isaia to fakamatala e tala mitaki ki a lautolu kua mahani molu. Ko hai a lautolu nei kua mahani molu? Ko lautolu haia ne fakamaama he tohi ha Gahua kua “kotofa ke he moui tukulagi.” (Gahua 13:48) Ko lautolu kua mahani tokolalo nukua moua he tau tuaga oti he kaufakalatahaaga kua hafagi e tau loto ha lautolu ke he fekau he kupu moli. Ne ako e lautolu ia ko e taute e finagalo he Atua kua tamai e tau monuina ue atu nukua kehe mai he mena kua foaki he lalolagi nei. (1 Ioane 2:15-17) Ti maeke fefe mogoia e gahua fakamatala ha lautolu ko e Tau Fakamoli a Iehova ke hokotia ke he tau loto?
11. Hagaao ki a Paulo, kua lata ke fakamatala fefe e tala mitaki?
11 Kia manamanatu la ke he fakafifitakiaga he aposetolo ko Paulo, ne tohi ke he tau Korinito: “Ko au foki, ko e tau matakainaga na e, ne fina atu au kia mutolu nakai fina atu ai au mo e tau kupu kua mua ue atu, po ke iloilo he haku a fakamatala atu kia mutolu e talahauaga ke he Atua, ha ko e mena mau tuai haku a manatu, ke nakai iloa e au ha mena ia mutolu ka ko Iesu Keriso ni, ko ia ne fakasatauro.” (1 Korinito 2:1, 2) Ne nakai lali a Paulo ke fakafiafia hana tau tagata fanogonogo aki hana fakaakoaga. Ne fakaako katoa e ia ke he tau fakamoliaga faka-Atua, tau mena moli ne fakamau he vaha nei he Tohi Tapu. Mailoga foki, ko e fakamaloloaga ha Paulo ke he hana matakainaga evagelia ko Timoteo: “Kia fakamatala atu e koe e kupu.” (2 Timoteo 4:2) Ko Timoteo haia ke fakamatala “e kupu,” ko e fekau he Atua. Ne tohi foki a Paulo ki a Timoteo: “Kia lalilali atu a koe kia eke a koe mo tagata kua fiafia ki ai e Atua, ko e ekegahua nakai fai mena ke mā ai, kua fakatokatoka fakahako e kupu moli.”—2 Timoteo 2:15.
12. Kua talia fefe he Tau Fakamoli a Iehova he vaha nei e tau kupu mo e fakafifitakiaga ha Paulo?
12 Ne muitua he Tau Fakamoli a Iehova e fakafifitakiaga ha Paulo, ti pihia ke he tau kupu hana ki a Timoteo. Kua mailoga e lautolu e malolo he Kupu he Atua ti fakaaoga fakamitaki ai he kumi e lautolu ke fakakite ke he tau katofia ha lautolu e tau kupu he amaamanakiaga mo e mafanatia. (Salamo 119:52; 2 Timoteo 3:16, 17; Heperu 4:12) Moli, kua fakaaoga fakamitaki e lautolu e tohi faka-Tohi Tapu ke maeke ia lautolu kua fiafia ke moua lahi e iloilo he Tohi Tapu he magaaho ata ha lautolu. Ka e kumi tumau a lautolu ke fakakite ke he tau tagata e tau kupu he Tohiaga Tapu. Kua iloa e lautolu ko e Kupu mai he agaga he Atua ka fakalagalaga e tau loto ha lautolu kua mahani fakatokolalo. Ti fakaaoga ai ke he puhala nai kua fakamalolo aki foki ni ha lautolu a tua.
“Fakamafana Ai a Lautolu Oti kua Tagi”
13. He tau 2001, ko e heigoa e tau mena tupu ne malikiti ke he manako he motu katoa ke foaki e fakamafanaaga ki a lautolu kua maanu?
13 Ko e tau 2001 ne putoia ai foki e tau matematekelea, ti ko e fua, kua tokologa lahi ne lata he fakamafana. Ia Sepetema e kua mole ne kitia e fakataiaga kehe ue atu he Tau Fahi Kaufakalataha, ne ha ha ai e tau tagata fakamatakutakuina ne moumou e World Trade Center i New York mo e Pentagon tata atu ki Washington, D.C. Ko e matakutakuina ha ia he moumouaga ia ma e motu katoa! He tutupu e tau mena ia, kua tutuli e Tau Fakamoli a Iehova ke fakamoli e poakiaga ha lautolu ke foaki e ‘fakamafanaaga ki a lautolu oti kua tagi.’ To fakakite he falu mena tutupu gahoa e puhala kua taute e lautolu e mena nei.
14, 15. Maeke fefe he Tau Fakamoli he ua e magaaho kehekehe ke fakaaoga fakamitaki e tau kupu Tohi Tapu ke fakamafana aki a lautolu kua maanu?
14 Ko e Fakamoli, ko ia ko e tagata fakamatala mau ne fina atu ke he fifine he puhala o hui mo e huhu ke he manatu hana hagaao ke he mena tupu laia ne taute he tau tagata fakamatakutakuina. Kua kamata e fifine ke tagi. Ne pehe e fifine kua momoko lahi a ia ti loto a ia ke foaki taha lagomatai. Ne tala age e Fakamoli ki a ia kua lahi e fakaalofa he Atua ki a tautolu oti, ti totou e ia e Isaia 61:1, 2. Ne hako tonu e tau kupu faka-Atua nei ke he fifine, ne talahau kua maanu e tau tagata oti. Ne talia e ia e tuleke mo e tala age ke he Fakamoli ke fina age ke he kaina hana.
15 Tokoua e Fakamoli ne taute e gahua fakamatala ne feleveia mo e tagata tane ne gahua he poko toka koloa hana. Ne foaki e laua ke fakakite e tau kupu fakamafana mai he tau Tohiaga Tapu ke lata mo e matematekelea tupu fou ke he World Trade Center. Ha ko e hana taliaaga ne totou e laua e 2 Korinito 1:3-7, ne putoia e tau kupu: ‘Fakamafanatia fakalahi mai ia Keriso.’ Ne fakaaue e tagata tane ha kua foaki he tau katofia Fakamoli hana e taha fakamafanaaga ke he falu mo e pehe: “Kia fakamonuina he Atua e gahua homo ue atu fa e taute e mutolu.”
16, 17. Ko e heigoa e tau mena tutupu ua ne fakakite e malolo he Tohi Tapu ke lagomatai a lautolu kua momoko po ke kapaletu ke he tau matematekelea?
16 Kua liu ahi atu e Fakamoli ke he tau tagata fiafia ne feleveia ai mo e tama tane he fifine ne fakakite fakamua e fiafia mo e fakamaama e ia kua manamanatu a ia hagaao ke he tau mena ne taute he tau katofia hana he mole laia e matematekelea lahi. Ne ofo e tagata tane ha kua foaki ni he Fakamoli hana magaaho ke aahi e tau tagata mo e fakakia atu ki a lautolu. Ne talahau e ia kua gahua tata lahi atu a ia ke he World Trade Center ti kitia katoa e mena ne hoko he magaaho ne moumou ai. He huhu a ia ko e ha ne fakaata he Atua e matematekelea, ne totou he Fakamoli e tau kupu mai he Tohi Tapu, putoia e Salamo 37:39, nukua talahau: “Mai ia Iehova e fakamouiaga he tau tagata tututonu; ko ia ni ko e taue ha lautolu ke he vaha matematekelea.” Ne huhu totonu e tagata tane hagaao ke he tuaga he Fakamoli mo e hana magafaoa, ne uiina a ia ke liu age, mo e fakakite e fakaaue mai he loto he ahi atu.
17 Ko e taha foki he tau afe ia lautolu ne maanu ne fakamafana he Tau Fakamoli a Iehova he aho hake he tau fakamatakutaku ko e fifine ne feleveia he Tau Fakamoli he o atu ke he tau katofia ha lautolu. Kua tupetupe lahi mahaki a ia ke he mena ne tupu mo e fanogonogo he totou e laua e Salamo 72:12-14: “Ko e mena laveaki e ia a ia ne nofogati he hana kalaga mai; katoa mo ia kua matematekelea, mo ia kua nakai fai lagomatai. To fakaalofa a ia kia ia kua lolelole, mo ia kua nofogati; to fakamoui e ia a lautolu kua nonofogati. To laveaki e ia a lautolu mai he favale mo e mahani kelea; ko e mena uho foki ha lautolu a tau toto kia ia.” Ko e kakano ha ia he tau kupu ia! Ne ole e fifine ke he Tau Fakamoli ke liu totou e tau kupu ia ti uiina a laua ke he fale hana ke matutaki e fakatutalaaga. He fakahikuaga he tutala, ne kamata ai e fakaako Tohi Tapu.
18. Maeke fefe e Fakamoli ke lagomatai hana tau katofia he magaaho ne uiina a ia ke liogi ke lata mo lautolu?
18 Taha e Fakamoli ne gahua he fale kai he matakavi mautu ne nakai fia loto e tau tagata he magaaho fakamua ke he tala mitaki he Kautu. Mole e tau matakutakuina, ne tuga e hopoate e motu. He afiafi Faraile he mole e moumouaga, ne uiina he takitaki he fale kai e tau tagata oti ki fafo mo e toto e tau kanela, ke fakamanatu he nakai falelea ke manatu aki a lautolu nukua mamate. He fakalilifu e tau logonaaga ha lautolu, ne fano e Fakamoli ki fafo mo e tu fakaeneene ai he hala o hui. Ne iloa he takitaki ko e fekafekau he Tau Fakamoli a Iehova a ia, ti mole e magaaho he fakamanatu, ne ole a ia ki ai ke hukui e tau tagata oti ke he liogi. Ne talia he Fakamoli. He hana liogi, ne totoku e ia e maanu he motu katoa ka e talahau kua lata e tau tagata maanu ke momoko mo e nakai fai amaamanakiaga. Ne vagahau a ia ke he magaaho ka nakai liu tupu foki e tau mena matakutakuina pihia mo e talahau ke fakatata lahi e tau tagata oti ke he Atua he mafanatia puhala mai he iloilo moli mai he Tohi Tapu. He oti e “Amene,” ko e takitaki—fakalataha mo e tau tagata ne molea e toko 60 i fafo he fale kai—ne o ke he Fakamoli, fakaaue ki a ia, mo e peka ki a ia, he talahau ko e liogi laia ne mua ue atu e mitaki he logona e ia.
Ko e Fakamonuina ke he Matakavi
19. Ko e heigoa e mena tupu kua fakakite kua mailoga he falu e tau tuaga tokoluga he Tau Fakamoli a Iehova?
19 Mua atu ke he magahala tonu nei, ne aoga lahi mahaki e Tau Fakamoli a Iehova ha ko e fakalataha atu ha lautolu—nukua talahau he tokologa. Maeke fefe he tau tagata fakatolomaki mafola, mahani fakamoli, mo e mahani mea ke eke mo fakalagalaga mitaki? He taha motu he Lotouho ha Asia, ne feleveia e Tau Fakamoli mo e tagata gahua ofisa litaea he matakau leveki fakamua he motu. Ne talahau e ia ne kotofa a ia taha magaaho ke kumikumi e tau fakatokatokaaga fakalotu kehekehe. He kumikumi e ia e Tau Fakamoli a Iehova, ne nava a ia he mahani fakamoli mo e mahani mitaki ha lautolu. Ne manamanatu lahi a ia ke he tua mauokafua ha lautolu mo e kitia ai ko e tau fakaakoaga ha lautolu kua fakave ke he tau Tohiaga Tapu. Ne talia he tagata tane nei e fakaako Tohi Tapu.
20. (a) Ko e heigoa ne hokotaki he gahua he Tau Fakamoli a Iehova he tau kua mole? (e) Ko e heigoa kua fakakite kua lahi agaia e gahua ke taute, ti fefe e onoonoaga ha tautolu ke he kotofaaga he gahua fakamatala?
20 Mai he tau mena tutupu nukua talahau he vala tala nei, mai he tau afe ka talahau ki ai, kua maaliali ai ne lavelave lahi e Tau Fakamoli a Iehova he tau he fekafekauaga 2001. * Ne tutala a lautolu mo e tau tagata totou miliona, ne fakamafana e lautolu e tokologa kua maanu, ti kua fakamonuina ai e gahua fakamatala ha lautolu. Ko e 263,431 ne fakakite e tukuleleaga ha lautolu ke he Atua he papatiso. Ko e numera he tau tagata fakamatala he lalolagi katoa ne malikiti ke he 1.7 e pasene. Ti ko e fakahikuaga ko e 15,374,986 ne fakalataha ke he Fakamanatuaga ke he tau tau takitaha he mate ha Iesu nukua fakakite kua lahi mahaki agaia e gahua ke taute. (1 Korinito 11:23-26) Kia fakatumau a tautolu ke kumi a lautolu kua mahani molu nukua talia ke he tala mitaki. Mo e pete ne fakatumau e fakaalofa ha Iehova, kia fakatumau a tautolu ke fakamafana a lautolu ne ‘loto malipilipi.’ Ko e kotofaaga monuina ha ia kua moua e tautolu! Kua taogo atu moli e tautolu e tau kupu ha Isaia: “To fiafia lahi au kia Iehova, to olioli haku loto ke he haku Atua.” (Isaia 61:10) Kia fakatumau e Atua ke fakaaoga a tautolu ke fakamoli e tau kupu fakaperofeta nei: “To fakatupu ai pihia he Iki ko Iehova e mahani tututonu mo e fakahekeaga ki mua he tau motu oti kana.”—Isaia 61:11.
[Matahui Tala]
^ para. 20 Ko e fakafonua he lau 29 ke he 32 kua foaki mai e hokotakiaga he gahua he Tau Fakamoli a Iehova he tau he fekafekauaga 2001.
Manatu Nakai e Koe?
• Maeke fefe a lautolu ne mahani molu ke monuina mai he tala mitaki ne fakamatala e Iesu?
• Ko e heigoa e tau monuina ne o mai ki a lautolu kua talia e gahua fakamatala he tau tutaki ha Iesu he senetenari fakamua?
• Maeke fefe ia lautolu ne talia he vaha nei ke monuina ha ko e tala mitaki?
• Fefe e onoonoaga ha tautolu ke he kotofaaga he eke mo tau tagata fakamatala?
[Tau Huhu he Fakaakoaga]
[Fakafonua he lau 29-32]
HOKOTAKI HE FEKAFEKAUAGA HE TAU HE 2001 HE TAU FAKAMOLI A IEHOVA HE LALOLAGI OTI
(Kikite pega volume)
[Tau Fakatino he lau 25]
Kua manatu tumau he Tau Fakamoli a Iehova e matagahua ke fakamatala
[Tau Fakatino he lau 27]
Ko lautolu kua talia ke he tala mitaki kua eke mo vala he fakamatakainaga fakalataha he lalolagi katoa