Iehova—Ko e Fakafifitakiaga Tokoluga he Mitaki
Iehova—Ko e Fakafifitakiaga Tokoluga he Mitaki
“Kia fakaheke atu a mutolu kia Iehova Sapaota, ha kua mitaki ni a Iehova.”—IEREMIA 33:11.
1. Ko e ha kua omoomoi a tautolu ke fakaheke e Atua ma e mitaki hana?
KUA mitaki a Iehova ko e Atua ke he tau puhala katoatoa. “Kua lahi ai pihia hana mitaki,” he talahau he perofeta ko Sakaria. (Sakaria 9:17) Moli, kua kitia e mitaki he tau mena oti ne taute he Atua he tauteute e lalolagi ke fiafia ai a tautolu. (Kenese 1:31) To nakai maama oti e tautolu e tau fakatufono halavihu ne fakaaoga he Atua he magaaho ne tufuga e ia e lagi mo e lalolagi. (Fakamatalaaga 3:11; 8:17) Ka ko e mena tote ne iloa e tautolu kua omoi aki a tautolu ke fakaheke e Atua ma e mitaki hana.
2. To fakakakano fefe e koe e mitaki?
2 Ko e heigoa e mitaki? Ko e mahani ne mahomo atu e mitaki. Ka kua mua atu ke he nakai ha ha ai he tau kelea oti. Ko e mahani mitaki, ko e taha fua he agaga, ko e fua gahuahua aoga. (Kalatia 5:22, 23) Kua fakakite e tautolu e mitaki he magaaho ne taute e tautolu e mena mitaki mo e tau gahua ke lagomatai falu. He fakatokatokaaga nei, ko e mena talahau ke mitaki he falu matakau kua liga kitia ke kelea ke he falu. Ka e, kaeke ke olioli e tautolu e mafola mo e fiafia, kua lata ke taha ni e fakatufono he mitaki. Ko hai kua maeke ke fakatu e fakatufono nei?
3. Ko e heigoa ne fakakite he Kenese 2:16, 17 hagaao ke he tuaga he mitaki?
3 Ne fakatokatoka he Atua e fakatufono he mitaki. He kamataaga he fakamauaga tuai he tagata, ko Iehova ne poaki ke he tagata tane fakamua: “Ko e tau akau oti kana ha he kaina ke kai ai ni e koe. Ka ko e akau ke iloa ai e mitaki mo e kelea, aua neke kai ai e koe; ha ko e aho ka kai ai e koe to mate ai ni a koe.” (Kenese 2:16, 17) E, kua lata e tau tagata ke hahaga ke he Tufuga ha lautolu ke iloa e mitaki mo e kelea.
Fakakite Noa he Mitaki
4. Ko e heigoa nukua taute he Atua ma e tau tagata tali mai he hala a Atamu?
4 Ko e amaamanakiaga ke fiafia tukumalagi he moui mitaki katoatoa kua fakahagahaga kelea he magaaho ne hala a Atamu he fakaheu ke fakailoa e tonu he Atua ke fakatokatoka e tau fakatufono he mitaki. (Kenese 3:1-6) Ka e, fakamua to fanau mai e fanau ha Atamu ko e tau hakega he hala mo e mate, ne talahau tuai he Atua e haele mai he Tega mitaki katoatoa. He hagaaki ke he “gata tuai,” ko Satani ko e Tiapolo, ne fakapuloa e Iehova: “To fakatupu e au e faitaua kia mua mo e fifine, ko e hau a [“tega”] foki mo e hana [“tega”]; to tatuki e ia hau a ulu, ka e tatuki ni e koe hana muihui.” (Fakakiteaga 12:9; Kenese 3:15, fakatatai NW) Ko e finagalo ha Iehova ke laveaki e tau tagata agahala. He fakakite noa he mitaki, ne taute e Iehova e fakaholoaga ke fakamoui a lautolu ne fakagahuahua e tua ke he poa lukutoto he Tama fakahele hana.—Mataio 20:28; Roma 5:8, 12.
5. Pete kua moua e tautolu e fatuakiloto kelea, ko e ha kua lata ia tautolu ke fakakite taha vala he mitaki?
5 Moli, ha ko e hala ha Atamu, ne moua e tautolu e fatuakiloto kelea. (Kenese 8:21) Ka kua fiafia ni he lagomatai e Iehova a tautolu ke fakakite e taha vala he mitaki. He fakatumau ke he tau mena ne ako mai he tau matatohi tapu uho hana, kua nakai ni ‘fakailoilo a tautolu ke moua e moui’ mo e ‘tauteute a tautolu ke he tau gahua mitaki oti kana,’ ka kua fakaata a tautolu ke taute e mena mitaki ki mua hana. (2 Timoteo 3:14-17) Ka ke aoga mai he fakaakoaga faka-Tohiaga Tapu mo e ke fakakite e mitaki, kua lata ia tautolu ke moua e aga he salamo ne lologo: “Kua mitaki a koe [Iehova], ti kua mitaki a koe; kia fakaako e koe au ke he hāu a tau fakatufono.”—Salamo 119:68.
Kua Fakalilifu e Mitaki ha Iehova
6. He mole he tamai he Patuiki ko Tavita e puha he maveheaga ki Ierusalema, ne uhu he tau Levi e lologo ne toka ai e tau talahauaga fe?
6 Ne fakailoa he Patuiki ko Tavita i Isaraela i tuai e mitaki he Atua mo e kumi e takitakiaga Hana. “Kua mitaki, mo e tututonu a Iehova,” he talahau e Tavita. “Ko e mena ia ke fakakite e ia e puhala ke he tau tagata hala.” (Salamo 25:8) Ko e fakaakoaga mai he Atua ne foaki ke he tau Isaraela ne putoia ai e tau fakatufono aoga lahi—ko e Tau Poakiaga Hogofulu—ne tohia he tau lapa maka mo e toka i loto he puha tapu ne ui ko e puha he maveheaga. He mole he tamai e Tavita e Puha ke he maga lahi ha Isaraela, ko Ierusalema, ne uhu he tau Levi e tau lologo ne ha ha ai foki e talahauaga nei: “Kia fakaheke atu ā mutolu kia Iehova ha kua mitaki ni a ia; ha kua tukulagi hana fakaalofa.” (1 Nofoaga he Tau Patuiki 16:34, 37-41) Ko e fiafia ha ia ke logona e tau kupu ia mai he tau laugutu he tau tagata lologo Levi!
7. Ko e heigoa ne tupu he mole he tamai e Puha ki loto he Tapu ue Atu mo e he mole e liogi fakauku ha Solomona?
7 Ko e tau kupu fakaheke ia ni ne fakamatalahi he magahala he fakauluaga he faituga ha Iehova, ne ta he tama ha Tavita ko Solomona. He mole e tuku e puha he maveheaga he Tapu ue Atu he faituga ta fou, ne kamata e tau Levi ke fakaheke ki a Iehova, “ha kua mitaki ni a ia, ha ko e mena tukulagi ni hana fakaalofa .” He magaaho ia, ne puke fakamana e faituga he aolagi ne fakatino ai e ha ha ai he lilifu ha Iehova. (2 Nofoaga he Tau Patuiki 5:13, 14) He oti e liogi fakauku ha Solomona, “ti to hifo ai e afi mai he lagi, mo e fakaoti ai e poa huhunu mo e tau poa.” He kitia e mena nei, ko e “fanau a Isaraela . . . [ne] fakaveveli fakafohifo ai a lautolu ke he tau maka tanaki mo laupapa, mo e hufeilo a lautolu, mo e fakaheke atu a lautolu kia Iehova, kua pehe atu, Ha kua mitaki ni a ia; ha ko e mena tukulagi ni hana fakaalofa.” (2 Nofoaga he Tau Patuiki 7:1-3) He mole e kaiaga ne 14 e aho, ne liliu e tau Isaraela ke he tau kaina ha lautolu “mo e olioli mo e loto fiafia ha ko e tau mena mitaki ne eke e Iehova kia Tavita, mo Solomona mo e hana motu ko Isaraela.”—2 Nofoaga he Tau Patuiki 7:10.
8, 9. (a) Pete he fakaheke he tau Isaraela a Iehova ma e mitaki hana, ko e heigoa e puhala ne tutuli e lautolu fakamui? (e) Ko e heigoa ne talahau tuai ma Ierusalema he puhala ia Ieremia, mo e fakamoli fefe e perofetaaga ia?
8 Ka e momoko ai, he nakai fakatumau e tau Isaraela ke moui fakatatai atu ke he tau lologo fakaheke ha lautolu ke he Atua. Fai magaaho, ko e tau tagata ha Iuta ‘ne fakaheke noa kia Iehova ke he tau laugutu ha lautolu.’ (Isaia 29:13) He nakai fakatatai atu ke he tau fakatufono he Atua ma e mitaki, ne kamata a lautolu ke taute e tau mena kelea. Mo e heigoa e tau mena kelea ne taute e lautolu? Nukua hala a lautolu he tapuaki tupua, feuaki, fakamamahi e tau nonofogati, mo e falu a hala fakalialia foki! Ko e fua, ne moumou ai a Isaraela mo e uta fakapaea e tau tagata Iuta ki Papelonia he 607 F.V.N.
9 Kua akonaki moli he Atua e tau tagata hana. Ka e he puhala he perofeta ko Ieremia, ne talahau tuai e ia to logona foki e leo ha lautolu i Ierusalema ke talahau: “Kia fakaheke atu a mutolu kia Iehova Sapaota, ha kua mitaki ni a Iehova, ha kua tukulagi ni hana fakaalofa.” (Ieremia 33:10, 11) Ti kua pihia ni e mena ne tupu. He mole e 70 e tau he malamalaega e motu, he 537 F.V.N. ne liliu e tau Iutaia ne toe ki Ierusalema. (Ieremia 25:11; Tanielu 9:1, 2) Ne liu a lautolu ati e fatapoa he kelekele he faituga he Mouga ko Moria mo e kamata ke foaki hake e tau poa i ai. Ko e fakaveaga he faituga kua fakatoka hifo he tau ke uaaki ne liliu ai a lautolu. Ko e magaaho fiafia ha ia! “Ne fakavē he tau tufuga ati fale e faituga a Iehova,” he talahau e Esera, “ti kotofa ai e tau ekepoa ne tapulu ai e lautolu, ha i ai foki e tau pu ne ulo, mo e tau tagata Levi ko e fanau a Asafo ha i ai e tau kumepalo, kua fakaheke atu a lautolu kia Iehova ke lata mo e pule a Tavita ko e patuiki a Isaraela. Ne lologo fetaliaki a lautolu, he fakaheke mo e fakaaue atu ai kia Iehova, ha kua mitaki a ia, kua tukulagi hana fakaalofa kia Isaraela.”—Esera 3:1-11.
10. Ko e heigoa e talahauaga kakano ne kamata mo e fakaoti aki e Salamo 118?
10 Ko e talahauaga pihia foki he fakaheke ne hagaao ke he mitaki ha Iehova kua kitia ai he tau numera he salamo. Ha ha ai ko e Salamo 118, ne uhu he tau magafaoa Isaraela ke fakahiku aki e fakamanatuaga he Paseka. Ne kamata mo e fakaoti e salamo aki e tau kupu: “Fakaheke ā mutolu kia Iehova, ha kua mitaki ni a ia; ha kua tukulagi ni hana fakaalofa.” (Salamo 118:1, 29) Liga ko e tau kupu fakahiku anei he fakaheke ne uhu e Iesu Keriso mo e tau aposetolo tua fakamoli hana he po fakamua to matulei a ia he 33 V.N.—Mataio 26:30.
“Kia Fakakite Mai kia Au Hau a Lilifu”
11, 12. He magaaho ne kitia maleku ia Mose e lilifu he Atua, ko e heigoa e fakapuloaaga ne logona e ia?
11 Ko e matutakiaga he vahaloto he mitaki ha Iehova mo e fakaalofa totonu hana kua taute fakamua he tau senetenari ato hoko e vaha ha Esera. Nakai leva e mole he tapuaki e tau Isaraela ke he punua povi auro he tutakale mo e kelipopo ai e tau tagata taute hehe, ne ole a Mose ki a Iehova: “Kia fakakite mai kia au hau a lilifu.” Mailoga kua nakai maeke a Mose ke kitia e fofoga Hana mo e moui, ne talahau e Iehova: “To fakafano atu e au haku a mitaki oti kana ki mua hau.”—Esoto 33:13-20.
12 Ne fano e mitaki ha Iehova ki mua ha Mose he aho hake he Mouga ko Sinai. He magaaho ia ne kitia maleku ia Mose e lilifu he Atua mo e logona e fakapuloaaga nei: “Ko Iehova, ko Iehova, ko e Atua fakaalofa hofihofi, mo e fakaalofa noa; kua fakatuai hana ita, to lahi e fakaalofa, to fakamoli; kua tumau hana fakaalofa to hoko ke he afe he tau hau; kua fakamagalo foki e ia e mahani hepehepe, mo e holifono, mo e hala, k[a] e nakai toka noa e ia a lautolu kua hala, ka e taui ni e hala he tau matua ke he ha lautolu a fanau, mo e fanau he ha lautolu a fanau, ke hoko ke he tolu mo e fa e hau.” (Esoto 34:6, 7) Kua fakakite he tau kupu nei e mitaki ha Iehova ne matutaki ke he fakaalofa hana mo e falu a puhala he aga hana. He manamanatu ke he tau mena nei ka lagomatai a tautolu ke fakakite e mitaki. Kia manamanatu fakamua a tautolu ke he fua ne totoku lagaua i loto he fakapuloaaga homo nei he mitaki he Atua.
“Ko e Atua . . . Lahi e Fakaalofa”
13. He fakapuloaaga he mitaki he Atua, ko e heigoa e fua ne totoku lagaua, mo e ko e ha ne latatonu ai?
13 “Ko Iehova ko e Atua . . . , lahi e fakaalofa . . . , kua tumau hana fakaalofa to hoko ke he afe he tau hau.” Ko e kakano foki he kupu Heperu ne fakaliliu “fakaalofa” ko e “fakaalofa fakamoli.” Ko e fua ni a ia ne tohi lagaua he fakapuloaaga he Atua ki a Mose. Ko e latatonu ha ia, ha ko e fua ne mua ha Iehova ko e fakaalofa! (1 Ioane 4:8) Ko e talahauaga talahaua he fakaheke ki a Iehova “ha kua mitaki ni a ia; ha kua tukulagi ni hana fakaalofa totonu” ne peehi e kakano he fua nei.
14. Ko hai ne olioli lahi e mitaki mo e fakaalofa he Atua?
14 Taha e fakakiteaga he mitaki ha Iehova kua “lahi e fakaalofa” hana. Kua kitia lahi e mena nei ke he leveki mitaki ne foaki e ia ke he tau tagata fekafekau tukulele mo e tua fakamoli hana. (1 Peteru 5:6, 7) Tuga he talahau fakamoli he Tau Fakamoli a Iehova, ko ia kua ‘fakatumau e fakaalofa’ ki a lautolu ne fakaalofa mo e fekafekau ki a ia. (Esoto 20:6) Ne nakai moua he motu Isaraela moli e fakaalofa, po ke fakaalofa fakamoli ha Iehova, kakano he tiaki e lautolu e Tama hana. Ka ko e mitaki mo e fakaalofa fakamoli he Atua ke he tau Kerisiano tua fakamoli he tau motu oti to eke ke tukumalagi tukumuitea.—Ioane 3:36.
Iehova—Fakaalofa Hofihofi mo e Fakaalofa Noa
15. (a) Ko e fakapuloaaga ne logona e Mose he Mouga ko Sinai kua hafagi aki e tau talahauaga fe? (e) Ko e heigoa ne putoia ke he fakaalofa noa?
15 Ne hafagi e talahauaga ne logona e Mose i luga he Mouga ko Sinai mo e tau kupu: “Ko Iehova, ko Iehova, ko e Atua fakaalofa hofihofi, mo e fakaalofa noa.” Ko e kupu Heperu ne fakaliliu “fakaalofa noa” kua hagaao foki ke he “manava kelekele” mo e teitei tatai ke he kupu ma e “fatu.” Kua putoia ai e fakaalofa noa ke he tau logonaaga feofanaki ne hokulo i loto he tagata. Ka kua mua atu e fakaalofa noa ke he momoko moli. Kua lata ke omoi a tautolu ke taute taha mena ke fakatotoka e mamahi he falu. Tuga anei, ne kitia he tau motua Kerisiano loto fakaalofa e lata ke fakaalofa noa ke he tau katofia talitonu, ‘he eke e fakaalofa noa mo e fakamakai’ ka lata ai.—Roma 12:8; Iakopo 2:13; Iuta 22, 23.
16. Ko e ha ne talahau ai kua fakaalofa hofihofi a Iehova?
16 Kua kitia foki e mitaki he Atua he hana fakaalofa hofihofi. Ko e tagata fakaalofa hofihofi kua “kitia ai he manamanatu ke he tau logonaaga he taha” mo e fakakite e ‘totonu fakahelehele ne mua atu ki a lautolu ne nonofo gati.’ Ko Iehova ko e fifitakiaga mitaki lahi he fakaalofa hofihofi he fakafehagai mo e tau fekafekau tua fakamoli hana. Ke tuga anei, he kakano he tau agelu, ne fakamalolo he fakaalofa hofihofi he Atua e perofeta fuakau ko Tanielu, mo e tala age ke he tamafifine taupou ko Maria e kotofaaga hana ke fanau a Iesu. (Tanielu 10:19; Luka 1:26-38) Ko e tau tagata ha Iehova, kua fakaaue a tautolu ke he hana puhala fakaalofa hofihofi he tutala mai ki a tautolu he tau lau he Tohi Tapu. Kua fakaheke e tautolu a ia ma e fakakiteaga nei he mitaki hana, mo e lali ke fakaalofa hofihofi ke he tau fehagai ha tautolu mo e falu. He magaaho ne liuaki mai e lautolu ne mahani fakalata ke he agaga e katofia talitonu “mo e loto he mahani molu,” ne lali a lautolu ke fakaeneene mo e fakaalofa noa.—Kalatia 6:1.
Ko e Atua kua Fakatuai Hana Ita
17. Ko e ha ne fakaaue ai a tautolu he “fakatuai [a Iehova] ke ita”?
17 “Ko e Atua . . . kua fakatuai hana ita.” Ko e tau kupu ia kua peehi taha fakakiteaga foki he mitaki ha Iehova. Kua fakauka a Iehova ke he tau kaumahala ha tautolu mo e tuku mai ki a tautolu taha magaaho ke kautu ke he tau lolelole lalahi mo e taute e tau tolomaki fakaagaga. (Heperu 5:12–6:3; Iakopo 5:14, 15) Ko e fakauka he Atua kua aoga foki ki a lautolu ne nakai la eke ia mo tau tagata tapuaki hana. Kua fai magaaho agaia a lautolu ke fai tali ke he ogo he Kautu mo e tokihala. (Roma 2:4) Ka e pete ni he fakauka a Iehova, kua omoi he mitaki hana a ia he falu magaaho ke fakakite e ita, tuga ne taute e ia he magaaho ne tapuaki e tau Isaraela ke he punua povi he Mouga ko Sinai. Nakai leva to fakakite e ita he Atua ke he puhala lahi ue atu he magaaho ka tamai e ia e fakaotiotiaga ke he fakatokaaga kelea ha Satani.—Esekielu 38:19, 21-23.
18. Hagaao ke he kupu moli, ko e heigoa e kehe he vahaloto ha Iehova mo e tau tagata takitaki?
18 “Ko Iehova, ko e Atua . . . to lahi . . . e fakamoli.” Ko e kehe lahi ha ia ha Iehova mai he tau tagata takitaki, ne taute e tau maveheaga lalahi mo e kaumahala ke fakamoli e tau maveheaga ia! Kehe mai, ko e tau tagata tapuaki ha Iehova kua maeke ke falanaki ke he tau mena oti ne talahau i loto he Kupu omoi he agaga hana. Ha kua lahi e fakamoli he Atua, kua maeke ia tautolu ke falanaki tumau ke he tau maveheaga hana. Ke he hana mitaki, ne tali tumau he Matua ha tautolu he lagi e tau liogi ha tautolu ma e kupu fakaagaga, he foaki fakalahi mai.—Salamo 43:3; 65:2.
19. Ko e heigoa e fakakiteaga kakano lahi he mitaki ne fakakite e Iehova ke he tau tagata tokihala?
19 “Ko Iehova, ko e Atua . . . kua fakamagalo foki e ia e mahani hepehepe, mo e holifono, mo e hala.” He hana mitaki, kua mautali a Iehova ke fakamagalo e tau tagata agahala ne tokihala. Kua lahi moli e fakaaue ha tautolu ha ko e Matua fakaalofa ha tautolu he lagi kua foaki mai e fakamagaloaga he puhala he poa ha Iesu. (1 Ioane 2:1, 2) Kua fiafia moli a tautolu, ha ko lautolu oti ne fakagahuahua e tua ke he lukutoto kua maeke ke olioli e fakafetuiaga mitaki mo Iehova, katoa mo e amaamanakiaga he moui nakai fai fakaotiaga he lalolagi fou hana ne mavehe. Ko e tau kakano hokulo ha ia ke fakaheke a Iehova ma e mitaki ne fakakite e ia ke he tau tagata!—2 Peteru 3:13.
20. Ko e heigoa e fakamoliaga ne ha ha ia tautolu kua nakai toka noa he Atua e kelea?
20 ‘Ka e nakai toka noa e Iehova a lautolu kua hala.’ Ko e taha kakano foki anei ke fakaheke a Iehova ma e mitaki hana. Ko e ha? Kakano ko e vala ne mua he mitaki kua nakai toka noa ha puhala kelea. Mua atu, he “fakakite mai e Iki ko Iesu mai he lagi, fakalataha mo e tau agelu he hana malolo,” to hoko e taui “kia lautolu kua nakai iloa e Atua, mo lautolu kua nakai omaoma ke he vagahau mitaki.” Ko lautolu ia to “fakahala ke he mahaikava tukulagi.” (2 Tesalonia 1:6-9) Ko e tau tagata tapuaki ha Iehova ne hao, to olioli e moui ke he katoatoaaga mo e nakai fai fakalavelave mai he tau tagata nakai mahani Atua, ne “nakai loto ke he mitaki.”—2 Timoteo 3:1-3.
Fifitaki e Mitaki ha Iehova
21. Ko e ha kua lata ia tautolu ke fakakite e mitaki?
21 Nakai fakauaua kua ha ha ia tautolu e tau kakano loga ke fakaheke mo e fakaaue ki a Iehova ma e mitaki hana. Ko e tau fekafekau hana, nakai kia lata ia tautolu ke lali fakalahi ke fakakite e fua nei? E, ha kua poaki he aposetolo ko Paulo e tau katofia Kerisiano: “Kia fifitaki a mutolu ke he Atua tuga e tau fanau fakahelehele.” (Efeso 5:1) Ne fakakite tumau he Matua ha tautolu he lagi e mitaki, ti kua lata ke taute pihia foki e tautolu.
22. Ko e heigoa ka manamanatu a tautolu ki ai he vala tala ka mui mai?
22 Kaeke tukulele mo e loto katoatoa a tautolu ki a Iehova, kitia maali ai kua manako moli a tautolu ke fifitaki e mitaki hana. Ha ko e ohi ha Atamu agahala a tautolu, kua nakai mukamuka ia tautolu ke taute e mena mitaki. Ka ko e vala tala ka mui mai, to kitia e tautolu ko e ha kua maeke ia tautolu ke fakakite e mitaki. To manamanatu foki a tautolu ke he tau puhala kehekehe kua maeke ia tautolu mo e kua lata ia tautolu ke fifitaki a Iehova—ko e fakafifitakiaga tokoluga he mitaki.
To Tali Fefe e Koe?
• Ko e heigoa e mitaki?
• Ko e heigoa e talahauaga faka-Tohiaga Tapu ne fakamaama e mitaki he Atua?
• Ko e heigoa falu fakakiteaga he mitaki ha Iehova?
• Ko e ha kua lata ia tautolu ke fifitaki e fakafifitakiaga he mitaki ha Iehova?
[Tau Huhu he Fakaakoaga]
[Fakatino he lau 10]
Ne akonaki e Iehova e tau tagata i tuai hana kakano he nakai moui a lautolu ke he tau talahauaga fakaheke ha lautolu
[Fakatino he lau 10]
Ne liliu a lautolu kua tua fakamoli ne toe ki Ierusalema
[Fakatino he lau 11]
Ne logona e Mose e fakapuloaaga homo lahi he mitaki he Atua
[Fakatino he lau 13]
Ko e mitaki ha Iehova kua kitia he puhala ne tutala mai ki a tautolu he tau lau he Tohi Tapu