Iloilo ke he Puhala ha Lautolu Ni

“HA HA i ai he tau tagata lalahi e iloilo, ka e ha ha i ai he tau fanau e iloilo ke he puhala ha lautolu ni,” he talahau he tala fakatai mai Nigeria. Kua kitia e Edwin, ko e taha motua Kerisiano i Nigeria, e moliaga he mena nei.

Taha e aho, ne moua e Edwin e puha tiniapa i lalo he laulau hana i kaina.

“Ko e ha hai e mena nai?” ne huhu age e Edwin ke he fanau tokotolu hana.

“Ko e haku,” e tali ha Emmanuel, ne valu e tau. Kua vave a ia ke tala age ko e puha pakafa hi nei ne 12 e senetimita nekua fakati a luga, ne talaga ma e tau mena fakaalofa hagaao ke he gahua he Tau Fakamoli a Iehova he lalolagi katoa. “Ha kua nakai fano au he tau aho oti ke he Fale he Kautu,” he fakamaama e ia, “ti fifili e au ke taute taha puha kaeke nakai fakaaoga e au e tupe fakatau kai haku, to tuku ai e au he puha.”

Na taha e puha he matua tane a Emmanuel i kaina ne fakaputuputu ki ai e tupe ke o atu he tau fonoaga fahimotu he tau. Ha ko e taha mena tupu fakalutukia he magafaoa, kua fakaaoga tuai e lautolu e tupe i ai. Ke leveki kua nakai fakaaoga e tupe fakaalofa hana ma e ha mena kehe, ne uta e Emmanuel e apa tuai ke he tagata taute pili ke pili ai. Ko e tagata taute pili, nukua iloa e kakano ma e apa, ne talaga e puha ma Emmanuel mai he tau valavala apa toe. Kua ole foki a Michael ma e taha puha, ko e tehina ne lima e tau ha Emmanuel.

Ofogia he mena ne taute he fanau, ne huhu age a Edwin kia lautolu ko e ha ne taute e lautolu e tau puha. Ti tala age e Michael: “Manako a au ke foaki e mena fakaalofa!”

Nakai iloa ke he tau mamatua ha lautolu, ka kua tuku kehe e Emmanuel, Michael, mo Uchei, ko e mahakitaga ha laua ne hiva e tau, e taha faahi tupe ma e mena kai ha lautolu ki loto he tau puha. Moua mai i fe e lautolu e iloilo? Tali he mogo ne lalahi hake e fanau ke kuku he tau lima ha lautolu e tupe, kua fakaako he tau matua ha lautolu a lautolu ke tuku e tau tupe ke he tau puha mena fakaalofa he Fale he Kautu. Moli ni, kua maama mitaki he fanau e fakaakoaga ha lautolu.

He mogo ne puke e tau puha, kua hele ai ke hafagi. Ne katoa ke $3.13 (U.S.) e tau tupe—nakai ko e tupe tote mai he motu ne fiha ni e tama teau tala ne moua he totogi he tau katoa. Ko e tau mena fakaalofa makai pihia ne tokotu aki e gahua fakamatala he Tau Fakamoli a Iehova anei ke 235 e tau motu ke he lalolagi katoa.