Tau Huhu he Tau Tagata Totou

Hoko ki fe e fakakaupaaga ke he fakamauaga he vahaloto he tau magafaoa ne tokai he Fakatufono faka-Mose, ne hagaao ke he tau Kerisiano he vaha nei?

Ko e Fakatufono ne foaki e Iehova ke he motu ha Isaraela kua tote e mena ne talahau hagaao ke he tau mau hoana mo e tau fakaholoaga. Pete ia, nukua fakatoka mai e tau fakatapuaga ke he falu a fakafetuiaga he fakamauaga. Ke fakatai ki ai, ia Levitika 18:6-20, ne moua e tautolu e tau kupu tohi ne fakatapu e tau fakafetuiaga ne putoia ke he “tagata he hana magafaoa.” Ne fakamatafeiga mai e vala tohi ia ke nakai lata e tagata he hana magafaoa ke fetauteaki e mahani fakatane mo e fifine. Moli, kua nakai ha ha e tau Kerisiano i lalo he Fakatufono faka-Mose po ke lili ke he tau poakiaga i ai. (Efeso 2:15; Kolose 2:14) Pete he pihia, kua nakai pehe e mena nei ke fakaheu noa e tau Kerisiano ke he lekua nei he magaaho ka fifili e tagata ke mau. Kua ha ha ai e tau kakano loga ke he mena nei ne tupu.

Ke kamata, ha i ai e tau fakatufono fakalalolagi ne pule ke he fakamauaga he vahaloto he tau magafaoa tino ne tata lahi, ti ko e tau Kerisiano kua latatonu ke omaoma ke he tau fakatufono he motu ne nonofo ai a lautolu. (Mataio 22:21; Roma 13:1) Moli, ko e tau fakatufono pihia kua kehe mai he taha motu ke he taha motu. Ko e laulahi he tau fakatufono fou pehenei kua fakave lahi ke he tau manatu hagaao ke he talagaaga fakatagata. Ko e moli anei, ko e tau fakamauaga he vahaloto he tau faoa tino ne tata kua hagahaga lahi ni ke fakamatematekelea e fanau ke he tau ukiuki mo e tau gagao he fakamauaga pihia. Ma e kakano nei mo e ha ko e ha lautolu a “omaoma ke he tau tui ne mua,” ne mau e tau Kerisiano ke fakatatai ke he tau fakatufono-fakamauaga he motu.

Ti ha ha ai e lekua ke he mena ka talia mo e nakai talia he maga ne nofo ai e tagata. Kua teitei ke ha ha he tau mahani fakamotu oti e tau fakatufono mo e aga fa mahani ke fakatapu e fakamauaga he vahaloto he tau tagata ne faoa tata he toto, ti fa mailoga e tau fakalatahaaga pihia mo mahani tiki ati fakataputapu ai. Pete kua kehekehe lahi e fakatapu he tau fakafetuiaga he tau mahani fakamotu, ne talahau he The Encyclopædia Britannica, “ko e kakano ne mua, ka fetataaki lahi e fakafetuiaga he vahaloto he tau tagata tokoua ne faoa he toto, kua malolo mo e tokoluga lahi e fakataputapu ke tiaki e tau fakafetuiaga he mahani tane mo e fifine he vahaloto ha laua.” Ko e mena ia, pete he nakai putoia ai e fakafetuiaga mahani tiki, kua nakai manako e tau Kerisiano ke fakaheu e tau aga fa mahani po ke ke he tau manamanatuaga tonuhia he maga, ke nakai tamai e talahaua kelea ke he fakapotopotoaga Kerisiano po ke higoa he Atua.—2 Korinito 6:3.

Nakai lata ke tiaki e loto manamanatu foaki-Atua ha tautolu. Ko e tau tagata oti kua fanau mo e pulotu ke he hako mo e hepe, mitaki mo e kelea. (Roma 2:15) Ne tala age he tau loto manamanatu ha lautolu ki a lautolu e mena mitaki mo e hako mo e mena ne nakai lata mo e fakateteki, ane mai kua fakakelea ai po ke fakamao he tau gahua fakalialia. Ne hagaao a Iehova ke he moli nei he magaaho ne foaki e ia ke he tau Isaraela e fakatufono hana ne totoko ke he fakamauaga he vahaloto he tau magafaoa tino ne tata. Kua totou e tautolu: “Aua neke eke e mutolu, tuga ne tau mena kua fa eke ke he motu ko Aikupito, ne nonofo ai a mutolu; ti ua eke foki e mutolu tuga ne tau mena kua fa eke ke he motu ko Kanana ka fakahoko atu e au a mutolu ki ai; aua neke fifitaki foki a mutolu ke he ha lautolu a tau mahani.” (Levitika 18:3) Kua tokiofa he tau Kerisiano e loto manamanatu fakave-Tohi Tapu ha lautolu mo e nakai fakaata ai ke fakakelea he tau pulotu fakahehe ke he hako mo e hepe he tau motu.—Efeso 4:17-19.

Ka ko e heigoa ka fakahiku aki e tautolu? Ha kua nakai ha ha e tau Kerisiano i lalo he Fakatufono faka-Mose, kua tala age fakamahino he tau loto manamanatu ha lautolu ki a lautolu ko e fakamauaga he vahaloto he tau faoa tino ne tata—tuga e matua tane mo e tama fifine, matua fifine mo e tama tane, tugaane mo e mahakitaga—kua nakai fakaata ke he kaufakalatahaaga he tau Kerisiano. * He holo ki mua e tau fakafetuiaga toto taha, ne mailoga he tau Kerisiano kua ha ha ai e tau fakatufono mo e tau poakiaga ne takitaki e fakamauaga fakamatafakatufono mo e ha ha ai e tau matafakatufono kua talia he kaufakalatahaaga mo e he mahani fakamotu. Kua lata e tau mena nei ke manamanatu fakaeneene ki ai ke maeke ia tautolu ke fakatatai atu ke he poaki faka-Tohi Tapu: “Kia eke e mutolu ke mitaki he fai hoana e tau tagata oti kana.”—Heperu 13:4.

[Matahui Tala]