Fahia ke he “Mena Mahukihuki ke he Tino”

“Ko e haku a fakaalofa noa kua lata ia mo koe.”—2 KORINITO 12:9.

1, 2. (a) Ko e ha kua nakai lata ia tautolu ke nakai ofo hagaao ke he moliaga kua fehagai a tautolu ke he tau kamatamataaga mo e tau lekua? (e) Ko e ha kua mauokafua a tautolu pete ko e tau kamatamata?

“KO LAUTOLU oti foki kua loto ke nonofo mo e mahani Atua kia Keriso Iesu, to hoko ni kia lautolu e favale.” (2 Timoteo 3:12) Ko e ha ne pihia ai? Ha kua talahau e Satani kua fekafekau e tagata ke he Atua he manako fulukovi, ti kua lali fakamakamaka a ia ke fakamoli e talahauaga nei hana. Lagataha ne hataki e Iesu e tau aposetolo tua fakamoli hana: “Kua manako a Satani kia mutolu, ke lulululu a mutolu tuga ne saito.” (Luka 22:31) Na iloa moli e Iesu ko e Atua ne fakaata a Satani ke kamatamata a tautolu he puhala he tau lekua fakamamahi. Ka kua nakai pehe e mena ia ko e tau mena uka oti ne fehagaao mo tautolu he mouiaga, kua tupu fakahako mai ia Satani po ke tau temoni hana. (Fakamatalaaga 9:11) Ka kua matamua a Satani ke fakaaoga ha puhala he malolo hana ke moumou e fakamoli ha tautolu.

² Ne talamai e Tohi Tapu ki a tautolu kua nakai lata a tautolu ke ofo ke he ha tautolu a tau kamatamata. Ko e ha mena ni ka tupu ki a tautolu, kua nakai kehe mo e nakai tupu fakalutukia. (1 Peteru 4:12) Ko e moli, kua “iloa e mutolu ha ne fakakatoatoa e tau mena mamahi ia ni ke he tau matakainaga ha [ta]utolu ha he lalolagi.” (1 Peteru 5:9) He vaha nei, kua peehi fakalahi atu a Satani ke he tau fekafekau oti he Atua. Kua fiafia lahi e Tiapolo ke kitia tautolu ne matematekelea he tau lekua tuga e tau mena mahukihuki. Ke kautu, ne fakaaoga e ia e fakatokaaga hana ke he puhala ka lafi ki mua po ke fakamania aki ha “mena mahukihuki ke he tino” ha tautolu. (2 Korinito 12:7) Pete ia, kua nakai lata ke toka e favale ha Satani ke moumou aki ha tautolu a fakamoli. Ke tuga ni ka ‘taute e Iehova e mena’ ma tautolu ke fakauka ke he tau kamatamata, to taute pihia foki e ia he magaaho ka fehagaao a tautolu mo e tau lekua ne tuga e tau mena mahukihuki ke he tino ha tautolu.—1 Korinito 10:13.

Puhala ke Fahia ke he Mena Mahukihuki

3. Fefe e tali ha Iehova he magaaho ne ole a Paulo ki a ia ke utakehe e mena mahukihuki ke he tino hana?

³ Ne olelalo e aposetolo ko Paulo ke he Atua ke utakehe e mena mahukihuki mai he tino hana. “Ne ole atu au ke he Iki ha ko e mena ia, kia fano kehe ai a ia ia au.” Ko e heigoa e tali ha Iehova ke he ole fakamakamaka ha Paulo? “Ko e haku a fakaalofa noa kua lata ia mo koe; ha kua  fakakatoatoa haku a malolo ke he lolelole.” (2 Korinito 12:8, 9) Kia kumikumi fakamatafeiga a tautolu ke he tali nei mo e kitia e puhala ka maeke ke lagomatai a tautolu ke fahia ke he ha lekua ne tuga e tau mena mahukihuki ne fakamamahi a tautolu.

4. Ko e tau puhala fe ne aoga mai a Paulo he fakaalofa noa ha Iehova?

⁴ Mailoga ne fakamalolo he Atua a Paulo ke fakaaue ke he fakaalofa noa nukua fita he foaki ki a ia he puhala ia Keriso. Haia, kua fakamonuina lahi a Paulo ke he tau puhala loga. Ne foaki fakaalofa e Iehova ki a ia e kotofaaga ke eke mo tutaki pete nukua eke a ia mo tagata totoko lahi he tau tagata tua ki a Iesu. (Gahua 7:58; 8:3; 9:1-4) Ati foaki e Iehova ki a Paulo e tau kotofaaga mitaki lahi loga he magaaho fakamui. Kua maamatika e fakaakoaga ia ki a tautolu. Pihia foki he tau magaaho kelea lahi, kua ha ha agaia ia tautolu e tau monuina loga ke fakaaue ki ai. Kia nakai lata ke toka e tau kamatamata ha tautolu ke fakanimo aki e tau mena mitaki loga ha Iehova.—Salamo 31:19.

5, 6. (a) Fakaako fefe e Iehova a Paulo ko e malolo faka-Atua ‘kua fakakatoatoa ke he lolelole’? (e) Fakakite moli fefe he fakafifitakiaga ha Paulo a Satani ko e fakavai?

⁵ Ko e fakaalofa noa ha Iehova kua lata tonu foki ke he taha puhala. Kua mua atu e malolo he Atua ke lagomatai a tautolu ke he tau kamatamata ha tautolu. (Efeso 3:20) Ne fakaako e Iehova ki a Paulo ko e malolo faka-Atua ‘kua fakakatoatoa ke he malolo.’ Fefe? Ne foaki fakaalofa e Ia ki a Paulo e malolo katoa ne lata mo ia ke fahia ke he tau kamatamata hana. Ko e mena ne tupu, ko e fakauka mo e falanaki katoatoa ha Paulo ki a Iehova, ne fakakite ke he tau Kerisiano oti kua kautu e malolo he Atua ke he tagata lolelole mo e agahala nei. Mogonei kia manamanatu e lauia ke he Tiapolo, ne talahau kua fekafekau ni e tau tagata ke he Atua he magaaho ka totoka mo e haohao mitaki e moui. Ko e fakamoli ha Paulo kua fua ke poki he peresona fatipiko ia!

⁶ Hanei a Paulo, ko e tagata kau mo Satani fakamua he hana totoko ke he Atua, ko e tagata favale fakaikaluga he tau Kerisiano, ko e Farasaio fakamoli, nukua nakai fakauaua, ne olioli e moui mahuiga ha kua fanau a ia ke he vahega maukoloa. Ka kua fekafekau a Paulo he mogonei ki a Iehova mo Keriso mo ‘muikau he tau aposetolo.’ (1 Korinito 15:9) He pihia, ne oma fakatokolalo a ia ke he pule malolo he kau fakatufono Kerisiano he senetenari fakamua. Ti fakauka fakamoli foki a ia pete ko e mena mahukihuki ke he tino hana. Ke he faguna ha Satani, ne nakai taute he tau kamatamata he moui e makutu ha Paulo ke temotemoai. Ne nakai lagataha ia Paulo ke galo e foliaga hana he amaamanaki ke fakalataha ke he Kautu he Keriso i luga he lagi. (2 Timoteo 2:12; 4:18) Nakai fai mena mahukihuki, pete ko e lahi fefe e mamahi, ka utakehe e makutu hana. Kia eke e makutu ha tautolu ke tumau ke malolo pihia! He fakamalolo a tautolu he puhala he tau kamatamata ha tautolu, ne fakatokoluga e Iehova a tautolu aki e kotofaaga  he lagomatai ke fakakite moli a Satani ko e pikopiko.—Tau Fakatai 27:11.

Aoga Lahi e Tau Foakiaga ha Iehova

7, 8. (a) Ko e heigoa e kakano ne fakamalolo e Iehova e tau fekafekau hana he vaha nei? (e) Ko e ha e totou mo e fakaako e Tohi Tapu ne aoga lahi ai ke fahia ke he mena mahukihuki ke he tino ha tautolu?

⁷ He vaha nei, kua fakamalolo e Iehova e tau Kerisiano tua fakamoli he kakano he agaga tapu, ko e Kupu hana, mo e fakamatakainaga Kerisiano ha tautolu. Ke tuga e aposetolo ko Paulo, kua lata ia tautolu ke tuku atu e tau mena ne fakaatukehe a tautolu ki a Iehova he liogi. (Salamo 55:22) Pete ka nakai utakehe he Atua e tau kamatamata ha tautolu, kua maeke ia ia ke foaki ki a tautolu e pulotu ke fahia ki ai, pihia foki ke he tau kamatamata ne uka lahi ke fakauka ki ai. Maeke foki ia Iehova ke tuku mai ki a tautolu e malolo—he mai ki a tautolu e “lahi ue atu he malolo”—ke lagomatai a tautolu ke fakauka.—2 Korinito 4:7.

⁸ Maeke fefe a tautolu ke moua e lagomatai pihia? Kua lata ia tautolu ke fakaako fakamakutu e Kupu he Atua, ha ko e mena to moua e tautolu i loto e tau fakamafanaaga moli hana. (Salamo 94:19) I loto he Tohi Tapu, kua totou e tautolu e tau kupu aamotia he tau fekafekau he Atua he ole a lautolu ma e lagomatai faka-Atua. Ko e tali ha Iehova, ne mahani ke fakaaoga e tau kupu fakamafana, ko e tau mena kai ke manamanatu fakahokulo ki ai. To fakamalolo he fakaakoaga a tautolu, ti ko e ‘lahi ue atu he malolo, kua nakai mai ia tautolu ka he Atua.’ Tuga ni he lata ia tautolu ke kai e tau mena kai he tau aho oti ke moua e tupu olaola mitaki mo e malolo, ti kua lata foki ia tautolu ke kai tumau ke he tau kupu he Atua. Taute nakai e tautolu e mena nei? Kaeke taute pihia e tautolu, to kitia mogoia e tautolu kua lagomatai he “lahi ue atu he malolo” ne moua e tautolu a tautolu ke fakauka ke he ha mena mahukihuki ka fakamamahi mai he mogonei.

9. Maeke fefe he tau motua ke lagomatai a lautolu ne fahia ke he tau lekua?

⁹ Kua lata e tau motua Kerisiano matakutaku Atua ke eke mo “fakamumuliaga mai he matagi” he fakaagitau, “mo e mena ke malu ai ka to e afa” he tau lekua. Ko e tau motua, ne manako ke moua e fakamaama omoi agaga ia, kua ole fakatokolalo mo e fakamoli ki a Iehova ke foaki ki a lautolu e “alelo ha lautolu ne fakaako” ke iloa e lautolu ke tali ki a lautolu ne matematekelea, aki e tau kupu hako. Ko e tau kupu he tau motua kua tuga e uha mataikiiki ne fakahahau mo e fakamafana e agaga ha tautolu he magahala he tau magaaho uka he moui. He vagahau “fakamafana [ki] a lautolu kua manava tote,” ne lagomatai moli he tau motua e tau matakainaga fakaagaga ha lautolu ne kua lolelole po ke loto mamahi ha ko e falu mahukihuki ke he tino ha lautolu.—Isaia 32:2; 50:4; 1 Tesalonia 5:14.

10, 11. Maeke fefe he fekafekau he Atua ke fakamalolo falu ne ha i lalo he kamatamata lahi?

¹⁰ Ko e vala moli e tau fekafekau oti ha Iehova he magafaoa Kerisiano kaufakalataha hana. E, ko tautolu kua “fakafehagaiaki e tau fahi tino,” mo e kua “lata ni ke feofanaki a tautolu.” (Roma 12:5; 1 Ioane 4:11) Maeke fefe a tautolu ke fakamoli e matagahua nei? Hagaao ke he 1 Peteru 3:8, kua taute ai e tautolu he ‘feofanaki, fakaalofa ke he tau matakainaga, [mo e] he hofihofi noa e fakaalofa’ ki a lautolu oti ne faoa ki a tautolu he tua. Ki a lautolu ne fahia ke he mena mahukihuki pauaki ke he tino, pete fuata po ke fuakau, kua lata ia tautolu oti ke foaki ki a lautolu e manamanatuaga pauaki. Fefe?

¹¹ Kua lata ia tautolu ke eketaha ke mataala ke he matematekelea ha lautolu. Kaeke ke nakai fakaalofa, nakai tokaga, po ke fakamailoga tagata a tautolu, liga fakaauatu, ka e nakai mailoga, e tautolu e matematekelea ha lautolu. He mataala ha tautolu ke he tau kamatamata ha lautolu, kua lata ni ke omoi a tautolu ke fakaeneene ke he tau mena ka talahau e tautolu, puhala ka talahau ai, mo e puhala taute mena ha tautolu. Ko e ha tautolu a onoonoaga mitaki mo e fakamalolo, ka lagomatai ke fakatote hifo falu mamahi tuina he tau mena mahukihuki ne fakamamahi aki a lautolu. Kia fakamoli ai a tautolu ke eke mo lagomatai ki a lautolu.—Kolose 4:11.

Puhala ne Kautu e Fahia he Falu

12-14. (a) Ko e heigoa ne taute he taha Kerisiano ke fahia ke he kanesa? (e) Puhala fe ne lagomatai mo e fakamalolo he tau matakainaga fakaagaga he fifine nei a ia?

¹² He tata atu a tautolu ke he fakaotiaga he tau aho fakamui nei, kua tutupu ki mua e “tau mena  matematekelea” he tau aho takitaha. (Mataio 24:8) Ti, kua tuga fakamamahi he tau kamatamata e tau tagata oti he lalolagi, mua atu ke he tau fekafekau tua fakamoli ha Iehova, ne lali ke taute e finagalo hana. Ke fakatai ki ai, manamanatu ke he Kerisiano he fekafekauaga mau. Ne moua e ia e kanesa mo e lata he iihi ke utakehe e tau salivary mo e lymphatic gland hana. He magaaho ne iloa e ia mo e tane hana kua moua e ia e gagao nei, ne hahaga agataha a laua ki a Iehova ke he liogi loa mo e olelalo. Ti talahau e ia fakamui, ne logona hifo e laua e mafola mahaki. Pete ia, ne fakauka a ia ke he tau vaha mitaki mo e kelea, mua atu he magaaho ne fahia ke he hufiaaga he tau vai ekekafo ne tului aki a ia.

¹³ Ke fehagai ke he tuaga hana, ne lali fakalahi e matakainaga fifine nei ke fai iloaaga hagaao ke he kanesa. Ne tutala a ia ke he tau ekekafo. I loto he Ko e Kolo Toko, Awake!, mo e tau tohi Kerisiano pihia, ne moua e ia e tau fakamauaga moli ne fakakite e puhala ne fahia e loto manamanatu he falu tagata takitokotaha ke he gagao nei. Ne totou foki e ia e tau kupu he Tohi Tapu ne fakakite e matala ha Iehova ke fakamalolo e tau tagata hana he tau magahala uka, mo e falu a talahauaga lagomatai foki.

¹⁴ Ne tohi he taha vala tala hagaao ke he fahia mo e fakaatukehe e tau kupu pulotu nei: “Ko ia kua vevehe kehe a ia, kua kumi ni e ia e mena ne manako ki ai a ia.” (Tau Fakatai 18:1) Ne foaki mogoia he vala tala e tomatomaaga nei: “Kia totoko e vevehe kehe.” * Ne talahau he matakainaga fifine: “Tokologa ne talahau ki a au kua liogi a lautolu ma haku; ko e falu ne telefoni ki a au. Ua e motua ne o mai tumau ke fakakia au. Ne moua e au e tau fiti mo e loga e tau tohi. Ne taute he falu e tau kai. Mo e tokologa foki ne foaki noa ke uta au ke he ekekafo.”

15-17. (a) Puhala fe ne fahia taha Kerisiano ke he tau mena uka ne fua mai he tau pakia? (e) Ko e heigoa e lagomatai ne foaki e lautolu he fakapotopotoaga?

¹⁵ Ko e fekafekau leva tuai ha Iehova i New Mexico, U.S.A., ne pakia lagaua he motoka. Ne pakia e kakia mo e tau tokeua hana, ti fakalagalaga ai e arthritis hana ne fahia a ia ki ai ke molea e 25 e tau tau. Ne talahau e ia: “Ne uka lahi ia au ke fakahako ki luga e ulu haku mo e ke toto ha mena ne molea 2 e kilo kuleme he mamafa. Ka ko e liogi fakamakamaka ki a Iehova ne fakamalolo lahi aki au. Ti pihia foki he tau vala tala i loto he Ko e Kolo Toko ne fakaako e tautolu. Taha e tali hagaao ki a Mika 6:8, ke mailoga ke o fakalatalata mo e Atua ka iloa e fakakaupaaga he tagata. Ne lagomatai he mena nei au ke mailoga, pete ni ko e tuaga haku, kua nakai lata au ke fakalolelole, pete he tote e magaaho ne fakaaoga e au he fekafekauaga ke he mena ne manako au ki ai. He fekafekau ki a ia mo e tau manako moli ko e mena ne mua.”

¹⁶ Ne hokotaki foki e ia: “Ne nava mai tumau e tau motua ke he tau laliaga haku ke finatu ke he tau feleveiaaga mo e ke fakalataha ke he fekafekauaga he fonua. Ne o mai e tau fuata ke feleveia mo e peka mai ki a au. Ko e tau fekafekau paionia kua fakauka lahi ki a au mo e mahani ke hikihiki e tau fakaholoaga ha lautolu he tau aho kelea haku. Ka kelea e matagi, ne uta e lautolu au ke he tau liu aahi atu po ke uiina au ke nofo he tau fakaakoaga Tohi Tapu ha lautolu. Mo e nakai maeke ia au ke toto e kato tohi, ne tuku he falu matakainaga e tau tohi haku he tau kato ha lautolu he fano au he gahua fakamatala.”

¹⁷ Mailoga e puhala ne lagomatai he tau motua he fakapotopotoaga mo e tau katofia talitonu e tau matakainaga fifine tokoua nei ke fahia ke he ha lautolu a tau matulituli tuga e tau mena mahukihuki. Ne foaki e lautolu e lagomatai kua lata mo e totonu ne talaga ke feleveia e tau manako fakaagaga, fakatino, mo e he manamanatuaga. Nakai kia fakamalolo he mena ia a koe ke foaki e lagomatai ke he falu a matakainaga ha ne fakafita ke he tau lekua? Ko mutolu ko e tau tama fuata kua lata foki ia mutolu ke lagomatai ki a lautolu he fakapotopotoaga ha mutolu, ne fehagai mo e tau mena mahukihuki ke he tino ha lautolu.—Tau Fakatai 20:29.

18. Ko e heigoa e fakamaloloaga ka moua e tautolu he tau fakamauaga moli he moui ne lolomi fakailoa i loto he tau mekasini Ko e Kolo Toko mo e Awake!?

¹⁸ Kua lolomi fakailoa he tau mekasini Ko e Kolo Toko mo e Awake! e tau tala moli mo e tau mena tutupu he moui he Tau Fakamoli ne kua fahia, mo e fahia agaia, ke he tau lekua he moui.  He totou tumau e koe e tau vala tala pihia, to kitia e koe e tokologa he tau matakainaga fakaagaga hau he lalolagi nukua fakauka ke he tau uka fakatupe, galo he tau fakahelehele ke he matematekelea, mo e tau tutuaga haofia he vaha felakutaki. Ko e falu kua nonofo foki mo e tau gagao matulituli muikau. Tokologa ne nakai maeke ke taute falu a mena mukamuka he moui ne fakateaga a lautolu ne tino malolo ki ai. Ne kamatamata vevela he tau gagao ha lautolu a lautolu, mua atu he nakai maeke a lautolu ke fakalataha fakalahi ke he tau gahua faka-Kerisiano ke tuga ne manako a lautolu ki ai. Kua fakaaue lahi ha a lautolu ke he lagomatai mo e lalago ne foaki he tau matakainaga, fuata mo e fuakau, ki a lautolu!

Tamai he Fakauka e Fiafia Lahi

19. Ko e ha ne maeke ia Paulo ke olioli pete ko e tau kamatamata tuga e tau mena mahukihuki mo e tau lolelole hana?

¹⁹ Ne olioli a Paulo ke kitia e puhala ne fakamalolo he Atua a ia. Ne pehe a ia: “To olioli lahi ai au, mo e hula ke he tau mena kua lolelole ai au, kia tumau ai e malolo a Keriso i luga haku. Ko e mena ia kua fiafia ai au ke he tau mena kua lolelole ai, ko e fakakelea mai, ko e nofogati, ko e favale mai, ko e tau mena ke fakaatukehe ai ha ko Keriso; ha ko e mena ka lolelole au, ti malolo ai au.” (2 Korinito 12:9, 10) Ha ko e mena ne tupu ki a ia, kua maeke ia Paulo ke talahau fakamoli: “Nakai tala atu au ha ko e nofogati; ha kua ako tuai au kuenaia haku a loto ke he tau mena ha ha ia au. Kua iloa e au e nofogati, kua iloa foki e au e muhu mena; ko e tau mena oti ke nofo ai au, mo e tau mena oti ke hoko mai ai kia au, kua ako ai au kia makona mo e hoge, kia muhu mena mo e nofogati. Kua maeke ia au e tau mena oti kana ke he fakamalolo mai a Keriso kia au.”—Filipi 4:11-13.

20, 21. (a) Ko e ha ka moua e tautolu e fiafia he manamanatu fakahokulo ke he “tau mena nakai kitia”? (e) Ko e heigoa falu “mena nakai kitia” ne amaamanaki a koe ke kitia he lalolagi Parataiso?

²⁰ Ti, he fakauka ke he ha mena mahukihuki fakatai ke he tino ha tautolu, kua maeke ia tautolu ke moua e fiafia ne mua he fakakite ke he tau tagata oti ko e malolo ha Iehova kua fakakatoatoa ke he lolelole ha tautolu. Ne tohia e Paulo: “Kua nakai fakalolelole ai a mautolu . . . kua fakafou ha mautolu a tagata i loto ke he taha aho mo e taha aho. Ha ko e matematekelea ha mautolu kua mama mo e mole vave, ke tupu mai ai ma mautolu e monuina kua mua ue atu e mamafa mo e tukulagi. Kua nakai manamanatu e mautolu . . . e tau mena nakai kitia; ha ko e tau mena kua kitia kua mole vave ia, ka ko e tau mena nakai kitia kua tukulagi ia.”—2 Korinito 4:16-18.

²¹ Tokologa e tau tagata ha Iehova he vaha nei kua amaamanaki ke moui he lalolagi Parataiso hana mo e ke olioli e tau monuina ne mavehe e ia. Ko e tau monuina pihia kua liga manamanatu ke “nakai kitia” ki a tautolu he vaha nei. Pete he pihia, nukua tata lahi mai e magaaho ka kitia e tautolu e tau monuina ia aki e tau mata ni ha tautolu, e, mo e fiafia tukulagi ki ai. Taha he tau monuina pihia ko e totoka mai he nakai liu ke moui ke he ha lekua ne tuga e mena mahukihuki! Ko e Tama he Atua to “moumou e ia e tau gahua he tiapolo” mo e “fakaoti ai e ia . . . a ia ne toka ai e kautu ke mate ai.”—1 Ioane 3:8; Heperu 2:14.

22. Ko e heigoa e mauokafua mo e fifiliaga kua lata ma tautolu?

²² Ti, ko e ha mena mahukihuki ni ne fakamamahi ke he tino ha tautolu he vaha nei, kia fahia tumau a tautolu ki ai. Ke tuga a Paulo, to ha ia tautolu e malolo mai he mitaki ha Iehova, ne foaki fakamokoi mai e malolo ki a tautolu. Ka nonofo a tautolu he lalolagi Parataiso, to fakaheke e tautolu a Iehova ko e Atua ha tautolu ke he tau aho takitaha ma e tau mena mitaki oti ne taute e ia ma tautolu.—Salamo 103:2.

[Matahui Tala]

To Tali Fefe e Koe?

• Ko e ha mo e puhala fe ne lali e Tiapolo ke moumou e fakamoli he tau Kerisiano moli?

• Puhala fe ‘kua fakakatoatoa e malolo ha Iehova ke he lolelole’?

• Puhala fe kua maeke he tau motua mo e falu ke fakamalolo a lautolu ne fakamamahi he tau lekua?

[Tau Huhu he Fakaakoaga]

[Fakatino he lau 11]

Ne liogi lagatolu a Paulo ke utakehe he Atua e mena mahukihuki ke he tino hana