“Haga Mai, Neke Mamahi e Mena Nei”

FA mahani nakai a koe ke logona e tau kupu ia? Liga logona he magaaho ka talahau ai he ekekafo po ke nosi ato taute e tuluiaga ne fakalata atu.

Ka e liga, nakai totoko foki ne koe e tuluiaga ke kalo e mamahi ne amaamanaki mai i ai. Nakai, ka e fakauka e koe e mamahi ke moua ai e tuluiaga aoga ke he tau aho amui. He falu magaaho ne kelea lahi, ke talia po ke nakai talia e tuluiaga nakai hagahaga mitaki ko e mena ne putoia lahi ai e moui po ke mate.

Pete ne nakai o atu tumau a tautolu ke he ekekafo, ko e tau tagata nakai mitaki katoatoa oti a tautolu mo e nakai maeke ke noa mo e akonaki, po ke fakatonuaga, pete he falu a magaaho, kua mamahi lahi. (Ieremia 10:23) Fanafanahi ai e mena nei ke he fanau, ne pehe e Tohi Tapu: “Kua lili ai e goagoa ke he loto he tama; ka e vega mamao atu a ia ia ia he akau ne akonaki aki a ia.”—Tau Fakatai 22:15.

Ko e akau, he magaaho e, ne fakatai ke he akonakiaga he tau mamatua. Ne moli, tokogahoa e tau fanau ne fiafia ke akonaki. Kaeke lauia ke akonaki he ha mena, fa mahani ke ita a lautolu. Ka e pete ia, haga atu e tau mamatua ne iloilo mo e fakaalofa ke he mitaki ke moua mai nakai he loto momoko he tama. Iloa he tau mamatua Kerisiano e moliaga he Kupu he Atua ne pehe mai i ai: “Ko e tau akonakiaga oti kana kua nakai manatu a tautolu ke he vaha ia ko e mena ke fiafia ki ai, ka ko e mena ke momoko ai; ati oti ka e fua mai e fua he tututonu ke monuina ai a lautolu kua akonaki ai.”—Heperu 12:11; Tau Fakatai 13:24.

Kua moli, nakai ni ko e tau fanau ne lata he akonaki. Ka e lata foki ke he tau tagata lalahi. Kua vagahau e Tohi Tapu ke he tau tagata lalahi ha ne pehe ai: “Kia taofi e koe ke mau e tau kupu ne fakaako atu ai a koe, aua neke tiaki e koe; kia omaoma a koe ki ai; ha ko e hau a moui haia.” (Tau Fakatai 4:13) E, ko e tau tagata iloilo—tau fuata mo e tau momotua—ka peka ke he akonakiaga fakave ke he Kupu he Atua, ko e Tohi Tapu, mai he tau aho i mua, ha kua omaoma ki ai, to fakahao ai e tau moui ha lautolu.