Uho Fefe e Kupu Moli ki a Koe?
Uho Fefe e Kupu Moli ki a Koe?
“To iloa foki e mutolu e mena moli, ko e mena moli foki ke toka noa ai a mutolu.”—IOANE 8:32.
1. Kehe fefe e fakaaogaaga ha Pilato he talahauaga “kupu moli” mai he fakaaogaaga ha Iesu?
“KO HEIGOA e kupu moli?” He huhu e Pilato e huhu nei, ko e fia iloa hana ki ai, kua hagaao ke he kupu moli he puhala laulahi. He taha fahi, ne talahau la ia e Iesu: “Ko e mena hanai ne fanau mai ai au, mo e hau ai au ke he lalolagi, kia talahau e au e kupu moli.” (Ioane 18:37, 38) Kua fakakite he talahauaga Heleni fakamua na fakaaoga e Iesu e kupu fakatonu hagaao ke he “kupu moli.” Ne hagaao a ia ke he kupu moli faka-Atua.
Ko e Aga he Lalolagi ke he Kupu Moli
2. Ko e heigoa e talahauaga ha Iesu kua fakakite e aoga he kupu moli?
2 Ne pehe a Paulo: “Nakai ha he tau tagata oti kana e tua.” (2 Tesalonia 3:2) Ko e mena taha ia ni ka talahau ke he kupu moli. Pihia foki ka fakafelau mo e kupu moli ne fakave ke he Tohi Tapu, kua tokologa e tau tagata kua fakaheu pauaki ai. Ka kua uho ha ia! Ne pehe a Iesu: “To iloa foki e mutolu e mena moli, ko e mena moli foki ke toka noa ai a mutolu.”—Ioane 8:32.
3. Ko e heigoa e hatakiaga hagaao ke he tau fakaakoaga fakavai kua lata ke omaoma a tautolu ki ai?
3 Ne pehe e aposetolo ko Paulo ko e kupu moli ne nakai haia he tau pulotu mo e tau aga toka tuai he tagata. (Kolose 2:8) Moli, kua fakahehe e tau fakaakoaga pihia. Ne hataki e Paulo e tau Kerisiano Efeso kaeke ke tua a lautolu ki ai, to tuga e tau tama mukemuke fakaagaga a lautolu “kua hikihikifano, mo e havilia he tau matagi oti he tau kupu fakaako, ko e pikopiko he tau tagata ke he tau lagatau kelea kua taute ke fakahehe ai.” (Efeso 4:14) He vaha nei, ko e ‘tau tagata lagatau kelea’ ne tupu lahi ha ko e tau manatu ha lautolu kua totoko e kupu moli faka-Atua. Ko e “manatu” kua fakamaama he The New Encyclopædia Britannica ko e “laliaga fakapapahi ke fakavaia e tau taofiaga, tau aga, po ke tau gahua he tagata.” Ko e manatu pihia kua fakakeukeu e kupu moli ke he fakavai mo e fakatupu e tau pikopiko ke eke mo kupu moli. Ke kumi e kupu moli ke he fakatokaaga he tau peehiaga fakavaia pihia, kua lata a tautolu ke totou fakamakutu ke he tau Tohiaga Tapu.
Tau Kerisiano mo e Lalolagi
4. Fakaata ki a hai e kupu moli, ti ko e heigoa e matagahua ha lautolu kua moua ai?
4 Hagaao ki a lautolu nukua eke mo tau tutaki hana, ne liogi a Iesu Keriso ki a Iehova: “Kia fakatapu e koe a lautolu ke he hau a kupu moli; ko e hau a kupu ko e kupu moli haia.” (Ioane 17:17) Ko lautolu pihia to fakatapu, po ke vevehe kehe, ma e kakano he fekafekau ki a Iehova mo e fakailoa hana higoa mo e Kautu. (Mataio 6:9, 10; 24:14) Pete ni nakai ko e koloa he tau tagata oti, kua fakaata e Iehova e kupu moli ke he tau tagata oti kana ko e mena fakaalofa noa ki a lautolu kua kumi ki ai, pete ni ha lautolu a tau motu, lanu, po ke tupumaiaga fakamotu. Ne pehe e aposetolo ko Peteru: “Kua iloa e au nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.”—Gahua 10:34, 35.
5. Ko e ha ne fa e ekefakakelea e tau Kerisiano?
5 Kua folafola he tau Kerisiano e kupu moli he Tohi Tapu ke he falu ka e nakai talia he tau matakavi oti. Ne hataki e Iesu: “Ati tuku atu ai e lautolu a mutolu ke he matematekelea, mo e kelipopo a mutolu; to vihiatia foki a mutolu he tau motu oti ha ko e haku a higoa.” (Mataio 24:9) He fai tali ke he kupu nei, ne tohi he akoako Aelani ko John R. Cotter he 1817: “Ko e tau manako [he tau Kerisiano] ha lautolu ke fakafou e tau momoui he tau tagata ha ko e ha lautolu a fakamatala atu, mamao mai ai he taute e tau tagata ke loto fakaaue, ka kua fakatupu a lautolu ke fakavihia mo e favale ke he tau tutaki he fakatapakupaku e tau matahavala ha lautolu.” Ko e tau tagata favale pihia kua nakai “talia e lautolu e kupu moli mo e fiafia ki ai kia momoui ai a lautolu.” Ma e kakano nai, “kua fakafano atu ai he Atua kia lautolu e gahua ke fakahehe ai, kia talia ai e lautolu e pikopiko; kia fakahala a lautolu oti kua nakai talia e kupu moli, ka e fiafia ke he mahani hepehepe.”—2 Tesalonia 2:10-12.
6. Ko e heigoa e tau manako kua lata e tau Kerisiano ke nakai feaki?
6 Kua fakamafana he aposetolo ko Ioane e tau Kerisiano ne nonofo he lalolagi kelea nei: “Aua neke fakaalofa a mutolu ke he lalolagi, po ke tau mena ha ha he lalolagi. . . . Ha ko e tau mena oti ha ha he lalolagi, ko e manako lahi he tino, mo e manako lahi he tau mata, katoa mo e tau mena he mouiaga nai ke hula ki ai, nakai mai he Matua ia, ka e mai he lalolagi.” (1 Ioane 2:15, 16) He talahau “tau mena oti,” ne putoia e Ioane e tau mena oti kana. Ma e kakano nai kua nakai lata ia tautolu ke feaki e manako ma e ha mena kua foaki mai he lalolagi nei ne kua maeke ke utakehe aki a tautolu mai he kupu moli. He omaoma ke he tomatomaaga ha Ioane ka fakagahuahua e fakaohoohoaga malolo lahi ke he tau momoui ha tautolu. Fefe?
7. Fakalagalaga fefe he iloilo he kupu moli a lautolu kua loto hako?
7 He tau 2001, ne taute he Tau Fakamoli a Iehova he lalolagi katoa he tau mahina takitaha ke molea e fa mo e hafa e miliona he tau fakaakoaga Tohi Tapu he kaina, he fakaako takitokotaha mo e fakamatakau ke he tau poakiaga faka-Atua ma e moui. Ti ko e fua, 263,431 e tagata ne papatiso. Ko e maama he kupu moli ne eke mo mena uho ke he tau tutaki fou nei, ti tiaki e lautolu e tau feoakiaga kelea ti pihia mo e tau puhala nakai fakalilifu ke he Atua nukua tupu lahi he lalolagi nei. Tali mai he papatiso, ne fakatumau a lautolu ke momoui ke he tau poakiaga kua fakatoka e Iehova ma e tau Kerisiano oti. (Efeso 5:5) Uho kia e kupu moli ki a koe?
Leveki e Iehova a Tautolu
8. Tali mai fefe a Iehova ke he tukuleleaga ha tautolu, ti ko e pulotu he ha ke ‘tuku fakamua e Kautu’?
8 Pete ne nakai mitaki katoatoa a tautolu, kua talia noa e Iehova e tukuleleaga ha tautolu, he oho hifo ke lopoti a tautolu ki a ia. Ti fakaako mogoia e ia a tautolu ke tuku fakatokoluga e tau foliaga mo e tau manako ha tautolu. (Salamo 113:6-8) He magaaho taha, kua fakaata e Iehova a tautolu ke moua e fakafetuiaga fakatagata mo ia, ti mavehe a ia ke leveki a tautolu kaeke ke ‘kumikumi fakamua a tautolu ke he kautu mo e hana tututonu.’ Kaeke ke taute e tautolu e mena nei mo e puipui a tautolu fakaagaga, kua mavehe mai a ia: “Ati lafi atu ai e tau mena oti ia kia mutolu.”—Mataio 6:33.
9. Ko hai e “fekafekau fakamoli mo e loto matala,” mo e fakaaoga e “fekafekau” nei, leveki fefe e Iehova a tautolu?
9 Ne fifili e Iesu Keriso hana tau aposetolo 12 mo e fakatoka e fakaveaga ma e fakapotopotoaga he tau Kerisiano fakauku ne fakahigoa ai ko “Isaraela he Atua.” (Kalatia 6:16; Fakakiteaga 21:9, 14) Ne fakamaama e mena nei he magaaho fakamui ko e “ekalesia he Atua moui haia, ko e pou foki ia mo e fakaveaga he kupu moli.” (1 Timoteo 3:15) Ne fakakite maali e Iesu e tau tagata he fakapotopotoaga ia ‘ko e fekafekau fakamoli mo e loto matala’ ti ‘ko e fekafekau pule, kua fakamoli a ia mo e loto matala.’ Ne pehe a Iesu, ko e fekafekau tua fakamoli ia ka fakalago ki ai e matagahua ke foaki ke he tau Kerisiano e “tau mena kai ke he tau magaaho.” (Mataio 24:3, 45-47; Luka 12:42) Ka nakai fai mena kai ti mamate hoge a tautolu. Mena taha ia ni, ka nakai kai e tau mena kai fakaagaga, to lolelole mo e mamate fakaagaga a tautolu. Ko e mena ia, ha ko e fai “fekafekau fakamoli mo e loto matala” ko e taha fakamoliaga kua leveki e Iehova a tautolu. Kia loto fakaaue tumau a tautolu ke he tau foakiaga fakaagaga uho ne taute ma tautolu he puhala mai he “fekafekau” ia.—Mataio 5:3.
10. Ko e ha kua lata ma tautolu ke fakalataha tumau ke he tau feleveiaaga?
10 Ko e uta he tau mena kai fakaagaga kua putoia e fakaako fakatagata. Kua putoia foki e fakalataha mo e falu Kerisiano mo e o atu ke he tau feleveiaaga he fakapotopotoaga. Manatu tonu nakai e koe e mena ne kai e koe he ono mahina, po ke ono e fahi tapu kua mole? Liga nakai. Ko e heigoa ni kua kai e koe ne foaki e huhua kua lata ke fakamalolo aki a koe. Ti liga kai agaia e koe e tau mena kai ia tali mai he magaaho ia. Tatai agaia ni mo e tau mena kai fakaagaga ne foaki he tau feleveiaaga Kerisiano ha tautolu. Liga nakai manatu e tautolu e tau mena oti kua logona e tautolu he tau feleveiaaga. Ti ko e tau vala tala taha ia kua tuga ke fatiaki lagaloga. Ka ko e tau mena kai agaia ni ke lata mo e malolo ha tautolu. Kua foaki tumau he tau feleveiaaga ha tautolu e lagomataiaga fakaagaga mitaki, ne fakatoka mai he tau magaaho kua lata tonu.
11. Ko e heigoa e tau matagahua ka fakalataha a tautolu ke he tau feleveiaaga Kerisiano?
11 Ko e o atu ke he tau feleveiaaga Kerisiano kua eke foki mo matagahua ha tautolu. Ne fakamafana ke he tau Kerisiano ke “fefakamafanaaki,” he fakalagalaga e tau matakainaga he fakapotopotoaga ke “fakaalofa mo e gahua mitaki.” Ko e tauteute, fakalataha atu, mo e fai vala ha tautolu ke he tau feleveiaaga Kerisiano oti kua ati hake e tua ha tautolu takitokotaha mo e fakamafanatia ke he falu. (Heperu 10:23-25) Tuga ni e tau fanau ikiiki ne fa kai fili, kua liga lata e falu mo e fakamaloloaga tumau ke kai fakaagaga. (Efeso 4:13) Ko e fakaalofa ke foaki e fakamaloloaga pihia ka lata ke maeke ia lautolu ia ke tupu mo tau Kerisiano motua, nukua tohi ai he aposetolo ko Paulo: “Ko e tau mena kakano, kua lata ia mo e tau tagata motua, ko lautolu ni kua mahani he ako mua ai ke mailoga e tau mena mitaki mo e tau mena kelea.”—Heperu 5:14.
Leveki a Tautolu Fakaagaga
12. Ha hai e matagahua makimaki ma e tumauaga ha tautolu ke he kupu moli? Fakamaama.
12 Ko e tau hoa mau ha tautolu po ke tau matua ha tautolu kua maeke ke fakamalolo a tautolu ke he puhala he kupu moli. Tuga a ia, ko e tau motua he fakapotopotoaga kua maeke ke leveki a tautolu ko e vala he fuifui i lalo he levekiaga ha lautolu. (Gahua 20:28) Ka e fakalago kia hai e matagahua makimaki ia kaeke ke fakauka a tautolu ke he puhala ha tautolu he moui ne fakave ke he kupu moli? Moli, ko e matagahua kua fakalago ni ki a tautolu takitokotaha. Ti moli e mena ia i lalo hifo he tau tutuaga mitaki mo e tau magaaho uka. Manamanatu la ke he mena na ne tupu.
13, 14. He fakatai mai he mena ne tupu hagaao ke he punua mamoe, maeke fefe ia tautolu ke moua e lagomatai fakaagaga kua lata?
13 I Sikotelani ko e falu he tau punua mamoe ne kai he lotopa he magaaho ne taha ia lautolu ne totolo atu ke he fahi he matiketike tote mo e taveli hifo ke he hoe i lalo. Nakai pakia ai, ka kua matakutaku ai mo e nakai maeke ke liu toli hake. Ti kamata agataha a ia ke tagi lahi. Ne logona he matua hana, ti kamata foki a ia ke tagi ato hau e leveki mo e fakahao e punua mamoe.
14 Mailoga e fakatokaaga he tau mena tutupu. Ne hea lagomatai e punua mamoe, ne lafi he mamoe fifine hana leo ke he hea ia, ti gahua mafiti e leveki mamoe mataala ke fakahao ai. Kaeke ke mailoga he punua manu tote mo e hana matua fifine e hagahagakelea mo e mafiti ke hea lagomatai, nakai kia taute pihia foki e tautolu ka veveli fakaagaga a tautolu po ke fehagai fakahaupo mo e tau hagahaga kelea mai he lalolagi ha Satani? (Iakopo 5:14, 15; 1 Peteru 5:8) Kua lata ke pihia a tautolu, mua atu kaeke ke nakai fai lotomatala a tautolu ha kua ikiiki po kua fou lahi agaia a tautolu ke he kupu moli.
Muitua ke he Takitakiaga Faka-Atua ka Tamai e Fiafia Lahi
15. Fefe e logonaaga he taha fifine he magaaho ne kamata a ia ke feoaki mo e fakapotopotoaga Kerisiano?
15 Manamanatu la ke he aoga he maama e Tohi Tapu mo e mafola he manamanatuaga ka tamai ki a lautolu kua fekafekau ke he Atua he kupu moli. Ko e fifine 70 e tau he moui ne tupu hake he Tapu ha Igilani ne talia ke moua e fakaakoaga Tohi Tapu fakatagata mo e taha he Tau Fakamoli a Iehova. Ne nakai leva ti iloa e ia e higoa he Atua ko Iehova mo e fakalataha he pehe “Amene” ke he tau liogi auloa mai he loto ne foaki he Fale he Kautu. Mo e logonaaga malolo ne pehe a ia: “He nakai fakatino e Atua kua tokoluganea atu ia tautolu ko e tau tagata fakateaga, kua tuga e tamai e koe a ia ke he uho tonu ha tautolu tuga e kapitiga fakahele. Ko e mena nakai la iloa ia e au fakamua.” Matamata ai, to nakai nimo he tagata fakahele fiafia ia e fakakiteaga fakamua he kupu moli ne taute ki a ia. Kia eke pihia foki a tautolu, he nakai nimo e uho he kupu moli ne taute ki a tautolu he magaaho ne talia fakamua ai e tautolu.
16. (a) Ko e heigoa e mena ka tupu ka taute e tautolu e kumi tupe mo matapatu foliaga ha tautolu? (e) Maeke fefe a tautolu ke moua e fiafia moli?
16 Tokologa ne talitonu kaeke ke loga e tupe ha lautolu, to fiafia lahi a lautolu. Pete ia, kaeke ko e matapatu foliaga e kumi tupe ha tautolu he moui, to liga mamahi a tautolu he “tau matematekelea loga.” (1 Timoteo 6:10) Manamanatu la ke he tokologa ne fakatau e tau tiketi lafolo, fakamole e tau tupe he tau kasino, po ke fakafua fakagoagoa he tau stock market, po ke mohemiti ke muhu tupe. Tokogahoa lahi kua kitia e tau tupe kua amanaki a lautolu ki ai. Ti fa pihia foki a lautolu kua kitia ai ko e muhu koloa fakaofo ha lautolu kua nakai tamai e fiafia. Kehe ai, ko e fiafia tumau kua hau he taute e finagalo ha Iehova, he gahua auloa mo e fakapotopotoaga Kerisiano mo e takitakiaga he agaga tapu ha Iehova mo e lagomatai he hana tau agelu. (Salamo 1:1-3; 84:4, 5; 89:15) Ka taute e tautolu e mena nei, to liga moua e tautolu e tau monuina loga. Kua uho lahi nakai e kupu moli ki a koe ke tamai e tau monuina pihia ke he moui hau?
17. Ko e heigoa kua fakakite hagaao ke he aga he aposetolo ko Peteru he nofo a ia mo Simona, ko e tagata taute kili manu?
17 Mailoga la e mena ne tupu ke he aposetolo ko Peteru. He tau 36 V.N., ne fenoga misionare atu a ia ke he Matiketike ha Sarona. Ne mataofi a ia i Lita, ne kua fakamaulu e ia a Ainea ti fina atu he toga ke he fahi tahi ha Iopa. Ti fakaliu tu mai e ia a Toreta. Kua talahau he Gahua 9:43 ki a tautolu: “Ati nofo ai a ia i Iopa ke he tau aho loga ke he taha tagata ko Simona e higoa, ko e taute kili manu.” Ko e talahauaga ku nei kua fakakite e aga nakai onoono hifo ha Peteru he fekafekau a ia ke he tau tagata he maaga ia. Fefe? Kua tohi he pulotu Tohi Tapu ko Frederic W. Farrar: “He fale he tagata taute kili manu kua nakai fai tagata fifitaki kikili mo e mauokafua ke he Fakatufono [faka-Mose] ne Totoku Noa kua fakalagalaga ke muitua ki ai. Ko e matutaki he tau aho takitaha mo e tau vala kakano mo e tino mamate he tau manu kehekehe ne moua mai he feua nei, mo e tau koloa kua lata, kua nakai mea ai mo e tau mena fakalialia ke he fofoga he tau tagata mao fakatufono.” Pete ni kaeke ke ‘ha he tapa tahi e fale hana’ ko Simona, ne mamao mai he hana fale kili manu, ko e gahua ha Simona he ‘feua ne fakalialia e onoonoaga ki ai mo e tuga ke fakatokolalo e fakalilifu fakatagata ha lautolu ne gahua pihia,’ he talahau e Farrar.—Gahua 10:6.
18, 19. (a) Ko e mahalohalo he ha a Peteru ke he fakakiteaga ne moua e ia? (e) Ko e heigoa e monuina fakalutukia ne moua e Peteru?
18 Ne talia e Peteru nakai fili tagata e mahani fakamokoi ha Simona, mo e moua ai e Peteru i ai e takitakiaga faka-Atua fakalutukia. Ne kitia e ia e fakakiteaga nukua poaki ki a ia ke kai e tau manu nakai mea hagaao ke he fakatufono faka-Iutaia. Ne totoko a Peteru na nakai la “kai [a ia] ha mena kua tapu, po ke kelea.” Ka e lagatolu ne tala age ki a ia: “Ko e tau mena ne kua fakamea he Atua aua neke totoku e koe kua tapu.” Maama ai, “kua mahalohalo ai a Peteru ke he hana loto po ke heigoa e fakakiteaga kua kitia e ia.”—Gahua 10:5-17; 11:7-10.
19 Ne nakai mailoga e Peteru he aho mua i Kaisaria, 50 e kilomita he mamao, ko e Tagata Motu Kehe ko Konelio ne kitia foki e fakamailoga. Ne hataki e agelu ha Iehova ki a Konelio ke fakafano age e tau fekafekau ke moua a Peteru he kaina ha Simona ko e tagata taute kili manu. Ne fakafano atu e Konelio e tau fekafekau hana ke he fale ha Simona, ti faihoani e Peteru a lautolu he liliu atu ki Kaisaria. Ne fakamatala a ia i ai ki a Konelio mo e tau magafaoa mo e tau kapitiga hana. Ti ko e fua, ne eke a lautolu mo tau tagata talitonu Motu Kehe fakamua ne nakala peritome ke moua e agaga tapu ko e tau hakega he Kautu. Pete ni e nakai peritome e tau tagata tane, ne papatiso oti a lautolu kua logona e kupu ha Peteru. Ne hafagi he mena nei e puhala ma e tau tagata he tau motu, ne onoono ki ai kua nakai mea mai he tuaga Iutaia, ke eke mo tau tagata he fakapotopotoaga Kerisiano. (Gahua 10:1-48; 11:18) Ko e kotofaaga uho ha ia ma Peteru—mai ni ha ko e kupu moli kua uho ki a ia mo e takitaki a ia ke muitua e takitakiaga mai ia Iehova mo e fakagahua ke he tua!
20. Ko e heigoa e lalagoaga faka-Atua kua foaki mai ki a tautolu ka tuku fakamua e tautolu e kupu moli he tau momoui ha tautolu?
20 Kua tomatoma e Paulo: “Kia vagahau fakamoli mo e fakaalofa, kia tutupu ai a tautolu ke he tau mena oti kana kia ia, ko e ulu ni, ko Keriso haia.” (Efeso 4:15) E, to tamai he kupu moli ki a tautolu e fiafia nakai fai fakatataiaga he magaaho nei kaeke ke tuku fakamua ai e tautolu e kupu moli he tau momoui ha tautolu mo e fakaata a Iehova he puhala mai he hana agaga tapu ke takitaki e tau lakaaga ha tautolu. Kia tokaloto foki e tautolu e lalagoaga he tau agelu tapu he gahua evagelia ha tautolu. (Fakakiteaga 14:6, 7; 22:6) Ko e monuina ha ia ha tautolu ke moua e lalagoaga pihia ke he gahua ha Iehova nukua poaki mai ki a tautolu ke taute! Ko e mahani fakamoli tumau ka takitaki a tautolu ke fakaheke a Iehova, ko e Atua he kupu moli, ke hoko ke he tukumalagi. Fai mena nakai kua mua atu e uho ke he mena ia?—Ioane 17:3.
Ko e Heigoa ne Ako e Tautolu?
• Ko e ha e tokologa ne nakai talia e kupu moli?
• Fefe e onoonoaga he tau Kerisiano ke he tau mena he lalolagi ha Satani?
• Ko e heigoa e aga ha tautolu ke he tau feleveiaaga, ti ko e ha?
• Ko e heigoa e matagahua ha tautolu ke leveki a tautolu fakaagaga?
[Tau Huhu he Fakaakoaga]
[Mepe/Fakatino he lau 30]
(Ma e puhala katoa ne tohi aki, kikite e tohi)
TAHI LAHI
Kaisaria
MATIKETIKE HA SARONA
Iopa
Lita
Ierusalema
[Fakatino]
Ne muitua a Peteru ke he tau takitakiaga faka-Atua mo e helehele e tau monuina fakalutukia
[Credit Line]
Map: Mountain High Maps® Copyright © 1997 Digital Wisdom, Inc.
[Fakatino he lau 27]
Ne fakamatala e Iesu e kupu moli
[Fakatino he lau 29]
Tuga ni e tau mena kai tino, kua lata e tau mena kai fakaagaga mo e tau momoui ha tautolu