Ai La Fuakau Lahi ke Ako

NE FANAU a Kseniya he tau 1897. Ne ha ha ia ia 3 e tama fifine, taha e tama tane, 15 e tau mokopuna, mo e 25 e fanau he tau mokopuna. Ne oma katoatoa e ia e tau mena oti ne fakaako age he tau mamatua hana ki a ia. Pete kua hau a ia ki Moscow ha ko e tagata paea he matakavi felakutaki mai he Abkhaz Republic, he vahaloto he Tahi Uli mo Caucasia, kua fiafia lahi a ia mo e moui hana, au atu mo e mena ne ui e ia ko e tua foaki hifo he tau mamatua hana.

He tau 1993, ne eke e tama fifine ha Kseniya ko Meri mo taha he Tau Fakamoli a Iehova. Ne kamata a Meri ke vagahau ki a Kseniya hagaao ki a Iehova ko e Atua mo e ke he Tohi Tapu, ka e nakai fakateliga age a ia. Ne tala age tumau e Kseniya ke he hana tama, “Kua fuakau tuai a au ke ako ha mena fou.”

Ka e, ne feiga agaia e tama fifine hana ko Meri; e hoana he mokopuna tane hana, ko Londa; mo e tau tama he tau mokopuna hana, ko Nana mo Zaza, nukua eke mo Tau Fakamoli a Iehova, ke matutaki ki a ia hagaao ke he Tohi Tapu. Taha afiafi he tau 1999, ne totou age e lautolu e kupu Tohi ki a Kseniya ne amohia lahi e loto hana. Ha i ai e tau kupu mafanatia ha Iesu ke he tau aposetolo tua fakamoli he magaaho ne fakatu e ia e Kaiaga Afiafi he Iki. (Luka 22:​19, 20) He afiafi ia, he 102 e tau he moui, ne fifili e Kseniya hana manatu ke ako e Tohi Tapu.

“Kua moui ke 102 e tau,” he talahau e Kseniya, “ka e iloa la ia e au e kakano he moui. Iloa e au mogonei, nakai ha ha i ai ha mena ne mua atu ka e ke fekafekau ke he Atua fakaalofa hofihofi, ko Iehova. Mafaofao mo e malolo agaia e tino haku. Maeke ia au ke totou mo e nakai fai tioata mo e kua fakalataha tumau mo e haaku a magafaoa.”

Ia Novema 5, 2000, ne papatiso ai a Kseniya. Ne pehe a ia: “Kua tuku atu e au e moui haku mogonei ki a Iehova ke fekafekau ai mo e fakaalofa ki a ia. Foaki e au e tau mekasini mo e tau tuleke he nofo he tuaga pasi ne tata atu ke he kaina haku. Fa mahani e tau magafaoa ke afe mai, ati fiafia lahi au ke fakamatala ki a lautolu e kupu moli hagaao ki a Iehova.”

Amaamanaki atu a Kseniya ke he magaaho ka “liu moui mitaki hana tino ke homo atu ke he tino he tama tote; to liu foki a ia ke he hana vaha fuata.” (Iopu 33:25) Ti, kaeke nakai logona he tagata ne molea e teau tau kua ai la fuakau lahi a ia ke ako e kakano he moui mai he Tohi Tapu, ati fefe e manatu hau?