Fakatumau e Fekafekau ki a Iehova mo e Loto kua Mau
Fakatumau e Fekafekau ki a Iehova mo e Loto kua Mau
“Ko e Atua na e, kua mau hoku loto, kua mau hoku loto.”—SALAMO 57:7.
1. Ko e ha kua ha ha ia tautolu e fifiliaga tuga ia ha Tavita?
MAEKE ia Iehova ke taute a tautolu ke mau ke he tua he Kerisiano, ke maeke ia tautolu ke pipiki mau ke he faka-Kerisiano moli ko e tau fekafekau tukulele hana. (Roma 14:4) Ko e mena ia, maeke ia tautolu ke moua e malolo tuga ia he salamo ko Tavita, ne fakalagalaga ke lologo: “Ko e Atua na e, kua mau hoku loto.” (Salamo 108:1) Kaeke ke mau e tau loto ha tautolu, to fakalagalaga a tautolu ke fakamoli e tukuleleaga ha tautolu ke he Atua. Mo e he ono ki a ia ma e takitakiaga mo e malolo, maeke ia tautolu ke fakamoli kua nakai maueue, nukua mauokafua he fifiliaga ha tautolu ko e tau tagata tua fakamoli mau, kua “fakamakai nakai noa ke he gahua he Iki.”—1 Korinito 15:58.
2, 3. Ko e heigoa e manatu he tau tomatomaaga ha Paulo ne fakamau ia 1 Korinito 16:13?
2 Ko e tau tomatomaaga hagaao ke he tau tutaki ha Iesu i Korinito i tuai ka e gahuahua moli agaia ke he tau Kerisiano he vaha nei, ne pehe e aposetolo ko Paulo: “Kia mataala a mutolu, kia tumau a mutolu ke he tua, kia eke a mutolu mo tau tagata toa, kia fakamalolo a mutolu.” (1 Korinito 16:13) He faka-Heleni ne igatia e tau poakiaga nei mo e kupu hagaao ke he mogonei, ti fakamafana ai ke gahuahua tumau. Ko e heigoa e kakano he fakamafanaaga nei?
3 Maeke ia tautolu ke “mataala” fakaagaga he totoko ke he Tiapolo mo e nonofo fakatata ke he Atua. (Iakopo 4:7, 8) Ko e falanaki ki a Iehova kua maeke ia tautolu ke fakatumau e tuaga kaufakalataha mo e ke ‘tumau ke he tua faka-Kerisiano.’ Ko tautolu—katoa mo e tau fifine tokologa ha ha mo tautolu—nukua eke “mo tau tagata toa” he fekafekau fakamalolo ke he Atua ko e tau tagata fakapuloa he Kautu. (Salamo 68:11) Kua “fakamalolo” a tautolu he ono fakatumau ke he Matua ha tautolu he lagi ma e malolo ke taute hana finagalo.
4. Ko e heigoa ne takitaki atu ke he papatisoaga ha tautolu ko e tau Kerisiano?
4 Fakakite e tautolu e tuaga ha tautolu ma e tua moli he magaaho ka taute e tautolu e tukuleleaga mauokafua ki a Iehova mo e fakakite ai he fakatomo ke he vai. Ka ko e heigoa ne takitaki atu ke he papatisoaga ha tautolu? Uta fakamua e tautolu e iloilo moli he Kupu he Atua. (Ioane 17:3) Ko e tua nei ne moua mo e omoi a tautolu ke tokihala, he fakakite e momoko moli ke he tau mena kelea ne taute he tau tau kua mole atu. (Gahua 3:19; Heperu 11:6) Mui mai mogoia e liliuina ha tautolu, he fuluhi kehe a tautolu mai he tau gahua hepe ke maeke ke tutuli e moui lagotatai mo e finagalo he Atua. (Roma 12:2; Efeso 4:23, 24) Ne mui mai he mena nai e tukuleleaga loto katoa ki a Iehova he liogi. (Mataio 16:24; 1 Peteru 2:21) Ne ole a tautolu ke he Atua ma e loto manamanatu mitaki mo e ne papatiso ko e fakamailoga he ha tautolu a tukuleleaga ki a ia. (1 Peteru 3:21) He manamanatu ke he tau lakaaga nei ka lagomatai a tautolu ke tumau e hagaaki ke he manako ma e laliaga fakatumau ke moui fakatatau ke he tukuleleaga mo e fakatumau e fekafekau ki a Iehova mo e tau loto kua mau.
Fakatumau e Kumikumi Hau ke he Iloilo Moli
5. Ko e ha kua lata ke fakatumau a tautolu ke fakaaoga e iloilo he Tohiaga Tapu?
5 Ke moui fakatatau ke he tukuleleaga ha tautolu ke he Atua, kua lata ia tautolu ke fakatumau ke moua e tua ati hake he iloilo faka-Tohi Tapu. Ko e fiafia ha ia ke uta e tau mena kai fakaagaga he magaaho ne mahani fakamua a tautolu mo e kupu moli he Atua! (Mataio 24:45-47) Ko e “fua kai” ia ne lolo lahi—ti fakatupuolaola mitaki aki a tautolu fakaagaga. Kua latatonu he magaaho nei ke fakatumau a tautolu he uta e tau mena kai fakaagaga, ke maeke ia tautolu ke fakatumau e loto kua mau ko e tau fekafekau tukulele ha Iehova.
6. Nukua lagomatai fefe ki a koe ke feaki e loto fakaaue ma e kupu moli he Tohi Tapu?
6 Kua lata e laliaga ke moua atu foki e iloilo he tau Tohiaga Tapu. Kua tuga e kumi he tau koloa galo—nukua lata ke eketaha. Ka ko e palepale mitaki ha ia ke moua e “iloilo ke he Atua”! (Tau Fakatai 2:1-6) He fakaako fakamua he tagata fakailoa he Kautu e Tohi Tapu mo koe, liga kua fakaaoga e ia e tohi Iloilo Ne Takitaki Atu ke he Moui Tukulagi. Kia lahi e magaaho ke taute e tau veveheaga takitaha, liga molea e taha e magaaho. Ne aoga ki a koe ka totou mo e fakamaama e tau kupu tohi ne tu ai. Ka uka e manatu ke iloa, ti fakamaama atu ai. Kia kumikumi fakamitaki a ia ka taute e fakaakoaga Tohi Tapu hau, he liogi ma e agaga he Atua, mo e lagomatai a koe ke feaki e aga fiafia mai he loto ma e kupu moli.
7. Ko e heigoa ke fakakatoatoa aki e tagata ke fakaako e kupu moli he Atua ke he falu?
7 Kua latatonu e laliaga nai, ha kua tohi e Paulo: “Ko ia kua ako e kupu, kia tufatufa atu e ia e tau mena mitaki oti kia ia kua fakaako mai.” (Kalatia 6:6) Hinei e kupu Heleni kua fakakite ko e tau fakaakoaga he Kupu he Atua ne gahuahua hifo ke he manamanatuaga mo e loto hana ne kua “ako e kupu.” Ko e fakaako a koe ke he puhala ia ka taute a koe mo faiaoga he falu foki. (Gahua 18:25) Ke fakamoli ke he tukuleleaga hau, kua lata ia koe ke fakatumau e malolo mo e mau fakaagaga hau he fakaako tumau e Kupu he Atua.—1 Timoteo 4:13; Tito 1:13; 2:2.
Manatu e Fakatokihala mo e Liliuina Hau
8. Maeke fefe ke fakatumau e mahani Atua?
8 Manatu nakai e koe totokaaga ne logona e koe he magaaho ne ako e koe e kupu moli, tokihala, ti moua e logonaaga he fakamagaloaga he Atua ne fakave ke he tua he poa lukutoto ha Iesu? (Salamo 32:1-5; Roma 5:8; 1 Peteru 3:18) Moli ni, nakai manako a koe ke liu ke he moui agahala. Mo e he falu mena foki, ko e liogi tumau ki a Iehova ka lagomatai a koe ke fakatumau e mahani Atua, moui fakatatau ke he tukuleleaga hau, mo e fakatumau ke fekafekau fakamoli ki a Iehova.—2 Peteru 3:11, 12.
9. He liliu kehe mai he tau gahua agahala, ko e heigoa e puhala kua lata ke tutuli e tautolu?
9 He maliu kehe mai he tau gahua agahala, kia matutaki ke kumi e lagomatai he Atua he fakatumau hau a loto kua mau. Mailoga ai, kua hifo a koe he puhala hepe ati kua kikite ke he mepe mo e kamata agataha ke fano he puhala hako. Kia nakai galo e puhala hau mogonei. Kia falanaki tumau ke he takitakiaga he Atua, ti fifili mau ke nofo he puhala ke he moui.—Isaia 30:20, 21; Mataio 7:13, 14.
Kia Nakai Nimo e Tukuleleaga mo e Papatisoaga Hau
10. Ko e heigoa e tau manatu kua lata ke mauloto e tautolu hagaao ke he tukuleleaga ha tautolu ke he Atua?
10 Kia manatu na taute e koe e tukuleleaga ki a Iehova he liogi, mo e fekafekauaga tua fakamoli tukulagi. (Iuta 20, 21) Kua hagaao e tukuleleaga ke he tuku kehe, po ke vevehe kehe, ma e tuaga fakatapu. (Levitika 15:31; 22:2) Ko e tukuleleaga hau ne nakai ko e fakamoliaga ku po ke gahua ke he tau tagata. Ko e tukuleleaga tumau ke he Pule Katoa he Lalolagi mo e Lagi Katoatoa, mo e moui fakatatau ki ai kua lata ke fakamoli ke he Atua ke hoko ke he tukulagi. E, ko e ‘momoui po ke mamate, ko e tau tagata he Iki a tautolu.’ (Roma 14:7, 8) Kua falanaki e fiafia lahi ha tautolu ke he omaoma ke he hana finagalo mo e ha tautolu a fakatumau ke fekafekau ki a ia mo e loto kua mau.
11. Ko e lata he ha ia koe ke manatu e hau a papatisoaga mo e aoga hana?
11 Kia manatu tumau e papatisoaga hau ko e fakamailoga he hau a tukuleleaga loto katoa ke he Atua. Nakai ko e papatisoaga fakaohooho, ha ko e mena taute ni e koe e fifiliaga hau. To maeke nakai ia koe mogonei ke fakagahuahua e fifiliaga he fakatatau mo e finagalo faka-Atua ke hoko ke he fakahikuaga he moui hau? Taute e koe e ole ke he Atua ma e loto manamanatu mitaki ti kua papatiso ko e fakamailoga he tukuleleaga hau ki a ia. Leveki e loto manamanatu mitaki ia he fakamoli e tukuleleaga hau, ti ko e fakamonuina lahi ha Iehova to lago ki luga hau.—Tau Fakatai 10:22.
Gahuahua Lahi e Fifiliaga Hau
12, 13. Fefe e fifiliaga hau ni hagaao ke he tukuleleaga mo e papatisoaga?
12 Ko e tukuleleaga mo e papatisoaga ne ta mai moli e tau monuina lalahi ke he tau tagata miliona he lalolagi katoa. Magaaho ne fakamailoga e tautolu e tukuleleaga ha tautolu ke he Atua he fakatomo ke he vai he papatisoaga, to mamate a tautolu hagaao ke he puhala momoui fakamua ha tautolu ka e nakai hagaao ke he fifiliaga ni ha tautolu. Ha ko e tau tagata talitonu mitaki nukua fakaako, ne fakagahuahua moli e tautolu e fifiliaga ni ha tautolu he magaaho ne taute e tautolu e tukuleleaga ke he Atua he liogi mo e papatiso ai. Ko e puhala he tukuleleaga mo e papatisoaga kua lata ke fifili e kakano he finagalo he Atua mo e fifili pauaki ke taute ai. (Efeso 5:17) Ti, fifitaki e tautolu a Iesu, ne fakagahuahua e fifiliaga hana he magaaho ne fakatoka e ia ke he mafoa hana gahua kamuta, ti papatiso, mo e foaki katoatoa e ia a ia ke taute e finagalo he hana Matua he lagi.—Salamo 40:7, 8; Ioane 6:38-40.
13 Ne finagalo e Iehova ko e Atua hana Tama he eke mo ‘fakakatoatoa ha ko e tau matematekelea.’ Ko e mena haia ne fakagahuahua e Iesu hana loto manamanatu ke maeke ke fakauka e tau matematekelea pihia he mahani fakamoli. Ko e mena ia, ne foaki hake e ia e “tau olelalo . . . mo e tau ole . . . fakalataha mo e tau tagi fakalahi mo e tau hihina mata, mo e kua logona mo e fiafia ki a ia ma e hana matakutaku mahani fakaatua.” (Heperu 2:10, 18; 5:7, 8, NW) Ka fakatata pihia e tautolu e matakutaku fakalilifu ke he Atua, to moli foki a tautolu ke “logona mo e fiafia,” ti maeke ia tautolu ke mauokafua to taute e Iehova a tautolu ke mau mo Tau Fakamoli tukulele hana.—Isaia 43:10.
Maeke ia Koe ke Fakatumau e Loto kua Mau
14. Ko e lata he ha ke totou e tautolu e Tohi Tapu he tau aho takitaha?
14 Ko e heigoa ka lagomatai a koe ke fakatumau e loto kua mau ti moui fakatatau ke he tukuleleaga hau ke he Atua? Mo e amaamanakiaga he uta e iloilo tupu ki mua he Kupu he Atua, kia totou e Tohi Tapu he tau aho oti. Ko e taha mena anei kua fakamafana tumau mai he “fekafekau fakamoli mo e loto matala” ke taute e tautolu. Ko e tomatomaaga pihia kua foaki ha ko e moui fakatatau ke he tukuleleaga ha tautolu kua lata ke fakatumau a tautolu ke o he kupu moli he Atua. Ane talia moli he fakatokatokaaga ha Iehova e tau fakaakoaga fakavai, ko e hatakiaga ke totou e Tohi Tapu to nakai fakaata ia ke he Tau Fakamoli a Iehova mo lautolu kua fakamatala ki ai.
15. (a) Ko e heigoa kua lata ke manamanatu ki ai he taute e tau fifiliaga? (e) Ko e lata he ha ke talahau ko e gahua tupe ko e gahua ke uaaki he Kerisiano?
15 Ka taute e tau fifiliaga, kia onoono tumau ke he puhala kua lauia e fakamoliaga he tukulele hau ki a Iehova. Kua liga hagaao e mena nei ke he gahua tupe hau. Manako nakai a koe ki ai ke lagomatai a koe ke fakatupu ki mua e tapuakiaga moli? Pete ni kua mailoga he tau takitaki gahua e tau Kerisiano ne kua falanaki mo e lauia mitaki, kua kitia foki e lautolu e Tau Fakamoli a Iehova ke nakai folia ke matalahi ke he lalolagi mo e kua nakai fetoko ai mo e falu ke he tau tuaga muhu koloa. Kakano e mena nei ha ko e foliaga he Tau Fakamoli kua nakai moua mai he monuina, talahaua, hula, po ke malolo. Ma lautolu kua moui fakatatau ke he tukuleleaga ha lautolu ke he Atua, ko e mena aoga lahi e taute he finagalo faka-Atua. Ko e fakatupa ke he gahua tupe kua fakamalolo a lautolu ke gahua ke moua e tau koloa he moui, ko e matafeua aoga ke uaaki. Tatai ai ke he aposetolo ko Paulo, ko e matapatu gahua ha lautolu ko e fekafekau faka-Kerisiano. (Gahua 18:3, 4; 2 Tesalonia 3:7, 8; 1 Timoteo 5:8) Tumau nakai a koe ke tuku fakamua e Kautu he moui hau?—Mataio 6:25-33.
16. Ko e heigoa ha tautolu ka taute ka fakamatauka he tau fakaatukehe teao a tautolu ke moui fakatatau ke he ha tautolu a tukuleleaga ke he Atua?
16 Kua teitei kaumahala e falu ha ko e tau tupetupe kehekehe fakamua ato ako e lautolu e kupu moli. Ka kua punapuna ha ia he tau loto ha lautolu ke he olioli, fakaaue, mo e fakaalofa ma e Atua he magaaho ne ofania e lautolu e amaamanakiaga he Kautu! He manamanatu ke he tau monuina ne olioli e lautolu tali mai ne kua lagomatai a lautolu ke moui fakatatau ke he tukuleleaga ha lautolu ki a Iehova. He taha fahi, ka e kua kaeke ko e fakaatukehe teao ke he tau lekua fa mahani ke he moui he fakatokaaga nei ha ne mogonei kua fakamatakutaku ke fakaapitia “e kupu he Atua,” tuga ni e tau fotofoto ka taofi e tau tega akau ke motua he fua mai? (Luka 8:7, 11, 14; Mataio 13:22; Mareko 4:18, 19) Kaeke ke mailoga e koe hane kamata e mena nei ke tupu ki a koe po ke magafaoa hau, tuku atu e tau fakaatukehe hau ki a Iehova mo e liogi to lagomatai e ia a koe ke tupu ke he fakaalofa mo e loto fakaaue. Kaeke ke tuku atu e koe e tau kavega hau ki a ia, to fakatumau e ia a koe mo e atu ki a koe e malolo ke tumau e fekafekau fiafia ki a ia mo e loto kua mau.—Salamo 55:22; Filipi 4:6, 7; Fakakiteaga 2:4.
17. Maeke fefe ke fahia mai he tau kamatamata hagahagakelea?
17 Kia fakatumau ke liogi ki a Iehova ko e Atua, pihia foki he liogi a koe he magaaho ka taute e tukuleleaga ki a ia. (Salamo 65:2) Ka kamatamata a koe ke taute e mena hepe po ke fehagai mo e kamatamata kelea lahi, kia kumi e takitakiaga ke he Atua mo e hana lagomatai ke muitua ki ai. Tokaloto e lata ma e tua, ha kua tohia he tutaki ko Iakopo: “Kaeke ha ha ia mutolu taha kua nakai fai iloilo [he fahia ke he matematekelea], kia ole atu a ia ke he Atua, ko ia kua foaki mai mo e totonu ke he tau tagata oti mo e nakai tauage; ti foaki mai ai kia ia. Ka kia ole atu a ia mo e tua, aua neke mahalohalo ha ko ia kua mahalohalo kua lata a ia mo e peau he tahi kua fafati mai he matagi mo e fepokaki. Aua neke manatu e tagata ia ke moua e ia ha mena mai he Iki; ko e tagata loto fakauaua a ia, kua hikihikifano ke he hana tau mahani oti.” (Iakopo 1:5-8) Ka tuga e uka lahi e kamatamata, maeke ia tautolu ke iloa moli e mena nei: “Nakai moua a mutolu he kamatamata kua kehe mo e tau tagata auloa; ha kua fakamoli e Atua, he nakai tuku atu e ia a mutolu ke he kamatamata kua mua ke he mena kua fahia ai a mutolu, ka e taute foki e ia fakalataha mo e kamatamata e mena ke hao ai, kia fahia a mutolu ke fakauka ai.”—1 Korinito 10:13.
18. Ko e heigoa ka taute e tautolu ka fakalolelole he agahala galo a tautolu ke moui fakatatau ke he tukuleleaga ha tautolu ki a Iehova?
18 Ka e kua ka fakatauhele e agahala galo he manamanatuaga hau mo e fakalolelole e fifiliaga hau ke moui fakatatau ke he tukuleleaga hau ke he Atua? Ka tokihala a koe, maeke ia koe ke mafanatia ke he iloilo ‘to nakai vihiatia e [Iehova] e loto malipilipi mo e pehia.’ (Salamo 51:17) Kumi e lagomataiaga ke he tau motua Kerisiano fakaalofa, he iloa ko lautolu—nukua fifitaki ki a Iehova—ka nakai taute fakateaga e manako hau ke moua e fakafouaga he fakafetuiaga mitaki mo e Matua hau he lagi. (Salamo 103:10-14; Iakopo 5:13-15) Ti ko e fakafouaga he malolo fakaagaga mo e loto kua mau, to maeke ia koe ke taute e puhala hako ma e tau hui hau mo e maeke ai ke moui fakatatau ke he tukuleleaga hau ke he Atua.—Heperu 12:12, 13.
Fakatumau ke Fekafekau mo e Loto kua Mau
19, 20. Ko e aoga he ha ke fakatumau a tautolu ke moui fakatatau ke he tukuleleaga ha tautolu?
19 He tau aho uka nei, kua lata ia tautolu ke gahua malolo ke moui fakatatau ke he tukuleleaga ha tautolu mo e fakatumau he fekafekau ke he Atua mo e loto kua mau. Ne pehe a Iesu: “Ka ko ia ke tumau ato hoko ke he fakaotiaga, to fakamoui na ia.” (Mataio 24:13) Ha kua nonofo a tautolu he “tau aho fakamui,” na to hoko mai e fakaotiaga ke he ha magaaho. (2 Timoteo 3:1) Moha ia, nakai fai ia tautolu ke iloa moli na to momoui a tautolu a pogi. (Iakopo 4:13, 14) Ti kua aoga ke fakatumau a tautolu ke momoui fakatatau ke he tukuleleaga ha tautolu he vaha nei!
20 Ne peehi he aposetolo ko Peteru e mena nei he tohi hana ke uaaki. Ne fakakite e ia ne tuga ni a lautolu ne moumou he nakai mahani Atua he Fakapukeaga, to pihia e lalolagi fakatai, po ke fakalatahaaga he tau tagata kelea, ka moumou he “aho he Iki.” Ko e mena ia ne fakailoa e Peteru: “Po ke fefe ha mutolu a mahani ke lata ai ke he tau mahani mitaki mo e tau mahani Atua”! Ne fakamafana foki e ia a lautolu: “Ko e tau fakahelehele na e, kia fakaeneene a mutolu kia mutolu, ha kua iloa fakamua e mutolu, neke hekeheketakina a mutolu ke he hehe he tau tagata hemu [he tau faiaoga fakavai mo e tau tagata nakai mahani Atua], ti veveli ai a mutolu mai he mena kua tumau ai a mutolu.” (2 Peteru 3:5-17) Ko e momoko ha ia kaeke ke tafea kehe e tagata nukua papatiso mo e hoko ke he fakaotiaga he hana moui ko e taha ne kaumahala ke fakatumau e loto kua mau!
21, 22. Fakamoli fefe e tau kupu he Salamo 57:7 ke he mena ne tupu ki a Tavita mo e tau Kerisiano moli?
21 Ko e fifiliaga hau ke moui fakatatau ke he tukuleleaga hau ke he Atua ka fakamalolo mitaki ka tokaloto e koe e aho fiafia he papatisoaga hau mo e tutuli e lagomataiaga he Atua ke maeke he tau kupu mo e tau gahua hau ke fakafiafia e loto hana. (Tau Fakatai 27:11) Nakai fakakaumahala e Iehova hana tau tagata, mo e kua lata moli ia tautolu ke mahani fakamoli ki a ia. (Salamo 94:14) Ne fakakite e ia e fakaalofa hofihofi mo e fakaalofa noa he totoko e tau pulega he tau fi mo e fakahao ai a Tavita. Fakaaue ai ma e mena nei, ne fakapuloa e Tavita e mauoka, nakai maueue hana fakaalofa ma e hana Fakahao. Mo e logonaaga hokulo, ne lologo a ia: “Ko e Atua na e, kua mau hoku loto, kua mau hoku loto; to lologo atu au, mo e uhu lologo au.”—Salamo 57:7.
22 Tuga a Tavita, nakai maueue e tau Kerisiano moli mai he fakamoli katoatoa ha lautolu ke he Atua. Fakalataha mo e loto kua mau, kua fakamau e lautolu e fakahaoaga mo e fakamouiaga ha lautolu ki a Iehova, nukua fiafia a lautolu he lologo fakaheke ki ai. Kaeke ke mau e loto hau, to falanaki ai ke he Atua, mo e hana lagomatai to maeke ia koe ke fakamoli e tukuleleaga hau. E, maeke ia koe ke tuga “e tagata tututonu” kua hagaao ki ai e lologo he salamo: “Ka logona e ia e ogo kelea, ti nakai matakutaku ai a ia, kua mau hana loto he tua kia Iehova.” (Salamo 112:6, 7) Fakalataha mo e tua ke he Atua mo e falanakiaga katoatoa ki a ia, maeke ia koe ke moui fakatatau ke he tukuleleaga mo e fakatumau ke fekafekau ki a Iehova mo e loto kua mau.
Manatu Nakai e Koe?
• Ko e ha kua lata ke fakatumau a tautolu ke uta e iloilo moli he Tohi Tapu?
• Kua lata he ha ke tokaloto e tautolu e fakatokihala mo e liliuina ha tautolu?
• Aoga fefe a tautolu mai he manatu e tukuleleaga mo e papatisoaga ha tautolu?
• Ko e heigoa ka lagomatai a tautolu ke fakatumau e fekafekau ki a Iehova mo e loto kua mau?
[Tau Huhu he Fakaakoaga]
[Tau Fakatino he lau 28]
Eke ai e fekafekauaga faka-Kerisiano ha tautolu mo matapatu gahua he lagomatai a tautolu ke fakatumau e fekafekau ki a Iehova mo e loto kua mau
[Fakatino he lau 28]
Ha ne fakatumau nakai e koe e malolo fakaagaga he totou e Kupu he Atua he tau aho oti?