Lata Kia e Tua ke Fakave ke he Lotomatala?

“Kua tokologa lahi e tau tagata ‘lotu’ ne muitua ke he tau puhala fakalotu nukua fakamahino ke tiaki e fakaaoga he malolo-manamanatu ki ai,” he tohi he ulu faiaoga fioloti he Tau Fahi Kaufakalataha. “Kua manako a lautolu ke talia e tau mena oti ‘he tua,’” he lalafi atu e ia.

KO E hagaaoaga kua laulahi he tau tagata ne kua talahau ke tua fakalotu ne nakai manamanatu lahi ke he kakano nukua talitonu a lautolu ke he mena ne taute e lautolu po kua fai kakano mitaki e fakaveaga ma e tua ha lautolu. Nakai ofo ai ha ko e lotu e matakupu nukua tokologa kua fakauaua ke tutala ki ai.

Tokihala ai, ko e tau gahua pihia ne fakaaoga e tau fakamailoga fakalotu mo e tau liogi tafeliuaki mahani mau nukua fakalolelole foki e manamanatuaga hako. Ko e tau gahua nei, fakalataha mo e palana ta fale ofoofogia, tau fakamaama kalase fakaeneene, mo e leo kofe fakalagalaga, kua fakakite aki e tau mouaaga fakalotu he tau miliona tagata. Pete ni e talahau he falu lotu kua fakave e tua ha lautolu ke he Tohi Tapu, ko e fekau ha lautolu he ‘tua ki a Iesu ti fakahao ai a koe’ kua fakamama e hokulo he fakaakoaga Tohi Tapu. Kua fuluhi e falu ke fakamatala e evagelia fakamatakau po ke fakapolitika. Ko e heigoa e fua he tau mena oti nei?

Hagaao ke he tuaga i Amerika Tokelau, taha e tagata tohia fakalotu ne pehe: “Ko e faka-Kerisiano . . . kua hihiga ke potake, [mo e] tau tagata kua fakalataha ki ai kua fakaako fakakelea ke he tua.” Ko e tagata kumikumi ke he tau manatu ne hokotia foki ke fakamaama ko e Tau Fahi Kaufakalataha ko e “motu nakai iloilo faka-Tohi Tapu.” Ke fakamoli, ko e tau kitekiteaga nei to moli foki hagaao ke he falu motu ne ha ha i ai e faka-Kerisiano. Loga e tau lotu nakai faka-Kerisiano kua fakalolelole pihia foki e manamanatuaga ati peehi ai mogoia e tau liogi totou holo, ako mau, mo e tau puhala kehekehe he manamanatu hokulo kua putoia e fakataulatua, ka e nakai manamanatu fakapapahi mo e tolomaki ki mua.

Ka e, he tau momoui ha lautolu he tau aho takitaha, ko e tau tagata ia ne nakai manamanatu lahi ke he tonutika po ke moli he tau taofiaga fakalotu ha lautolu kua fa manatu fakamakutu ke he falu mena foki. Nakai kia matakehe e mena nei ki a koe, ko e tagata kua taute e kumikumiaga lahi ke fakatau e motoka—he a taha aho to toka ai he putuputuaga veve—ka talahau hagaao ke he hana lotu, ‘Ane mai mitaki ai ma e tau mamatua haku, kua mitaki foki ma haku’?

Kaeke ko e manako moli ha tautolu ke fakafiafia e Atua, kua lata kia ia tautolu ke manamanatu fakahokulo e tonutika he mena kua talitonu a tautolu hagaao ki a ia? Ne tutala e aposetolo ko Paulo hagaao ke he falu tagata fakalotu he hana vaha ne ha ha i ai “e fakamakutu ke he tau mena he Atua, ka e nakai lata mo e maama.” (Roma 10:2) Ko lautolu pihia kua lata ke fakatatai ke he tagata valivali kua gahua malolo ke vali e fale ka e  fakaaoga e tau vali hepe ha kua kaumahala a ia ke fanogonogo ke he tau fakaakoaga he tagata ne pule ai. Kua liga fiafia e tagata valivali ke he gahua hana, ka e to talia nakai ke he tagata ne pule ai?

Ko e heigoa kua talia ke he Atua hagaao ke he tapuakiaga mea? Kua tali he Tohi Tapu: “Ha ko e mena mitaki ia mo e fakafiafia ki mua he Fakamoui ha tautolu, ko e Atua, ko ia kua finagalo ke fakamomoui e tau tagata oti kana, mo e hokotia a lautolu he maama ke he kupu moli.” (1 Timoteo 2:3, 4) Liga logona hifo he falu kua nakai maeke ke moua e maama pihia i loto he tau lotu loga he vaha nei. Ka e manamanatu—kaeke ko e finagalo he Atua kua lata he tau tagata ke o mai ke he iloilo tonu he kupu moli, to fufu fakakelea kia e ia e mena ia mai ia lautolu? Nakai pihia mai he Tohi Tapu, nukua talahau: “Kaeke ke kumi e koe [e Atua], ti moua e koe a ia.”—1 Nofoaga he Tau Patuiki 28:9.

Taute fefe he Atua a ia he fakailoa ki a lautolu kua kumi moli ki a ia? To foaki he vala tala ka hau e tali.