Takitaki e Iesu e Fakapotopotoaga Hana

“Kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.”—MATAIO 28:20.

1, 2. (a) He foaki e poakiaga ke taute tutaki, ko e heigoa ne mavehe e Iesu ne liu tu mai ke he tau tutaki hana? (e) Takitaki fakagahuahua fefe e Iesu e fakapotopotoaga Kerisiano fakamua atu?

FAKAMUA to haele hake ke he lagi, ko Iesu Keriso, ko e Takitaki ne liu tu mai ha tautolu, ne finatu ke he tau tutaki hana mo e talahau: “Kua tuku mai kia au e pule oti kana ke he lagi mo e lalolagi. Hanei, kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e agaga tapu; ti fakaako atu a mutolu kia lautolu kia omaoma ke he tau mena oti ne tala atu e au kia mutolu; kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.”—Mataio 23:10; 28:18-20.

² Ne nakai kuenaia kotofa e Iesu ke he tau tutaki hana e gahua fakamoui he taute atu falu a tutaki ka e mavehe foki ke fakalataha mo lautolu. Ko e fakamauaga tuai he faka-Kerisiano fakamua atu, tuga ne fakamau i loto he Tohi Tapu he tohi ha Gahua, kua fakakite fakamoli mai na fakaaoga he Keriso e pule ne foaki ki a ia ke takitaki e fakapotopotoaga ne fakatu fou laia. Ne fakafano e ia e “lagomatai” ne mavehe—ko e agaga tapu—ke fakamalolo e tau tutaki hana mo e takitaki a lautolu ke he ha lautolu a tau laliaga. (Ioane 16:7; Gahua 2:4, 33; 13:2-4; 16:6-10) Ne fakagahua e Iesu ne liu tu mai e tau agelu ke he pule hana ke lagomatai hana tau tutaki. (Gahua 5:19; 8:26; 10:3-8, 22; 12:7-11; 27:23, 24; 1 Peteru 3:22) Mua atu, ne foaki he Takitaki ha tautolu e hatakiaga ke he fakapotopotoaga he taute e fakaholoaga ma e tau tagata tane matua ke fekafekau ko e kau fakatufono.—Gahua 1:20, 24-26; 6:1-6; 8:5, 14-17.

3. Ko e heigoa e huhu ka tutala ki ai he vala tala nei?

 ³ Ka e kua mogoia e vaha ha tautolu, ko e “fakaotiaga he lalolagi”? Ko e puhala fe ha ne takitaki e Iesu Keriso e fakapotopotoaga Kerisiano he vaha nei? Mo e fakakite fefe e tautolu na talia e tautolu e takitakiaga nei?

Ha he Iki e Fekafekau Fakamoli

4. (a) Ko hai ne feaki hake e “fekafekau fakamoli mo e loto matala”? (e) Ko e heigoa ne foaki he Iki ke leveki he tau fekafekau?

⁴ He foaki e perofetaaga hagaao ke he fakamailoga he ha ha hinei hana, ne talahau e Iesu: “Ko hai foki e fekafekau fakamoli mo e loto matala, kua kotofa he hana iki ke pule ke he hana tau fekafekau mo e age kia lautolu e tau mena kai ke he tau magaaho? Uhoaki e fekafekau ia, ka hau hana iki mo e moua e ia ha ne eke pihia. Ko e moli, ke tala atu e au kia mutolu, to kotofa a ia ke pule ke he hana tau mena oti.” (Mataio 24:45-47) Ko e “iki” ko e Takitaki ha tautolu, ko Iesu Keriso, mo e kotofa e ia e “fekafekau fakamoli mo e loto matala”—ko e kau he tau Kerisiano fakauku he lalolagi—ke he tau mena oti hana he lalolagi.

5, 6. (a) He fakakiteaga ne moua he aposetolo ko Ioane, ko e heigoa ne fakatino he “tau tuāga lamepa auro ne fitu” mo e “tau fetu ne fitu”? (e) Ko e heigoa kua fakakite mai ha ko e “tau fetu ne fitu” ha he lima matau ha Iesu?

⁵ Ne fakakite he tohi ha Fakakiteaga kua haia i lalo he pule ha Iesu Keriso e fekafekau fakamoli mo e loto matala. He fakakiteaga he “aho he Iki,” ne kitia he aposetolo ko Ioane e “tau tuāga lamepa ne fitu. Ha i ai foki ke he vaha loto he tau tuāga lamepa auro ne fitu e taha tuga ne Tama he tagata” ne “ha he lima matau hana fitu e fetu.” He fakamaama e fakakiteaga ki a Ioane, ne talahau e Iesu: “Ko e kakano galo he tau fetu ne fitu ne kitia e koe ke he lima matau haku, mo e tau tuāga lamepa auro ne fitu. Ko e tau fetu ne fitu, ko e tau agelu ia he tau ekalesia ne fitu; ko e tau tuāga lamepa foki ne fitu ne kitia e koe ko e tau ekalesia ia ne fitu.”—Fakakiteaga 1:1, 10-20.

⁶ Kua fakatino he “tau tuāga lamepa auro ne fitu” e tau fakapotopotoaga Kerisiano moli oti he “aho he Iki,” ne kamata he 1914. Ka e kua e “tau fetu ne fitu”? He magaaho fakamua, ne fakatino e lautolu e tau leveki fakauku oti ne kotofa he agaga, ke leveki e tau fakapotopotoaga he senetenari fakamua. * Ko e tau leveki kua ha he lima matau ha Iesu—i lalo he pule mo e hatakiaga hana. E, ne takitaki e Keriso Iesu e vahega fekafekau ne feaki hake he tau tagata takitokotaha. Ka e, he mogonei, nukua gaogao e numera he tau leveki fakauku. Ka e hokotia atu fefe e takitakiaga he Keriso ke molea e 93,000 he tau fakapotopotoaga he Tau Fakamoli a Iehova he lalolagi katoa?

7. (a) Fakaaoga fefe e Iesu e Kau Fakatufono ke foaki e takitakiaga i loto he fakapotopotoaga ke he lalolagi katoa? (e) Ko e ha kua talahau ai kua kotofa he agaga tapu e tau leveki Kerisiano?

⁷ Tuga he senetenari fakamua, ko e matakau tote he tau tagata tane matua ne mai he tau leveki fakauku ha ne fekafekau he mogonei ko e Kau Fakatufono, ne fakatino e fekafekau fakamoli mo e loto matala ne mai he tau tagata takitokotaha. Ne fakaaoga he Takitaki ha tautolu e Kau Fakatufono nei ke kotofa e tau tagata matua—kua fakauku he agaga po ke nakai—ko e tau motua he fakapotopotoaga he matakavi. Ke he mena nei, ko e agaga tapu, ne foaki e Iehova ki a Iesu e pule ke fakaaoga, kua aoga lahi e matagahua. (Gahua 2:32, 33) Ke fakamua, kua lata he tau leveki nei ke feleveia mo e tau fakatufono ne tohi i loto he Kupu he Atua, ne omoi he agaga tapu. (1 Timoteo 3:1-7; Tito 1:5-9; 2 Peteru 1:20, 21) Ko e tau fakailoaaga mo e tau kotofaaga kua taute ka oti e liogi mo e i lalo he takitakiaga he agaga tapu. Ke lafi ki ai, kua fakakite e lautolu ne kotofa e gahuahua moli he fua he agaga. (Kalatia 5:22, 23) Ti ko e fakatonuaga ha Paulo, mogoia, kua hagaao fakatatai ke he tau motua oti, kua fakauku po ke nakai: “Hanai, a mutolu kia mutolu, katoa mo e fuifui mamoe oti kana kua kotofa a mutolu he agaga tapu ke eke ai mo leoleo.” (Gahua 20:28) Ko e tau tagata kotofa nei nukua moua e hatakiaga mai he Kau Fakatufono mo e fakamakai ke leveki e fakapotopotoaga. He puhala nei, ko Keriso a e mo tautolu mogonei ti hane takitaki fakagahuahua e fakapotopotoaga.

8. Fakaaoga fefe e Keriso e tau agelu ke takitaki e tau tutaki hana?

 ⁸ Ne fakaoga foki e Iesu e tau agelu moli ke takitaki e tau tutaki hana he vaha nei. Hagaao ke he fakataiaga he tau saito mo e tau titania, to hoko mai e heleheleaga he “fakaotiaga he lalolagi.” Ko hai ka fakaaoga he Iki ke taute e heleheleaga? “Ko lautolu ke helehele, ko e tau agelu haia,” he talahau he Keriso. Ne lafi e ia: “To fakafano atu he Tama he tagata hana tau agelu, to fakapotopoto mai e lautolu he hana kautu a lautolu oti kua fakatupetupe mo lautolu kua mahani kelea.” (Mataio 13:37-41) Mua atu, ke tuga ne fakataki he agelu e tau lakaaga ha Filipi ke finatu ke he eunuka Aitiope, ti ha ha ai foki e tau fakamoliaga loga he vaha nei he fakaaoga he Keriso e tau agelu hana ke hataki e tau gahua he tau Kerisiano moli ke moua a lautolu ne loto fakamoli.—Gahua 8:26, 27; Fakakiteaga 14:6.

9. (a) He puhala fe ne takitaki he Keriso e fakapotopotoaga Kerisiano he vaha nei? (e) Ko e heigoa e huhu ka manamanatu a tautolu ki ai kaeke manako a tautolu ke aoga mai he takitakiaga he Keriso?

⁹ Ko e mafanatia ha ia ke iloa kua foaki e Iesu Keriso e takitakiaga ke he tau tuaki hana he vaha nei he puhala he Kau Fakatufono, he agaga tapu, mo e he tau agelu! Pete foki kaeke vevehe fakaku falu he tau tagata tapuaki ha Iehova mai he Kau Fakatufono ha ko e favale po ke tau mena pihia ni, to foaki agaia he Keriso e takitakiaga he kakano he agaga tapu mo e he lagomatai fakaagelu. Pete he pihia, nukua aoga a tautolu mai he takitakiaga hana he magaaho ni ka talia ai e tautolu. Liga fakakite fefe e tautolu kua talia e tautolu e takitakiaga he Keriso?

“Kia Omaoma . . . mo e Fifitaki”

10. Fakakite fefe e tautolu e lilifu ke he tau motua kotofa i loto he fakapotopotoaga?

¹⁰ Nukua foaki he Takitaki ha tautolu ke he tau fakapotopotoaga e “tau mena fakaalofa ke he tau tagata”—“falu foki ke fakamatala e vagahau mitaki, ko e falu foki ke eke mo tau leoleo katoa mo e tau akoako.” (Efeso 4:8, 11, 12) Kua fakakite maali he aga mo e tau gahua ha tautolu ki a lautolu kua talia nakai e tautolu e takitakiaga he Keriso. Kua tonu ni ke ‘mahani foki a tautolu ke fakaaue’ ma e tau tagata tane matua fakaagaga ne foaki he Keriso. (Kolose 3:15) Kua lata foki a lautolu mo e fakalilifu ha tautolu. “Ko e tau patu kua pule fakamitaki, kia talahaua a lautolu kua lata mo e lilifu kua lafi ua,” he tohia he aposetolo ko Paulo. (1 Timoteo 5:17) Maeke fefe ia tautolu ke fakakite ha tautolu a fakaaue mo e lilifu ke he tau patu—ko e tau motua, po ke tau leveki—i loto he fakapotopotoaga? Ne tali e Paulo: “Kia omaoma a mutolu ke he tau takitaki ha mutolu, mo e fifitaki a mutolu ki ai.” (Heperu 13:17) Haia, kua lata ia tautolu ke omaoma ki a lautolu mo e fifitaki, ke fanogonogo, ki a lautolu.

11. Ko e ha e fakalilifu ma e fakaholoaga ma e tau motua ko e taha vala he moui ke he papatisoaga ha tautolu?

¹¹ Kua mitaki katoatoa ha tautolu a Takitaki. Ko e tau tagata tane ne foaki e ia ko e tau mena fakaalofa, kua nakai mitaki katoatoa. Ti liga hehe a lautolu he falu magaaho. Pete ia, kua latatonu ia tautolu ke fakatumau e fakamoli ke he fakaholoaga he Keriso. Ko e moli, he moui fakatatau atu ke he tukuleleaga mo e papatisoaga ha tautolu kua lata ke mailoga e tautolu e tonuhia he pule kotofa he agaga i loto he fakapotopotoaga mo e fakamakai ke fifitaki ki ai. Ko e papatisoaga ha tautolu ‘ke he higoa he agaga tapu’ ko e fakapuloaaga a ia ke he toloaga tagata nukua mailoga e tautolu e agaga tapu mo e fakailoa e matagahua ne kua taute ke he tau finagalo ha Iehova. (Mataio 28:19) Ne talahau he papatisoaga ia nukua kaufakalataha a tautolu mo e agaga ti nakai taute ha mena  ke fakalavelave aki hana gahuaaga ke he tau tutaki he Keriso. Ha kua taute he agaga tapu e gahua aoga lahi he fakailoa mo e kotofa e tau motua, kua tua fakamoli kia a tautolu kaeke mahala a tautolu ke kaufakalataha mo e tau fakaholoaga ma e tau motua i loto he fakapotopotoaga?

12. Ko e heigoa e tau fakafifitakiaga hagaao ke he nakai fakalilifu ke he pule ne totoku e Iuta, mo e heigoa ne fakaako e lautolu ki a tautolu?

¹² Kua toka he tau Tohiaga Tapu e tau fakafifitakiaga ne fakaako ki a tautolu e aoga he omaoma mo e fifitaki. Hagaaki ki a lautolu ne vagahau kelea ke he tau tagata tane kotofa he fakapotopotoaga, ne tuhi e aposetolo ko Iuta ke he tau fakafifitakiaga hataki ne tolu, he talahau: “Oi fakaalofa kia lautolu! Ha ko e mena o a lautolu ke he puhala a Kaino, mo e tafepoi fakahanoa ke he hehe a Palaamo ha ko e totogi, kua mahaikava foki a lautolu ke he fakafualoto a Koru.” (Iuta 11) Ne fakaheu e Kaino e fakatonu fakaalofa ha Iehova mo e tutuli pauaki e puhala kelipopo vihiatia. (Kenese 4:4-8) Pete kua moua e tau hatakiaga faka-Atua loga, ne lali a Palaamo ke kaialu e tau tagata he Atua ma e tau tupe. (Numera 22:5-28, 32-34; Teutaronome 23:5) Ne ha ia Koru ni e matagahua lilifu i Isaraela, ka kua nakai kuenaia ki a ia. Ne fakatupu e ia e fakafualoto ke he fekafekau he Atua ko Mose, ko e tagata totonu ue atu he lalolagi. (Numera 12:3; 16:1-3, 32, 33) Ne malaia a Kaino, Palaamo, mo Koru. Kua maaliali ha e fakaakoaga he tau fakafifitakiaga nei ki a tautolu ke fanogonogo ke he fakatonuaga ha lautolu ne fakaaoga e Iehova he tau tuaga ne ha ai e tau matagahua mo e ke fakalilifu a lautolu!

13. Ko e heigoa e tau fakamonuinaaga ne talahau tuai he perofeta ko Isaia ma lautolu ne fifitaki ke he fakaholoaga ma e tau motua?

¹³ Ko hai ka nakai manako ke aoga mai he fakaholoaga leveki ne mua ue atu ne fakatu he Takitaki ha tautolu he fakapotopotoaga Kerisiano? Ne talahau tuai he perofeta ko Isaia e tau fakamonuina mai ai, he talahau: “Kitiala, to pule e patuiki ha ko e mahani tututonu, to pule foki e tau iki ha ko e tonu. To eke foki e tagata ke tuga ne fakamumuliaga mai he matagi, mo e mena ke malu ai ka to e afa, ke tuga ne tau vailele ke he motu paku lā, ke tuga ne malu foki he kau maka lahi ke he  motu nakai fai vai.” (Isaia 32:1, 2) Kua lata ke igatia e tau motua ke eke mo “mena” pihia ke puipui mo e haohao mitaki. Pete foki kaeke uka ia tautolu ke fifitaki ke he pule, kia liogi a tautolu ke omaoma mo e fifitaki ke he pule ne kotofa faka-Atua i loto he fakapotopotoaga.

Puhala ne Fifitaki e Tau Motua ke he Takitakiaga he Keriso

14, 15. Fakakite fefe e lautolu ne takitaki i loto he fakapotopotoaga kua fifitaki a lautolu ke he takitakiaga he Keriso?

¹⁴ Kua lata he tau Kerisiano oti—mua atu ke he tau motua—ke muitua e takitakiaga he Keriso. Ko e tau leveki, po ke tau motua, kua fai pule foki i loto he fakapotopotoaga. Ka kua nakai kumi a lautolu ke ‘fia pule ke he tua ha tautolu’ he lali ke pule ke he tau momoui ha lautolu. (2 Korinito 1:24) Ne fanogonogo e tau motua ke he tau kupu ha Iesu: “Kua iloa e mutolu, ko e tau iki he tau motu kehe kua pule kia lautolu, ko e tau tagata lalahi foki kua pule kia lautolu. Ka e nakai pihia a mutolu.” (Mataio 20:25-27) He fakakatoatoa he tau motua e tau matagahua ha lautolu, ne lali fakamoli a lautolu ke fekafekau ke he falu.

¹⁵ Kua fakamafana ke he tau Kerisiano: “Kia manamanatu e tau takitaki ha mutolu, ko lautolu kua talahau atu e kupu he Atua kia mutolu; . . . kia fifitaki a mutolu ha lautolu a tua, mo e manamanatu e fakahikuaga he tau mahani ha lautolu.” (Heperu 13:7) Kua nakai lata ke taute noa ni e mena nei ha ko e tau motua ko e tau takitaki. Ne talahau e Iesu: “Ko e mena tokotaha ha mutolu a Takitaki, ko e Keriso haia.” (Mataio 23:10) Ti ko e tua he tau motua ne kua lata ke fifitaki ki ai ha ko e tau tagata fifitaki a lautolu he Takitaki moli ha tautolu, ko e Keriso. (1 Korinito 11:1) Manamanatu ke he falu puhala ne ukufeke e tau motua ke tuga a Keriso he tau fakafetuiaga ha lautolu mo e falu i loto he fakapotopotoaga.

16. Pete ko e pule ne ha ha ia ia, ne fehagai fefe a Iesu mo e tau tutaki hana?

¹⁶ Pete ni he mua atu a Iesu ke he tau tagata nakai mitaki katoatoa ke he tau puhala oti mo e ha ha ai e pule mitaki lahi ne foaki mai he Matua hana, nukua mahani fakalatalata a ia he tau fakafehagaiaga hana mo e hana tau tutaki. Ne nakai fakaofo e ia e tau tagata fanogonogo hana aki e fakatataaga fia kitia he iloilo. Ne fakakite e Iesu e loto manamanatu mo e fakaalofa hofihofi ke he tau tutaki hana, he tokaga ke he tau manako fakatagata ha lautolu. (Mataio 15:32; 26:40, 41; Mareko 6:31) Ne nakai lagataha a ia ke fakagahua lahi e ia e tau tutaki hana ke he mena ne fahia ai a lautolu, mo e nakai fakamamafa e ia a lautolu ke he mena kua maeke ia lautolu. (Ioane 16:12) Ko Iesu kua “totonu mo e loto holoilalo.” Ti kua nakai ke ofo ai, ha kua moua he falu a ia mo okiokiaga.—Mataio 11:28-30.

17. Kua lata fefe e tau motua ke fakakite e mahani fakalatalata tuga he Keriso he tau fakafetuiaga ha lautolu mo e falu i loto he fakapotopotoaga?

¹⁷ Kaeke kua fakatata he Takitaki ko e Keriso e mahani fakalatalata, kua lata foki ia lautolu ne takitaki i loto he fakapotopotoaga ke taute pihia! E, kua fakaeneene a lautolu neke fakaaoga fakakelea e pule ne tuku ki a lautolu. Mo e nakai taute e lautolu ‘ke fina atu mo e tau kupu kua mua ue atu,’ he lali ke fakafiafia e falu. (1 Korinito 2:1, 2) Ka kua eketaha a lautolu ke vagahau fakamukamuka mo e fakamoli e tau kupu moli mai he Tohi Tapu. Mua atu, kua eketaha e tau motua ke fakalatalata he tau amanakiaga ha lautolu mai he falu mo e ke manamanatu ke he tau manako ha lautolu. (Filipi 4:5) He mataala ke he tau kuku he tau tagata oti, ne manamanatu fakaalofa a lautolu ke he tau matakainaga ha lautolu. (1 Peteru 4:8) Mo e nakai kia ko e okiokiaga moli e tau motua ne loto fakatokolalo mo e totonu? Kua pihia moli a lautolu.

18. Ko e heigoa kua lata he tau motua ke ako mai he puhala ne fehagai a Iesu ke he fanau?

 ¹⁸ Nukua mukamuka ke o atu ki a Iesu, pihia foki a lautolu ne ikiiki. Manamanatu ke he tali hana he magaaho ne akonaki he tau tutaki hana e tau tagata he “ta mai e lautolu kia ia e tau tama ikiiki.” “Tokai e tau tama ikiiki, ke o mai a lautolu kia au,” he tala age e Iesu, “ti ua hataki a lautolu.” “Ti kua nikiti ai e ia a lautolu he hana tau lima, ti fakalago e ia hana tau lima ki luga ia lautolu, mo e fakamonuina ai.” (Mareko 10:13-16) Nukua mafanatia mo e totonu a Iesu, mo e futiaki atu falu ki a ia. Ne nakai matakutaku e tau tagata ia Iesu. Mo e fiafia foki e fanau ka ha ha ai a Iesu. Kua mukamuka foki ke o atu ke he tau motua, mo e he fakakite e lautolu e fakaalofa mafanatia mo e totonu, ko e falu—fakalataha mo e fanau—kua fiafia he ha ha ai a lautolu.

19. Ko e heigoa ne putoia he moua e “finagalo a Keriso,” mo e heigoa e laliaga ne kua lata ke taute?

¹⁹ Ko e laulahi he fifitaki e tau motua ki a Keriso Iesu kua falanaki ni ke he lotomatala ha lautolu ki a ia. “Ko hai kua iloa e finagalo he Iki [Iehova] ke fakaako atu a ia?” he huhu e Paulo. Ti lafi e ia: “Ka kua moua e tautolu e finagalo a Keriso.” (1 Korinito 2:16) He moua e finagalo a Keriso kua lata foki ke iloa e puhala manamanatu mo e tau aga oti hana, ke iloa e tautolu e mena ka taute e ia he tuaga pauaki. Manamanatu la nukua iloa mitaki pihia e Takitaki ha tautolu! E, kua lata ke mamata lahi atu ke he tau fakamauaga Evagelia mo e fakapuke e tau loto manamanatu ha tautolu mo e maamaaga he moui mo e fakafifitakiaga ha Iesu. He magaaho ka lali fakalahi e tau motua ke muitua ke he takitakiaga he Keriso, kua hahaga lahi ni a lautolu he fakapotopotoaga ke fifitaki e tua ha lautolu. Mo e ha ha he tau motua e makona ke kitia falu ne muitua fiafia ke he tau tuagahui he Takitaki.

Fakatumau i Lalo he Takitakiaga he Keriso

20, 21. He onoono atu a tautolu ke he lalolagi fou ne mavehe, ko e heigoa kua lata mo fakamaloloaga ha tautolu?

²⁰ Kua aoga lahi ia tautolu oti ke fakatumau i lalo he takitakiaga he Keriso. He teitei hohoko tuai a tautolu ke he fakaotiaga he fakatokaaga he lalolagi nei, kua fakatai e tuaga ha tautolu ke he tau Isaraela he Kelekele Tatai a Moapi he 1473 F.V.N. Kua ha ha he katofia he Motu he Maveheaga a lautolu, mo e he puhala he perofeta ko Mose, ne fakapuloa he Atua: “Ko e mena o atu a [koe, Iosua] mo e motu nai ke he motu ne omonuo ai e Iehova ke he ha lautolu a tau matua ke foaki atu ai kia lautolu.” (Teutaronome 31:7, 8) Ko e takitaki kotofa a Iosua. Ke huhu atu ke he Motu he Maveheaga, kua lata he tau Isaraela ke fifitaki e takitakiaga ha Iosua.

²¹ Kia tautolu ne talamai e Tohi Tapu: “Ko e mena tokotaha ha mutolu a Takitaki, ko e Keriso haia.” Ko e Keriso ni hokoia ka takitaki a tautolu ke he lalolagi fou he maveheaga ka nofo ai e tututonu. (2 Peteru 3:13) Kia fakamalolo mogoia a tautolu ke fifitaki e takitakiaga hana ke he tau puhala oti he moui.

[Matahui Tala]

Manatu Nakai e Koe?

• Takitaki fefe he Keriso e fakapotopotoaga fakamua atu?

• Takitaki fefe he Keriso e fakapotopotoaga hana he vaha nei?

• Ko e ha kua lata ia tautolu ke fifitaki ki a lautolu ne takitaki i loto he fakapotopotoaga?

• Ko e tau puhala fe kua lata he tau motua ke fakakite ko Keriso e Takitaki ha lautolu?

[Tau Huhu he Fakaakoaga]

[Fakatino he lau 16]

Kua takitaki he Keriso e fakapotopotoaga hana mo e toto e tau leveki he lima matau hana

[Tau Fakatino he lau 17]

“Kia omaoma a mutolu ke he tau takitaki ha mutolu, mo e fifitaki a mutolu ki ai”

[Fakatino he lau 19]

Kua mafanatia mo e mukamuka ke o atu ki a Iesu. Kua eketaha e tau motua Kerisiano ke tuga a ia