Tau Huhu Mai he Tau Tagata Totou

Kua fakakelea kia he nakai mitaki katoatoa he tamafine taopou ko Maria e fakafua ha Iesu?

Hagaao ke he “fanau mai a Iesu,” ne talahau he fakamauaga omoi he agaga: “Mena fakatu tane hana matua fifine ko Maria kia Iosefa, ti kitia kua fatu a ia ke he agaga tapu, ka e nakaila fakalataha a laua.” (Mataio 1:18) Maali ai, kua aoga lahi e matagahua he agaga tapu he Atua ke he fakafua tama ha Maria.

Ka e kua, mogoia, a Maria? Putoia nakai hana tau fufua, po ke ovum, ke he fakafua tama hana? He mailoga e tau maveheaga he Atua ne taute ki a Aperahamo, Isaako, Iakopo, Iuta, mo e Patuiki ko Tavita—ko e tau tupuna tane ha Maria—to eke e tama ka fanau mo hakega moli ha lautolu. (Kenese 22:18; 26:24; 28:​10-14; 49:10; 2 Samuela 7:16) Ko e puhala fe foki ka eke e tama ne fanau mai ki a Maria ko e hakega tonu he tau maveheaga faka-Atua ia? To eke a ia mo tama moli ha Maria.—Luka 3:23-34.

Nukua finatu e agelu ha Iehova ke he tamafine taopou ko Maria, he talahau: “Ma Maria na e, ua matakutaku a koe, ha kua ofania he Atua a koe. Kitiala, ko e fatu ne fai a koe, ti fanau e koe e tama tane, ti fakahigoa e koe a ia, ko Iesu.” (Luka 1:30, 31) Kua lata e fufua he fifine ke fakagahuahua he fakafua. Maali ai, ne fakatupu e Iehova ko e Atua e fufua he manava ha Maria ke gahuahua, he hiki e moui he Tama fuataha hana mai he kautu fakaagaga ke he lalolagi.—Kalatia 4:4.

Kua maeke kia e tama ne fakafua he puhala nei, mai he fifine nakai mitaki katoatoa, ke mitaki katoatoa mo e ataina mai he hala he talagaaga ke he tino hana? Gahuahua fefe e tau matafakatufono he hakega he magaaho ka fefakalatahaaki e mitaki katoatoa mo e nakai mitaki katoatoa? Manatu nukua fakaaoga e agaga tapu ke hiki mai aki e moui mitaki katoatoa he Tama he Atua ke fakatupu e fakafuaaga. Nukua utakehe he mena nei ha nakai mitaki katoatoa he tau fufua ha Maria, ati fakatupu ai e talagaaga pauaki ne mitaki katoatoa mai he kamataaga hana.

Ke he ha mena ni, kua lata ia tautolu ke iloa moli ko e fakagahuahua he agaga tapu he Atua he magaaho ia kua fakamoli aki e kautu he finagalo he Atua. Kua fita he fakamaama he agelu ko Kaperielu ki a Maria: “To haele hifo e Agaga Tapu kia koe to fakamalu hifo foki e koe he mana hana ne Mua ue atu ko e mena ia ke talahaua ai e tama tapu, ko e Tama he Atua.” (Luka 1:35) E, kua tuga taute he agaga tapu he Atua e kaupa puipui ke nakai fai nakai mitaki katoatoa po ke malolo kelea ke fakailaila aki e tupuaga he tama mai he fakafuaaga.

Kitia maali ai, ne kaitalofa e Iesu e moui tagata ne mitaki katoatoa hana ke he Matua hana he lagi, nakai ke he ha tagata. Ne “taute e [Iehova] e tino” ma hana, ti ko Iesu​—tali mai he fakafuaaga—kua “nakai fai mena kelea kua mamao mo e tau tagata hala.”—Heperu 7:26; 10:5.

[Fakatino he lau 31]

“Ko e fatu ne fai a koe, ti fanau e koe e tama tane”