Nakai Fai Fakakaupaaga e Tau Kulikuli

KO CHRISTIAN, ne nofo he motu ha Aferika, nukua tapaki he tau kautau ne lali ke peehi a ia ke hu he tau, ka e matauka ia ia ke talia ha ko e hana manamanatuaga ne fakaako he Tohi Tapu. Ti uta he tau kautau a ia ke he kemuaga pagota he magaaho ne oti e tafolo ke fa e aho, taha ia lautolu ne fana a ia he hui. Ne hokotia atu a Christian ke he fale gagao, ka kua lata e hui hana ke hio mai he tuli ki lalo. He taha motu ha Aferika, ne hiohio he tau kautau e tau alaga he tau tama ikiiki. Ti mai he tau motu Cambodia ke he tau Balkan, mai i Afghanistan ki Angola, kua matutaki e tau pomu ke fakamatematekelea mo e fakakulikuli a lautolu ne ikiiki mo e fuakau.

Mai foki he kulikuli ko e tau pakia mo e tatalu, tuga e tau gagao suka. Maeke foki he tau moko he takatakaimotu ke takitaki ke he kulikuli. Ko e tau katofia tata mai he taone Europa Uta, tuga anei, fai fanau ne fanau nakai mau katoa e taha lima. Ne mamutu fua e tau lima ha lautolu he tulilima. Kua fakakite e tau fakamoliaga ke he malona he tino ne tupu mai he kiva he vaikona. Tokologa foki e tau tagata kua ha i ai e tau alaga ha lautolu ka e matematekelea agaia ha kua pareluti po ke falu lauiaaga. Moli, nakai fai fakakaupaaga e tau kulikuli.

Ko e heigoa ni e tupuaga, kua fakamamahi agaia e tau kulikuli. Ne galo e hui hema hifo he tuli ha Junior he 20 e tau. Ne pehe a ia fakamui: “Ne loga lahi e tau logonaaga uka haku. Ne tagi lagaloga au ha ko e mena to nakai liu au ke fai hui foki. Nakai iloa e au e mena ke taute. Ne fakagogoa au.” Nakai leva, ne hiki lahi e aga ha Junior. Ne kamata a ia ke fakaako e Tohi Tapu ti ako e tau mena ne nakai ni lagomatai ki a ia ke fahia ka e pihia foki ha kua foaki ki a ia e amaamanakiaga homo ue atu he vaha fiafia anoiha i hinei he lalolagi. Ka kulikuli a koe, to manako nakai a koe ke moua e amaamanakiaga ia?

Ka pihia, ti fakamolemole totou e vala tala ne mui mai. Kua fakamalolo e mautolu a koe ke kumi e tau tohi he Tohi Tapu ni hau ke maeke ia koe ke kitia ni e koe e mena kua fakatoka mai he Tufuga ma lautolu kua ako hagaao ke he hana finagalo mo e fakalagotatai e tau momoui ha lautolu ki ai.