“Kua Hifo A Lautolu”

“Kua ufitia a lautolu he moana, kua hifo a lautolu ke he mena hokulo tuga ne maka.”

MO E tau kupu ia, ne fakaheke mo e lologo ai e Mose mo e tau Isaraela e fakamouiaga ha lautolu he Tahi Kula mo e fakaotiotiaga he tau fi ko e tau Aikupito ne tutuli a lautolu—ko Farao mo e hana tau kau.—Esoto 15:4, 5.

Ke he tau tagata ne kitiamata e mena tupu hopoate ia, kua nakai maeke ke nimo e fakaakoaga. Nakai fakaai e ha tagata ke paleko po ke totoko e malolo ha Iehova ti moui. Pete ia, nakai leva e mole he tau mahina, ha i ai e tau tagata talahaua ha Isaraela—ko Koru, Tatano, Apiramo mo e 250 ne kau auloa—ne fakatutu mo e totoko e pule foaki-Atua ha Mose mo Arona.—Numera 16:1-3.

He fakatonuaga a Iehova, ne vagahau age a Mose ke he tau Isaraela ke o kehe he tau fale ie he tau tagata fakafualoto. Ko Tatano mo Apiramo, katoa mo e faoa he tau magafaoa ha laua, ne kau fakamao a lautolu. Ati pehe age a Mose ko e hagaao ke he mena kua finagalo e Ia ki ai, to fakakite age e Iehova ke he motu e tau tagata nei “kua vihiatia he tau tagata ia a Iehova.” He mogo taha ia, ti ihi ai e Iehova e kelekele ki lalo ia lautolu. “Kua o hifo moui a lautolu ki seoli mo e tau mena oti ni ha ha ia lautolu, ti tanumia ai a lautolu he kelekele.” Ka e kua a Koru mo e falu ne fakafualoto? “Ti fina atu ai e afi mai mua a Iehova, mo e fakaotioti ai e tau tagata ua e teau ti limagofulu ne uta e mena manogi ke huhunu.”—Numera 16:23-35; 26:10.

Ko Farao mo e hana tau kau, pihia foki mo e tau tagata fakafualoto he tutakale, kua mahaikava oti nukua mahala a lautolu he nakai omaoma ke he fakatufono a Iehova mo e hana finagalo hagaao ke he tau fakatokaaga ke he hana motu. Ko e mena ia, kua fakamakamaka ai, ke he tau tagata oti kua kitia e fakamouiaga a Iehova he tau vaha uka nei ke ako mo e omaoma ki a Iehova “Mua ue atu” mo e “malolo oti kana.” He eke pihia, ne tokaloto e lautolu e tau kupu fakamalolo a Iehova: “To veveli e taha afe ke he tapa hāu, ti afe mo afe ke he fahi matau hau, ka e nakai fakatata mai kia koe. To kitekite noa hāu a tau mata ki ai, to kitia e koe e taui he tau tagata mahani kelea. Ha ko koe Iehova na e, ko e haku a kolo a koe; kua eke e koe a ia ne Mua ue atu mo mena ke nofo ai a koe.”—Salamo 91:1, 7-9.