Kia Ako mo e Fakaako e Mahani Faka-Kerisiano

“Hanai, ko koe kua fakaako ke he taha tagata, nakai kia fakaako e koe a koe?”—ROMA 2:21.

1, 2. Ko e heigoa e tau kakano hau ne manako ai ke fakaako e Tohi Tapu?

HA HA ia koe e tau kakano loga ke fakaako e Kupu he Atua. Liga manako a koe ke iloa e moli i loto—ne hagaao ke he tau tagata, tau mena tutupu, tau matakavi, mo e falu mena foki. Manako a koe ke iloa e taofiaga he kupu moli, ne totoko ke he tau hepehepe fakalotu, tuga e Tolu Taha po ke afi i helo. (Ioane 8:32) Kua lata foki ia koe ke manako ke iloa mitaki a Iehova ke maeke ia koe ke fakatatai fakalahi atu ki a ia mo e fano i mua hana he puhala hako.—1 Tau Patuiki 15:4, 5.

² Ko e kakano tatai mo e mitaki lahi ke fakaako e Kupu he Atua kia tauteute e koe a koe ke fakaako e falu—hau a tau fakahelehele, tau kapitiga, mo lautolu foki ne nakala iloa e koe. Ti nakai ko e fifiliaga noa anei ma e tau Kerisiano moli. Ne tala age a Iesu ke he tau tutaki hana: “Hanei, kia o atu a a mutolu ke eke e tau motu oti kana mo tutaki, . . . Ti fakaako atu a mutolu kia lautolu kia omaoma ke he tau mena oti ne tala atu e au kia mutolu.”—Mataio 28:19, 20.

3, 4. Ko e ha ne kua lilifu ki a koe ke fakaako tuga ne poaki e Iesu?

³ He fakaako e Tohi Tapu mo e manako ke fakaako e falu  ko e mena lilifu lahi mo e maeke foki mo punaaga he mauokafua tukulagi. Ke fakaako ko e feua pauaki nukua leva e fakalilifu. Ne talahau he Encarta Encyclopedia: “Ke he tau Iutaia, kua tokologa e tau tagata lalahi ne mailoga e tau faiaoga ko e tau takitaki ke he fakamouiaga mo e tomatoma ke he fanau ha lautolu ke fakalilifu e tau faiaoga ha lautolu ke mua atu ke he ha lalu tau matua.” Kua mua atu e fakalilifu ma e tau Kerisiano ke fakaako ne lautolu a lautolu he kumikumi ke he Tohi Tapu ti oti fakaako atu ke he falu.

⁴ “Kua loga atu e tau tagata ne gahua fakaako mai he falu a feua pauaki. Kavi ke 48 e miliona he tau tagata tane mo e tau fifine he lalolagi katoa ko e tau faiaoga.” (The World Book Encyclopedia) Kua tuku ke he faiaoga he lalolagi e tau manamanatuaga he tau tagata ikiiki mo e maeke ke fakaohooho a lautolu ke he tau tau loga i mua. Ka kua mua ue atu e lauiaaga he magaaho ka omaoma a koe ke he poakiaga ha Iesu ke fakaako e falu; ti maeke ia koe ke fakaohooho a lautolu ke he vaha tukulagi. Ne peehi he aposetolo ko Paulo e mena nei he magaaho ne tomatoma a ia ki a Timoteo: “A koe kia koe ni, katoa mo e hau a fakaako atu, kia tumau ki ai; ha ko e mena ka eke e koe e mena ia ti fakamoui ai e koe a koe, katoa mo lautolu kua fanogonogo kia koe.” (1 Timoteo 4:16) Haia, kua putoia ke he tau fakaakoaga hau e fakamouiaga.

5. Ko e ha e fakaakoaga Kerisiano ko e fua tokoluga lahi?

⁵ Ke fakaako ne koe a koe ti oti fakaako e falu ko e poakiaga mo e fekau mai he Punaaga mua ue atu, ko e Pule Katoatoa he lalolagi mo e lagi katoatoa. Kua taute he mena ia e fahi nei he fakaakoaga ke mua atu ke he ha fakaakoaga he lalolagi, ko e fakaakoaga ke he tau matapatu kupu, tau makaka gahua, po ke tau pulotu fahi fakaekekafo. Ko e fakaakoaga faka-Kerisiano nukua lata he tagata fakaako ke ako a ia ke fifitaki e Tama he Atua, ko Iesu Keriso, mo e ke fakaako falu ke taute pihia.—Ioane 15:10.

Ko e Ha ne Fakaako ne Koe a Koe?

6, 7. (a) Ko e ha kua lata ia tautolu ke fakaako fakamua ne tautolu a tautolu? (e) Ko e puhala fe ne kaumahala e tau Iutaia he senetenari fakamua ke eke mo tau faiaoga?

⁶ Ko e ha ne pehe ai kua lata ia tautolu ke fakaako fakamua ne tautolu a tautolu? Moli, kua nakai maeke ia tautolu ke fakaako fakamitaki falu kaeke kua nakala fakaako fakamua ne tautolu a tautolu. Ne peehi e Paulo e moli nei he taha vala fakaohooho-manamanatu ne kua aoga ma e tau Iutaia he vaha ia ka kua hahamo foki e fekau aoga lahi ma e tau Kerisiano he vaha nei. Ne huhu a Paulo: “Hanai, ko koe kua fakaako ke he taha tagata, nakai kia fakaako e koe a koe? ko koe kua fakamatala atu, Ua kaiha, kua kaiha kia a koe? Ko koe kua pehe atu, Ua faivao, kua faivao kia a koe? ko koe kua fakalialia ke he tau tupua, kua fofo kia e koe e tau faituga ha lautolu? Ko koe kua hula ke he fakatufono, kua fakakelea kia ke he Atua he holia e koe e fakatufono?”—Roma 2:21-23.

⁷ He fakaaoga e tau huhu, ne fakakite e Paulo ua e hepehepe ne hagaao fakatonu e Tau Poakiaga Hogofulu ki ai: Aua neke kaiha, mo e aua neke faivao. (Esoto 20:14, 15) Ko e falu Iutaia he vaha ha Paulo kua hula he moua e lautolu e Fakatufono he Atua. Ko lautolu ‘kua fakaako ke he fakatufono. Kua taofi foki ko lautolu ko e takitaki he tau matapouli, ko e maama kia lautolu ha ha he pouli, ko e akoako ke he tau tama ikiiki.’ (Roma 2:17-20) Pete ni ia, kua fakatupua falu ha kua taute fakagalogalo e lautolu e kaiha po ke faivao. Kua nakai fakalilifu he mena ia e Fakatufono mo e hana Punaaga i luga he lagi. Kitia ai e koe kua nakai fakaai a lautolu ke lata ke fakaako e falu; kua nakai ni fakaako ne lautolu a lautolu.

8. Liga puhala fe ne eke e falu Iutaia he vaha ha Paulo mo ‘fofo he tau faituga’?

⁸ Ne totoku e Paulo e fofo he tau faituga. Taute moli kia he falu Iutaia e mena ia? Ko e heigoa ne tokaloto e Paulo? Kua moli, hagaao atu ke he tau fakaakoaga temotemoai he vala nei, kua nakai lata a tautolu ke molioli lahi ke he puhala ne ‘fofo he tau Iutaia e tau faituga.’ Fakamua atu ne fakapuloa he fakamauaga he maga i Efeso, nakai ko e ‘fofo he tau faituga’ e tau faihoani ha Paulo, ne talahau kua manatu e falu tagata nukua lata e tau Iutaia ke he tukumale ia. (Gahua 19:29-37) Ne fakaaoga po kua fakafua kia e lautolu takitokotaha e tau koloa uho ne tamai he tau faituga pouliuli ne fofo he tau tagata tau po ke tau tagata fakamakai he lotu? Hagaao ke he Fakatufono he  Atua, ko e auro mo e tau ario he tau tupua kua lata ke moumou, nakai ke uta ma e fakaaogaaga fakatagata. (Teutaronome 7:25) * Ti kua liga hagaao atu a Paulo ke he tau Iutaia ne holitu e poakiaga he Atua ti fakaaoga po ke mautu mai he tau koloa ne tamai he tau faituga pouliuli.

9. Ko e heigoa e tau gahua hepehepe hagaao ke he faituga i Ierusalema ne kua tuga tatai ke he fofo he faituga?

⁹ Ke he taha fahi, ne talahau e Josephus hagaao ke he tala logona i Roma ne fakatupu he tau Iutaia tokofa, ko e takitaki ko e faiaoga he Fakatufono. Ne fakaohooho he tokofa nei e fifine Roma, ko e fifine liliuina ke he faka-Iutaia, ke age e tau auro mo e falu koloa uho mo mena fakaalofa ke he faituga i Ierusalema. He moua ai e lautolu e tau mena nei mai ia ia, ne fakaaoga e lautolu e tau koloa uho ma lautolu ni—kua tatai ai ke he fofo mai he faituga. * Ko e falu kua tuga fofo mai he faituga he Atua he foaki e lautolu e tau poa kulikuli mo e fakahakehake e fakafua koloa lotokai i fafo he faituga, ti taute e faituga “mo ana he tau tagata fofo mena.”—Mataio 21:12, 13; Malaki 1:12-14; 3:8, 9.

Fakaako e Mahani Faka-Kerisiano

10. Ko e heigoa e manatu kua nakai lata ia tautolu ke fakato he tau kupu ha Paulo ne fakamau ia Roma 2:21-23?

¹⁰ Ko e heigoa ni e tau gahua he senetenari fakamua ne putoia ai e kaiha, faivao, mo e fofo e tau faituga ne hagaao a Paulo ki ai, kia nakai fakatonoa e tautolu e manatu he talahauaga hana. Ne huhu e ia: “Ko koe kua fakaako ke he taha tagata, nakai kia fakaako e koe a koe?” Kua mailoga lahi ai ko e tau fakafifitakiaga ne nikiti e Paulo kua hagaao ai ke he tau mahani. Kua nakai mamata e aposetolo he mena nei ke he tau taofiaga po ke fakamauaga tuai he Tohi Tapu. Ko e fakaakoaga fakatagata mo e ke he falu ne hagaao a Paulo ki ai kua hagaao ke he mahani faka-Kerisiano.

11. Ko e ha kua lata ia koe ke fakamahino atu ke he mahani faka-Kerisiano he fakaako e koe e Kupu he Atua?

¹¹ Ko e kakano ma tautolu ke fakagahuahua e fakaakoaga ia Roma 2:21-23 ke ako e mahani faka-Kerisiano mai he Kupu he Atua, he gahua ke hagaao atu ke he mena ne ako e tautolu, ti oti mo e fakaako e falu ke taute pihia foki. Ko e mena ia, he fakaako e koe e Tohi Tapu, kia mataala ke he tau fakamailoga he tau tutuaga ha Iehova, ne tupu mai ai e mahani faka-Kerisiano moli. Kia manamanatu fakahokulo ke he fakatonuaga mo e tau fakaakoaga ne moua e koe i loto he Tohi  Tapu. Ati fakagahuahua fakamalolo ai e tau mena ne ako e koe. Mo e taute pihia kua lata ke moua e fakamalolo ne lafi ke he fifiliaga. Kua mukamuka ma e tau tagata nakai mitaki katoatoa ke feaki e tau fakamolemole, ke fakakakano ko e ha ne fakaata ai he taha tuaga po ke holitu foki e mahani faka-Kerisiano ke he taha mena tupu. Liga ko e tau Iutaia ne totoku e Paulo kua iloilo lahi ke he fakakakano fakagalogalo pihia ne taute pauaki ke fakahehe ai falu. Ka kua fakakite he tau kupu ha Paulo, ko e mahani faka-Kerisiano kua nakai lata ke fakateaga po ke fakaheu ke he mena ne fifili ni he tagata.

12. Fakaata fefe e mahani mitaki po ke mahani fakahanoa ki a Iehova ko e Atua, mo e ko e ha kua lagomatai ai ke tokaloto e moli nei?

¹² Ne fakakite he aposetolo e matapatu kakano ne fakaako mo e fakagahuahua ai e mahani ne moua e koe i loto he Tohi Tapu. Ne fakaata e mahani fakahanoa he tau Iutaia ki a Iehova: “Ko koe kua hula ke he fakatufono, kua fakakelea kia ke he Atua he holia e koe e fakatufono? Ha ko e mena kua eke fakakelea e higoa he Atua ha ko mutolu, ke he tau motu kehe.” (Roma 2:23, 24) Kua pihia foki e moli he mogonei kaeke fakaheu e tautolu e mahani Kerisiano, kua nakai fakalilifu e tautolu e Punaaga hana. Ke he taha fahi, kaeke kuku mau a tautolu ke he tau tutuaga he Atua, to fakaata mitaki ki a ia, he fakalilifu a ia. (Isaia 52:5; Esekielu 36:20) Ko e mataala hau ke he mena nei ka fakamalolo e fifiliaga hau kaeke fehagai a koe mo e tau kamatamata po ke tau tutuaga ka liga mukamuka po kua lata ni ke fakaheu e mahani Kerisiano. Mua atu, ne fakaako he tau kupu ha Paulo a tautolu hagaao ke he taha mena foki. Pete he mataala fakatagata nukua fakaata e mahani hau ke he Atua, he fakaako e koe falu, kia lagomatai a lautolu ke kitia e puhala ko e puhala ka fakagahuahua e lautolu e tau tutuaga mitaki ne fa e ako e lautolu to fakaata atu ni ki a Iehova. Kua nakai kuenaia kua omoi he mahani Kerisiano e mauokafua mo e puipui e malolo tino he taha. Kua fakaata foki ke he Taha ne foaki mo e fakamalolo e mahani ia.—Salamo 74:10; Iakopo 3:17.

13. (a) Lagomatai fefe he Tohi Tapu a tautolu ke he tau mahani? (e) Talahau e kakano he fakatonuaga ia 1 Tesalonia 4:3-7.

¹³ Kua lauia falu a tagata foki he mahani. Kua kitia ai e koe mai he tau fakafifitakiaga i loto he Kupu he Atua ne fakataitai e uho he fakagahuahua e tau tutuaga mahani mitaki he Atua mo e tau fua he fakaheu a lautolu. (Kenese 39:1-9, 21; Iosua 7:1-25) Kua maeke foki ia koe ke moua e fakatonuaga maali pihia ke he tau mahani tuga anei: “Ko e finagalo foki he Atua hanai, kia fakatapu a mutolu, kia fakamamao a mutolu mo e feuaki. Kia takitokotaha a mutolu mo e iloa ke moua e ia ni hana hoana mo e fakatapu mo e lilifu, ua moua mo e foli kelea he manako lahi, tuga he tau motu kehe kua nakai iloa e Atua. Aua neke mahani hepehepe taha, po ke fakavai hana matakainaga ke he mena nai; . . . ha ko e mena nakai ui ai a tautolu he Atua kia mahani kelea ai, ka kia fakatapu ai.”—1 Tesalonia 4:3-7.

14. Ko e heigoa ka liga huhu e koe ki a koe ni hagaao ke he fakatonuaga ia 1 Tesalonia 4:3-7?

¹⁴ Kua teitei ke kitia he ha tagata ni mai he vala nei kua moumou he mahani feuaki e mahani faka-Kerisiano. Ka kua maeke ia koe ke mua atu e maama ke he vala nei. Kua foaki he falu matakupu e tau puhala ma e fakaakoaga mo e manamanatu fakahokulo, mo e lotomatala ka moua mai. Ke tuga anei, liga kua fakaata a koe ke he kakano he mena ne talahau e Paulo nukua tamai he mahani feuaki e tagata ‘ke mahani hepehepe po ke fakavai hana matakainaga ke he mena nai.’ Ko e heigoa e tonuhia ne putoia ki ai, mo e to maeke fefe he maama mitaki ke he mena nei ke foaki ki a koe e fatuakiloto ke fakatumau e mahani faka-Kerisiano? Maeke fefe he tau fua he kumikumiaga pihia ke tauteute foki a koe ke fakaako e falu mo e lagomatai a lautolu ke fakalilifu e Atua?

Kia Ako ke Maeke ke Fakaako

15. Ko e heigoa e tau kanavaakau kua lata ia koe ke fakaaoga ke fakaako ne koe a koe he puhala he fakaakoaga fakatagata?

¹⁵ Kua ha ha he Tau Fakamoli a Iehova e tau kanavaakau ne fakaaoga e lautolu ke kumikumi e tau huhu po ke tau matakupu ne mafuta hake he ako a lautolu ke fakaako ne lautolu a lautolu po ke falu. Taha e kanavaakau ne moua ke he tau vagahau loga ko e Watch Tower Publications Index. Kaeke ke moua ai e koe, kua maeke ia koe ke fakaaoga ai ke moua aki e tau fakaakoaga i loto he tau  tohi fakave ke he Tohi Tapu he Tau Fakamoli a Iehova. Maeke ia koe ke kumi ke he tau matakupu po ke i lalo he tohiaga he tau kupu he Tohi Tapu. Taha kanavaakau foki kua moua ke he Tau Fakamoli a Iehova ke he tau vagahau lalahi loga ko e Watchtower Library. Ko e polokalama komopiuta nei he CD-ROM kua toka ai e tau tohi lafilafi loga he puhala eleketoniki. Kua fakaata he polokalama i ai e taha ke kumikumi e tau matakupu mo e tau tutalaaga he tau kupu Tohi Tapu. Kaeke kua moua ua e koe e tau kanavaakau nei, kia fakaaoga tumau ai he ako e koe e Kupu he Atua ke maeke ke fakaako e falu.

16, 17. (a) I fe ka moua e koe e tau talahauaga maaliali ke he tau tonuhia ne totoku ia 1 Tesalonia 4:6? (e) Ko e tau puhala fe kua maeke e feuaki ke fakavai e tau tonuhia he falu?

¹⁶ Kia onoono a tautolu ke he fakafifitakiaga na i luga ia 1 Tesalonia 4:3-7. Nukua mafuta hake e huhu hagaao ke he tau tonuhia. Tonuhia ha hai? Mo e liga kua fakavai fefe e tau tonuhia ia? Mo e tau kanavaakau fakaako ne totoku, kua liga maeke ia koe ke moua e numera he tau talahauaga maaliali he tau kupu nei, pihia foki ke he tau tonuhia ne totoku e Paulo. Kua maeke ia koe ke totou e tau talahauaga pihia he Insight on the Scriptures, Volume 1, tau lau tohi 863-4; True Peace and Security—How Can You Find It?, lau tohi 145; The Watchtower, Novema 15, 1989, lau tohi 31.

¹⁷ He tutuli ke fakaako, to kitia e koe kua fakakite he tau tohi ia e moli he tau kupu ha Paulo. Ne hala e tagata feuaki ke he Atua mo e fakatapakupaku ne ia a ia ke he tau gagao. (1 Korinito 6:18, 19; Heperu 13:4) Ko e tagata tane feuaki kua fakavai e tau tonuhia kehekehe he fifine ne agahala fakalataha mo ia. Ne fofo e ia e tuaga mahani mitaki mo e loto manamanatu mitaki he fifine. Kaeke nofo tokotaha e fifine, kua fakavai e ia e  tonuhia hana ke mau ko e taopou mo e tonuhia he tane hana anoiha ne amanaki e hoana ke pihia. Ne fakamamahi e ia e tau matua he fifine mo e tane hana kaeke kua mau a ia. Ne fofo he tagata faivao e tonuhia he magafaoa ni hana ke he talahaua he mahani mea. Kaeke ko ia ko e taha he fakapotopotoaga Kerisiano, kua tamai tuai e ia e fakavai ki ai, he moumou e talahaua he fakapotopotoaga.—1 Korinito 5:1.

18. Aoga fefe mai a koe he fakaakoaga Tohi Tapu hagaao ke he mahani faka-Kerisiano?

¹⁸ Nakai kia lagomatai he tau talahauaga pihia hagaao ke he tau tonuhia e kupu ia ke folafola mai i mua hau? Ke ako pihia kua uho lahi moli. He tutuli ai e koe, kua fakaako ne koe a koe. Ko e hau a maama ke he kupu moli mo e lauiaaga malolo he fekau he Atua to tupu ki mua. Kua fakamalolo e koe e fifiliaga hau ke piki mau ke he mahani faka-Kerisiano pete ko e heigoa e tau kamatamata ka mafuta hake. Mo e manatu la e mua atu hau ke eke mo faiaoga! Tuga anei, he fakaako ke he falu e kupu moli he Tohi Tapu, kua maeke ia koe ke foaki e lotomatala ke he 1 Tesalonia 4:3-7, he fakatolomaki e maamaaga mo e fakaaueina ha lautolu ma e mahani faka-Kerisiano. Ko e mena ia, kua maeke he fakaakoaga hau ke lagomatai a koe mo e tokologa foki ke fakaheke e Atua. Ti kua totoku ai e tautolu taha ni e fakafifitakiaga, mai he tohi ha Paulo ke he tau Tesalonia. Kua ha ha ai e loga he falu a vala he mahani faka-Kerisiano, mo e loga foki e falu fakafifitakiaga mo e tau manatu he Tohi Tapu, ne kua lata ia koe ke ako, fakagahua, mo e fakaako.

19. Ko e ha kua aoga ai ke piki mau a koe ke he mahani faka-Kerisiano?

¹⁹ Kua nakai fai huhu kua lata hagaao ke he pulotu he taute e mena ia. Ne talahau ia Iakopo 3:17 “ko e iloilo mai luga,” mai ni ia Iehova ko e Atua, “kua fakamua hana a mea.” Kua talahau moli he mena ia ke muitua ke he tau tutuaga mahani mitaki he Atua. Ko e moli, kua manako a Iehova ko lautolu ne hukui a ia he fakaako e Tohi Tapu ko lautolu ia ni ko e tau fakafifitakiaga mitaki he “loto mea.” (1 Timoteo 4:12) Ko e fakatokatokaaga moui he tau tutaki fakamua atu ia tuga ne fakakite e Paulo mo Timoteo; ne fehola mai a laua he mahani faivao, ti tohi foki e Paulo: “Ko e feuaki, mo e tau mena kelea oti, mo e velevelemena, aua neke talahau e tau mena ia ki mua ha mutolu, tuga e mena kua lata mo e tau tagata tapu. Ko e tau kupu kelea foki, mo e tau kupu fakateaga, mo e fefeua.”—Efeso 5:3, 4.

20, 21. Ko e ha ne talia a koe ke he mena ne tohia he aposetolo ko Ioane, tuga ne fakamau ia 1 Ioane 5:3?

²⁰ Pete kua maama mo e mahino e tau tutuaga mitaki ne fakakite i loto he Kupu he Atua, nakai ko e kavega mamafa a lautolu. Kua moli e mena nei ki a Ioane, ko e aposetolo ne leva lahi e moui. He fakave ke he mena ne kitia e ia mai he tau tau loga he moui, kua iloa e ia ko e mahani faka-Kerisiano kua nakai hagahaga kelea. Ke he taha fahi, kua eke ni ke mitaki, aoga, mo e monuina. Ne peehi e Ioane e mena nei, he tohia: “Ha ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.”—1 Ioane 5:3.

²¹ Ka kia mailoga, ne nakai fakakite e Ioane ka omaoma ke he Atua ha ko e mahani faka-Kerisiano ko e puhala mitaki lahi ni a ia ha kua fakahao a tautolu mai he tau mena vihi, mai he fua kelea kaeke muitua ke he taha puhala foki. Ne fakamaama fakamitaki ai e ia he fakailoa fakamua ko e fakakiteaga a ia he fakaalofa ha tautolu ma Iehova ko e Atua, ko e magaaho uho ke fakakite e fakaalofa ha tautolu ma hana. Moli ai, ke fakaako ni he tagata e tagata po ke falu ke fakaalofa ke he Atua kua lata ke talia e tautolu mo e fakagahuahua e tau tutuaga tokoluganea hana. E, ko e kakano kia fakaako ne tautolu a tautolu mo e falu e mahani faka-Kerisiano.

[Tau Matahui Tala]

Manatu Nakai e Koe?

• Ko e ha kua lata ia tautolu ke ako ke fakaako ne tautolu a tautolu fakamua to fakaako e falu?

• Maeke fefe e mahani ha tautolu ke fakaata a Iehova?

• Ko e ha hai e tonuhia ka liga fakavaia he tagata feuaki?

• Ko e heigoa e fifiliaga hau hagaao ke he mahani faka-Kerisiano?

[Tau Huhu he Fakaakoaga]

[Fakatino he lau 18]

“Nakai mamafa foki hana tau poaki”