Muitua ke he Fakatokatokaaga Faka-Patuiki

“Ti tohi ai e ia mana e tohi he fakatufono nai . . . Kia ha ia ia e tohi ia, kia totou ai e ia ke he tau aho oti he hana moui.”—TEUTARONOME 17:18, 19.

1. Kua liga manako e Kerisiano ke tuga a hai?

LIGA kua nakai manamanatu a koe hagaao ki a koe ni ke eke mo patuiki tane po ke fifine. Ko hai e Kerisiano tua fakamoli mo e tagata fakaako he Tohi Tapu ka manamanatu hifo ko ia haia hane fakagahua e pule patuiki, ke tuga e tau patuiki mitaki ko Tavita, Iosia, Hesekia, po ko Iehosafata? Ka kua maeke mo e kua lata ia koe ke tuga a lautolu ke he taha puhala aoga lahi. Ko e heigoa a ia? Ti kua lata he ha ia koe ke manako ke tuga a lautolu ke he puhala ia?

2, 3. Ko e heigoa ne kitia tuai e Iehova hagaao ke he patuiki tagata, mo e heigoa kua lata he patuiki pihia ke taute?

² He vaha ha Mose, leva ato talia he Atua e tau patuiki tagata ma e tau Isaraela, ne kitia tuai e Ia e manako ke fai patuiki ke tu hake he tau tagata Hana. Ko e mena ia ne omoi e ia a Mose ke lalafi e tau fakaakoaga aoga ke he maveheaga he Fakatufono. Ko e tau fakaakoaga mo e tau takitakiaga faka-patuiki anei ma e tau patuiki.

³ Ne talahau he Atua: “Ka hoko atu foki a koe ke he motu kua foaki mai ai e Iehova hau a Atua kia koe, . . . ti pehe age a koe, To fakatu e au maku ha patuiki, ke tuga ne tau motu oti kua agaagai mai kia au. Kia fakatu e koe e patuiki māu kua fifili ai e Iehova hau a Atua; . . . Ka nofo foki a ia ke he nofoaiki he hana kautu, ti tohi ai e ia mana e tohi he fakatufono nai . . . Kia ha ia ia e tohi ia, kia totou ai e ia ke he tau aho oti he hana moui; kia fakaako a ia ke matakutaku ai kia Iehova hana Atua; mo e omaoma ni a ia ke he tau kupu oti he fakatufono nai mo e tau poakiaga nai ke eke ai e ia.”—Teutaronome 17:14-19.

4. Ko e heigoa ne putoia ke he tau takitakiaga he Atua ma e tau patuiki?

⁴ Haia, ko e patuiki ka fifili e Iehova ma e tau tagata tapuaki hana ka taute e tohi fakatagata he tau matatohi ka moua e koe i loto he Tohi Tapu hau. Ti kua lata he patuiki ke totou e tohi ia ke he tau aho oti, ti liu fatiaki foki. Nakai ko e faofao he manamanatuaga a ia. Ka ko e fakaakoaga, mo e ha i ai e foliaga aoga lahi. Ko e patuiki ka moua e taliaaga ha Iehova kua lata ke tutuli mau e fakaakoaga ia ke feaki mo e leveki e aga he loto ne hako. Kua lata foki ia ia ke fakaako e tau matatohi omoi agaga ia ke eke mo patuiki kua kautu mitaki mo e lotomatala.—2 Tau Patuiki 22:8-13; Tau Fakatai 1:1-4.

Ako Tuga e Patuiki

5. Ko e heigoa e tau vala he Tohi Tapu ne kua lata he Patuiki ko Tavita ke tohi mo e totou, mo e fefe e logonaaga hana hagaao ke he mena nei?

⁵ Ko e heigoa he manatu e koe ne kua lata ma Tavita he magaaho ne eke a ia mo patuiki i Isaraela katoa? Haia, nukua lata a ia ke taute e tohi he tau tohi he Penetatuka (Kenese, Esoto, Levitika, Numera, Teutaronome). Manamanatu la ke he peehiaga hokulo ne kua liga lauia ke he manamanatuaga mo e loto ha Tavita ke fakaaoga e tau mata mo e tau lima ni hana ke tohia e tohi he Fakatufono. Kua tuga ai, ne tohi foki e Mose e tohi ha Iopu ti pihia foki e tau Salamo 90 mo e 91. Kua liga tohi foki kia e Tavita e tau kupu nei? Fakalata pihia. Ti kua liga ha ha ia ia foki e tau tohi ha Iosua, Tau Fakafili, mo Ruta. Ti kitia ai e  koe kua ha ha he Patuiki ko Tavita e tau vala loga he Tohi Tapu ke totou mo e manamanatu fakahokulo ki ai. Ti ha ha ai ia koe e kakano ke talitonu kua taute pihia ni e ia, ha ko e mena kia mailoga e talahauaga hana hagaao ke he Fakatufono he Atua, ne moua he mogonei ia Salamo 19:7-11.

6. Iloa moli fefe e tautolu kua tatai e fiafia ha Iesu mo e matua tupuna hana ko Tavita ke he tau Tohiaga Tapu?

⁶ Ko Tavita ne Mua—ko Iesu, ko e Tama ha Tavita—ne muitua ke he fakatokatokaaga taha ia ni. Ko e aga fa mahani ha Iesu a ia ke finatu ke he sunako he tau fahitapu oti. Ne logona e ia i ai e tau Tohiaga Tapu ne totou mo e fakamaama. Mua atu ke he mena ia, ke he falu magaaho ne totou e Iesu ke he toloaga tagata e Kupu he Atua mo e fakamaama hana gahuaaga. (Luka 4:16-21) Kua mukamuka ia koe ke kitia e mahani lahi hana mo e tau Tohiaga Tapu. Kia totou a e tau fakamauaga Evagelia, mo e kitia ko e fiha e magaaho ne talahau e Iesu “kua tohi” po ke ke he falu puhala ne hagaaki ke he falu vala pauaki he Tohiaga Tapu. Ha ko e mena, he hana a Lauga he Mouga ne fakamau e Mataio, ne totoku mai a Iesu he tau Tohiaga Tapu Heperu ke laga 21 e magaaho.—Mataio 4:4-10; 7:29; 11:10; 21:13; 26:24, 31; Ioane 6:31, 45; 8:17.

7. Kehe fefe a Iesu mai he tau takitaki lotu?

⁷ Ne muitua a Iesu ke he fakatonuaga ia Salamo 1:1-3: “Uhoaki e tagata kua nakai fano ke he pulega he tau tagata mahani kelea, . . . ka ko e fakatufono a Iehova kua fiafia ai a ia, ti manamanatu a ia ke he tau fakatufono hana ke he aho katoa mo e po. . . . To monuina foki a ia ke he tau mena oti kana ke eke e ia.” Kua kehe lahi ha e mena ia mo e tau takitaki lotu he vaha hana, ne ‘nonofo ke he nofoa a Mose’ ka e fakaheu e “fakatufono a Iehova”!—Mataio 23:2-4.

8. Ko e ha kua nakai aoga ai ke he tau takitaki lotu faka-Iutaia ke totou mo e fakaako e Tohi Tapu?

⁸ Ka kua liga fakaniniko falu ke he taha vala ka liga fakaliliu ke tuga kua fakalolelole e Iesu e fakaakoaga ke he Tohi Tapu. Ia Ioane 5:39, 40, kua totou e tautolu e mena ne talahau e Iesu ke he falu he vaha hana: “Kia kumikumi a mutolu ke he tau Tohi, ha ko e mena kua manatu a mutolu, ke moua ai e mutolu e moui tukulagi; ko e tau Tohi foki ia kua talahau a au. Ka e nakai mafai a mutolu ke o mai kia au ke moua ai e mutolu e moui.” He talahauaga ia kua nakai fakalolelole e Iesu e tau tagata fanogonogo Iutaia hana mai he fakaako e tau Tohiaga Tapu. Ka kua fakatapakupaku e ia e nakai fakamoli po ke nakai fakatumau ha lautolu. Iloa e lautolu to takitaki atu he tau Tohiaga Tapu a lautolu ke he moui tukulagi, ka ko e tau Tohiaga Tapu ia ni ne kumikumi e lautolu kua lata foki ke takitaki a lautolu ke he Mesia, ko Iesu. Pete ia, ne fakaheu a lautolu ke talia a ia. Ti kua nakai fai aoga e fakaakoaga ha kua nakai fakamoli a lautolu mo e kua nakai maeke ke fakaako.—Teutaronome 18:15; Luka 11:52; Ioane 7:47, 48.

9. Ko e heigoa e fakafifitakiaga mitaki ne fakatoka he tau aposetolo mo e tau perofeta fakamua atu?

⁹ Ko e kehe ha a ia e tuaga mo e tau tutaki ha Iesu, fakalataha mo e tau aposetolo! Ne fakaako e lautolu “e tau Tohi Tapu, kua maeke ke fakailoilo [e taha] ke moua ai e moui.” (2 Timoteo 3:15) Ke he mena nei kua tatai a lautolu mo e tau perofeta fakamua atu “ne hūhū ki ai mo e kumi fakamakutu.” Ko e tau perofeta ia kua nakai manatu ke he kumikumiaga ia ke eke mo taha magaaho fakamakutu noa ni he fakaakoaga ke he tau mahina gahoa po ke taha ni e tau. Ne talahau he aposetolo ko Peteru “ko lautolu kua kumi,” mua atu hagaao ke he Keriso mo e ke he tau fakahekeaga ne putoia ke he matagahua fakamoui hana ma e tau tagata. He tohi fakamua hana, ne fatiaki laga 34 e Peteru mai he tau tohi hogofulu he Tohi Tapu.—1 Peteru 1:10, 11.

10. Ko e ha kua lata ia tautolu ke fiafia ke he fakaakoaga Tohi Tapu?

¹⁰ Kitia maali ai, mogoia, ko e fakaako fakamakutu  ke he Kupu he Atua ko e kotofaaga fakapatuiki ma e tau patuiki i Isaraela i tuai. Ne muitua a Iesu ke he fakatokatokaaga nei. Mo e ke fakaako ai ko e matagahua lahi ma lautolu ka pule mo Keriso ko e tau patuiki i luga he lagi. (Luka 22:28-30; Roma 8:17; 2 Timoteo 2:12; Fakakiteaga 5:10; 20:6) Ko e fakatokatokaaga faka-patuiki nei kua lata lahi foki ma lautolu oti he vaha nei ne mamata atu ke he tau monuina he lalolagi i lalo he pule Kautu.—Mataio 25:34, 46.

Ko e Matagahua ma e Tau Patuiki mo e ma Hau

11. (a) Ko e heigoa e hagahaga kelea ke he fakaakoaga ne ha ha ai ma e tau Kerisiano? (e) Ko e heigoa e huhu kua lata ia tautolu ke huhu ki a tautolu ni?

¹¹ Kua lata ia tautolu ke talahau fakamalolo mo e fakamoli kua lata he tau Kerisiano moli takitokotaha ke taute ni e ia hana a kumikumiaga ke he Tohi Tapu. Nakai ko e taha mena kua lata a ia he magaaho ne fakaako fakamua e koe e Tohi Tapu mo e Tau Fakamoli a Iehova. Kua lata ia tautolu takitokotaha ke fifili ke kalo kehe mai ai neke tuga e falu he vaha he aposetolo ko Paulo ne fai magaaho ti fakahanoa ke he fakaakoaga fakatagata. Ne ako e lautolu e “tau kupu he kamataaga he kupu he Atua,” tuga e “tau kupu fakamua a Keriso.” Pete ia, kua nakai fakatumau e tau fakaakoaga ha lautolu ati nakai ‘hohoko atu ke he katoatoaaga.’ (Heperu 5:12–6:3) Kua lata ai ia tautolu ke huhu hifo ki a tautolu ni hagaao ki ai: ‘Fefe e logonaaga haku hagaao ke he fakaakoaga fakatagata ke he Kupu he Atua, pete kua fakalataha fakaku laia au ke he fakapotopotoaga Kerisiano po ke ke he tau tau loga? Ne liogi a Paulo ke ‘tupu foki e maama mitaki ke he Atua.’ Fakakite nakai e au kua pihia foki e manako haku?’—Kolose 1:9, 10.

12. Ko e ha kua aoga ai e fiafia hololoa ke he Kupu he Atua?

¹² Ko e kei ke moua e koe e aga mau he fakaakoaga mitaki ko e kua lata ia koe ke feaki e fiafia lahi ke he Kupu he Atua. Ne tuhi e Salamo 119:14-16 ke he fakaataaga tumau mo e kakano ke he Kupu he Atua ke eke mo puhala ke moua ai e koe e fiafia ki ai. Haia foki, kua moli e mena ia pete ni ko e fiha e leva hau he eke mo Kerisiano. Ke peehi e mena ia, kia manatu e fakafifitakiaga ki a Timoteo. Pete kua fita e fekafekau e motua Kerisiano nei ko e “tagata tau mitaki a Iesu Keriso,” ne tomatoma age a Paulo ki a ia ke lalilali fakalahi he “fakatokatoka fakahako e kupu moli.” (2 Timoteo 2:3, 15; 1 Timoteo 4:15) Maali ai, he ‘lalilali fakalahi’ kua putoia ai e tau aga mau he fakaakoaga mitaki.

13. (a) Maeke fefe ke moua taha magaaho lahi ma e fakaakoaga Tohi Tapu? (e) Ko e heigoa e tau hikihikiaga kua kitia e koe a koe kua maeke ke taute ke moua e magaaho ma e fakaakoaga?

¹³ Ko e lakaaga ke he tau aga mau he fakaakoaga mitaki ke fakatoka tumau taha magaaho ma e fakaakoaga Tohi Tapu. Ti ko e heigoa kua taute e koe hagaao ke he mena ia? Ko e heigoa ni e tali fakamoli hau, talitonu nakai a koe to moua e koe e aoga he fakaaoga fakalahi e taha magaaho ke fakaako fakatagata? ‘Maeke fefe,’ he manatu e koe, ‘ke fakatoka e au taha magaaho ma e mena ia?’ E, nukua fakatolomaki he falu e magaaho fakaako Tohi Tapu mitaki ha lautolu he uhu aala he mogo pogipogi. Liga totou e lautolu e Tohi Tapu ke 15 e minuti po ke taute taha feua pauaki he fakaakoaga fakatagata. Mo taha mena foki, ka e kua he taute e hikihikiaga fakatote ke he setulu fakafahitapu hau? Ke fakatai ki ai, kaeke ko e aga mau hau ke totou e tohitala ke he tau aho loga po ke kitekite e nusi he televisoni, kua maeke nakai ke taha e aho he fahitapu ka nakai taute ai e tau mena ia? Kua maeke ia koe ke fakaaoga e magaaho he aho ia ke fakatolomaki e fakaakoaga Tohi Tapu. Kaeke hukui e koe e nusi he taha aho mo e foaki e magaaho ne 30 e minuti po ke ha ke fakaako fakatagata, to moua e koe ke  molea e 25 e matahola he tau. Manamanatu la ke he aoga he tau matahola 25 ia he totouaga Tohi Tapu lafilafi po ke fakaako! Hanei taha manatu: Ke he fahitapu ka mui mai, kia tivi e tau gahua hau he matahiku he tau aho takitaha. Kitia kua maeke nakai ia koe ke moua taha mena kua lata ke tiaki po ke toka ke fakaata taha magaaho ke fakalahi atu e totou po ke fakaako Tohi Tapu.—Efeso 5:15, 16.

14, 15. (a) Ko e ha kua aoga e tau foliaga hagaao ke he fakaakoaga fakatagata? (e) Ko e heigoa e tau foliaga kua lata hagaao ke he totouaga he Tohi Tapu?

¹⁴ Ko e heigoa ka taute e fakaakoaga ke mukamuka, mo e fiafia ki a koe? Ko e tau foliaga. Ko e heigoa e tau foliaga moli kua lata ia koe ke fakatokatoka? Ma e tokologa, ko e foliaga mitaki lahi ko e totouaga he Tohi Tapu katoa. Liga to hoko ke he mogonei, kua totou e koe e tau vala he Tohi Tapu ke he falu magaaho ti kua moua e aoga mai ai. Maeke nakai ia koe mogonei ke taute ai mo fifiliaga hau ke totou e Tohi Tapu katoa? Ko e hau a foliaga fakamua ke totou e Tohi Tapu katoa kua liga lata ke totou e tau Evagelia ne fa, mui ai e foliaga ke uaaki, tuga ke totou e vala he tau Tohiaga Tapu Kerisiano Heleni ne toe. Ti ka moua e koe e tau fua makona mo e aoga, ko e foliaga foki hau ke totou fakamatafeiga e tau tohi ha Mose mo e tau tohi he fakamauaga tuai ke hoko ki a Eseta. He kautu ki ai, to kitia e koe ko e mena kua lata ni ke totou e vala he Tohi Tapu ne toe. Taha e fifine, ne kavi ke 65 e tau he moui he magaaho ne eke a ia ko e Kerisiano, ne tohia i loto he kili he Tohi Tapu hana e aho ne kamata a ia ke totou ai mo e aho ne oti ai he totou e ia. Mogonei kua laga lima he totou e ia e Tohi Tapu! (Teutaronome 32:45-47) Mo e nakai totou mai he komopiuta po ke he laupepa lomi, ne toto e ia e Tohi Tapu ke he tau lima hana.

¹⁵ Ko e falu ne kua fita he hokotia ke he foliaga ke totou e Tohi Tapu katoa kua uta falu lakaaga ke taute e fakaakoaga hololoa ha lautolu ke tolomaki ki mua e hakahakau mo e palepale mitaki. Taha puhala, ko e lafi ki ai e vala tala he fakaakoaga ne fifili ato taute e totou fakapapahi he tau tohi takitaha he Tohi Tapu. I loto he “All Scripture Is Inspired of God and Beneficial” mo e Insight on the Scriptures, kua maeke he taha ke moua e tau fakaakoaga mitaki lahi hagaao ke he fakatokaaga, puhala, mo e tau mena aoga lahi he fakamauaga tuai he tau tohi takitaha he Tohi Tapu. *

16. Kua lata ia tautolu ke kalo mai he muitua ke he fakafifitakiaga fe he fakaakoaga Tohi Tapu?

 ¹⁶ He magahala he fakaakoaga hau, kia kalo mai he onoonoaga ne mahani ke he tau tagata fakaako tokoluga he Tohi Tapu. Kua mamata fakalahi a lautolu ke he tau tohi kumikumi ke tuga kua puna mai e Tohi Tapu he tau tagata. Falu ia lautolu ne lali ke kotofa e toloaga tagata pauaki ma e tau tohi takitaha po ke manamanatu ke he foliaga mo e onoonoaga tonu ne manamanatu e tau tagata tohia ki ai he tau tohi takitaha. Ko e lauiaaga he tau fakamaamaaga tagata pihia nukua liga fakahagaao e tau tohi Tohi Tapu ke eke ko e tohi fakamauaga tala tuai po ke onoono ni ki ai ke eke ke fakakite e kamataaga he tupumainoa ke he tau lotu. Ko e falu tagata fakaako tokoluga nukua putoia lahi ke he fakaakoaga he tau kupu, ke tuga e kumikumiaga ke he tau kupu he tau tohi he Tohi Tapu. Kua lavelave lahi a lautolu ke fakaako e punaaga he tau kupu mo e talahau e tau kakano he faka-Heperu mo e faka-Heleni, ka e nakai ke he aoga he fekau he Atua. Manatu nakai a koe to foaki he tau kumikumiaga pihia e tua hokulo mo e fakalagalaga?—1 Tesalonia 2:13.

17. Ko e ha kua lata ia tautolu ke mailoga kua ha ha he Tohi Tapu e fekau ma e tau tagata oti?

¹⁷ Kua tonu foki kia e tau fakahikuaga he tau tagata fakaako tokoluga? Moli kia kua ha ha he tau tohi takitaha he Tohi Tapu ko e taha ni e matapatu manatu po kua fakatonu ni ke he taha toloaga tagata pauaki? (1 Korinito 1:19-21) Ko e moli hanei, kua ha ha he tau tohi he Kupu he Atua e aoga mauokafua ma e tau tagata he tau tau momoui kehekehe mo e tau feakiaga oti. Pete ni ka tohi fakamahao e tohi ke he tagata taha, tuga a Timoteo po ko Tito, po ke ke he matakau pauaki, tuga ko e tau Kalatia po ke tau Filipi, kua maeke mo e kua lata ia tautolu oti ke fakaako e tau tohi ia. Kua aoga a lautolu ma tautolu takitokotaha, ti liga tutala taha tohi pauaki ke he tau matapatu kupu loga mo e aoga ai e toloaga tagata loga. Haia, ko e fekau he Tohi Tapu kua gahuahua ke he lalolagi katoatoa, ne lagomatai a tautolu ke maama ko e ha ne fakaliliu ai ke he tau vagahau he tau tagata he lalolagi katoa.—Roma 15:4.

Aoga ma Hau mo e Falu

18. He totou e koe e Kupu he Atua, ko e heigoa kua lata ia koe ke manamanatu ki ai?

¹⁸ He fakaako a koe, to moua e koe kua lagomatai lahi ke kumi e maamaaga he Tohi Tapu pihia foki ke lali ke kitia ko e puhala fe ne fakafetui ai e tau matafeiga takitaha. (Tau Fakatai 2:3-5; 4:7) Ko e mena ne fakakite e Iehova he puhala he Kupu hana kua matutaki lahi ke he finagalo hana. Ti ka totou ai e koe, kia fakatatai e tau mena moli mo e tau fakatonuaga ki ai. Liga manatu a koe ko e puhala fe ne matutaki e mena tupu, manatu, po ke perofetaaga ke he finagalo ha Iehova. Huhu ki a koe ni: ‘Ko e heigoa ne talamai he mena nei ki a au hagaao ki a Iehova? Matutaki fefe ai ke he finagalo he Atua ne taute he puhala he Kautu hana?’ Liga manatu foki a koe: ‘Maeke fefe au ke fakaaoga e fakaakoaga nei? Maeke nakai au ke fakaaoga ai ka fakaako po ke ka tomatoma atu ke he falu he fakave ke he tau Tohiaga Tapu?’—Iosua 1:8.

19. Ko hai ka aoga he talahau e koe ke he falu e tau mena ne ako e koe? Fakamaama.

¹⁹ He manamanatu atu ke he falu kua aoga ke he taha puhala foki. He magahala he totou mo e fakaako Tohi Tapu hau, to ako e koe e tau mena fou mo e moua foki e tau maamaaga fou. Lali ke putoia e tau mena nei ke he tau matutakiaga atihake hau mo lautolu he magafaoa hau po ke falu foki. Kaeke taute pihia e koe ke he tau magaaho kua lata mo e ke he puhala lilifu, nakai fakauaua ko e tau fakatutalaaga ia to palepale mitaki. Ko e hau a loto fakamoli, he liu talahau fakamakai e tau mena kua moua e koe po ke tau vala ne manako a koe ki ai to liga nava lahi ai ke he falu. Mua atu ke he mena ia, to aoga ni ki a koe fakatagata. Ke he puhala fe? Kua mailoga he tau tagata pulotu to manatu leva he tagata e mena ne ako po ke totou e ia kaeke kua fou agaia he loto hana, he fakaaoga e ia po ke liu fatiaki ai, tuga ka talatala age ke he falu. *

20. Ko e ha kua aoga lahi ke totou mo e liu fatiaki e Tohi Tapu?

²⁰ He tau magaaho takitaha ne totou e koe e tohi Tohi Tapu, to ako moli e koe e tau  fakaakoaga fou. To nava a koe ke he tau vala ne nakai nava a koe ki ai fakamua. To moua e koe e maamaaga fou ia lautolu. Kua lata he mena nei ke peehi e nakai ko e tau tohi he tagata, ka ko e tau tohi he Tohi Tapu ko e tau mena uho kua lata ke liu fakaako hau mo e ke aoga ai a koe. Manatu, ko e patuiki, tuga a Tavita, kua “totou ai e ia ke he tau aho oti he hana moui.”

21. Ko e heigoa e palepale mitaki ka amanaki a koe ki ai mai he fakatolomaki e fakaakoaga hau ke he Kupu he Atua?

²¹ E, ko lautolu ne fakaaoga taha magaaho ma e fakaakoaga hokulo he Tohi Tapu kua moua e aoga lahi. Kua moua e lautolu e tau mena uho fakaagaga mo e lotomatala. Ko e fakafetuiaga ha lautolu mo e Atua kua mua atu e malolo mo e uho lahi. Kua eke foki a lautolu mo tau tagata aoga lahi ne tupu tolomaki he magafaoa, ke he tau matakainaga i loto he fakapotopotoaga Kerisiano, mo e ki a lautolu ka eke mo tau tagata tapuaki ha Iehova.—Roma 10:9-14; 1 Timoteo 4:16.

[Tau Matahui Tala]

Manatu Nakai e Koe?

• Ko e heigoa he tau patuiki i Isaraela ne kua lata ke taute?

• Ko e heigoa e tau fakafifitakiaga ne foaki e Iesu mo e tau aposetolo ke he fakaako Tohi Tapu?

• Ko e heigoa e tau hikihikiaga kua lata ia koe ke taute ke fakatolomaki e magaaho hau ma e fakaakoaga fakatagata?

• Kua lata ia koe ke taute e fakaakoaga he Kupu he Atua mo e manamanatuaga fefe?

[Tau Huhu he Fakaakoaga]

[Puha he lau 15]

“He Tau Lima ha Tautolu”

“Kaeke manako a tautolu . . . ke moua e tau matapatu kupu ke he Tohi Tapu, kua mitaki lahi e kanavaakau he Internet. Ka e ka manako a tautolu ke totou e Tohi Tapu, ke fakaako ki ai, ke manamanatu hagaao ki ai, fakaata hagaao ki ai, kua lata ia tautolu ke toto ai he tau lima ha tautolu, ha ko e puhala ni haia ke uta ai ke he tau manamanatuaga mo e tau loto ha tautolu.”—Gertrude Himmelfarb, ko e porofesa nukua okioki he feua pauaki hana, City University, New York.