Omaoma Fakamoli ke he Pule Mahani Atua

“Ko Iehova ko e ha tautolu a Fakafili a ia, ko Iehova ko e ha tautolu a Pule, ko Iehova ko e ha tautolu a Patuiki.”—ISAIA 33:22.

1. Ko e heigoa ne taute a Isaraela i tuai ke kehe mai he tau motu?

HE 1513 F.V.N., ne fakatu ai e motu ko Isaraela. He magaaho ia, ne nakai fai maga lahi, nakai fai kaina, mo e nakai fai patuiki kitia. Ko e tau tagata hana ko e tau tupa fakamua. Ka ko e motu fou ia kua kehe foki ke he taha puhala. Ha ko Iehova ko e Atua e Fakafili, Pule, mo e Patuiki nakai kitia hana. (Esoto 19:5, 6; Isaia 33:22) Kua nakai maeke he falu a motu ke talahaua pihia!

2. Ko e heigoa e tau huhu ne mafuta hake hagaao ke he puhala ne fakatokatoka ai a Isaraela, mo e ko e ha ne aoga ai e tali ki a tautolu?

² Ha ko Iehova ko e Atua maopoopo, mo e ko e Atua he mafola foki, kua amanaki ni a tautolu ko e ha motu ne pule a ia ki ai ke maopoopo mitaki foki. (1 Korinito 14:33) Kua pihia moli e mena ne tupu ki Isaraela. Ka e maeke fefe e fakatokatokaaga kitia he lalolagi ke takitaki he Atua nakai kitia? Kua lata ia tautolu ke kikite atu ke he puhala ne takitaki e Iehova e motu i tuai ia, he kikite fakamahino atu ke he tau puhala ne fakakite he fakafehagaiaga hana mo Isaraela e aoga he omaoma fakamoli ke he pule mahani Atua.

Puhala ne Takitaki Aki a Isaraela i Tuai

3. Ko e heigoa e tau fakaholoaga gahuahua ne taute e Iehova ke takitaki aki e tau tagata hana?

³ Pete ko Iehova ko e Patuiki nakai kitia ha Isaraela, ne kotofa e ia e tau tagata tane tua fakamoli mo tau hukui ne kitia hana. Kua ha ha ai e tau iki, tau iki he faoa he matua, mo e tau patu ne fekafekau mo tau tagata foaki fakatonuaga mo e tau fakafili ke leveki e tau tagata. (Esoto 18:25, 26; Teutaronome 1:15) Pete ia, kua nakai lata ia tautolu ke fakahiku, ka nakai ha ai e takitaki faka-Atua kua maeke foki ni he tau tagata tane ia ke taute e fakafiliaga he manamanatu mo e fai maamaaga mitaki katoatoa. Nukua nakai mitaki katoatoa a lautolu, mo e nakai maeke ia lautolu ke totou e tau loto he tau katofia tapuaki ha lautolu. Pete ia, kua maeke he tau fakafili ke foaki ke he tau katofia talitonu ha lautolu e fakatonuaga lagomatai ha kua fakave ai ke he Fakatufono ha Iehova.—Teutaronome 19:15; Salamo 119:97-100.

4. Ko e heigoa e tau fatuakiloto ne lali e tau fakafili tua fakamoli ha Isaraela ke kalo mai ai, mo e ko e ha?

⁴ Ka kua mua atu e gahua he fakafili ke he iloa hokoia e Fakatufono. He kua nakai mitaki katoatoa, kua lata e tau patu ke mataala ke tautaofi ha  lautolu ni a tau fatuakiloto hehe—tuga e fulukovi, fakamailoga tagata, mo e lotokai—ka liga fakakeukeu aki e fakafiliaga ha lautolu. Ne tala age a Mose ki a lautolu: “Aua neke fakamailoga tagata a mutolu ke he fakafiliaga; tuga ne fanogonogo a mutolu ke he lalo tagata kia pihia foki ke he iki; ua matakutaku a mutolu ke he tau tagata; ha ko e fakafiliaga ko e mena he Atua haia.” E, kua taute he tau fakafili ha Isaraela e fakafiliaga ma e Atua. Ko e kotofaaga lilifu ofoofogia ha a ia!—Teutaronome 1:16, 17.

5. Ke lafi ke he fakatuaga he tau fakafili, ko e heigoa e falu a foakiaga ne taute e Iehova ke leveki aki e tau tagata hana?

⁵ Ne taute foki e Iehova e falu a fakaholoaga ke leveki aki e tau manako fakaagaga he tau tagata hana. Pihia foki, ato hohoko atu a lautolu ke he Motu he Maveheaga, ne poaki e ia a lautolu ke ati hake e faituga uta fano, ko e lotouho he tapuaki moli. Ne fakatu foki e ia e feua ekepoa ke fakaako e Fakatufono, ke foaki e tau poa manu, mo e huhunu e tau mena fakamanogi he pogipogi mo e he afiafi. Ne fakatu he Atua e taokete ha Mose, ko Arona, mo ekepoa ne mua ke fakamuaaki i Isaraela mo e kotofa e tau tama tane ha Arona ke lagomatai e matua ha lautolu mo e tau matagahua hana.—Esoto 28:1; Numera 3:10; 2 Nofoaga he Tau Patuiki 13:10, 11.

6, 7. (a) Ko e heigoa e fakafetuiaga he vahaloto he tau ekepoa mo e tau tagata Levi nakai ko e tau ekepoa? (e) Ko e heigoa e fakaakoaga ne ako e tautolu he taute he tau tagata Levi e tau gahua kehekehe? (Kolose 3:23)

⁶ Ke leveki e tau manako fakaagaga he tau miliona tagata ko e gahua mahaki foili, ti kua tokofiha foki e numera he tau ekepoa. Ati taute ai e fakaholoaga ma lautolu ke lagomatai he falu tagata he magafaoa Levi. Ne tala age a Iehova ki a Mose: “To ta age e koe e tau tagata Levi kia Arona mo e hana tau tama tane; kua ta age fakaoti a lautolu kia ia mai he fanau a Isaraela.”—Numera 3:9, 39.

⁷ Kua maopoopo mitaki e tau tagata Levi. Nukua vevehe a lautolu ke he tolu e magafaoa—ko e tau tagata Keresoma, tau tagata Koato, mo e tau tagata Merari—ti kua igatia ke fai kotofaaga he gahua ke taute. (Numera 3:14-17, 23-37) Kua tuga ke mua e aoga he falu a kotofaaga ke he falu, ka kua uho oti na lautolu. Kua fakatata atu he gahua he tau tagata Koato Levi a lautolu ni ke he puha fakatapu he maveheaga mo e tau koloa he faituga uta fano. Ka ko e tau tagata Levi oti, pete ko e tagata Koato po ke nakai, nukua olioli e tau kotofaaga lilifu mitaki lahi. (Numera 1:51, 53) Ka kua momokoina ai, he nakai loto fakaaue he falu e tau kotofaaga lilifu ha lautolu. He nakai omaoma fakamoli ke he pule mahani Atua, ne nakai loto makona a lautolu mo e mahala ke he fakaikaluga, manako lahi, mo e mahekeheke. Ko e tagata Levi ne higoa ko Koru kua ha ha ai foki mo lautolu.

“Kumi Kia a Mutolu ke he Feua Foki he Tau Ekepoa?”

8. (a) Ko hai a Koru? (e) Liga ko e heigoa ne taute a Koru ke kitia e tau ekepoa mai ni he onoonoaga fakatagata?

⁸ Nakai ko e iki a Koru he faoa he matua he tau magafaoa ha Levi, nakai iki foki a ia he tau magafaoa he tau tagata Koato. (Numera 3:30, 32) Pete he pihia, ko e iki lilifu a ia i Isaraela. Liga fakatata atu he tau matagahua ha Koru a ia ki a Arona mo e tau tama tane hana. (Numera 4:18, 19) He kitia mata e tau nakai mitaki katoatoa he tau tagata tane nei, ne liga manamanatu a Koru: ‘Ko e tau ekepoa nei kua moli e nakai  mitaki katoatoa, ka kua amanaki tukua ki a au ke omaoma ki a lautolu! Nakai la leva ia ne ta e Arona e punua povi auro. He tapuaki ke he punua povi ia ati mokulu e tau tagata ha mautolu ke he tapuaki tupua. Ka e he mogonei ko Arona, ko e taokete ha Mose, hane fekafekau mo ekepoa ne mua! Ko e fakamailoga tagata ha a ia! Mo e ka e kua e tau tama ha Arona, ko Natapu mo Avihu? Ha kua taute e laua e nakai fakalilifu muikau ke he tau kotofaaga ha laua he fekafekauaga ati tamate ai e Iehova a laua!’ * (Esoto 32:1-5; Levitika 10:1, 2) Ko e heigoa ni he manamanatuaga ha Koru, kua kitia maali ai ne kamata a ia ke kitia e feua ekepoa mai he onoonoaga fakatagata. Ati takitaki atu ai ke he fakafualoto hana ki a Mose mo Arona mo e, fakahiku, ki a Iehova.—1 Samuela 15:23; Iakopo 1:14, 15.

9, 10. Ko e heigoa e tukumale ne taute e Koru mo e tau katofia totoko hana ki a Mose, mo e ko e ha ne kua lata ai ia lautolu ke mailoga?

⁹ Ha ko e tagata talahaua, kua nakai uka ia Koru ke fakalataha mai ki a ia falu ne manatu tuga na ia. Ko ia, katoa mo Tatano mo Apiramo, ne moua 250 e tagata ne manatu tatai—ko e tau iki oti he fakapotopotoaga. Ne o atu auloa a lautolu ki a Mose mo Arona mo e tala age: “Kua tapu e fakapotopotoaga oti ni, ha ha ia lautolu foki a Iehova, hanai, ko e ha ne fia pule ai a mua ke he fakapotopotoaga a Iehova?”—Numera 16:1-3.

¹⁰ Kua lata he tau tagata totoko ke mailoga ke nakai paleko e pule ha Mose. Nakai la leva ia ne taute e Arona mo Miriama e mena taha ia ni. Ti kua pihia foki e kakano ha laua ke he ha Koru! Hagaao ki a Numera 12:1, 2, ne huhu a laua: “Ko Mose tokotaha kia kua vagahau mai ai e Iehova? ka e nakai kia vagahau mai foki ia maua nai?” Ti logona ai e Iehova. Ne poaki e ia a Mose, Arona, mo Miriama ke fakapotopoto ke he gutuhala he fale uta fano ke fakakite e Ia e takitaki ne fifili e ia. Ti, ke he puhala maali teteka ne tala age a Iehova: “Kaeke ke ha ia mutolu ha perofeta a Iehova kua fakailoa atu e au a au kia ia ke he fakakiteaga, kua vagahau atu e au kia ia ke he miti. Ka e nakai pihia haku a fekafekau ko Mose, kua fakamoli ni a ia ke he haku a magafaoa oti.” Mui mai ke he mena ia, ne fakagagao fakaku e Iehova a Miriama aki e lepela.—Numera 12:4-7, 10.

11. Fefe e puhala ne fehagai a Mose ke he mena ne tupu ki a Koru?

¹¹ Liga ni kua iloa e Koru mo lautolu ne kau mo ia e mena ia ne tupu. Kua nakai fai tonu e fakafualoto ha lautolu. Pete ni ia, ne lali fakauka ni a Mose ke fakamaama age ki a lautolu. Ne tomatoma a ia ki a lautolu ke lahi e fakaaue ke he ha lalu tau kotofaaga lilifu, he talahau: “Ko e mena tote kia kia mutolu kua vevehe kehe he Atua a Isaraela a mutolu mo e fakapotopotoaga a Isaraela, kia fakatata a mutolu kia ia ke fekafekau ai a mutolu ke he gahua he faituga a Iehova?” Nakai, ai ko e “mena tote”! Nukua loga lahi e tau mena he tau tagata Levi. Ko e heigoa foki ne manako a lautolu ki ai? Ne fakatapakupaku foki he tau kupu ha Mose e tau manamanatu he tau loto ha lautolu: “Kumi kia a mutolu ke he feua foki he tau ekepoa?” * (Numera 12:3; 16:9, 10) Ka e, fefe mogoia, e onoonoaga ha Iehova ke he fakafualoto nei ke he pule mahani Atua?

Ne Fakalaga Mai e Fakafili ha Isaraela

12. Ko e heigoa ne falanaki e fakafetuiaga mitaki tumau he tau Isaraela mo e Atua?

¹² He magaaho ne foaki e Iehova e Fakatufono ki a Isaraela, ne tala age a ia ke he tau tagata kaeke ke omaoma a lautolu, to eke a lautolu mo “motu tapu” mo e to fakatumau foki e motu ke tapu ane mai talia tumau e lautolu e fakaholoaga ha Iehova. (Esoto 19:5, 6) Mogonei, he kua kitia maali e fakafualoto, ko e magaaho hanei ma e Fakafili mo e Pule ha Isaraela ke fakalaga mai! Ti pehe a Mose ki a Koru: “Kia o mai a mutolu ki mua a Iehova a pogipogi ko koe mo lautolu oti kua kau fakalataha mo koe, ko koe, mo lautolu, katoa foki mo Arona. Kia takitaha foki e  tagata mo e uta hana mena uta afi mo e tuku ki ai e mena manogi, ti takitaha foki e tagata ia mutolu mo e ta mai hana mena uta afi ki mua a Iehova, ko e ua e teau ti limagofulu e mena uta afi; ko koe foki mo Arona kia takitaha mo e hana mena uta afi.”—Numera 16:16, 17.

13. (a) Ko e ha ko e fakatokoluga a ia he tau tagata totoko ke foaki e mena manogi ki mua a Iehova? (e) Fefe e fehagaiaga ha Iehova mo e tau tagata totoko?

¹³ Hagaao ke he Fakatufono he Atua, ko e tau ekepoa hokoia kua maeke ke foaki e tau mena manogi. Ko e manatu ke foaki he tagata Levi nakai ko e ekepoa e mena manogi ki mua a Iehova nukua lata ke fakaofo aki e tau tagata totoko ia ke manamanatu fakamitaki. (Esoto 30:7; Numera 4:16) Ka kua nakai pihia a Koru mo e tau tagata lalago hana! He aho hake ne “fakapotopoto ai e Koru e fakapotopotoaga katoa ke he gutuhala he fale uta fano he tutuutaga ke totoko [ki a Mose mo Arona].” Ne talamai he fakamauaga ki a tautolu: “Ti vagahau mai a Iehova kia Mose mo Arona, kua pehe mai, Kia vevehe kehe a mutolu mo e fakapotopotoaga nai ato fakaotioti ai e au a lautolu ke he magaaho ke kemo ai e mata.” Ka kua olelalo a Mose mo Arona ke nakai tamate e tau tagata. Ne talia e Iehova e tau olelalo ha laua. Ka e ki a Koru mo e moto tagata hana, ne “fina atu ai e afi mai mua a Iehova, mo e fakaotioti ai e tau tagata ua e teau ti limagofulu ne uta e mena manogi ke huhunu.”—Numera 16:19-22, 35. *

14. Ko e ha ne fakahoko e Iehova e gahua malolo ke he fakapotopotoaga ha Isaraela?

¹⁴ Ka kua kehe lahi ai, ha ko e tau Isaraela ne kitia mata e puhala ne fehagai atu a Iehova mo e tau tagata totoko, nukua nakai mahalohalo a lautolu ki ai. “Kua hoko ke he aho a pogipogi ti loma ai he fakapotopotoaga oti he fanau a Isaraela kia Mose mo Arona, kua pehe mai, kua kelipopo e mua e motu a Iehova.” Kua lago tukua e tau Isaraela ke he tau tagata fakafualoto! Fakahiku, ne fakaoti ai e fakauka ha Iehova. Ti nakai fai tagata—nakai foki ko Mose po ko Arona—kua maeke ke hulalo ma e tau tagata he mogonei. Ne fakatupu e Iehova e tatalu ke fakahala aki e tau tagata nakai omaoma, ti “ko lautolu foki ne mamate ke he tatalu ko e hogofulu ma fa e afe ti fitu e teau e tagata, ka e nakai lafilafi ki ai a lautolu ne mamate ai ke he mena a Koru.”—Numera 16:41-49.

15. (a) Ko e heigoa e tau kakano ne kua lata he tau Isaraela ke talia fakamakai e takitakiaga ha Mose mo Arona? (e) Ko e heigoa ne fakaako he fakamauaga nei ki a koe hagaao ki a Iehova?

¹⁵ Kua nakai lata he tau tagata oti ia ke mamate, ane mai ke manamanatu fakamitaki a lautolu ke he lekua ia. Kua lata ia lautolu ke huhu hifo e tau huhu pehenei ki a lautolu ni: ‘Na ko hai ne fakahagahaga kelea e tau momoui ke hulalo ki a Farao? Ko hai ne poaki ke fakatokanoa e tau Isaraela? Ko hai hokoia ne uiina ke o hake ke he Mouga ko Horepa he mole e laveakiaga ha Isaraela, ke fevagahauaki mo e agelu he Atua?’ Moli na fakakite maaliali he fakamauaga mitaki lahi ha Mose mo Arona e fakamoli ha laua ki a Iehova mo e fakaalofa ha laua ma e tau tagata. (Esoto 10:28; 19:24; 24:12-15) Ne nakai fiafia a Iehova ke tamate e tau tagata totoko. Pete ia, he kitia mitaki to fakatumau ni e tau tagata ke he fakafualoto ha lautolu, ne taute e ia e mena kua lata. (Esekielu 33:11) Ko e tau mena oti nei kua aoga lahi ki a tautolu he vaha nei. Ko e ha?

Kitiaaga he Puhala he Vaha Nei

16. (a) Ko e heigoa e fakamoliaga ne kua lata e tau Iutaia he senetenari fakamuaaki ke talitonu ko Iesu ko e hukui ha Iehova? (e) Ko e ha ne hukui e Iehova e feua ekepoa faka-Levi, mo e aki e heigoa?

¹⁶ He vaha nei, kua ha ha ai e “motu” fou ne eke a Iehova mo Fakafili, Pule, mo e Patuiki nakai kitia hana. (Mataio 21:43) Ne fakatu e “motu” ia he senetenari fakamuaaki V.N. He magaaho ia, ko e faituga uta fano he vaha a Mose kua hukui aki e faituga fulufuluola i Ierusalema, ne fekafekau ai agaia e tau tagata Levi. (Luka 1:5, 8, 9) Ka e, he tau 29 V.N., ne fakatu ai taha faituga, ko e faituga fakaagaga, mo Iesu Keriso ko e Ekepoa ne Mua. (Heperu 9:9, 11) Ne mafuta hake foki e huhu toko ke he pule mahani Atua. Ko hai ka fakaaoga e Iehova ke takitaki e “motu” fou nei?  Ne fakakite ni e Iesu a ia ke fakamoli katoatoa ke he Atua. Ne ofania e ia e tau tagata. Ne taute foki e ia e tau fakamailoga mitaki ne loga. Pete he pihia, ke tuga e tau tupuna mao kekeha ha lautolu, ne nakai mahalo e laulahi he tau tagata Levi ke talia a Iesu. (Mataio 26:63-68; Gahua 4:5, 6, 18; 5:17) Fakahikuaga, ne hukui e Iehova e feua ekepoa faka-Levi aki e mena kehe lahi—ko e feua ekepoa fakapatuiki. Ko e feua ekepoa fakapatuiki ia kua fakatumau mai ke he vaha nei.

17. (a) Ko e heigoa e matakau ne fakakatoatoa e feua ekepoa fakapatuiki he vaha nei? (e) Fakaaoga fefe e Iehova e feua ekepoa fakapatuiki?

¹⁷ Ko hai ne fakakatoatoa e feua ekepoa fakapatuiki nei he vaha nei? Ne tali he aposetolo ko Peteru e huhu ia i loto he tohi omoi agaga fakamua hana. Ki a lautolu ne fakauku he kau he Keriso, ne tohia a Peteru: “Ka ko mutolu, ko e hau fifili a mutolu, ko e tau patuiki mo e tau ekepoa, ko e motu tapu, mo e motu kua moua māna, kia fakakite atu e mutolu e mitaki hana ne ui a mutolu ke o mai he pouli ke he hana maama ke ofo lahi ai.” (1 Peteru 2:9) Mai he tau kupu nei kua kitia maali ai, ko e matakau, ko e tau tutaki fakauku ha Iesu ne kua fakakatoatoa e ‘feua ekepoa fakapatuiki’ nei, ne ui e Peteru ko e “motu tapu.” Ne fakatu e lautolu e puhala ne fakaaoga e Iehova ke foaki ma e tau tagata hana e tau fakaakoaga mo e tau takitaki fakaagaga.—Mataio 24:45-47.

18. Ko e heigoa e matutakiaga he vahaloto he tau motua kotofa mo e feua ekepoa fakapatuiki?

¹⁸ Ne hukui e feua ekepoa fakapatuiki ko e tau motua kotofa, ne fekafekau he tau tutuaga fai matagahua i loto he fakapotopotoaga he tau tagata ha Iehova he lalolagi katoa. Kua lata e tau tagata tane nei ke moua e fakalilifu ha tautolu, pete ko e he vahega fakauku a lautolu po ke nakai. Ko e ha? Kakano, he puhala he agaga tapu hana, ne kotofa e Iehova e tau patu ke he tau tutuaga ha lautolu. (Heperu 13:7, 17) Maeke fefe e mena ia?

19. Ko e puhala fe ne kotofa he agaga tapu e tau motua?

¹⁹ Ko e tau patu nei kua fakafita ke he tau fakatufono ne fakatoka i loto he Kupu he Atua, ko e fua a ia he agaga he Atua. (1 Timoteo 3:1-7; Tito 1:5-9) Ati pehe ai na mai e kotofaaga ha lautolu he agaga tapu. (Gahua 20:28) Ko e tau patu, po ke tau motua, kua lata ke lahi e iloaaga ke he Kupu he Atua. Ke tuga e Fakafili Mua ue Atu ne kotofa a lautolu, kua lata foki he tau motua ke fakavihia ha mena ne tuga e fakamailoga tagata ka fakafili ai.—Teutaronome 10:17, 18.

20. Ko e heigoa ne fakaaueina a koe ki ai hagaao ke he tau motua gahua fakamalolo?

²⁰ He nakai paleko e pule ha lautolu, kua fakaaueina moli a tautolu ke he tau motua gahua fakamalolo ha tautolu! Ko e fakamauaga ke he fekafekauaga fakamoli ha lautolu, ne fa mahani ke he tau tau loga, nukua omoi e falanakiaga ha tautolu. Kua tauteute fakamoli mo e takitaki e lautolu e tau feleveiaaga he fakapotopotoaga, fegahuaaki  mo tautolu he fakamatala e ‘tala mitaki he Kautu,’ mo e foaki mai e tau tomatomaaga faka-Tohiaga Tapu he magaaho kua manako a tautolu ki ai. (Mataio 24:14; Heperu 10:23, 25; 1 Peteru 5:2) Kua aahi mai a lautolu ka gagao a tautolu mo e fakamafana mai ka maanu a tautolu. Kua lalago fakamoli mo e nakai fulukovi e lautolu e tau mena he Kautu. Kua ha ha ai e agaga ha Iehova ia lautolu; kua moua e lautolu e fiafia hana.—Kalatia 5:22, 23.

21. Ko e heigoa kua lata he tau motua ke tokaloto, mo e ko e ha?

²¹ Moli, kua nakai mitaki katoatoa e tau patu. He mailoga ha lalu a tau kuku, kua nakai lali a lautolu ke fia iki ke he tau fuifui mamoe, ko e “kaina he Atua.” Ka kua kitia e lautolu a lautolu ko e ‘tau lagomatai ke he fiafia he tau matakainaga ha lautolu.’ (1 Peteru 5:3; 2 Korinito 1:24) Kua ofania he tau motua fakatokolalo mo e gahua fakamalolo a Iehova, mo e iloa e lautolu ka lahi e fifitaki e lautolu a ia, to lahi foki e mitaki kua maeke ia lautolu ke taute i loto he fakapotopotoaga. He tokaloto e mena nei, nukua ukufakina tumau a lautolu ke feaki e tau fua mahani Atua pihia ke tuga e fakaalofa, fakaalofa hohofi noa, mo e fakauka.

22. Fakamalolo fefe he liu kikite atu ke he fakamauaga ha Koru e tua hau ke he fakatokatokaaga kitia ha Iehova?

²² Ko e fiafia ha ia ke eke a Iehova mo Pule nakai kitia ha tautolu, mo Iesu Keriso mo Ekepoa ne Mua ha tautolu, mo lautolu he feua ekepoa fakapatuiki mo tau faiaoga ha tautolu, mo e tau patu Kerisiano tua fakamoli mo tau tagata fakatonutonu ha tautolu! Pete kua nakai fai fakatokatokaaga takitaki he tau tagata ne mitaki katoatoa, kua fiafia lahi a tautolu ke maeke ke fekafekau ke he Atua fakalataha mo e tau katofia talitonu tua fakamoli, ne fiafia ke omaoma ke he pule mahani Atua!

[Tau Matahui Tala]

Ko e Heigoa ne Ako e Koe?

• Ko e heigoa e tau foakiaga mokoina ne taute e Iehova ke leveki aki e tau Isaraela?

• Ko e ha e fakafualoto ha Koru ki a Mose mo Arona ke nakai fai tonu?

• Ko e heigoa kua ako e tautolu mai he puhala ne fehagai a Iehova mo e tau tagata totoko?

• Fakakite fefe e tautolu kua fakaaueina a tautolu ke he tau fakaholoaga ha Iehova he vaha nei?

[Tau Huhu he Fakaakoaga]

[Fakatino he lau 22]

Kitia nakai e koe ha kotofaaga i loto he fekafekauaga ha Iehova mo kotofaaga lilifu?

[Fakatino he lau 23]

“Ko e ha ne fia pule ai a mua ke he fakapotopotoaga a Iehova?”

[Fakatino he lau 26]

Kua hukui he tau motua kotofa e feua ekepoa fakapatuiki