Fifitaki e Faiaoga ne Mua

“Hanei, kia o atu a a mutolu ke eke e tau motu oti kana mo tutaki . . . , ti fakaako atu a mutolu kia lautolu kia omaoma ke he tau mena oti ne tala atu e au kia mutolu.”—MATAIO 28:19, 20.

1, 2. (a) Ke he puhala fe kua eke a tautolu mo tau faiaoga? (e) Ka hoko mai ke he fakaako atu, ko e heigoa e matagahua kehe lahi kua ha ha he tau Kerisiano moli?

KO E faiaoga nakai a koe? Ke he taha puhala, ko e tau faiaoga oti a tautolu. Ko e tau magaaho oti ne foaki e koe e tau puhala ke he tagata fano fenoga ne galo, fakakite ke he tagata gahua e puhala ke taute aki e gahua pauaki, po ke fakamaama ke he tama e puhala ke pipi e tau kave tevae hana, ko e hane fa e fakaako atu a koe. Ko e lagomatai e falu ke he tau puhala pihia kua tamai e fuafuaaga he makona, pihia nakai?

² Hagaao ke he fakaako atu, ha ha he tau Kerisiano moli e matagahua kehe lahi. Ne poaki ki a tautolu ke ‘eke e tau motu oti kana mo tutaki, ti fakaako atu kia lautolu.’ (Mataio 28:19, 20) I loto he fakapotopotoaga foki, fai magaaho a tautolu ke fakaako atu. Ko e tau tagata tane ne lata kua kotofa mo “tau leoleo katoa mo e tau akoako,” mo e onoonoaga ke ati hake ai e fakapotopotoaga. (Efeso 4:11-13) He tau matagahua Kerisiano ha lautolu he tau aho takitaha, ko e tau fifine motua kua eke mo “tau akoako ke he tau mena mitaki” ke he tau tamafine. (Tito 2:3-5) Kua fakamafana oti ki a tautolu ke fakamalolo e tau matakainaga talitonu, ti maeke ia tautolu ke omaoma ke he fakamafanaaga he fakaaoga e Tohi Tapu ke ati hake e falu. (1 Tesalonia 5:11) Ko e lilifu moli ha ia ke eke mo faiaoga he Kupu he Atua mo e feutaaki e tau kakano fakaagaga nukua moua mai e tau aoga tumau tukulagi!

3. Maeke fefe ia tautolu ke fakatolomaki ki mua e lauia mitaki he eke mo tau faiaoga?

³ Maeke fefe ia tautolu ke fakatolomaki ki mua ha tautolu a lauia mitaki ko e tau faiaoga? Matapatu ai, he fifitaki e Faiaoga ne Mua, ko Iesu. ‘Ka e fifitaki fefe e tautolu a Iesu?’ he manamanatu he falu. ‘Na mitaki katoatoa a ia.’ Moli, to nakai eke a tautolu mo tau faiaoga mitaki katoatoa. Moha ia ha tautolu a tau lotomatala, maeke ia tautolu ke foaki katoa he fifitaki e puhala ne fakaako e Iesu. O mai la tautolu ke tutala ke he fa e puhala ne fakaaoga e ia—fakamukamuka, tau huhu lauia mitaki, fakakakanoaga papahi mo e tau fakatai kua lautonu.

Fakamukamuka Ai

4, 5. (a) Ko e ha e fakamukamuka ko e matapatu vala he kupu moli he Tohi Tapu? (e) Ke fakaako mo e fakamukamuka, ko e ha kua aoga ke mailoga e tau kupu ha tautolu?

⁴ Nakai uka e tau kupu moli mai he Kupu he Atua. He liogi, ne pehe a Iesu: “Hoku Matua na e, . . . he ufiufi e koe e tau mena nai he tau tagata iloilo mo e loto matala, ka kua fakakite atu ai ke he tau tama mukemuke.” (Mataio 11:25) Kua fakatupu e Iehova hana tau finagalo ke kitia e lautolu ne ha ha ai e tau loto fakamoli mo e molu. (1 Korinito 1:26-28) Ti, ko e fakamukamuka ko e matapatu vala he kupu moli he Tohi Tapu.

⁵ Ka taute e koe e fakaako Tohi Tapu he kaina po ke liu ahi atu ki a lautolu ne fiafia mai, maeke fefe ia koe ke fakaako mo e fakamukamuka? Ko e heigoa ha tautolu ne ako mai he Faiaoga ne Mua? Ke hokotia ke he hana tau tagata fanogonogo, tokologa ne ‘nakai ako mo e goagoa,’ ati fakaaoga e Iesu e vagahau mukamuka ke maeke ia lautolu ke maama. (Gahua 4:13) Ke fakaako mo e fakamukamuka mogoia, ko e manako fakamua ke mailoga e tau kupu ha tautolu. Nakai lata ia tautolu  ke fakaaoga e tau kupu po ke tau talahauaga tu tokoluga ke maeke ai ke fakalagalaga lahi e falu aki e kupu moli mai he Kupu he Atua. Ko e “tau kupu kua mua ue atu” pihia kua liga fakamatakutaku, mua atu ki a lautolu ne temotemoai e fakaakoaga po ke iloilo. (1 Korinito 2:1, 2) Kua fakakite he fakataiaga ha Iesu e tau kupu mukamuka ne fifili fakamitaki ke fakahoko aki e kupu moli mo e malolo lahi.

6. Fakamamao fefe a tautolu mai he tapeehi e tagata fakaako Tohi Tapu aki e tau vala tala loga?

⁶ Ke fakaako mo e fakamukamuka, kua lata foki ia tautolu ke fakaeneene ke fakamamao mai he tapeehi e tagata fakaako Tohi Tapu aki e tau vala tala loga. Kua manamanatu a Iesu ke he tau mena ne kuku ai hana tau tutaki. (Ioane 16:12) Kua lata foki ia tautolu ke manamanatu ke he tagata fakaako. Ma e fakatai, ka taute e fakaako ke he tohi Iloilo Ne Takitaki Atu ke he Moui Tukulagi, nakai lata ia tautolu ke fakamaama e tau matafeiga takitaha. * Po kua lata ke fakamafiti e vala tala, ke tuga ko e magaaho ke oti ai e vala tala ko e mena kua mua e aoga. Ka kua pulotu ke fakaata e tau manako mo e tau maamaaga he tagata fakaako ke kitia aki e mafiti he fakaakoaga. Ko e foliaga ha tautolu ke lagomatai e tagata fakaako ke eke mo tutaki ha Keriso mo e tagata tapuaki ha Iehova. Kua lata ke fakaaoga e tautolu e magaaho kua lata ke lagomatai e tagata fiafia ke maama mitaki e mena hana hane ako e ia. Ti, hokotia e kupu moli ke he hana loto mo e omoi a ia ke gahua.—Roma 12:2.

7. Ko e heigoa e tau manatu kua lagomatai a tautolu ke fakaako mo e fakamukamuka ka taute e tau lauga he fakapotopotoaga?

⁷ Ka taute e tautolu e tau lauga ke he fakapotopotoaga, mua atu ka fai tagata fou he toloaga, talahau fefe e tautolu e tau kupu kua ‘mukamuka ke maama’? (1 Korinito 14:9) Manamanatu la ke he tolu e manatu fakakite kua maeke ke lagomatai. Fakamua, fakamaama e tau kupu fakaliga kehe nukua fakaaoga e koe. Ko e maama ha tautolu ke he Kupu he Atua nukua foaki mai ki a tautolu e tau kupu tonu. Ka fakaaoga e tautolu e tau talahauaga tuga e “fekafekau fakamoli mo e loto matala,” “mamoe kehe,” mo “Papelonia Lahi,” kua lata ia tautolu ke fakamaama ai ke he tau talahauaga mukamuka ke maama e kakano. Uaaki, ua loga e tau kupu. Ko e loga lahi he tau kupu, ko e fakalaulahi he manatu, ka galo e fiafia he toloaga. Ko e maama kua mai he tiaki e tau kupu mo e tau talahauaga nakai lata. Toluaki, ua talahau oti e vala tala katoa. Liga ke moua he kumikumiaga ha tautolu e tau matafeiga fulufuluola. Ka kua mitaki lahi ke fakatokatoka e vala tala ke he tau manatu gahoa, fakaaoga ni e vala tala kua fakamoli e tau manatu ia mo e maeke ke fakalaulahi fakamahino ke he magaaho kua fafati.

Lauia Mitaki e Fakaaoga he Tau Huhu

8, 9. Fifili fefe e tautolu e huhu kua felauaki ke he fiafia he tagata he kaina? Foaki e tau fakataiaga.

⁸ Manatu na makaka a Iesu he fakaaoga e tau huhu ke hokotia ke he tau tutaki hana ke fakakite e mena ne toka he tau manamanatuaga ha lautolu mo e fakalagalaga mo e fakamahani e tau manamanatuaga ha lautolu. Mo e tau huhu hana, ne amotia mo e lauia totonu e Iesu e tau loto ha lautolu. (Mataio 16:13, 15; Ioane 11:26) Maeke fefe a tautolu, ke tuga a Iesu, he fakaaoga e tau huhu lauia mitaki?

⁹ Ka fakamatala he taha fale ke he taha fale, fakaaoga e tautolu e tau huhu ke fakalaga aki e fiafia, he tauteute e puhala ma tautolu ke tutala hagaao ke he Kautu he Atua. Maeke fefe a tautolu ke fifili e huhu kua felauaki ke he fiafia he tagata he kaina? Kia matakite. Ka finatu ke he fale, onoono viko fano. Fai mena pele nakai i fafo, fakakite  ai he mena ia na fai fanau he kaina? Ka pihia, maeke ia tautolu ke huhu, ‘Kua fa manamanatu nakai a koe to fefe la e lalolagi ka lalahi hake e fanau hau?’ (Salamo 37:10, 11) Loga nakai e tau tamau he gutuhala he fahi mua, po ke fai koloa puipui he kaina nakai? Maeke ia tautolu ke huhu: ‘Manatu nakai a koe to hoko mai e magaaho ma e tau tagata tuga a koe mo au ke logona e haohao mitaki i loto he tau kaina ni ha tautolu mo e he puhala tu?’ (Mika 4:3, 4) Fai paipai nakai ma e nofoa fakataveli? Liga pehe a tautolu: ‘To ha ha i ai nakai ha magaaho ka nonofo e tau tagata mo e tino malolo mitaki?’ (Isaia 33:24) Loga e tau manatu fakakite i loto he tohi Reasoning From the Scriptures. *

10. Maeke fefe ia tautolu ke fakaaoga e tau huhu ke “utu mai” e tau manatu mo e tau logonaaga he loto he tagata fakaako Tohi Tapu, ka ko e heigoa kua lata ke tokaloto e tautolu?

¹⁰ Maeke fefe ia tautolu ke lauia mitaki e fakaaoga he tau huhu ka taute e tautolu e tau fakaakoaga Tohi Tapu? Kehe mai ia Iesu, kua nakai maeke ia tautolu ke iloa e tau loto. Pete ia, ko e tau huhu fakailoilo ka e maama nukua maeke ke lagomatai a tautolu ke “utu mai” e tau manatu mo e tau logonaaga he loto he tagata fakaako. (Tau Fakatai 20:5) Ma e fakatai, kau ko e fakaako a tautolu he veveheaga “Ko e Ha kua Fiafia ai e Moui Mahani Atua,” he tohi Iloilo. Kua tutala ai ke he onoonoaga he Atua ke he nakai mahani fakamoli, mahani feuaki, mo e falu matakupu foki. Kua maeke he tagata fakaako ke tali fakahako mai he tohi, ka e talia pihia nakai ke he mena ne ako e ia? Liga huhu a tautolu: ‘Liga tonu nakai e onoonoaga ha Iehova ke he tau matakupu pihia ki a koe? Maeke fefe a koe ke fakaaoga e tau matapatu fakaakoaga he Tohi Tapu ke he moui hau?’ Tokaloto ai e lata ke mahani fakalilifu, hagaao ke he lilifu he tagata fakaako. To nakai manako a tautolu ke huhu e tau huhu fakama po ke fakafuafua kelea aki e tagata fakaako Tohi Tapu.—Tau Fakatai 12:18.

11. Ko e heigoa e tau puhala kua maeke he tau tagata lauga ke fakaaoga e tau huhu lauia mitaki?

¹¹ Maeke foki he tau tagata lauga ke he toloaga ke fakaaoga e tau huhu lauia mitaki. Ko e tau huhu fakalaga—ko e tau huhu kua nakai amanaki a tautolu ke he tau tagata fanogonogo ke tali—ka lagomatai e toloaga ke manamanatu mo e fakakakano. Fa fakaaoga e Iesu e tau huhu pihia. (Mataio 11:7-9) Lafi ai, ka oti e fakafeleveiaaga, liga ke fakaaoga he tagata lauga e tau huhu ke fakatoka aki e tau matapatu manatu ka fakatutala ki ai. Maeke ia ia ke talahau: “He fakatutalaaga ha tautolu he aho nei, to manamanatu a tautolu ke he tau tali ke he tau huhu nai . . . ” Ti, ke he fakaotiaga, maeke ia ia ke fuluhi atu ke he tau huhu ia ke fakakatoatoa aki e tau matapatu manatu.

12. Foaki e fakataiaga ke fakakite e puhala kua maeke he tau motua Kerisiano ke fakaaoga e tau huhu ke lagomatai aki e matakainaga talitonu ke moua mai e mafanatia he Kupu he Atua.

¹² He gahua ahi leveki atu ha lautolu, maeke he tau motua Kerisiano ke fakaaoga e tau huhu ke lagomatai aki a “lautolu kua manava tote” ke moua mai e mafanatia he Kupu a Iehova. (1 Tesalonia 5:14) Ma e fakatai, ke lagomatai e taha kua logona e pehiaaga, liga takitaki atu he motua a ia ke he Salamo 34:18. Nukua pehe: “Kua tata mai a Iehova kia lautolu kua loto malipilipi; kua fakamoui foki e ia a lautolu kua loto pehia.” Ke iloa tonu nukua kitia e ia ne lolelole e hagaaoaga he mena nei ki a ia ni, liga huhu atu e motua: ‘Tata a Iehova ki a hai? Fa logona kia e koe he falu magaaho e “loto malipilipi” mo e “loto pehia”? Ka pihia, na pehe e Tohi Tapu, kua tata a Iehova ki a lautolu ia, nakai kia kakano e mena ia kua tata a ia ki a koe?’ Ko e fakamafanaaga totonu pihia ka fakamalolo e agaga hana ne lolelole.—Isaia 57:15.

 Fakakakanoaga Papahi

13, 14. (a) Liga fakakakano fefe a tautolu mo e taha tagata kua talahau na nakai talitonu a ia ke he Atua nakai kitia e ia? (e) Ko e ha ne nakai amanaki a tautolu to fakalagalaga ai e tau tagata oti kana?

¹³ He fekafekauaga ha tautolu, manako a tautolu ke hokotia ke he tau loto e fakakakanoaga tonu mo e fakalagalaga. (Gahua 19:8; 28:23, 24) Kakano kia e mena ia kua lata ia tautolu ke iloa ke fakaaoga e tau fakakakanoaga uka ke maeke ke omoomoi ke he falu e kupu moli he Kupu he Atua? Nakai pihia. Ko e fakakakanoaga tonu kua nakai lata ke uka. Ko e tau manatu fetoko papahi ne talahau ke he puhala mukamuka kua fa lauia mitaki lahi. Manamanatu ke he fakataiaga.

¹⁴ Maeke fefe a tautolu ke tali atu ke he taha kua talahau na nakai talitonu a ia ke he Atua ne nakai kitia e ia? Maeke ia tautolu ke fakakakano ke he matafakatufono pauaki he fakatupuaga mo e lauiaaga. Ka kitekite a tautolu ke he lauiaaga, kua talia e tautolu na fai fakatupuaga. Liga pehe a tautolu: ‘Kaeke ko koe he matakavi mamao ti pu a koe mo e fale talaga mitaki ne toka ai e tau mena kai (lauia), maeke ia koe ke talia moli ko e mena fai tagata (fakatupu) ne talaga e fale ia mo e fakapuke e poko tuku kai ia. Ti pihia foki, ka kitia e tautolu e talagaaga he tufugatiaaga mo e loga he tau mena kai he “poko tuku kai” (lauia) he lalolagi, nakai kia moli mogoia ke talia na Fai Tagata (ko e fakatupu) ne taute ai?’ Ko e matakupu mukamuka he Tohi Tapu kua fakamahino ai pehe: “Ha kua takitaha e fale mo e tufugatia ai e taha, ka ko ia ne tufugatia ai e tau mena oti kana, ko e Atua haia.” (Heperu 3:4) Pete ni mogoia kua liga tonu e fakakakanoaga ha tautolu, to nakai fakalagalaga e tau tagata oti kana. Kua fakamanatu mai he Tohi Tapu ki a tautolu ko lautolu ni ne “kotofa” ka eke mo tau tagata talitonu.—Gahua 13:48; 2 Tesalonia 3:2.

15. Ko e heigoa e puhala fakakakano kua maeke ia tautolu ke fakaaoga ke fakakatoatoa aki e tau mahani mo e tau puhala ha Iehova, ti ko e heigoa e tau fakataiaga ua kua fakataitai e puhala nukua liga lata ia tautolu ke fakaaoga e tau fakakakanoaga pihia?

¹⁵ He fakaako ha tautolu, ke he gahua he fonua po ke he fakapotopotoaga, maeke ia tautolu ke fakaaoga e fakakakanoaga papahi ke fakakatoatoa aki e tau mahani mo e tau puhala ha Iehova. Mahomo atu e lauia mitaki he ‘mua atu’ he puhala fakakakano ne fa fakaaoga e Iesu. (Luka 11:13; 12:24) Ne fakave ke he keheaga, ko e faga fakakakanoaga nei kua taute e kitiaaga malolo. Ke fakatapakupaku e nakai hako he fakaakoaga afi helo, liga pehe a tautolu: ‘Nakai fai matua tane fakaalofa ka fahi hana tama he toto e lima he tama hana ke he afi. Mua atu fefe mogoia e kelea muikau ke he manatu he afi helo ke he Matua fakaalofa ha tautolu he lagi!’ (Ieremia 7:31) Ke fakaako na leveki e Iehova hana tau fekafekau takitaha, kia pehe a tautolu: ‘Ka iloa takitaha e Iehova e tau fetu piliona ke he tau higoa ha lautolu, ti mua atu ha ia mogoia he levekiaga hana ke he tau tagata kua fakaalofa ki a ia mo e ne fakatau mai aki e toto uho he hana Tama!’ (Isaia 40:26; Gahua 20:28) Ko e tau fakakakanoaga malolo pihia kua maeke ke lagomatai a tautolu ke amotia ke he tau loto he falu.

Tau Fakatai Lautonu

16. Uho he ha e tau fakatai he fakaako atu?

¹⁶ Ko e tau fakatai lauia mitaki nukua fakafaikakano ke maeke he tau fakaakoaga ha tautolu ke gahuahua ke he falu. Ko e ha e tau fakatai kua uho he fakaako atu? Mailoga he taha ako tokoluga: “Ko e lotomatala ke manamanatu teao e taha mena kua mahomo atu e uka ke he tau mouaaga he tagata.” Fakamau he tau fakatai e tau fakatino fai kakano ke he tau manamanatuaga ha tautolu, he lagomatai a tautolu ke maama lahi e tau manatu fou. Kua mua atu e fakaaoga hana ko Iesu ke he tau fakatai. (Mareko 4:33, 34) O mai la ke manamanatu ke he puhala ke maeke ia tautolu ke fakaaoga e puhala fakaako nei.

17. Ko e heigoa e tau vala fa nukua eke e fakatai mo lauia mitaki?

¹⁷ Ko e heigoa kua taute e fakatai ke lauia mitaki? Fakamua, kua lata ke lautonu mo e toloaga ha tautolu, moua mai he tau tutuaga kua maeke he tau tagata fanogonogo ha tautolu ke iloa. Kua manatu e tautolu na moua mai e Iesu e tau fakatai loga hana ke he tau mena he moui he tau aho takitaha mai he tau tagata fanogonogo hana. Uaaki, kua lata e fakatai ke tatai mitaki ke he manatu nukua talahau. Ka nakai latatonu e fakatataiaga, to maeke ni he fakatai ke fakagalo e fiafia he tau tagata fakateliga ha tautolu. Toluaki, kua nakai mitaki e fakatai ke fakalokiloki aki e tau matafeiga nakai lata. Manatu na foaki e Iesu e tau vala tala  kua lata ka e tiaki e tau vala tala nakai lata. Faaki, ka fakaaoga e tautolu e fakatai, kua lata ke iloa moli e tautolu kua maama e fakaaogaaga. Ha ko e mena ka tupu, to nakai moua he falu e manatu.

18. Moua fefe e tautolu e tau fakatai kua lautonu?

¹⁸ Moua fefe e tautolu e tau fakatai kua lautonu? Kua nakai lata ia tautolu ke manamanatu ke he tau tala loa gitu. Ko e tau fakatai ku kua maeke ke lauia lahi. Kia lali ke manamanatu ke he tau fakatai hagaao ke he tau mena ne fakatutala ki ai. Tuga anei, liga ko e fakatutala a tautolu ke he matakupu he fakamagaloaga he Atua, ti manako a tautolu ke fakatai e manatu he Gahua 3:19, nukua talahau ai kua “holoholo kehe,” po ke tatafi kehe, e Iehova e tau hepehepe ha tautolu. Ko e fakataiaga maama lahi a ia, ka ko e heigoa e fakataiaga moli kua maeke ia tautolu ke fakatai aki e manatu—ko e mena kakana kehe, po ke omomi? Liga pehe a tautolu: ‘He magaaho ne fakamagalo e Iehova e tau hala ha tautolu, kua holoholo kehe ai e ia tuga he fakaaoga e omomi (po ke mena kakana kehe).’ Kua nakai uka ke moua e manatu he fakatai mukamuka ia.

19, 20. (a) Moua i fe e tautolu e tau fakatai mitaki? (e) Ko e heigoa falu fakataiaga he tau fakatai lauia mitaki ne kua lomi fakailoa he tau tohi ha tautolu? (Kikite foki e puha.)

¹⁹ Moua mai i fe e koe e tau fakatai kua lautonu, putoia ai mo e tau fakataiaga moli he moui? Kumi ki ai he moui ni hau po ke he tau tupuaga mo e tau iloaaga kehekehe he tau matakainaga. Maeke e tau fakatai ke fifili mai he falu punaaga, lauia e tau mena momoui mo e tau mena nakai gahuahua, tau koloa fakakaina, po ke tau tutupuaga fou ne mahuiga ke he maaga. Ko e puhala ke moua e tau fakatai mitaki ko e mataala, he “kitekite” ke he tau tutuaga ne viko takai ia tautolu he tau aho takitaha. (Gahua 17:22, 23) Taha e tohi he puhala vagahau ke he toloaga kua fakamaama: “Ko e tagata lauga nukua kitekite ke he moui he tagata mo e hana tau matafeua kehekehe, tutala mo e tau tagata oti kana, onoono fakatata ke he tau mena mo e huhu e tau huhu ato maama ai e ia, ka fakaputuputu e tau vala tala loga ke lagomatai lahi a ia he magaaho ka lata.”

²⁰ Ha ha i ai foki taha punaaga lahi he tau fakatai lauia mitaki—Ko e Kolo Toko, Awake!, mo e falu tohi foki ne taute he Tau Fakamoli a Iehova. Lahi atu e mena ka ako e koe he kitekite ke he puhala ne fakaaoga he tau tohi nei e tau fakatai. * Manamanatu la, ma e fakatai, ke he fakatai ne fakaaoga he paratafa 11 he veveheaga 17 he tohi Iloilo. Kua fakatatai e tau kehekeheaga he tau aga fakatagata he fakapotopotoaga ke he tau motoka kehekehe ne holo he tapa hau he puhala tu. Ko e heigoa ati lauia mitaki ai? Mailoga kua fakave ai ke he tau tutuaga he tau aho takitaha, kua tatai lahi ke he manatu ne kua talahau, ti ko e fakagahuaaga kua maama ai. Liga fakaaoga e tautolu e tau fakatai ne kua fita he lomi ke he ha tautolu a fakaako atu, he liga hikihiki ai ke lata mo e tagata fakaako Tohi Tapu po ke hiki ke he fakaaogaaga he lauaga.

21. Ko e heigoa e tau palepale kua hau he eke mo faiaoga lauia mitaki he Kupu he Atua?

²¹ Ko e tau palepale he eke mo faiaoga lauia mitaki kua lahi. Ka fakaako atu a tautolu, feutaaki a tautolu mo e falu; kua foaki ni e tautolu ha tautolu a falu koloa ke lagomatai aki a lautolu. Ko e foaki pihia kua tamai e fiafia lahi, ha kua talahau e Tohi Tapu: “Kua mua e monuina hana ke foaki atu, ke he monuina hana ke talia mai.” (Gahua 20:35) Ma e tau faiaoga he Kupu he Atua, ko e fiafia lahi ko e olioli he iloa kua foaki e tautolu taha mena uho mo e tumau tukulagi—ko e kupu moli hagaao ki a Iehova. Maeke foki ia tautolu ke moua e makona kua hau he iloa kua fifitaki e tautolu e Faiaoga ne Mua, ko Iesu Keriso.

[Tau Matahui Tala]

Manatu Nakai e Koe?

• Fakaako fefe a tautolu mo e fakamukamuka ka taute e fakaako Tohi Tapu he kaina? Ka foaki e lauga ke he fakapotopotoaga?

• Maeke fefe ia tautolu ke fakaaoga e tau huhu kua lauia mitaki ka fakamatala he taha fale ke he taha fale?

• Maeke fefe ia tautolu ke fakaaoga e tau fakakakanoaga papahi ke fakakatoatoa aki e tau mahani mo e tau puhala ha Iehova?

• Moua mai i fe e tautolu e tau fakatai kua lautonu?

[Tau Huhu he Fakaakoaga]

 [Puha/Fakatino he lau 30]

Manatu Nakai e Koe e Tau Fakatai Nei?

Ha ha i lalo e falu ni he tau fakatai nei. He ha he fakaaoga e tau tohi foaki ke iloa e puhala ne lagomatai he tau fakatai e manatu he fakatutalaaga?

• Tuga e tau hoa tokoua hane fakamavikoviko he aisa, ko lautolu ne kumi ke he fakamauaga kua kautu nukua falanaki lahi ke he hoa mitaki.—Ko e Kolo Toko, Iuni 1, 2001, lau tohi 11.

• Ko e talahau e manatu hau kua liga tuga e liti e fua polo. Maeke ia koe ke liti fakaeneene po ke liti mo e malolo ke fakapakia.—Iloilo Ne Takitaki Atu ke he Moui Tukulagi, lau tohi 144.

• Ko e ako ke fakakite e fakaalofa kua tuga e ako he vagahau fou.—Ko e Kolo Toko, Mati 1, 1999, lau tohi 11, 14-16.

• Ko e matutakiaga fakataulatua ke he tau temoni kua tuga e page he tau tagata takafaga. Kua futiaki ai ke faiola.—Iloilo Ne Takitaki Atu ke he Moui Tukulagi, lau tohi 111.

• Ko e puhala ne fakahao e Iesu e tau huli ha Atamu kua fakatatai ai ke he tagata foaki mautu mo e totogi oti e tau kaitalofa he kautaha (ne fakatupu he takitaki mahani nakai fakamoli) mo e liu hafagi e fale gahua ma e tau tagata tokologa.—Ko e Kolo Toko, Masi 1, 1991, lau tohi 11.

• Ko e tau tagata ne fiafia ke he tau fakatino vali kua eketaha ke liuaki e tufugatia hana ke he fuluola tuai, maeke ia Iehova ke fakamagalo e tau hepehepe, mo e kitia e mitaki ia tautolu mo e fakahiku to tamai e ia e tuaga mitaki katoatoa ne fakagalo e Atamu.—Iloilo Ne Takitaki Atu ke he Moui Tukulagi, lau 181.

[Tau Fakatino he lau 27]

Ko e tau faiaoga he Kupu he Atua e tau Kerisiano moli

[Fakatino he lau 28]

Fakaaoga he tau motua e tau huhu ke lagomatai e tau matakainaga talitonu ke moua e mafanatia mai he Kupu he Atua