‘Kia Fefakamagaloaki’

TALIA KIA e koe kua fakamagalo he Atua hau a tau agahala? Ha he Tau Fahi Kaufakalataha, tuga ne pihia e tau manamanatuaga he loga he tau tagata lalahi. Ne talahau e Dr. Loren Toussaint, tagata ne takitaki fakamua e kumikumiaga he Univesiti ha Michigan Institute ma e Social Research, ke he 1,423 he tau tagata Amerika ne fakatutala, hagaao ke 80 e pasene he tau tagata lalahi ne 45 e tau he moui ne pehe kua fakamagalo tuai he Atua a lautolu he tau hala ha lautolu.

Ka e mailoga la, hagaao ki a lautolu ia ne fakatutala, ne 57 ni e pasene ne pehe ato liu fakamagalo atu e lautolu e falu. Ne fakamanatu mai he fuafuaaga ia ki a tautolu e tau kupu a Iesu he Lauga he Mouga: “Kaeke ke fakamagalo atu e mutolu, ke he tau tagata e tau hala ha lautolu, ti fakamagalo mai foki a mutolu he Matua ha mutolu ha ha he lagi. Kaeke foki kua nakai fakamagalo atu e mutolu ke he tau tagata e tau hala ha lautolu, ti nakai fakamagalo foki ha mutolu a Matua ha mutolu a tau hala.” (Mataio 6:14, 15) E, ko e fakamagaloaga he Atua he tau agahala ha tautolu ne lauia lahi ki a tautolu ke mautali mo e fefakamagaloaki ke he falu.

Kua fakamanatu age he aposetolo ko Paulo ke he tau Kerisiano i Kolose e matapatu fakaakoaga nei. Kua fakamakamaka age e ia ki a lautolu: “Kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a Keriso kia mutolu, kia pihia foki a mutolu.” (Kolose 3:13) Moli, nakai ko e mena mukamuka aenei ke taute. He fakatai, kaeke kua lauia ai a koe mo e tau kupu fakahanoa po ke tuina, ko e mena uka lahi a ia ke fakamagalo.

Ka e pete ia, ko e aoga ne moua he fakamagaloaga kua loga. Ko e tagata kumikumi ke he tau mena kaufakalatahaaga, ko Dr. David R. Williams, ne talahau hagaao hana kumikumiaga: “Ne kitekite e mautolu ki a lautolu ne lotouho e tau tau mo e kua momotua lahi i Amerika e fakafetuiaga malolo lahi he fakamagaloaga ke he falu mo e he malolo he manamanatuaga.” Kua talia e mena ia mo e tau kupu he patuiki pulotu ko Solomona, ne tohia he 3,000 e tau ne mole: “Ko e loto mitaki, ko e moui he tino haia.” (Tau Fakatai 14:30) Ha kua omoomoi he aga fakamagalo e fakafetuiaga mitaki ki mua he Atua mo e tau katofia ha tautolu, kua moua e tautolu e fakaveaga mitaki ke fakahihiga atu ke fefakamagaloaki e taha mo e taha mai he loto.—Mataio 18:35.