‘Kua Fakatoka e Au e Fakafifitaki ma Mutolu’
‘Kua Fakatoka e Au e Fakafifitaki ma Mutolu’
“Ane mai eke a mutolu mo tau akoako po kua lata ai ha kua leva.”—HEPERU 5:12.
1. Ko e ha e tau kupu he Heperu 5:12 ne kua fakalagalaga pauaki e Kerisiano ke logona hifo taha fuafuaaga he kapaletu?
HE TOTOU e koe e tau kupu omoi he agaga, he mataulu tala ha tautolu, logona nakai e koe taha fuafuaaga he kapaletu hagaao ki a koe ni? Ka pihia, kua nakai tokotaha a koe. Ko e tau tutaki he Keriso, na iloa e tautolu kua lata ia tautolu ke eke mo tau faiaoga. (Mataio 28:19, 20) Iloa foki e tautolu ko e tau magaaho ne nonofo ai a tautolu ati mafiti ai ke mua atu e mitaki he ha tautolu a fakaakoaga. Mo e iloa e tautolu kua maeke he fakaakoaga ha tautolu ke taute e kehe ke he moui po ke mate ha lautolu ne fakaako e tautolu! (1 Timoteo 4:16) Kua lata ni mogoia, ke huhu hifo ki a tautolu: ‘Kua eke moli kia au mo faiaoga ne kua lata? Maeke fefe ia au ke holo ki mua?’
2, 3. (a) Fakamaama fefe he taha faiaoga e fakaveaga he fakaakoaga mitaki? (e) Ko e heigoa e fakafifitaki ne fakatoka e Iesu ma tautolu hagaao ke he fakaakoaga?
2 Ko e tau kapaletu pihia kua nakai lata ke fakalolelole aki a tautolu. Kaeke manatu a tautolu ko e fakaakoaga ko e mena kua lata ke makaka lahi ki ai, liga to lofia a tautolu he manatu kua nakai fakaai ke maeke ke holo ki mua. Ko e fakaveaga he fakaakoaga mitaki, mogoia, nakai ko e makaka lahi ka ko e taha mena ne mua atu e aoga. Mailoga la e mena ne tohia he taha faiaoga lotomatala he tohi hagaao ke he matakupu ia: “Ko e fakaakoaga mitaki kua nakai ko e taha puhala mahifi po ke taha puhala pauaki, tau fakatokatokaaga po ke tau gahuahuaaga. . . . Ko e fakaakoaga ko e matapatu puhala he fakaalofa.” Moli, ko e manatu hana ko e manatu he faiaoga he lalolagi. Pete ia, kua liga hagaao lahi e manatu hana ke he fakaakoaga ne taute e tautolu ko e tau Kerisiano. He puhala fe?
3 Ko e ha tautolu a Fifitakiaga ko e faiaoga, kua nakai fai foki ka ko Iesu Keriso hokoia, ne tala age ke he tau tutaki hana: ‘Kua fakatoka e au e fakafifitaki ma mutolu.’ (Ioane 13:15) Kua hagaao atu a ia ke he fifitakiaga hana ne fakakite e loto fakatokolalo, ka ko e fakafifitaki ne fakatoka e Iesu ma tautolu nukua putoia moli ki ai e gahua aoga lahi hana he eke mo tagata he lalolagi—ke fakaako ke he tau tagata e tala mitaki he Kautu he Atua. (Luka 4:43) Mogonei, kaeke fifili e koe taha kupu ke fakamaama aki e fekafekauaga ha Iesu, nakai kia to fifili e koe e kupu “fakaalofa”? (Kolose 1:15; 1 Ioane 4:8) Ko e fakaalofa ha Iesu ma e hana Matua he lagi, ko Iehova, kua tokoluga ue atu. (Ioane 14:31) Ha ko e faiaoga, ne fakakite e Iesu e fakaalofa ke he ua e puhala kehekehe. Ne ofania e ia e kupu moli ne fakaako e ia, mo e ofania e ia e tau tagata ne fakaako e ia. Kia fakamahino fakatata atu a tautolu ke he tau puhala ua nei he fakafifitaki ne fakatoka e ia ma tautolu.
Ko e Fakaalofa Tu Leva he Tau Kupu Moli Faka-Atua
4. Feaki fefe e Iesu e fakaalofa ma e tau fakaakoaga ha Iehova?
4 Ko e aga he faiaoga ke he matakupu hana kua lauia lahi e aoga he fakaakoaga hana. Ti, ko e ha fekehekeheaki to liga kitia mo e lauia ai ke he tau tagata fakaako hana. Kua nakai fakateaga a Iesu ke he tau kupu moli uho ne fakaako e ia hagaao ki a Iehova mo e Kautu Hana. Ko e ofania ha Iesu ma e matakupu nei kua hokulo lahi. Ne feaki e ia e fakaalofa nei ko e tagata fakaako. Mai he tau vaha loa he moui ato tagata hana, ko e Tama fuataha ko e tagata fakaako makutu. Ne fakamau e Isaia 50:4, 5 e tau kupu latatonu nei: “Kua foaki mai he Iki ko Iehova kia au e alelo ha lautolu ne fakaako, ke iloa ai e au ke fakamafana ke he kupu a ia ne matematekelea; to fafagu e ia au ke he pogipogi, ko e pogipogi to fafagu ai e ia haku a tau teliga, ke fanogonogo ai au tuga na lautolu kua fakaako. Kua vevete he Iki ko Iehova haku a tau teliga, ti nakai totoko atu e au, ti nakai tukumuli au.”
5, 6. (a) Ko e heigoa ne tupu ki a Iesu he papatisoaga hana, mo e lauia fefe ki a ia? (e) Ko e heigoa e kehe ne kitia e tautolu he vahaloto ha Iesu mo Satani ke he fakaaogaaga he Kupu he Atua?
5 He tupu hake mo tagata he lalolagi, ne fakatumau a Iesu ke ofania e pulotu faka-Atua. (Luka 2:52) Ti, he magaaho he papatisoaga hana, ne fakafita a ia ke he taha mena kehe. “Ati maihiua ai e lagi,” he talahau he Luka 3:21. Maali ai, ko e mogoia ni ne maeke ia Iesu ke liu manatu e vaha ato tagata hana. He mole, ne fakaaoga e ia 40 e aho he fakakanopogi he tutakale. Liga ni kua fiafia lahi a ia ke manamanatu fakahokulo ke he tau magahala fakaako loga he lagi ne moua e ia mai ia Iehova. Ka e nakai leva, ne kamatamata ai e ofania hana ke he kupu moli he Atua.
6 He magaaho ne mategugu mo e hoge a Iesu, ne kumi e Satani ke kamatamata a ia. Ko e kehe ha ia he vahaloto he tau tama ua nei he Atua! Ne fatiaki tokoua e laua mai he tau Tohiaga Tapu Heperu—ka e kehekehe katoatoa e tau agaga. Ne fakamamiko e Satani e Kupu he Atua, he fakaaoga fakahanoa ai ke moua aki e tau mena fulukovi hana. Moli ni, ko e tagata totoko ia kua fakavihia lahi e tau kupu moli faka-Atua. Ke he taha fahi, ne fafati e Iesu e tau Tohiaga Tapu fakalataha mo e fakaalofa maaliali, he fakaaoga fakamitaki e Kupu he Atua ke foaki e tau tali takitaha. Nukua leva e moui ha Iesu ato tohi hifo e tau kupu omoi he agaga ia, pete he pihia ne fakalilifu agaia e ia a lautolu. Ha ko e tau kupu moli uho a ia mai he hana Matua he lagi! Ne tala age a ia ki a Satani ko e tau kupu pihia mai ia Iehova kua mua atu e aoga ke he tau mena kai. (Mataio 4:1-11) E, ne ofania e Iesu e tau kupu moli oti ne fakaako e Iehova ki a ia. Ka e, fakakite fefe e ia e fakaalofa ia ko e faiaoga?
Fakaalofa ma e Tau Kupu Moli ne Fakaako e Ia
7. Ko e ha ne mataofi a Iesu he taute e tau fakaakoaga ni hana?
7 Ko e fakaalofa ha Iesu ma e tau kupu moli ne fakaako e ia kua kitia maaliali tumau. Ha ko e mena, kua mukamuka ia ia ke feaki e tau manatu ni hana. He kua toka ia ia e tanakiaga he iloilo mo e pulotu. (Kolose 2:3) Moha ia, ne liu fakamanatu tumau e ia e tau tagata fanogonogo hana ko e tau mena oti ne fakaako e ia kua mai, nakai ia ia, ka e he hana Matua he lagi. (Ioane 7:16; 8:28; 12:49; 14:10) Kua lahi e ofania e ia e tau kupu moli faka-Atua ke hukui a lautolu aki e tau manatu ni hana.
8. He kamataaga he hana fekafekauaga, puhala fe ne fakatoka e Iesu e fakafifitaki he falanaki ke he Kupu he Atua?
8 He magaaho ne kamata e fekafekauaga ha Iesu ke he toloaga tagata, ne fakatoka fakamafiti e ia e fakafifitaki. Mailoga la e puhala ne fakapuloa fakamua e ia ke he tau tagata he Atua ko ia ko e Mesia ne mavehe. Kua finatu kia a ia ki mua he moto tagata, fakapuloa ne ia ko e Keriso a ia, ti taute e tau mana ofoofogia ke fakamoli aki e manatu hana? Nakai. Ne finatu a ia ke he sunako, ko e kavi ne totou tumau he tau tagata he Atua e tau Tohiaga Tapu. I ai, ne totou fakalahi e ia e perofetaaga he Isaia 61:1, 2 mo e fakamaama kua hagaao e tau kupu moli fakaperofeta ia ki a ia ni. (Luka 4:16-22) Ne lagomatai ai he tau mana loga hana ke fakakite kua ha ha ia ia e lalago ha Iehova. Pete ia, ne fakatumau a ia ke falanaki ke he Kupu he Atua ke he tau fakaakoaga hana.
9. He tau fehagaiaga hana mo e tau Farasaio, fakakite fefe e Iesu e fakaalofa fakamoli hana ma e Kupu he Atua?
9 He magaaho ne paleko he tau tagata totoko fakalotu a Iesu, ne nakai lali a ia ke mua ki a lautolu, pete ni kua maeke ia ia ke fakakaumahala a lautolu ke he kamatamata pihia. Ka kua toka e ia e Kupu he Atua ke fakatikai a lautolu. Ke tuga anei, manatu la e magaaho ne tukumale e tau Farasaio kua holitu he tau tutaki ha Iesu e fakatufono he Sapati he tau e tau fua saito he fonua mo e kai ai he o a lautolu. Ne tali a Iesu: “Nakai kia totou e mutolu e mena ne eke e Tavita, ka kua fia kai a ia, katoa mo lautolu ne fakalataha mo ia?” (Mataio 12:1-5) Moli, kua liga totou he tau tagata fia tututonu ia e fakamauaga omoi he agaga he 1 Samuela 21:1-6. Kaeke pihia, kua kaumahala a lautolu ke mailoga e fakaakoaga aoga lahi ne toka i loto. Ka kua mua e mena ne taute e Iesu mai he totou noa e fakamauaga. Ne manamanatu a ia hagaao ki ai mo e mauloto e ogo i loto. Ne ofania e ia e tau matapatu fakaakoaga ne fakaako e Iehova he puhala he vala kupu ia. Ti fakaaoga ai e ia e fakamauaga ia, pihia foki mo e fifitakiaga mai he Fakatufono faka-Mose, ke fakakite e agaga lagotatai he Fakatufono. Tatai foki, ne omoi he fakaalofa fakamoli ha Iesu a ia ke lalago e Kupu he Atua mai he laliaga he tau takitaki lotu ke fakamamiko ke aoga ai ni a lautolu po ke tanumia i lalo he tau aga fakamotu loga he tagata.
10. Fakamoli fefe e Iesu e tau perofetaaga hagaao ke he uho he fakaakoaga hana?
10 Ko e ofania ha Iesu ma e kupu moli to nakai fakaai ke fakaata a ia ke fakaako ai ke he puhala ako manatu, ke he puhala mateafu po ke taute noa ni. Ne talahau he tau perofetaaga omoi he agaga to vagahau e Mesia mo e ‘tau kupu fakaalofa he hana tau laugutu,’ he fakaaoga e “tau kupu mitaki.” (Salamo 45:2; Kenese 49:21) Ne fakamoli e Iesu e tau perofetaaga ia he fakatumau ke fakaalaala e ogo hana, he fakaaoga e “tau kupu fakaalofa” he fakaako e ia e kupu moli ne ofania lahi e ia. (Luka 4:22) Nakai fakauaua, ne fakakikila he hana aga olioli e fofoga hana, mo e kua kikila hana tau mata mo e fiafia ke he matakupu hana. Liga ko e fiafia ha ia ke fanogonogo ki a ia, mo e ko e fakafifitaki mitaki ha ia ma tautolu ke mumuitua ki ai he magaaho ka tutala a tautolu ke he falu hagaao ke he mena ne ako e tautolu!
11. Ko e ha e lotomatala ha Iesu ko e faiaoga ne nakai taute a ia ke hula he fakatokoluga?
11 Taute nakai he lotomatala lahi ha Iesu ke he kupu moli faka-Atua mo e hana puhala vagahau fakafuluola a ia ke hula he fakatokoluga? Ko e mena fa tupu a ia ke he tau faiaoga tagata. Ka e manatu kua pulotu a Iesu ke he puhala mahani Atua. Ko e pulotu pihia kua nakai fakaata ma e fakaikaluga, ha ko e ‘pulotu kia lautolu ne fakatokolalo.’ (Tau Fakatai 11:2) Kua fai mena foki ne mataofi a Iesu he hula po ke fakaikaluga.
Fakaalofa a Iesu ke he Tau Tagata ne Fakaako e Ia
12. Fakakite fefe e Iesu kua nakai manako a ia ke hopoate e tau tutaki hana ki a ia?
12 Ko e fakaalofa ha Iesu ma e tau tagata kua kitia mau he puhala fakaako hana. Ko e puhala fakaako hana kua nakai fakafuafuakelea e tau tagata, nakai tuga he tau tagata fakaikaluga. (Fakamatalaaga 8:9) He mole he kitia taha he tau mana ha Iesu, ne lofia a Peteru he ofogia, mo e fakaveli a ia ke he na tulive ha Iesu. Ka kua nakai manako a Iesu ke hopoate e tau tutaki hana ia ia. Ne talahau totonu e ia, “Ua matakutaku” ti tala age ki a Peteru e gahua olioli lahi he taute tutaki ka fakalataha a ia ki ai. (Luka 5:8-10) Ne manako a Iesu ma e tau tutaki hana ke omoi he fakaalofa ni ha lautolu ma e kupu moli uho ne hagaao ke he Atua, nakai he hopoate ke he faiaoga ha lautolu.
13, 14. Ko e tau puhala fe ne fakakite e Iesu e mokoina ma e tau tagata?
13 Ko e fakaalofa ha Iesu ma e tau tagata ne fakaako e ia kua kitia foki ke he mokoina ne ha ha ia ia ma lautolu. “Kua fioia e ia e lanu tagata, ati fakaalofa hofihofi ai a ia kia lautolu, ne fakafita a lautolu, mo e tiaki atu ai, tuga e tau mamoe nakai fai leveki a lautolu.” (Mataio 9:36) Ne fakaalofa a ia ki a lautolu ha ko e tuaga matematekelea ha lautolu ati omoi ai ke lagomatai a lautolu.
14 Kia mailoga e mokoina ha Iesu he taha magaaho foki. He magaaho ne finatu e fifine ne gagao fakatafea ki a ia he moto tagata mo e aamo e tapulu hana, ne malolo agataha e fifine. Ne mailoga e Iesu e malolo ne fano kehe mai ia ia, ka e nakai kitia e ia ko hai kua fakamalolo. Ne manako lahi a ia ke kumi e fifine. Ko e ha? Nakai ke tuhituhi ki a ia he holitu e Fakatufono po ke tau matafakatufono he tau tohikupu mo e tau Farasaio, ne kua liga kapaletu a ia ki ai. Ka kua tala age a Iesu ki a ia: “Haku tama fifine na e, kua moui a koe he hau a tua; ti fano a, mo e monuina, kia malolo a koe he hau a kafo mamahi.” (Mareko 5:25-34) Mailoga la e mokoina he tau kupu ia. Ne nakai pehe noa a ia, “Kia malolo.” Ka kua, talahau e ia: “Kia malolo a koe he hau a kafo mamahi.” Ne fakaaoga e Mareko e kupu nei ne kakano moli ke “keli,” ko e faga fahi ne fa fakaaoga ke fakakikiveka. Ati talahau ai e Iesu nukua fakamatematekelea he gagao hana a ia, liga ko e mamahi kakava ke he fahi tino mo e he manamanatuaga. Ti fakaalofa ai a ia ma e fifine.
15, 16. Ko e heigoa e tau mena ne tutupu he fekafekauaga ha Iesu ne fakatata nukua kumi e ia e mitaki he tau tagata?
15 Ne fakakite foki e Iesu e fakaalofa ma e tau tagata he kumi e mitaki ia lautolu. Mailoga la e mena ne tupu he magaaho ne feleveia a ia mo Natanielu, ne eke mo aposetolo fakamui. “Kua fioia e Iesu a Natanielu, ha ne hau kia ia, ti tala age kia ia, Kitiala, ko e Isaraela moli, nakai pikopiko a ia.” He puhala mana, ne kitia e Iesu e loto ha Natanielu, ati lahi ai e mena ne iloa hagaao ki a ia. Moli, kua mamao mai a Natanielu he mitaki katoatoa. Kua ha ha ia ia e tau hepehepe hana, ke tuga ha tautolu oti. Ti he magaaho ne logona e ia hagaao ki a Iesu, ne fakateaga e vagahau hana: “Maeke kia ke tupu ha mena mitaki mai Nasareta?” (Ioane 1:45-51) Ka e pete ni ia, mai he tau mena oti ne kua lata ia Iesu ke talahau hagaao ki a Natanielu, ne fifili e Iesu taha mena mitaki ke fakamahino ki ai, ko e mahani fakamoli he tagata.
16 Tatai foki, he magaaho ne finatu e takitaki he tokoteau—liga ko e Tagata Motu Kehe, ko e Roma—mo e ole ki a Iesu ke fakamalolo e fekafekau gagao, ne iloa e Iesu na fai hehe e kautau ia. Ko e takitaki he tokoteau he tau magahala ia kua talahaua lahi ke he tau gahua favale, kelipopo, mo e tapuaki pikopiko. Pete ni ia, ne fakamahino atu a Iesu ke he taha mena mitaki—ko e tua kitia maali he tagata. (Mataio 8:5-13) Fakamui, he magaaho ne vagahau a Iesu ke he tagata holifono ne tautau he akau fakakikiveka he tapa hana, ne nakai akonaki e Iesu e tagata ha ko e mahani kolokolovao hana fakamua, ka e fakamafana ki a ia e amaamanakiaga anoiha. (Luka 23:43) Na iloa mitaki e Iesu ka eke ke onoono fakakelea mo e tuhituhi atu ke he falu to fakalolelole ai a lautolu. Ti nakai fakauaua, ko e tau laliaga hana ke kumi e mitaki he falu nukua fakamalolo e tokologa ke holo ki mua e mitaki.
Fakamakai ke Fekafekau ke he Tau Tagata
17, 18. He taulia e kotofaaga ke hau ke he lalolagi, ne fakakite fefe e Iesu e fakamakai ke fekafekau ke he falu?
17 Ko e taha fakamoliaga malolo lahi he fakaalofa ha Iesu ma e tau tagata ne fakaako e ia ko e fakamakai hana ke fekafekau ki a lautolu. He moui fakamua ato tagata hana, kua fa fiafia tumau e Tama he Atua ke he tau tagata. (Tau Fakatai 8:30, 31) Ha ko e “Loko” ha Iehova, po ke liliu kupu, liga olioli e ia e tau fakafehagaiaga loga mo e tau tagata. (Ioane 1:1) Ti, ko e taha puhala ke fakaako fakahako e tau tagata, ne “fakatokolalo e ia a ia, ne mahani a ia fakalataha mo e tupa,” he toka e tuaga tokoluga hana i luga he lagi. (Filipi 2:7; 2 Korinito 8:9) He nofo he lalolagi, ne nakai amanaki a Iesu ke fekafekau age ki a ia. Ke he taha fahi, ne pehe a ia: “Kia tuga e Tama he tagata nakai hau a ia kia fekafekau atu a ia, kia foaki atu foki hana moui mo lukutoto ke hukui aki e tau tagata tokologa.” (Mataio 20:28) Ne moui katoatoa a Iesu ke he tau kupu ia.
18 Ne fekafekau fakatokolalo atu a Iesu ke he tau manako ha lautolu ne fakaako e ia, he mautali ke foaki ne ia a ia ma lautolu. Ne fano hui a ia he Motu he Maveheaga, he fano ke he teau e tau kilomita he tau fenoga fakamatala, he lali ke hokotia ke he tau tagata tokologa. Nakai tatai mo e tau Farasaio mo e tau tohikupu fakaikaluga, ne tumau a ia ke mahani fakatokolalo ati mukamuka ai ke o ki a ia. Ko e tau tagata he tau feakiaga kehekehe—tau iki, tau kautau, tau loea, tau fifine, fanau, tau nonofogati, tau tagata gagao, pihia foki mo lautolu ne tiaki he kaufakalatahaaga—nukua fiafia ke o atu ki a ia, mo e nakai matakutaku. Pete kua mitaki katoatoa, ko Iesu ko e tagata, ne hokotia ke he mategugu mo e hoge. Ti pihia foki he magaaho ne lolelole a ia po ke manako ke okioki po ke fai magaaho ke liogi, ne tuku fakamua e ia e tau manako he falu ke he hana.—Mareko 1:35-39.
19. Fakatoka fefe e Iesu e fakafifitaki ke fakafehagai fakatokolalo, fakauka, mo e totonu ke he tau tutaki hana?
19 Kua tatai pihia foki e fakamakai ha Iesu ke fekafekau ke he hana tau tutaki. Ne taute pihia e ia he fakaako a lautolu ke he puhala totonu mo e fakauka. He magaaho ne fakatuai a lautolu ke maama e falu a fakaakoaga aoga, ne nakai tiaki, ita, po ke tauage e ia a lautolu. Kua tumau a ia ke kumi e tau puhala fou ke lagomatai a lautolu ke maama e manatu hana. Ke fakatai ki ai, manamanatu la ko e lagafiha e taufetoko e tau tutaki ko hai ne mua ia lautolu. He kumi tumau, ke hoko atu ke he po ato tamate a ia, ne moua e Iesu e tau puhala fou ke fakaako aki a lautolu ke mahani fakatokolalo ke he taha mo e taha. He puhala fakatokolalo nei, ke tuga ni e tau mena oti, nukua maeke ia Iesu ke talahau: ‘Kua fakatoka e au e fakafifitaki ma mutolu.’—Ioane 13:5-15; Mataio 20:25; Mareko 9:34-37.
20. Ko e heigoa e puhala fakaako ne kehe a Iesu mai he tau Farasaio, mo e lauia mitaki he ha e puhala ia?
20 Mailoga ne nakai tala age noa e Iesu ke he tau tutaki ko e heigoa e fakafifitaki; ne ‘fakatoka e ia e fakafifitaki.’ Ne fakaako e ia a lautolu he puhala he fifitakiaga. Ne nakai vagahau hifo a ia ki a lautolu mai he tuaga tokoluga, ke tuga kua mua ue atu a ia ke taute ha mena ne tala age e ia ki a lautolu ke taute. Ko e puhala he tau Farasaio a ia. “Kua talahau e lautolu, ka e nakai ni eke e lautolu,” he talahau e Iesu hagaao ki a lautolu. (Mataio 23:3) Ne fakakite fakatokolalo e Iesu ke he tau tagata fakaako hana e kakano he tau fakaakoaga hana he fakagahuahua a lautolu. Ti he magaaho ne fakamafana e ia hana tau tutaki ke takitaki e moui mukamuka ne nakai tauhele he tau koloa, ne nakai tali manatu e lautolu e manatu moli hana. Kua maeke ia lautolu ke kitia e moli he tau kupu hana: “Na fai ofaga e tau alope, ne fai mena foki ke momohe ai e tau manu lele, ka ko e Tama he tagata, nakai fai mena a ia ke mohe ai.” (Mataio 8:20) Ne fekafekau a Iesu ke he tau tutaki hana he fakatoka fakatokolalo e fakafifitaki ma lautolu.
21. Ko e heigoa ka fakatutala ki ai he vala tala ka mui mai?
21 Nakai fakauaua, ko Iesu ko e Faiaoga mua ue atu ke moui he lalolagi! Ko e fakaalofa hana ma e tau mena ne fakaako e ia mo e fakaalofa hana ma e tau tagata ne fakaako e ia nukua kitia moli ki a lautolu ne loto fakamoli oti ne kitia mo e logona a ia. Ti kua moli foki ki a tautolu he vaha nei ne fakaako e fakafifitaki ne fakatoka e ia. Ka e, maeke fefe mogoia ia tautolu ke mumuitua ke he fifitakiaga mitaki katoatoa he Keriso? To fakatutala e vala ka mui mai ke he huhu ia.
To Tali Fefe e Koe?
• Ko e heigoa e fakaveaga he fakaakoaga mitaki, ke tuga ne fakakite e hai?
• Ko e tau puhala fe ne fakatata e Iesu e fakaalofa ma e tau kupu moli ne fakaako e ia?
• Fakakite fefe e Iesu e fakaalofa ma e tau tagata ne fakaako e ia?
• Ko e heigoa e tau fifitakiaga ne fakakite e fakamakai fakatokolalo ha Iesu ke fekafekau ki a lautolu ne fakaako e ia?
[Tau Huhu he Fakaakoaga]
[Fakatino he lau 6]
Fakakite fefe e Iesu na ofania e ia e tau matapatu fakaakoaga ne moua i loto he Kupu he Atua?