“Mui Mai kia Au”
“Mui Mai kia Au”
“Ko e mena ia ni kua ui ai a mutolu; ha ko e mena ne mamahi a Keriso ni ma mutolu, ti toka ai e ia e fakafifitaki ma mutolu, kia mumui atu a mutolu ke he hana tau tuagahui.”—1 PETERU 2:21.
1, 2. Ko e ha e fifitakiaga mitaki katoatoa ha Iesu ko e faiaoga kua nakai tokoluganea ma tautolu ke fifitaki?
KO IESU KERISO ko e Faiaoga mua ue atu ke moui he lalolagi. Mua atu foki, kua mitaki katoatoa a ia, nakai agahala he moui katoa hana ko e tagata. (1 Peteru 2:22) Kua pehe kia e mena ia ko e fifitakiaga ha Iesu ko e faiaoga kua tokoluganea ma tautolu nakai mitaki katoatoa ke fifitaki? Nakai pihia.
2 He kitia e tautolu he vala tala fakamua, ko e fakaveaga he fakaakoaga ha Iesu ko e fakaalofa. Ti ko e fakaalofa ko e taha mena kua lata ke feaki e tautolu oti. Kua fakamafana tumau mai e Kupu he Atua ki a tautolu ke tutupu mo e holo ki mua e fakaalofa ha tautolu ma e falu. (Filipi 1:9; Kolose 3:14) Kua nakai amanaki a Iehova ke taute he tau mena momoui hana e taha mena ne nakai maeke ia lautolu ke taute. Ko e moli, ha ko e “Atua ko e fakaalofa a ia” ti kua eke a tautolu he hana fakatai, kua lata ai ke talahau kua talaga e ia a tautolu ke fakakite e fakaalofa. (1 Ioane 4:8; Kenese 1:27) Ti ka liga totou e tautolu e tau kupu he aposetolo ko Peteru ne fakamau he mataulu tala ha tautolu, liga to tali a tautolu mo e mauokafua. Kua maeke ia tautolu ke mumui atu ke he tau tuagahui he Keriso. Ko e moli, kua maeke ia tautolu ke oma e poakiaga ha Iesu ni: “Mui mai kia au.” (Luka 9:23) Kia kikite atu a tautolu ke he puhala ka liga fifitaki e tautolu e fakaalofa ne fakakite he Keriso, fakamua ma e tau kupu moli ne fakaako e ia, ti ma e tau tagata ne fakaako e ia.
Ati Hake e Ofania ma e Tau Kupu Moli ne Ako e Tautolu
3. Ko e ha ne uka ai he falu ke fakaako, ka ko e heigoa e tomatomaaga ne moua he Tau Fakatai 2:1-5?
3 Ke ofania e tau kupu moli ne fakaako e tautolu ke he falu, kua lata ia tautolu ke fiafia ke ako ne tautolu hoko tautolu e tau kupu moli pihia. He lalolagi he vaha nei, ko e vahega fakaalofa pihia kua nakai mukamuka ke moua. Ko e tau mena pihia ke tuga e temotemoai e fakaakoaga mo e tau aga kelea mau ne feaki he tau fuata mui nukua taute falu ke nakai fiafia ke fakaako. Ti kua latatonu ai ke ako mai a tautolu ia Iehova. Ne pehe e Fakatai 2:1-5: “Haku tama na e, kaeke ke talia e koe haku a tau kupu, mo e toka ai e koe ke he loto hāu haku a tau poaki. Kua fakateliga hāu a tau teliga ke he iloilo, kua haga atu ai hāu a loto ke he manamanatu. Kaeke kua ui atu a koe ke he loto matala, mo e fakaleo lahi atu ke he loto manamanatu. Kaeke ke kumi e koe a ia, tuga he kumi ario; kaeke ke kumi fakamakutu ki ai, tuga he kumi e koloa galo. Ti iloa ai e koe e matakutaku kia Iehova, mo e moua ai e koe e iloilo ke he Atua.”
4. Ko e heigoa e kakano ke “haga atu” e loto, mo e heigoa e onoonoaga ka lagomatai a tautolu ke taute pihia?
4 Mailoga e kupu 1 ke he 4, kua fakamafana mau ki a tautolu ke fakamakamaka ke nakai ni “talia” mo e ‘toka ke he loto’ ka e “kumi fakamakutu” foki. Ka ko e heigoa ka fakalagalaga a tautolu ke taute e tau mena oti nei? Kia mailoga e alaga kupu “kua haga atu ai hāu a loto ke he manamanatu.” Taha e tohi ne talahau ko e tomatomaaga nei “nakai ko e ole ke logona hokoia; ko e ole ma e taha aga pauaki: ko e talia fakamoli ke he tau fakaakoaga.” Mo e heigoa ka taute a tautolu ke talia mo e makutu ke ako e tau mena ne fakaako e Iehova ki a tautolu? Ko e ha tautolu a onoonoaga. Kua lata ia tautolu ke mailoga e “iloilo ke he Atua” ke tuga e “ario” mo e “koloa galo.”
5, 6. (a) Ko e heigoa ka liga tupu, mo e maeke fefe ia tautolu ke kalo mai he mena ia? (e) Ko e ha kua lata ia tautolu ke fakatumau ke lafi atu ke he uho he iloilo ne moua e tautolu he Tohi Tapu?
5 Kua nakai uka ke moua e onoonoaga pihia. Ke fakatai ki ai, ko e “iloilo ke he Atua” ne ako e koe kua liga putoia ai e kupu moli kua finagalo a Iehova ke nonofo tukulagi e tau tagata tua fakamoli he Parataiso he lalolagi. (Salamo 37:28, 29) He magaaho fakamua ne ako e koe e kupu moli ia, kua kitia moli ai e koe ko e koloa uho, ko e iloilo ne fakapuke e manamanatuaga mo e loto hau aki e amaamanakiaga mo e fiafia. Ka e kua he mogonei? Fai magaaho ne mole, kua mateafu po kua pau kia e loto fakaaue ma e koloa uho hau? Kia lali, mogoia, ke taute ua e mena. Fakamuaaki, fakafou e loto fakaaue hau, pehe a ia, fakalagalaga tumau e loto hau ko e ha ne uho ai ki a koe e tau kupu moli takitaha ne fakaako e Iehova ki a koe, pihia foki e tau kupu moli ne ako e koe he tau tau loga kua mole.
6 Ke uaaki, kia fakatumau ke lafi ke he koloa uho hau. Ha ko e mena, kaeke keli hake e koe e patuo uho, to tuku ni kia e koe he katofihui, fiafia ai ti fano? Po ke kelikeli atu e koe ke kitia ko e fai foki nakai? Ko e Kupu he Atua kua puke he tau patuo mo e tau tepu patuo uho he kupu moli. Pete he loga ne moua e koe, maeke ke moua foki e koe falu. (Roma 11:33) He keli hake e koe e tepu maka uho he kupu moli, huhu ki a koe ni: ‘Ko e ha ne eke ai mo koloa uho? Kua foaki mai kia ki a au e lotomatala ke he aga fakaperesona ha Iehova po ke tau finagalo hana? Kua foaki mai falu takitakiaga aoga ke lagomatai au ke mui atu ke he tau tuagahui ha Iesu?’ Ke manamanatu fakahokulo ke he tau huhu pihia ka lagomatai a koe ke ati hake e ofania hau ma e tau kupu moli ne fakaako e Iehova ki a koe.
Fakakite e Ofania ma e Tau Kupu Moli ne Fakaako e Tautolu
7, 8. Ko e heigoa falu a puhala ne kua maeke ia tautolu ke fakakite ke he falu kua fakaalofa a tautolu ke he tau kupu moli ne ako e tautolu mai he Tohi Tapu? Foaki e fifitakiaga.
7 He fakaako e tautolu falu, maeke fefe ia tautolu ke fakakite kua ofania e tautolu e tau kupu moli ne ako e tautolu mai he Kupu he Atua? He mumui atu ke he fifitakiaga ha Iesu, kua falanaki mamafa a tautolu ke he Tohi Tapu he ha tautolu a fakamatalaaga mo e fakaakoaga. Nakai la leva, nukua fakamafana e tau tagata he Atua he lalolagi katoa ke fakaaoga fakalahi e Tohi Tapu he fekafekauaga ha tautolu ke he toloaga tagata. He fakagahuahua e koe e manatu ia, kia kumi e tau puhala ke fakailoa ke he tagata he fale kua uho lahi ki a koe e mena ne fakamatala e koe mai he Tohi Tapu.—Mataio 13:52.
8 Ke fakatai ki ai, he magahala fakamatakutakuina he tau kua mole i New York City, taha e matakainaga Kerisiano fifine ne totou e Salamo 46:1, 11 mo e tau tagata ne feleveia mo ia he fekafekauaga hana. Fakamua ne huhu a ia ke he tau tagata ko e fahia fefe a lautolu ke he mena matematekelea ne tupu. Ne fanogonogo fakamitaki a ia ke he tau tali ha lautolu, fakakite e mailogaaga, ti talahau: “Totou nakai e au e kupu tohi ki a koe ne fakamafana lahi mai ki a au he magahala he magaaho uka nei?” Tokofiha ni ne nakai mahalo, mo e loga e tau fakatutalaaga homo ue atu ne fua mai ai. He tutala ke he tau fuata, ne fa tumau e matakainaga ia ke talahau: “Kua fakaako e au e Tohi Tapu ke molea e 50 e tau he mogonei, ka e iloa nakai e koe? Kua nakai la fehagai au mo e ha mena vihi ne nakala maeke he tohi nei ke tali.” He fakaaoga e puhala fakafeleveia fakamoli mo e fiafia lahi, kua fakakite e tautolu ke he tau tagata kua uho mo e ofania e tautolu e tau mena ne ako e tautolu mai he Kupu he Atua.—Salamo 119:97, 105.
9, 10. Ko e ha kua aoga ai ke fakaaoga e Tohi Tapu ka tali e tau huhu hagaao ke he tau taofiaga ha tautolu?
9 He magaaho ka huhu mai e tau tagata ki a tautolu hagaao ke he tau taofiaga ha tautolu, kua ha ha ia tautolu e magaaho mitaki ke fakakite age kua ofania e tautolu e Kupu he Atua. He mumui ke he fifitakiaga ha Iesu, kua nakai fakave e tautolu e tau tali ha tautolu ke he ha tautolu ni a tau manatu. (Tau Fakatai 3:5, 6) Ka kua fakaaoga fakamitaki e tautolu e Tohi Tapu he tau tali. Matakutaku nakai a koe neke liga huhu he taha tagata ki a koe e huhu ka liga nakai maeke ia koe ke tali? Kia kikite ke he ua e lakaaga mitaki kua maeke ia koe ke taute.
10Taute e tau mena ne kua maeke ia koe ke mautauteute. Ne tohia he aposetolo ko Peteru: “Kia tapu e Iki ko e Atua ke he tau loto ha mutolu. Kia mautali a mutolu ke tali atu mo e mahani molu mo e matakutaku kia lautolu oti kua hūhu mai kia mutolu ke he kakano he amaamanaki ha ha ia mutolu.” (1 Peteru 3:15) Kua mautali nakai a koe ke lalago e tau taofiaga hau? Ke fakatai ki ai, kaeke manako taha tagata ke iloa ko e ha ne nakai fakalataha a koe ke he falu a aga fakamotu ne nakai mai he Tohi Tapu, kia nakai talahau noa, “Kua nakai fakaata he lotu haku.” Kua liga pehe e tali ia, kua toka e koe falu ke taute e tau fifiliaga hau ma hau ti tuga foki kua mai he taha vahega lotu a koe. Ka e liga mitaki lahi ke talahau, “Ha kua nakai fakaata he Kupu he Atua, ko e Tohi Tapu,” po ke, “Ha kua nakai fiafia e Atua haku ki ai.” Ti foaki mogoia e fakamaamaaga mahino ko e ha.—Roma 12:1.
11. Ko e heigoa e kanavaakau kumikumi ka lagomatai a tautolu ke mautali ke tali e tau huhu hagaao ke he tau kupu moli he Kupu he Atua?
11 Kaeke logona hifo e koe kua nakai mautauteute a koe, he ha he fakaaoga mogoia taha magaaho ke kumikumi ke he tohi Reasoning From the Scriptures? * Ti, fifili falu a matakupu ka liga ke huhu mai, mo e ako manatu falu a manatu faka-Tohiaga Tapu. Kia toka e tohi Reasoning mo e Tohi Tapu hau he mena ke mukamuka ke moua. Kia nakai fakauaua ke fakaaoga ua e tau tohi ia, he tala age kua ha ha ia koe e kanavaakau kumikumi ne manako a koe ke fakaaoga ke lagomatai ke moua aki e tali he Tohi Tapu ke he tau huhu.
12. Tali atu fefe a tautolu kaeke nakai iloa e tautolu e tali ke he huhu faka-Tohi Tapu?
12Lali ke nakai tupetupe teao. Nukua nakai fai tagata nakai mitaki katoatoa ne kua moua e tau tali oti. Ti he magaaho ka huhu atu e huhu faka-Tohi Tapu ne nakai maeke ia koe ke tali, maeke agaia ia koe ke tali he puhala nei: “Fakaaue he huhu e huhu hokulo pihia. Ka ke talahau fakamoli atu, nakai iloa e au e tali, ka e moli au na haia he Tohi Tapu e tali. Na fiafia lahi au ke kumikumi ke he Tohi Tapu, ti to kumikumi e au e huhu hau ti liu mai au ki a koe mo e tali.” Ko e feleveiaaga loto moli mo e fakatokolalo pihia ka foafoa e puhala ma e falu a fakatutalaaga i mua.—Tau Fakatai 11:2.
Fakaalofa ma e Tau Tagata ne Fakaako e Tautolu
13. Ko e ha kua lata ia tautolu ke fakatumau e onoonoaga mitaki hagaao ki a lautolu ne fakamatala a tautolu ki ai?
13 Ne fakakite e Iesu e fakaalofa ma e tau tagata ne fakaako e ia. Maeke fefe a tautolu ke fifitaki a ia hagaao ke he mena nei? Kia nakai feaki e tautolu e aga fakahanoa ke he tau tagata ne takai ia tautolu. Ha ko e “tau ke he aho lahi he Atua mana,” hane tata lahi mai, mo e tokologa he tau piliona he tau tagata ka fakaotioti. (Fakakiteaga 16:14; Ieremia 25:33) Pete ia, kua nakai iloa e tautolu ko hai ka momoui mo e ko hai ka mamate. Kua ha i mua e fakafiliaga ia mo e ko e fakafiliaga ni hana ne kotofa e Iehova, ko Iesu Keriso. Ato hoko e fakafiliaga, kua onoono atu a tautolu ke he tau tagata takitokotaha ke ha ha ai e amaamanakiaga ke eke mo fekafekau ha Iehova.—Mataio 19:24-26; 25:31-33; Gahua 17:31.
14. (a) Liga kumikumi hifo fefe na tautolu ki a tautolu ke kitia ko e fakaalofa nakai a tautolu ke he tau tagata? (e) Ko e heigoa e tau puhala mitaki ke fakakite e tautolu e mokoina mo e fiafia fakatagata ke he falu?
14 Ke tuga a Iesu, mogoia, kua kumi e tautolu e mokoina ma e tau tagata. Liga to huhu na tautolu ki a tautolu: ‘Fakaalofa nakai au ma e tau tagata ne fakahehe he tau fatipiko mo e tau fakavaivai fakailoilo he tau lotu, tau politika, mo e tau fakafua koloa he vaha nei? Kaeke tuga kua fakateaga a lautolu ke he ogo ne taatu e tautolu ki a lautolu, kua lali nakai au ke maama ko e ha ne pihia ai a lautolu? Mailoga nakai e au, po ke falu ne fekafekau fakamoli laia ki a Iehova, na manatu pihia foki au fakamua? Kua hikihiki nakai e au e fakafeleveiaaga haku ke he mena kua lata? Po kua fakaheu e au e tau tagata nei ke nakai fakaai ke moua e amaamanakiaga?’ (Fakakiteaga 12:9) He magaaho ka mailoga he tau tagata e mokoina moli ha tautolu, liga to fanogonogo a lautolu ke he ogo ha tautolu. (1 Peteru 3:8) Liga to omoi foki he mokoina a tautolu ke fakakite e fiafia ke he tau tagata ne feleveia mo tautolu he fekafekauaga ha tautolu. Liga tohi hifo e tautolu e tau huhu mo e tau tupetupe ha lautolu. Ka liliu a tautolu, liga to fakakite e tautolu kua manamanatu a tautolu hagaao ke he mena ne talahau e lautolu he ahi fakamua. Mo e kaeke ha ha ia lautolu e manako lahi he magaaho ia, liga kua maeke ia tautolu ke foaki falu a lagomatai gahuahua.
15. Ko e ha kua lata ia tautolu ke onoono ke he mitaki he tau tagata, mo e liga taute fefe ai e tautolu?
15 Ke tuga a Iesu, kua onoono a tautolu ke he mitaki he tau tagata. Liga kua taute he matua tokotaha e laliaga navanava ke feaki e fanau hana. Hane taufetului e tagata tane ke leveki e magafaoa hana. Hane fakakite he tagata motua lahi e fiafia ke he tau mena fakaagaga. Mailoga nakai e tautolu e tau mahani pihia ke he tau tagata ne feleveia mo tautolu mo e nava ai ki a lautolu ha ko e tau mena ia? He taute pihia, kua fakakite e tautolu e maamaaga ne ha ha he vahaloto ha tautolu mo e liga hafagi ai e puhala ke foaki e fakamatalaaga hagaao ke he Kautu.—Gahua 26:2, 3.
Latatonu e Mahani Fakatokolalo he Fakakite e Fakaalofa
16. Ko e ha ne aoga ai ke fakatumau ke mahani molu mo e matakutaku ki a lautolu ne fakamatala a tautolu ki ai?
16 Ko e fakaalofa ha tautolu ma e tau tagata ne fakaako e tautolu ka omoi a tautolu ke oma e hatakiaga pulotu he Tohi Tapu: “Kua fakaikaluga e maama, ka kua fakamafana e fakaalofa.” (1 Korinito 8:1) Kua ha ha ia Iesu e iloilo ne mua, ka kua nakai lagataha a ia ke fakaikaluga. Ti kaeke fakamatala e koe e tau taofiaga hau, kia tiaki e puhala taufetoko po ke fia tokoluga. Ko e foliaga ha tautolu ke hokotia mo e ke futia e tau loto he tau tagata ke he tau kupu moli ne ofania lahi e tautolu. (Kolose 4:6) Manatu, he magaaho ne fakatonu e Peteru e tau Kerisiano ke mautali ke tali atu, ne putoia e ia e fakamanatuaga kua lata ia tautolu ke taute pihia “mo e mahani molu mo e matakutaku kia lautolu oti.” (1 Peteru 3:15) Kaeke mahani molu mo e matakutaku a tautolu, liga to futiaki atu e tautolu e tau tagata ke he Atua ne fekafekau a tautolu ki ai.
17, 18. (a) Kua lata a tautolu ke tali fefe ke he tau aga tuhituhi hagaao ke he lata ha tautolu mo tau fekafekau? (e) Ko e ha e iloilo ke he tau vagahau faka-Tohi Tapu i tuai kua nakai latatonu ma e tau tagata fakaako he Tohi Tapu?
17 Kua nakai lata ke fakafiafia e tau tagata aki e iloilo po ke lotomatala ha tautolu. Kaeke fai tagata he matakavi hau ne fakaheu ke fanogonogo ke he ha tagata ne nakai fai tohi he univesiti po ke fai matahigoa, kia nakai fakaata e aga ha lautolu ke fakalolelole a koe. Ne nakai mahalohalo a Iesu ke he totokoaga he nakai fano a ia ke he aoga rapai tokoluga he vaha hana; nakai mahala foki a ia ke he tau fili tagata talahaua he lali ke fakafiafia e tau tagata aki e fakaakoaga ne mua hana.—Ioane 7:15.
18 Ko e mahani fakatokolalo mo e fakaalofa kua mua atu e aoga ke he tau fekafekau Kerisiano ke he lahi he fakaakoaga fakalalolagi. Ko e Faiaoga Mua ue Atu, ko Iehova, ne taute a tautolu ke lata ma e fekafekauaga. (2 Korinito 3:5, 6) Mo e pete ni ko e ha mena ne talahau he falu he tau akoako Kerisitenitome, kua nakai lata ia tautolu ke fakaako e tau vagahau faka-Tohi Tapu tuai ke eke mo tau faiaoga he Kupu he Atua. Ne omoi he agaga a Iehova ke tohia e Tohi Tapu ke he tau kupu maaliali mo e hokulo, ne kua teitei ke maama he tau tagata oti hana tau kupu moli kua uho. Ko e tau kupu moli ia kua tumau katoatoa pihia foki he magaaho ne fakaliliu ke he totou teau e tau vagahau. Ti ko e iloilo ke he tau vagahau i tuai, pete kua aoga he falu magaaho, kua nakai latatonu. Mua atu, ke hula he moua e lotomatala ke he tau vagahau, ka taute e taha ke galo e fua ne latatonu ma e Kerisiano moli—ko e puhala fakaako atu.—1 Timoteo 6:4.
19. Ko e heigoa e kakano ne kua eke e fekafekauaga faka-Kerisiano ha tautolu ko e gahua fakatokolalo?
19 Kua nakai fakauaua ko e fekafekau Kerisiano ha tautolu ko e gahua kua lata mo e aga fakatokolalo. Kua tumau a tautolu ke fakatapakupaku ne tautolu a tautolu ke he totokoaga, fekehekeheaki, mo e favale foki. (Ioane 15:20) Ka e, he taute fakamoli e fekafekauaga ha tautolu, kua taute e tautolu e gahua aoga. Kaeke tumau a tautolu ke fekafekau fakatokolalo ke he falu he gahua nei, kua fifitaki e tautolu e fakaalofa ne fakakite e Iesu Keriso ke he tau tagata. Manamanatu: Kaeke ke fakamatala a tautolu ke he totou afe he tau tagata ne fekehekeheaki po ke totoko ke maeke ke hokotia atu ke he taha tagata ne tuga e mamoe, nakai kia aoga lahi e laliaga ia? E aoga! Ti he fakatumau ke he gahua, nakai fakalolelole, kua fekafekau fakamoli tuai a tautolu ki a lautolu ne tuga e tau mamoe ne nakai la hokotia a tautolu ki ai. Nakai fakauaua to taute moli e Iehova mo Iesu ke tokologa atu foki e tau tagata uho pihia ka moua mo e lagomatai ato hoko mai e fakaotiaga.—Hakai 2:7.
20. Ko e heigoa falu a puhala ka fakaako a tautolu he fifitakiaga?
20 Ke fakaako he fifitakiaga ko e taha puhala ke fakakite e fakamakai ha tautolu ke fekafekau ke he falu. Ke tuga anei, kua manako a tautolu ke fakaako e tau tagata, ke fekafekau ki a Iehova, ‘ko e Atua fiafia,’ ko e puhala moui mitaki mo e mauokafua lahi ni a ia ke moua. (1 Timoteo 1:11) He kitia e lautolu e tau mahani mo e tau fehagaiaga ha tautolu mo e tau tuuta kaina, tau kapitiga he aoga, mo e tau kapitiga gahua, kitia nakai e lautolu kua fiafia mo e mauokafua a tautolu? Tatai foki, kua fakaako e tautolu e tau tagata fakaako Tohi Tapu ko e fakapotopotoaga Kerisiano ko e huaga he fakaalofa mai he lalolagi aga makalili mo e favale. Maeke nakai he tau tagata ne fakaako e tautolu ke kitia maali kua fakaalofa a tautolu ki a lautolu oti i loto he fakapotopotoaga mo e gahua fakalahi ke puipui e mafola mo e taha ke he taha?—1 Peteru 4:8.
21, 22. (a) Ko e kumikumi hifo ki a tautolu ni hagaao ke he fekafekauaga ha tautolu ka takitaki a tautolu ke taute e tau fifiliaga fe? (e) Ko e heigoa ka fakatutala ki ai he tau vala tala ka mumui mai?
21 Ko e aga fakamakai ke he fekafekau ha tautolu ka liga, he falu magaaho, fakalagalaga a tautolu ke liu kumikumi hifo ki a tautolu ni. He taute ai mo e loto fakamoli, kua tokologa ne kitia kua maeke ia lautolu ke fakalahi atu e gahua ha lautolu ke he fekafekauaga mau po ke o atu ke fekafekau ke he matakavi ne lahi e manako fakaagaga. Ko e falu kua fifili ke ako e vagahau motu kehe ke fakamatala ke he tau matakau he tau tagata motu kehe hane tupu he matakavi ni ha lautolu. Kaeke hafagi e tau fifiliaga pihia ki a koe, kia manamanatu fakamitaki mo e liogi hagaao ki ai. Kua tamai he moui fekafekau e fiafia ne mua, mauokafua, mo e mafola he manamanatuaga.—Fakamatalaaga 5:12.
22 Ke he tau puhala oti, kia fakatumau a tautolu ke fifitaki a Iesu Keriso he ati hake e fakaalofa ha tautolu ma e tau kupu moli ne fakaako e tautolu mo e ma e tau tagata ne fakaako e tautolu. Ke feaki mo e fakakite e fakaalofa ke he tau puhala ua nei ka lagomatai a tautolu ke fakatoka e fakaveaga ke eke mo tau faiaoga tuga e Keriso. Maeke fefe, mogoia, a tautolu ke ati e fakaveaga ia? To fakatutala a tautolu ke he falu a puhala fakaako pauaki ne fakaaoga e Iesu he tau vala tala ka mumui mai.
[Matahui Tala]
^ para. 11 Lomi fakailoa he Tau Fakamoli a Iehova.
To Tali Fefe e Koe?
• Ko e heigoa e fakamoliaga ne ha ha ia tautolu ko e fifitakiaga ha Iesu ko e faiaoga kua nakai tokoluganea ma tautolu ke fifitaki?
• Liga fakakite fefe e tautolu kua ofania e tautolu e tau kupu moli ne ako e tautolu mai he Tohi Tapu?
• Ko e ha ne aoga ai ke fakatumau ke fakatokolalo he tutupu a tautolu ke he iloilo?
• Ko e heigoa falu a puhala ka liga fakakite e tautolu e fakaalofa ma e tau tagata ne ukufakina a tautolu ke fakaako?
[Tau Huhu he Fakaakoaga]
[Tau Fakatino he lau 10]
Taute e mena kua maeke ia koe ke mautauteute
[Tau Fakatino he lau 11]
Kaeke talia e koe e “iloilo ke he Atua,” to maeke ia koe ke fakaaoga fakamitaki e Tohi Tapu
[Fakatino he lau 12]
Fakakite e tautolu e fakaalofa ma e tau tagata he fakamatala e tala mitaki mo lautolu