Mafanatia he Tau Vaha Matematekelea

KUA nakai fai fakamafanaaga moli e tau tala he tau aho nei. Ne tohi he taha tagata: “Ko e tau mena tutupu fou nei kua kelea lahi ti fa fakauaua a tautolu ke kitekite po ke nakai ke he tau tala tutupu he matahola ono.” Kua puke e lalolagi ke he felakutaki, tau gahua fakamatakutakuina, matematekelea, matahavala, mo e gagao—ko e tau mena kelea ka nakai leva ti lauia foki a tautolu kaeke ke nakai la hoko ia ki a tautolu.

Kua fita he talahau fakahako mai he Tohi Tapu e tuaga he tau mena nei. He fakamaama e vaha ha tautolu, ne pehe a Iesu to ha ha i ai e tau taulatau, tau tatalu, tau hoge, mo e tau mafuike lalahi. (Luka 21:10, 11) Tatai ai, ne tohi he aposetolo ko Paulo ka “hohoko mai e tau aho uka,” to mahani favale, velevele koloa mo e nakai loto ke he mitaki e tau tagata. Ne fakahigoa e ia e magahala ia “ko e tau aho fakamui.”—2 Timoteo 3:1-5.

Ti, he fakamaama e tau tutuaga he lalolagi, kua fakakite mai he tau tala tutupu falu tataiaga ke he mena ne fita he talahau mai he Tohi Tapu. Ka e ha ha i ai e kaupaaga ke he tataiaga ia. Kua foaki he Tohi Tapu e manatu ne nakai foaki he tau tala tutupu. Puhala mai he agaga he Kupu he Atua, maeke ia tautolu ke maama e kakano nukua lahi mahaki e kelea ti pihia foki mo e mena ka tupu he vaha anoiha.

Onoonoaga he Atua ke he Mahani Kelea

Kua fakamaama he Tohi Tapu e onoonoaga he Atua ke he tau tuaga fakaatukehe he vaha ha tautolu. Pete ni he kitia tuai e ia e tau tupetupe  mogonei, ne nakai talia ai e ia po ke fakatu leva ai a lautolu. “Ko e Atua ko e fakaalofa,” he tohi he aposetolo ko Ioane. (1 Ioane 4:8) Kua leveki fakalahi e Iehova e tau tagata mo e vihiatia e tau kelea oti kana. Ti kua latatonu ia tautolu ke hahaga atu ke he Atua ma e mafanatia, ha kua mitaki mo e fakaalofa hofihofi noa a ia mo e ha ha ia ia e malolo mo e finagalo ke utakehe e kelea mai he lalolagi. Ne tohi he salamo: “Ko e mena laveaki [he Patuiki he lagi ne fifili he Atua he lagi] a ia ne nofogati he hana kalaga mai; katoa mo ia kua matematekelea, mo ia kua nakai fai lagomatai. To fakaalofa a ia kia ia kua lolelole, mo ia kua nofogati; to fakamoui e ia a lautolu kua nonofogati. To laveaki e ia a lautolu mai he favale mo e mahani kelea; ko e mena uho foki ha lautolu a tau toto kia ia.”—Salamo 72:12-14.

Kua fakaalofa nakai a koe ki a lautolu kua matematekelea? Liga pihia a koe. Ko e feofanaki e aga kua tuku e Iehova ia tautolu, ha ko e mena tufuga a tautolu ke he hana fakatai. (Kenese 1:26, 27) Maeke ia tautolu ke mauokafua mogoia, kua mamahi a Iehova ke he matematekelea he tagata. Ko Iesu, ko ia ni kua iloa tata lahi a Iehova, ne fakaako na fiafia lahi a Iehova ki a tautolu ti kua puke a ia ke he fakaalofa hofihofi noa.—Mataio 10:29, 31.

Kua fakakite he tufugatia na fiafia e Atua ke he tau tagata. Ne pehe a Iesu ko e Atua “kua fakahake ne ia hana la kia lautolu kua mahani kelea katoa mo lautolu kua mahani mitaki, kua fakato hifo foki e ia e uha kia lautolu kua tututonu katoa mo lautolu kua nakai tututonu.” (Mataio 5:45) Ke he tau tagata he maaga ko Luseta, ne pehe e aposetolo ko Paulo: “Kua nakai toka noa ai [he Atua] ke nakai fai mena ke talahau ai a ia, he hana totonu mai, mo e foaki mai e tau uha mai he lagi kia tautolu, mo e tau tau ke tupu ai e tau fua, he fakamakona foki e ia e tau loto ha tautolu ke he tau mena kai mo e fiafia.”—Gahua 14:17.

I Fe e Fakalagoaga?

Kia mailoga na pehe foki a Paulo ke he tau tagata i Luseta: “Ne toka noa [he Atua] e tau motu kehe oti kana ke he tau hau kua mole atu, ke eke e lautolu ha lautolu a tau mahani.” Ti, ko e tau motu—po ke tau tagata hoko lautolu—kua fakalago lahi ki ai ma e tau mamahi loga ne moua e lautolu. Ko e tukupau kua nakai fakalago ke he Atua.—Gahua 14:16.

Ko e ha ne fakaata e Iehova e tau mena kelea ke tutupu? To fai mena nakai ka taute e ia ki ai? Ko e tali ke he tau huhu nei kua moua ni he Kupu he Atua. Ko e kakano ni ha ko e tali kua lauia lahi e taha peresona fakaagaga mo e matakupu ne fakatu e ia he fakatokaaga fakaagaga ne nakai kitia.

[Tau Fakatino he lau 4]

Ha ha he tau tagata e feofanaki. Ti mamahi nakai e Atua ke he matematekelea he tagata?

 [Fakatino Credit Lines he lau 2]

COVER: Tank: UN PHOTO 158181/J. Isaac; earthquake: San Hong R-C Picture Company

[Fakatino Credit Line he lau 3]

Upper left, Croatia: UN PHOTO 159208/S. Whitehouse; starving child: UN PHOTO 146150 BY O. MONSEN