Mafanatia ke he Iloilo Tonu he Atua

MA E falu tagata, kua fakatupu he mena ne talahau he Tohi Tapu hagaao ke he fakaalofa mo e fakaalofa noa he Atua e tau huhu fakatupetupe. Ne huhu a lautolu: Ka manako e Atua ke utakehe e kelea, ti iloa e puhala ke taute aki, mo e malolo ke taute pihia, ati ko e ha ne matutaki e tupu lahi he kelea? Ko e lekua ma lautolu ko e tututaki he tau mena tolu nei: (1) kua mua atu e malolo he Atua; (2) fakaalofa mo e mitaki e Atua; mo e (3) matutaki ni e tau mena matematekelea ke tutupu. Ne talahau e lautolu ha ko e mena ke toluaki kua molioli, ti taha mai he kau ua ne toe kua nakai moli. Kia lautolu, kua nakai maeke he Atua ke taofi e kelea po ke nakai manamanatu a ia ki ai.

Fai aho he mole atu e malolo he World Trade Center i New York, ne pehe e takitaki fakalotu mahuiga he Tau Fahi Kaufakalataha: “Nukua huhu . . . laga teau mai ki a au ko e ha kua fakaata he Atua e malaia mo e matematekelea. Maeke ia au ke talahau kua nakai maeke moli ia au ke iloa e tali katoa, ti nakai maama foki e au.”

He tali atu ke he talahauaga nei, ko e porofesa he fioloti ne tohi kua nava a ia ha “ko e fioloti mitaki” ne fakamatala he tau takitaki fakalotu nei. Ne talia foki a ia ke he onoonoaga he pulotu ne tohi: “Ko e nakai maama ke he matematekelea ko e vala he nakai maama e Atua.” Ka e nakai maeke moli kia ke maama e kakano ne fakaata he Atua e kelea?

Ko e Punaaga he Kelea

He liga kehe mai he mena kua talahau he tau takitaki fakalotu, ne nakai fakakite he Tohi Tapu e fakaataaga he Atua ke he kelea ko e mena nakai maama. Ko e matapatu manatu ke maama e matakupu he kelea ke mailoga mena nakai tufuga e Iehova e lalolagi kelea. Ne tufuga e ia e hoa mau fakamua ke he mitaki katoatoa, he nakai fai agahala. Ne kitekite a Iehova ke he tau mena oti ne tufugatia e ia ti kitia ai kua “mitaki lahi.” (Kenese 1:26, 31) Ko e finagalo hana ma Atamu mo Eva ke fakalaulahi atu e Parataiso i Etena ke he lalolagi oti ti fakapuke aki e tau tagata fiafia i lalo hifo he puipuiaga he pule fakaalofa hana.—Isaia 45:18.

Kamata e kelea mai he mena moui fakaagaga, ne tua fakamoli ke he Atua he magaaho fakamua, ne feaki e manako ke tapuaki ki ai. (Iakopo 1:14, 15) Ne kitia maali e totokoaga hana he lalolagi ke he magaaho ne fakaohooho e ia e hoa mau fakamua ke fakalataha mo ia he hana totokoaga ke he Atua. He nakai omaoma ke he fakaakoaga maaliali he Atua ke nakai kai po ke aamo e fua akau he iloilo ke he mitaki mo e kelea, ne uta ai e Atamu mo Eva mo e kai ai. (Kenese 3:1-6) He taute e laua, ne nakai ni liuliu a laua ke he Atua ka e fakakite foki kua manako a laua ke tu kehe mai ia ia.

Ne Fakatupu e Matakupu he Mahani

Ko e totokoaga nei i Etena ne fakatupu e matakupu he mahani, ko e paleko ke he aogaaga he lalolagi mo e lagi katoatoa. Ne fakauaua e tau tagata totoko ko e mena fakagahuahua  fakamitaki nakai e Iehova hana tuaga pule ki luga he tau mena momoui. Ha ha kia he Tufuga e tonuhia ke moua e omaoma katoatoa mai he tau tagata? Po ke liga laukauka ni e tau tagata he tutu kehe a lautolu?

Ne taute e Iehova e paleko nei ke he hana tuaga pule ke he puhala ne fakatata aki hana lagotatai mitaki katoatoa he fakaalofa, fakafili tonu, pulotu, mo e malolo. Nukua lata ia ia ke fakaaoga hana malolo ke moumou fakamafiti aki e totokoaga. Liga fakafili tonu e mena ia, ha kua ha ha ia ia e tonuhia ke taute pihia. Ka ko e taute pihia ka nakai tali e tau matakupu ne fita he fakatu. He taha fahi, maeke he Atua ke tiaki noa e agahala. Ko e puhala pihia kua liga ko e fifiliaga mitaki ke he falu he vaha nei. Ka e, kaumahala foki e mena nei ke tali e talahauaga ha Satani kane mitaki ni e tau tagata ke pule na lautolu ki a lautolu. Lafi ki ai, nakai kia fakamalolo foki he puhala ia e falu ke liliu kehe mai he tau puhala ha Iehova? To fua mai e tau matematekelea loga.

He hana pulotu, ne fakaata e Iehova ke fai magaaho e tau tagata ke tu tokotaha. Pete ni kua fakaata he mena nei e kelea ke matutaki fakaku, ati ha ha ai he tau tagata e magaaho ke fakakite kua maeke nakai ia lautolu ke kautu he pule ni a lautolu ki a lautolu he tu kehe mai he Atua, he mumui ni ke he tau puhala ha lautolu ke he mena kua hako mo e hepe. Ti ko e heigoa e fua? Kua fakakite fakapapahi mai he fakamauaga tala tuai he tagata e tau taulatau, nakai fakafili tonu, favale, mo e matematekelea. Ko e matapatu kaumahala he totokoaga ki a Iehova ka fakamafola tukulagi e tau matakupu ne fakatu i Etena.

Ato hoko atu ai, kua fakatata he Atua hana fakaalofa he foaki hana Tama, ko Iesu Keriso, ne foaki hana moui tagata mo poa lukutoto. Kua fakamalolo he mena nei e tau tagata omaoma ke ataina mai he malaia he agahala mo e mate ne fua mai he liuliu ha Atamu. Kua hafagi he lukutoto e puhala ke he moui tukulagi ma lautolu kua fakagahuahua e tua ia Iesu.—Ioane 3:16.

Ha ha ia tautolu e fakamafanaaga moli ha Iehova na ku e matematekelea he tagata. “Toe  tote, ti nakai ha i ai e tagata mahani kelea,” he tohi he salamo. “Ka manamanatu foki a koe ke he mena hana ne nofo ai, nakai ha i ai a ia. Ka ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.”—Salamo 37:10, 11.

Ko e Vaha Haohao Mitaki mo e Fiafia Lahi Anoiha

Nukua fakakite he fakamoliaga he tau perofetaaga he Tohi Tapu kua tata mai e magaaho ma e Atua ke fakaoti e gagao, mamahi, mo e mate. Mailoga e ata homo ue atu he tau mena ka hohoko mai i mua ne fakakite age ke he aposetolo ko Ioane he fakakiteaga. Ne tohi e ia: “Ne kitia foki e au e lagi fou mo e lalolagi fou; ha kua mole atu e lagi fakamua, mo e lalolagi fakamua, ti kua nakai tuai fai tahi. . . . To ha ia [he tau tagata] e Atua ni, . . . To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” He talahauaga kua peehi mai e falanakiaga moli he tau maveheaga nei, ne talahau ki a Ioane: “Tohi ā; ha ko e tau kupu nai kua moli mo e fakamoli ia.”—Fakakiteaga 21:1-5.

Ka e kua e tau piliona tagata lauia noa ne mamate tali mai he totokoaga i Etena? Ne mavehe mai e Iehova to liuaki mai e ia e tau tagata ke he moui nukua momohe ke he mate mogonei. Ne pehe e aposetolo ko Paulo: “Ha ha ia au e amaamanaki ke he Atua, . . . ke liu foki tutu mai a lautolu kua mamate, ko lautolu ne tututonu katoa mo lautolu ne hepehepe.” (Gahua 24:15) Ko lautolu nei ka moua e amaamanakiaga ke moui ke he lalolagi kua “nofo ai e tututonu.”—2 Peteru 3:13.

Tuga ni he fakaata he matua fakaalofa e tama hana ke mamahi he iihi ka iloa e ia to tamai e tau aogaaga tukulagi, ti fakaata e Iehova e tau tagata ke mamahi fakaku ke he kelea he lalolagi. Ka e, ko e tukumalagi he tau monuina kua fakatali mai ki a lautolu kua kumi ke taute e finagalo he Atua. Ne fakamaama e Paulo: “Nukua mahala e tau mena ne eke ke he mena popo vave, nakai loto a ia ki ai, ka e pihia ha ko ia ne mahala ai, ne fakamahala mo e amaamanaki, ha ko e mena to toka noa ai e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua.”—Roma 8:20, 21.

Ko e tala moli anei—nakai ko e vahega tala ne kitia e tautolu he televisoni po ke totou he nusipepa ka ko e tala mitaki. Ko e tala mitaki lahi he “Atua foki hana e tau fakamafanaaga oti,” ma tautolu.—2 Korinito 1:3.

[Tau Fakatino he lau 6]

Fakakite mai he vaha kua nakai maeke he tagata ke pule fakamitaki ki a lautolu ni he tu kehe mai he Atua

[Credit Lines]

Somalian family: UN PHOTO 159849/M. GRANT; atom bomb: USAF photo; concentration camp: U.S. National Archives photo