Uka Lahi He Ha ke Fakamolemole?

IA Iulai 2000, ko e California State Legislature he Tau Fahi Kaufakalataha ne talia e fakatufono kua fakatu ke nakai fakahala e tau tagata mai he fakalagoaga kaeke ke fakakite e lautolu e fakaalofa ke he taha kua pakia nukua putoia a lautolu i ai. Ko e ha he matafakatufono? Ne mailoga ai ka tupu e pakia po ke malona, ne fa tehatehaua e tau tagata ke fakamolemole he matakutaku neke iloa he fakafiliaga ko e talahau agahala. He taha fahi, ko lautolu ne logona hifo kua lata ke moua mafiti e lautolu e fakamolemole kua liga hogohogo manava, ti faliu e pakia tote ke he taufetoko makimaki.

Moli, nakai lata ke fakamolemole ma e pakia ne nakai ko e hepe hau. Ti ha ha i ai falu magaaho ke fakapulotu he fakaeneene ke he mena ka vagahau e koe. Kua pehe e tau kupu fakatai tuai: “Ko e loga e kupu ti nakai noa ai mo e holifono; ka ko ia kua taofi hana tau laugutu ko e tagata iloilo a ia.” (Tau Fakatai 10:19; 27:12) Na kua maeke agaia ia koe ke fakalilifu mo e lagomatai.

Ka e nakai kia moli, kua tokologa e tau tagata ne nakai fakamolemole, pete ni he nakai lauia e tau hopo fakafili? Liga  tagi e hoana i kaina, ‘Nakai fakamolemole e tane haku ke he ha mena taha.’ Ne gugu e takitaki he gahuaaga, ‘Kua nakai talahau he kau gahua haku e tau hehe ha lautolu, ti uka lahi a lautolu ke talahau kua hehe a lautolu.’ Liga hokotaki he faiaoga he aoga, ‘Kua nakai fakamahani e tau tama ke pehe fakamolemole la.’

Ko e taha kakano ne tehatehaua e tagata ke fakamolemole he liga matakutaku neke tiaki. He tupetupe he manatu neke fakaheu, liga nakai fakakite e ia e manatu moli hana. Moli, ko e tagata kua hukia ka liga fakaheu katoatoa e tagata ne taute hehe, ati uka lahi e fakafeiloaga.

Ko e nakai fai manamanatuaga ma e tau logonaaga he falu tagata liga ko e taha kakano foki ne tehatehaua e falu ke fakamolemole. Liga fakakakano e lautolu, ‘Nakai vevete he fakamolemole e hepe kua fita he taute e au.’ Ha ha ai foki a lautolu kua tehatehaua ke talahau e fakamolemole ha lautolu ha ko e tau fua ka moua. Kua manamanatu a lautolu, ‘To fai fakalagoaga kia a au mo e poaki mai ke totogi atu?’ Pete ia, ko e alaia lahi mahaki ke talahau e hepe ko e fakaikaluga. Ko e tagata kua fakaikaluga lahi ke talahau “Fakamolemole atu” kua liga ke fakahiku, ‘Nakai manako au ke utakehe e lilifu he talahau e hepe haku. To fakalolelole he mena ia e tuaga haku.’

Ko e heigoa ni e kakano, tokologa ne uka ke talahau e tau kupu fakamolemole. Ka kua lata moli kia ke fakamolemole? Ko e heigoa e tau aoga he fakamolemole?

[Fakatino he lau 3]

“Kua nakai fakamahani e tau tama ke pehe fakamolemole la”

[Fakatino he lau 3]

“Kua nakai talahau he kau gahua haku e tau hehe ha lautolu”

[Fakatino he lau 3]

“Nakai fakamolemole e tane haku”