Foaki Tumau Ato Nakai Fahia

“MAEKE ia koe ke ui au ko e kaiole; nakai tupetupe au. Ko e kaiole au ke lata mo Iesu.” Ko e tau kupu fakaneinei ia he fekafekau Porotesano ne omoomoi e fetokoaki kua putoia e tuaga fakatupe he lotu. Kua liga tumau ni e tau lotu fakatokatoka ha ko e lahi e lagomataiaga fakatupe. Kua lata ke tuku tupe ke totogi aki e gahua, kua lata ke talaga mo e leveki e tau faituga, kua lata ke fakatupe e tau fakailoaaga fakamatala. Maeke fefe ke moua e tupe kua lata?

Ma e tau lotu loga, ko e tali ko e mena ne hogofulu aki. * “Ko e mena ne hogofulu aki ko e puhala ne fakatupe he Atua Hana Kautu ke he lalolagi,” he totoku he tagata fakamatala ko Norman Robertson. “Ko e fakatokatokaaga Hana he tau puhala ekonomiki nukua fakamalolo e Evagelia ke fakamatala.” He nakai fakauaua ke fakamanatu hana tau tutaki ke he ha lautolu a matagahua ke foaki, kua talahau fakamahao e ia: ‘Nakai age e koe mena ne hogofulu aki ha kua maeke ia koe ke foaki. Ko e mahani omaoma. Ka nakai foaki e mena ne hogofulu aki ko e moumou moli haia he matafakatufono he Atua. Ko e fakaaoga kaiha.’—Tithing—God’s Financial Plan.

Liga to talitonu a koe kua lata e foaki mo vala he tapuakiaga Kerisiano. Pete ia, kua eke kia e ole tupe tumau ki a koe mo fakatauhele, liga fakahogohogo manava foki? Ko e tagata fioloti Parasili ko Inácio Strieder ne ekefakakelea e tau lotu he kumi ke he mena ne hogofulu aki ke “fakamafola e tau lekua fakatokatokaaga ha lautolu” mo e fakamailoga e tau gahua pihia kua “nakai hako, hehe, mo e kehe mai he fakaakoaga fakalotu.” Ko e fua, ne mailoga e ia, ko e “tau tagata nakai fai gahua, tau takape, tau tagata mativa, mo lautolu ne manamanatu goagoa kua fakahiku aki na tiaki he Atua a lautolu mo e ko e mena ia kua omoi a lautolu ke foaki fakalahi ke he ‘akoako’ ka e hoge ha lautolu a tau magafaoa.”

Liga manamanatu a koe: ‘Kua muitua moli kia e tau lotu ke he faka-Tohiaga Tapu he fakamalolo e mena ke hogofuluaki? Po ke falu kia he tau lotu kua fakatupu e matakutaku ke he Atua ke fofo e tau mamoe? Moli, kua amanaki kia e Atua ke foaki tumau ato nakai fahia, he talahau he falu?’

[Matahui Tala]