Kia Tumau ke Fekafekau mo e Loto Fakalataha
Kia Tumau ke Fekafekau mo e Loto Fakalataha
“To liuaki atu e au ke he tau motu e vagahau mitaki, kia ui atu a lautolu oti ke he higoa a Iehova, mo e fekafekau a lautolu kia ia mo e loto fakalataha.”—SEFANAIA 3:9.
1. Ko e heigoa kua tupu he fakamoliaga ia Sefanaia 3:9?
KUA kavi ke 6,000 e tau vagahau hane vagahau he lalolagi katoa he mogonei. Kehe mai ia lautolu, kua ha ha ai e tau puhala kehekehe, po ke tau puhala fakamotu he tau vagahau. Pete he nakai tatai e tau vagahau he tau tagata ke tuga e vagahau Arapi mo e Vieteneme, ka e, kua taute ni he Atua e taha mena kehe lahi moli. Kua taute ai e ia ke maeke he tau tagata he tau motu oti ke ako mo e vagahau e vagahau mitaki hokoia. Kua tupu e mena nei ha ko e fakamoliaga he maveheaga ne foaki he puhala he perofeta ko Sefanaia: “To liuaki atu e au [ko Iehova ko e Atua] ke he tau motu e vagahau mitaki [kakano moli, “e laugutu mea”], kia ui atu a lautolu oti ke he higoa a Iehova, mo e fekafekau a lautolu kia ia mo e loto fakalataha.”—Sefanaia 3:9.
2. Ko e heigoa e “vagahau mitaki,” mo e ko e heigoa ati maeke ai?
2 Ko e “vagahau mitaki” ko e kupu moli he Atua ne moua i loto he hana Kupu, ko e Tohi Tapu. Ti mua atu ke he kupu moli hagaao ke he Kautu he Atua, ka fakatapu e higoa a Iehova, fakatokoluga e pule katoatoa hana, mo e tamai e tau monuina ke he tau tagata. (Mataio 6:9, 10) Ko e vagahau mea fakaagaga hokoia he lalolagi, ko e vagahau mitaki kua vagahau he tau tagata he tau motu mo e tau lanu oti. Kua taute a lautolu ke fekafekau ki a Iehova “mo e loto fakalataha.” Ati fekafekau fakalataha ai a lautolu ki a ia, po ke “fetaliaaki.”—The New English Bible.
Nakai Lata ke Fakamailoga Tagata
3. Ko e heigoa ne taute a tautolu ke fekafekau fakalataha ki a Iehova?
3 Ko e tau Kerisiano, kua oue tulou a tautolu ma e kaufakalatahaaga he tau vagahau kehekehe ne ha ha ia tautolu. Pete ni kua fakamatala e tautolu e tala mitaki he Kautu ke he tau vagahau loga he tagata, nukua fekafekau fakalataha a tautolu ke he Atua. (Salamo 133:1) Kua maeke e mena nei, ke he ha mena ni ne nonofo ai a tautolu he lalolagi, ha kua vagahau e tautolu e vagahau mitaki hokoia ke he fakahekeaga a Iehova.
4. Ko e ha kua nakai fakamailoga tagata e tau tagata he Atua?
4 Kua lata ke nakai fakamailoga tagata e tau tagata he Atua. Ne fakamaaliali he aposetolo ko Peteru e mena ia he magaaho ne fakamatala a ia he kaina he takitaki he tokoteau he Motu Kehe, ko Konelio, he 36 V.N. ti kua omoi ke talahau: “Ko e moli, kua iloa e au nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.” (Gahua 10:34, 35) Ha kua moli e mena ia, ko e fakapotopotoaga Kerisiano kua nakai lata mo matakavi ma e fakamailoga tagata, taute e tau matakau, po ke fiafia tagata ai.
5. Ko e hepe he ha ke lafi atu ke he tau matakau i loto he fakapotopotoaga?
5 Hagaao ke he aahi mai hana ke he Fale he Kautu, ne talahau he taha tama fakaako he koliti: “Kua fa mahani, ke futia he tau lotu e tau tagata he tau lanu pauaki po ke matakau he motu. . . . Ko e Tau Fakamoli a Iehova kua nonofo auloa oti mo e nakai ke he tau matakau pauaki.” Moha ia, ne taute he falu tagata he fakapotopotoaga i Korinito i tuai e tau matakau. Ti he fakatupu e veveheaga, nukua totoko a lautolu ke he gahua he agaga tapu he Atua, ne fakatolomaki e kaufakalataha mo e mafola. (Kalatia 5:22) Kaeke ke feaki e tautolu e tau matakau i loto he fakapotopotoaga, kua totoko tuai a tautolu ke he tau takitakiaga he agaga. Ko e mena ia, kia mauloto e tautolu e tau kupu he aposetolo ko Paulo ke he tau Korinito: “Ko e tau matakainaga na e, kua ole atu au kia mutolu ke he higoa he Iki ha tautolu ko Iesu Keriso, kia taha ha mutolu a tau kupu oti kana, neke tupu ai e tau veveheaga kia mutolu; ka kia fakalataha a mutolu ke he loto taha mo e manatu taha.” (1 Korinito 1:10) Ne peehi foki e Paulo e kaufakalataha i loto he tohi hana ke he tau Efeso.—Efeso 4:1-6, 16.
6, 7. Ko e heigoa e fakatonuaga ne foaki e Iakopo hagaao ke he fiafia tagata, mo e fakagahuahua fefe e tau kupu hana?
6 Kua poaki tumau ke he tau Kerisiano ke nakai fakamailoga tagata. (Roma 2:11) Ha kua fakakite he falu he fakapotopotoaga he senetenari fakamua e fiafia tagata ki a lautolu takitokotaha ne mautu, ne tohia ai he tutaki ko Iakopo: “Haku a tau matakainaga na e, aua neke taofi e kupu ke he tua ke he Iki lilifu ha tautolu ko Iesu Keriso, mo e fakamailoga tagata. Ha ko e mena ka hu mai e tagata ke he fakapotopotoaga ha mutolu, mo e tau mama auro ha he tau mata lima, mo e tapulu uho; ti hu mai foki e tagata nofogati mo e tapulu kelea, ti hagao atu ai a mutolu kia ia kua tapulu he tapulu uho, mo e pehe atu kia ia, Kia nofo a koe hinei ke he mena mitaki; ka e pehe atu ke he tagata nofogati, Kia tu a koe i kunā, po ke nofo a koe hinei ki lalo he fakatuagahui haku; kua nakai kia fakamailoga e mutolu kia mutolu, mo e eke a mutolu mo tau fakafili kua kelea e tau manatu?”—Iakopo 2:1-4.
7 Kaeke o mai e tau tagata mautu nakai talitonu mo e tau mama auro mo e tau tapulu uho ke he fakapotopotoaga Kerisiano ti pihia foki e tau tagata nonofogati nakai talitonu mo e tau tapulu kelea, kua fakafehagai mitaki atu ni ke he tau tagata mautu. Kua fakanonofo a lautolu ke he “mena mitaki,” ka e fekau e tau tagata nonofogati ke tutu po ke nonofo ki lalo he tuaga hui he taha tagata. Ka kua nakai fakamailoga tagata e Atua he foaki e poa lukutoto ha Iesu ma e tau tagata mautu mo e tau tagata nonofogati foki. (Iopu 34:19; 2 Korinito 5:14) Ti kaeke ke fakafiafia e tautolu a Iehova mo e fekafekau ki a ia mo e loto fakalataha, kua nakai lata ia tautolu ke fakakite e fiafia tagata po ke ‘nava ke he tau tagata ke moua ai e tau mena.’—Iuta 4, 16.
Fakatumau ke Nakai Loma
8. Ko e heigoa ne tupu he loma e tau Isaraela?
8 Ke taofi mau e kaufakalataha ha tautolu mo e fakatumau ke moua e fiafia faka-Atua, kua lata ia tautolu ke omaoma e fakatonuaga ha Paulo: “Kia eke e mutolu e tau mena oti kana mo e nakai loma.” (Filipi 2:14, 15) Ko e tau Isaraela nakai tua ne fakatokanoa mai he liliaga he tau Aikupito ne loma ki a Mose mo Arona ti pihia foki ki a Iehova ko e Atua. Ha ko e mena nei, ko e tau tagata tane oti ne 20 e tau tau he momoui mo e molea hake ne nakai huhu atu ke he Motu he Maveheaga ka e mamate he magahala he 40 tau ne o hui e tau Isaraela he tutakale, ka ko Iosua mo Kalepa mo e tau Levi tua fakamoli ni ne huhu atu. (Numera 14:2, 3, 26-30; 1 Korinito 10:10) Kua lahi ha ia e totogi ha lautolu ha ko e loma!
9. Ko e heigoa ne tupu ki a Miriama he loma a ia?
9 Kua fakakite he mena nei e mena ka tupu ke he motu katoa ka loma. Ka e kua a lautolu ne loma takitokotaha? Ne loma e mahakitaga ha Mose, ko Miriama, fakalataha mo e tugaane hana ko Arona: “Ko Mose tokotaha kia kua vagahau mai ai e Iehova? ka e nakai kia vagahau mai foki ia maua nai?” Ne lafi atu e fakamauaga: “Ti logona ai e Iehova.” (Numera 12:1, 2) Ko e fua? Ko Miriama, ko ia moli ne takitaki e gugu nei, nukua fakama he Atua. Fefe? He kua fakamatematekelea aki e lepela ti fekau ke nofo i tua he heagaapi ke fitu e aho ato mea a ia.—Numera 12:9-15.
10, 11. Ko e loma nakai taofi ka fua mai e heigoa? Fakamaama.
10 Ko e loma, nakai ni ko e gugu noa hagaao ke he taha mena hehe ne taute. Ne fakakite he tau tagata loma tumau, kua peehi fakalahi e lautolu e aoga ke he tau logonaaga po ke tuaga ha lautolu ni, he fakamatalahi ne lautolu a lautolu nakai ke he Atua. Ka nakai taofi, to fakatupu he mena nei e mavehevehe ke he tau matakainaga fakaagaga mo e fakatauhele e tau laliaga ha lautolu ke fekafekau ki a Iehova mo e loto fakalataha. Kua pihia e mena nei ha ko e tau tagata loma kua gugu tumau a lautolu, he amaamanaki ke fakaalofa falu ki a lautolu.
11 Ke tuga anei, liga tuhituhi he taha tagata e puhala ne taute he taha motua e tau vala hana i loto he fakapotopotoaga po ke puhala ne fehagai ke he hana tau matagahua. Kaeke fakateliga a tautolu ke he tagata gugu, liga to kamata foki a tautolu ke manamanatu ni tuga a ia. Fakamua ato to e tega nakai makona he manamanatuaga ha tautolu, kua liga nakai faguna e tau gahua he motua ki a tautolu, ka kua pihia tuai he mogonei. Fakahiku, kua nakai taute he motua ha mena hako ke he kitiaaga ha tautolu, ti liga kamata foki a tautolu ke gugu hagaao ki a ia. Ko e faga mahani nei kua nakai lata i loto he fakapotopotoaga he tau tagata ha Iehova.
12. Lauia fefe e fakafetuiaga ha tautolu mo e Atua ha ko e loma?
12 Ke loma hagaao ke he tau tagata tane ne ha ha ai e matagahua ke leveki e fuifui mamoe he Atua ka takitaki atu ke he tauamuamu. Ko e loma pihia po ke kaialu pikopiko ki a lautolu ka fakahagahaga kelea e fakafetuiaga ha tautolu mo Iehova. (Esoto 22:28) Ko e tau tagata tauamuamu ne nakai tokihala to nakai moua e Kautu he Atua. (1 Korinito 5:11; 6:10) Ne tohia e tutaki ko Iuta hagaao ke he tau tagata loma ne ‘fakalialia ke he tau iki mo e vagahau kelea kia lautolu ne lilifu,’ po ke tau tagata tane kotofa i loto he fakapotopotoaga. (Iuta 8) Ko lautolu ia ne loma kua nakai ha ha ai e fiafia faka-Atua, ti kua pulotu ia tautolu ke fakaheu e tau puhala kelea ha lautolu.
13. Ko e ha kua nakai hepe oti e tau gugu?
13 Ka kua nakai kelea e tau gugu oti ke he Atua. Ne nakai tuli e teliga hana ke he “tagi” he gugu hagaao ki a Sotoma mo Komora ka e moumou e tau maga kelea ia. (Kenese 18:20, 21; 19:24, 25) I Ierusalema, nakai leva he mole e Penetekoso he 33 V.N., “ti tupu ai e loma he tau tagata Helenisi ke he tau tagata Heperu, ha kua nimo ha lautolu a tau fifine takape ke he tufatufaaga he tau mena ke he tau aho.” Ko e mena ne tupu, ne fakahako he “tokohogofulu ma ua” e tuaga, he kotofa “tokofitu e tagata talahaua” “ke he feua nai” ke tufatufa e tau kai. (Gahua 6:1-6) Kua nakai lata he tau motua he vaha fou nei ke ‘ponoti e tau teliga ha lautolu’ ke he tau gugu kua tonu. (Tau Fakatai 21:13) Mo e he nakai tuhituhi ke he tau katofia tapuaki, kua lata e tau motua ke fakamalolo mo e atihake.—1 Korinito 8:1.
14. Ke fakatumau ke nakai loma, ko e heigoa e fua ne kua lata lahi ke moua?
14 Kua lata ia tautolu oti ke fakatumau ke nakai loma, ha ko e agaga gugu kua fakahagahaga kelea fakaagaga. Ko e aga pihia ka faguna aki e kaufakalataha ha tautolu. Ka e, kia toka tumau e tautolu e agaga tapu ke fakatupu e fakaalofa ia tautolu. (Kalatia 5:22) He omaoma ke he ‘fakatufono kua mua ue atu he fakaalofa’ ka lagomatai a tautolu ke tumau ke fekafekau ki a Iehova mo e loto fakalataha.—Iakopo 2:8; 1 Korinito 13:4-8; 1 Peteru 4:8.
Puipui Mai he Pikopiko
15. Maeke fefe ia koe ke kitia e kehe he vahaloto he uta tala mo e pikopiko?
15 Ha kua maeke e loma ke takitaki atu ke he uta tala, kua lata ia tautolu ke fakaeneene hagaao ke he tau mena ka talahau e tautolu. Ko e uta tala, ko e tau tala teao hagaao ke he tau tagata mo e tau mena fakatagata ha lautolu. Ko e pikopiko, mogoia, ko e hokotaki fakavai ne pauaki ke moumou aki e mahani he taha tagata. Ko e tala pihia kua vihiatia mo e nakai mahani Atua. Ati tala age e Atua ke he tau Isaraela: “Aua neke faifano a koe ke he hau a motu mo e feutaaki tala.”—Levitika 19:16.
16. Ko e heigoa ne talahau e Paulo hagaao ke he falu tagata uta tala, mo e lata fefe a tautolu ke lauia he fakatonuaga hana?
16 Ha kua liga takitaki atu e tau tala teao ke he pikopiko, ne akonaki ai e Paulo e falu tagata uta tala. He mole e totoku e tau takape ne kua lata ma e lagomatai he fakapotopotoaga, ne hagaaki a ia ke he tau takape ne mahani “ke he teva, kua neva fano ke he taha fale mo e taha fale; ti nakai kuenaia foki he teva a lautolu, ka e fa fakatutala a lautolu, to hanihani, to vagavagahau ke he tau mena nakai lata.” (1 Timoteo 5:11-15) Kaeke ke mailoga he fifine Kerisiano e lolelole hana ma e tau tala ka takitaki atu ke he pikopiko, kua lata ia ia ke omaoma ke he fakatonuaga ha Paulo ke ‘mahani fulumokoi, nakai tauamuamu.’ (1 Timoteo 3:11) Moli, kua lata foki e tau tagata tane Kerisiano ke puipui mai he uta tala kelea.—Tau Fakatai 10:19.
Aua Neke Fakafili!
17, 18. (a) Ko e heigoa ne talahau e Iesu hagaao ke he fakafiliaga he tau matakainaga ha tautolu? (e) Maeke fefe ia tautolu ke fakagahuahua e tau kupu ha Iesu hagaao ke he fakafili?
17 Pete ni kua nakai pikopiko a tautolu ke he taha, kua liga lata ia tautolu ke lali fakamoli ke kalo mai he fakafili tagata. Ne fakatikai e Iesu e agaga pihia he magaaho ne talahau e ia: “Aua neke fakafili atu e mutolu, neke fakafili a mutolu. Ha ko e fakafili ke fakafili atu ai e mutolu, to fakafili mai ai kia mutolu; ko e fafati foki ka fafati atu e mutolu, to fafati mai ai kia mutolu. Ko heigoa e mena kua kitekite ai e koe ka he mala akau ke he mata he hau a matakainaga, ka e nakai kitia e koe e akau fakalava ke he mata hau. Ke tala age foki fefe e koe ke he hau a matakainaga, Tuku mai a, ke kape kehe e au e mala akau he mata hau; kitiala, ha ha he mata hau foki e akau fakalava? Ko koe na ko e fakavai, ati tiaki a fakamua e koe e akau fakalava he mata hau, ati kitia mitaki ai e koe ke kape kehe e mala akau he mata he hau a matakainaga.”—Mataio 7:1-5.
18 Kua nakai lata ia tautolu ke ole ke kape kehe e “mala akau” tote mai he mata he matakainaga ha tautolu ke lagomatai aki a ia ka e nakai maeke ia tautolu ke taute e fakafiliaga mitaki ha kua fakatauhele he “akau fakalava” fakatai. Ko e moli, kaeke fakaaueina a tautolu ke he fakaalofa noa lahi he Atua, to nakai hagahaga a tautolu ke fakafili e tau matakainaga fakaagaga ha tautolu. Ka e maeke fefe ia tautolu ke maama a lautolu tuga ne taute he Matua ha tautolu he lagi? Ko e kakano tukua ia ne hataki e Iesu a tautolu ke ‘aua neke fakafili atu neke fakafili a tautolu’! Ko e kumikumi fakamoli hifo ke he ha tautolu ni a nakai mitaki katoatoa ka lata ke taofi mai a tautolu he taute e tau fakafiliaga ka kitia he Atua ke nakai tututonu.
Lolelole ka e Lilifu
19. Kua lata a tautolu ke mailoga fefe e tau katofia talitonu?
19 Kaeke kua fakamalolo a tautolu ke fekafekau mo e loto fakalataha ke he Atua mo e tau katofia talitonu, to nakai kalo noa mai a tautolu he fakafili e falu. To muamua a tautolu ke fakakite e lilifu ki a lautolu. (Roma 12:10) Ka e, to kumi e tautolu e mitaki ha lautolu, nakai ni ha tautolu, mo e taute fiafia e tau matagahua loto fakatokolalo ma lautolu. (Ioane 13:12-17; 1 Korinito 10:24) Maeke fefe ia tautolu ke taofi mau e agaga mitaki pihia? He mauloto kua uho e tau tagata talitonu oti ki a Iehova mo e kua manako lagomatai a tautolu ke he taha mo e taha, tuga ne falanaki e tau fahi takitaha he tino tagata ke he taha.—1 Korinito 12:14-27.
20, 21. Ko e heigoa e kakano he tau kupu ia 2 Timoteo 2:20, 21 ma tautolu?
20 Kua moli, ko e tau kapiniu kelekele lolelole e tau Kerisiano ne foaki e koloa uho lilifu he fekafekauaga ki ai. (2 Korinito 4:7) Kaeke ke taute e tautolu e gahua tapu nei ke he fakahekeaga ha Iehova, kua lata ia tautolu ke taofi mau e tuaga lilifu ki mua hana mo e hana Tama. Ko e fakatumau ke mahani mitaki mo e mea fakaagaga hokoia ka maeke ia tautolu ke taofi mau ke eke mo kapiniu lilifu ma e fakaaogaaga he Atua. Ke he mena nei, ne tohia e Paulo: “Ha ha he fale lahi nakai kuenaia e tau kapiniu auro mo e ario, ka e katoa foki mo e tau kapiniu lakau mo e kelekele, kua lilifu falu, ka e fakakelea falu. Hanai, kaeke ke fakamea e taha a ia ni mai he tau mena ia, ti eke ai a ia mo kapiniu lilifu, kua fakatapu, kua aoga foki mo e Iki, kua taute mo e tau gahua mitaki oti.”—2 Timoteo 2:20, 21.
21 Ko e tau tagata takitokotaha ne nakai fakatatai atu ke he tau fakatufono faka-Atua ko e ‘tau kapiniu nakai lilifu’ a lautolu. Ka e, he tutuli e puhala mahani Atua, to eke a tautolu mo ‘tau kapiniu lilifu, kua fakatapu, po ke toka kehe, ma e fekafekauaga ha Iehova mo e taute ma e tau gahua mitaki oti.’ Ti kua lata ia tautolu ke huhu ki a tautolu ni: ‘Ko e “kapiniu lilifu” nakai au? Ha ha nakai ia au e lauia mitaki ke he tau katofia talitonu? Ko au kia ko e tagata he fakapotopotoaga ne gahua mo e loto fakalataha mo e tau katofia tapuaki?’
Fakatumau ke Fekafekau mo e Loto Fakalataha
22. Ko e heigoa ka liga fakatatai e fakapotopotoaga Kerisiano ki ai?
22 Ko e fakapotopotoaga Kerisiano kua tuga e fakaholoaga he magafaoa. Kua ha ha ai e agaga fakaalofa, felagomataiaki, mo e fiafia i loto he magafaoa ka tapuaki a lautolu oti ki a Iehova. Ko e magafaoa kua feaki hake he tau tagata tokologa mo e tau aga fakatagata kehekehe, ka kua ha ha he tau tagata oti e tuaga lilifu. Ko e tuaga kua tatai mo e he fakapotopotoaga. Pete kua kehekehe oti a tautolu—mo e nakai mitaki katoatoa—nukua futia he Atua a tautolu ki a ia he puhala he Keriso. (Ioane 6:44; 14:6) Kua fakaalofa a Iehova mo Iesu ki a tautolu, ti tuga e magafaoa kaufakalataha, kua lata moli a tautolu ke fakakite e fakaalofa ke he taha mo e taha.—1 Ioane 4:7-11.
23. Ko e heigoa kua lata ia tautolu ke manatu mo e fakamalolo ke taute?
23 Ko e fakapotopotoaga Kerisiano ne tuga e magafaoa ko e matakavi foki a ia ne kua lata ia tautolu ke amanaki ke moua e mahani fakamoli. Ne tohia he aposetolo ko Paulo: “Kua manako au kia liogi e tau tane ke he tau mena oti, kua nikiti ki luga e tau lima kua nakai hala, kia nakai ita foki ti nakai mahalohalo noa.” (1 Timoteo 2:8) Ati matutaki e Paulo e mahani fakamoli mo e liogi ma e toloaga “ke he tau mena oti” ka feleveia ai e tau Kerisiano. Ko e tau tagata tane mahani fakamoli hokoia kua lata ke hukui e fakapotopotoaga ke he liogi ma e toloaga. Moli, kua amanaki mai e Atua ki a tautolu oti ke mahani fakamoli ki a ia mo e ke he taha mo e taha. (Fakamatalaaga 12:13, 14) Kia fakamalolo ai a tautolu ke kaufakalataha ke gahua auloa, ke tuga e tau fahi he tino tagata. Kia fekafekau fakalataha foki a tautolu ko e vala he magafaoa he tau tagata tapuaki ha Iehova. Ke he tau mena oti, kia manatu e tautolu nukua manako lagomatai a tautolu ke he taha mo e taha mo e to olioli e fiafia faka-Atua mo e tau monuina kaeke tumau a tautolu ke fekafekau ki a Iehova mo e loto fakalataha.
To Tali Fefe e Koe?
• Ko e heigoa ne taute e tau tagata ha Iehova ke fekafekau ki a ia mo e loto fakalataha?
• Ko e ha ne kalo mai e tau Kerisiano he fakamailoga tagata?
• Ko e heigoa ka talahau e koe nukua hepe ai e loma?
• Ko e ha kua lata ia tautolu ke fakalilifu e tau katofia talitonu?
[Tau Huhu he Fakaakoaga]
[Fakatino he lau 14]
Iloa e Peteru “nakai fakamailoga tagata e Atua”
[Fakatino he lau 15]
Iloa nakai e koe ko e ha ne fakama he Atua a Miriama?
[Fakatino he lau 17]
Kua fekafekau fiafia mo e loto fakalataha e tau Kerisiano mahani fakamoli ki a Iehova