Ko e Magaaho Mua Atu e Mitaki ke Moui

HE TAU MAGAAHO ka fehagai mo e tau kamatamata, fa liu kia a koe manako ke he “tau aho fakamua ne mitaki”? Ati manamanatu la ke he tau kupu he patuiki pulotu ko Solomona: “Ua pehe a koe, Ko e heigoa e mena ne mua e mitaki he tau aho fakamua ke he tau aho nai? he nakai ko e iloilo ne huhu ai a koe ke he tau mena ia.”—Fakamatalaaga 7:10.

Ko e ha ne foaki e Solomona e tomatomaaga nei? Ha kua mailoga e ia, ko e mena aoga lahi ke iloa e tau mena ne tutupu he tau aho fakamua ke fahia ke he ha mena hagahagakelea he vaha nei. Ko lautolu ne manako lahi ke he “tau aho fakamua ne mitaki” kua liga nimo na ha ha i ai foki he tau aho ia e tau lekua mo e tau matematekelea ti nakai kua mafola moli e moui. Ko e falu mena he tau aho fakamua kua mitaki, ka e loga lahi foki e falu a mena ne nakai mitaki. Tuga ne mailoga e Solomona, nakai ko e mena iloilo a ia ke manamanatu teao ke he tau aho fakamua, ha kua nakai maeke ia tautolu ke vivilo ki tua e tula.

Ka ko e mena kelea kia a ia ke liu manako ke he tau mena he tau aho fakamua? E, kaeke taofi a tautolu he fakamahomo atu ki mua mo e mahalo ke he tau mena he vaha nai po ke taofi a tautolu he fakaaue ke he magaaho nei ne nonofo ai a tautolu mo e amaamanakiaga ne fakatoka ma tautolu.

Kua moli ni, ko e magaaho mua atu e mitaki anei ke moui ai, pete kua tolomaki ki mua e tau matematekelea he lalolagi. Ko e ha ai? Ha kua tata lahi a tautolu ke he fakamoliaga he finagalo he Atua hagaao ke he lalolagi ha tautolu mo e tau fakamonuinaaga i lalo he pule mafola he Kautu hana. Ko e mavehe he Tohi Tapu: “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” (Fakakiteaga 21:4) Ati, to homo atu e mitaki he tau magaaho ia, to nakai fai tagata ke liu manako ke he “tau aho fakamua ne mitaki.”