‘Atua, Ko e Ha ne Fakaata e Koe e Mena Nei?’
‘Atua, Ko e Ha ne Fakaata e Koe e Mena Nei?’
MANATU agaia e Ricardo he nofo mo e hoana hana, ko Maria, he poko fakatali he ekekafo. * Nakai ha ha tokoua ia laua e malolo ke totou e tau hokotaki he kumikumiaga fakaekekafo fakahiku ha Maria. Ati hafagi ai e Ricardo e faga tohi, ti fakateu mafiti hifo a laua ke he tau kupu fakaekekafo he hokotakiaga. Ne mailoga e laua e kupu “kanesa,” ti kamata tokoua ke tagi he iloa e laua e kakano katoa he kupu ia.
“Ne totonu lahi e ekekafo,” he talahau e Ricardo, “ka e mailoga moli e ia e hagahagakelea he tuaga ha kua fakatumau a ia ke talahau ki a maua nukua lata ia maua ke falanaki ke he Atua.”
Ato kamata e tuluiaga mao hila, ne mailoga he ekekafo ha Maria e nakai gahuahua mitaki he hui matau hana. Ne fakakite mai he tau kumikumiaga foki kua holofa e kanesa ke he uho ulu hana. He mole laia e fahi tapu taha he taute hana, ne nakai liu fakaaoga e mao hila. Ne kelea lahi mahaki a Maria ti mate ai ua e mahina he mole. “Fiafia au ha kua oti tuai hana matematekelea,” he fakamaama e Ricardo, “ka e galo lahi e au a ia ti fia manako au ke fakaoti foki haku a moui. Fa mahani, ke tagi atu au ke he Atua: ‘Ko e ha ne fakaata e koe e mena nei ke tupu?’”
Ka Tupu e Matematekelea, ti Laga Mai e Tau Huhu
Tuga a Ricardo, tokologa e tau tagata he lalolagi oti kua omoi ke fakafehagai ke he moliaga he matematekelea. Loga e magaaho, ne matematekelea a lautolu ko e tau tagata noa. Manamanatu ke he maanu he loto malipilipi ne fakatupu he tau fetokoaki kanavaakau tau ne fakamalaia aki e tau tagata. Po ke manamanatu ke he mamahi ne logona he tokologa he tau tagata noa ne fakapilo pulenoa, ekefakakelea tama, favale fakakaina, mo e falu mena kelea ne taute he tagata. Mai he fakamauaga tala tuai ne tuga e nakai fai taofiaga ke he nakai fakafili tonu mo e mamahi ne manako pauaki e tau tagata tane mo e tau fifine ke lauia e taha mo e taha. (Fakamatalaaga 4:1-3) Ti ha ha i ai e ita he tau tagata noa ke he tau mena tutupu pauaki po ke he tau tatalu fakatino, manamanatuaga, mo e logonaaga. Ko e mena haia ne huhu e tokologa, “Ko e ha ne fakaata he Atua e matematekelea pihia?”
Kia lautolu foki ne ha ha ai e tau taofiaga fakalotu, kua nakai mukamuka ke fehagai mo e matematekelea. Kua liga manamanatu foki a koe ke he kakano kua maeke he Atua malolo mo e fakaalofa ke fakaata e matematekelea he tagata. Ko e kumi e tali makona mo e moli ke he huhu fakauaua nei kua aoga ma e mafola he manamanatuaga ha tautolu mo e fakafetuiaga ha tautolu mo e Atua. Kua foaki he Tohi Tapu e tali. Fakamolemole manamanatu ke he mena ne talahau i ai he fakakite mai he vala tala ne mui mai.
[Matahui Tala]
^ para. 2 Hiki tuai e tau higoa.
[Tau Fakatino he lau 3]
Kua fakatumau e ekekafo ke talahau ki a maua kua lata ia maua ke falanaki ke he Atua