“Kia Mataala A”!
“Kia Mataala A”!
“Ko e mena kua tala atu e au kia mutolu, kua tala atu ai e au ke he tau tagata oti, Kia mataala a.”—MAREKO 13:37.
1, 2. (a) Ko e heigoa e fakaakoaga ne ako he taha tagata hagaao ke he puipuiaga he hana tau koloa? (e) Ke he fakataiaga ha Iesu hagaao ke he tagata kaiha, ko e heigoa kua ako e tautolu hagaao ke he nonofo mataala?
KUA toka e Juan e tau koloa uho hana i kaina. Ne fakaputu e ia i lalo he mohega hana—he hana manatu ko e matakavi haohao mitaki lahi he kaina. Pete ia, he taha po, hane momohe a ia mo e hoana hana, ne hu e tagata kaiha ke he poko mohe. Maaliali ai, ne iloa tonu he tagata kaiha e mena ke kumi ki ai. Ne uta fakatekiteki e ia e tau koloa uho oti mai he lalo mohega ti pihia mo e tupe ha Juan ne toka he toloa he laulau ne tata ke he mohega. He pogipogi hake, ne moua e Juan e tagata kaiha. To manatu tumau e ia e fakaakoaga mamahi lahi ne moua e ia: Nakai maeke he tagata mohe ke leveki hana tau koloa.
2 Ti ko e mena taha ia ni ke he tuaga fakaagaga. Nakai maeke ia tautolu ke puipui e amaamanakiaga ha tautolu mo e tua ha tautolu ka momohe a tautolu. Ti, ko e tomatomaaga ha Paulo: “Aua neke momohe a tautolu tuga ne falu, ka kia mataala a tautolu mo e nonofo fakalatalata.” (1 Tesalonia 5:6) Ke fakakite e aoga he nonofo mataala, ne fakaaoga e Iesu e fakataiaga he tagata kaiha. Ne fakamaama e ia e tau mena tutupu ka takitaki atu ke he hauaga hana ko e Fakafili, ati hataki e ia: “Hanai, kia mataala a mutolu; ha kua nakai iloa e mutolu po ke magaaho fe ke hau ai e Iki ha mutolu. Kia iloa e mutolu e mena nai, ane iloa he patu he fale po ke magapo fe ke hau ai e kaiha, po kua leveki ne ia, ka e nakai toka e ia hana fale kia keli ki ai. Ko e mena ia, kia nonofo tauteute ai a mutolu; ha ko e magaaho nakai manatu ai e mutolu, ke hau ai e Tama he Tagata.” (Mataio 24:42-44) Kua nakai fakailoa tuai he tagata kaiha e magaaho ka hau a ia. Kua amanaki a ia ke hau ka nakai fai tagata kua tatali ki a ia. Tatai ai, ne talahau e Iesu, ko e fakaotiaga he fakatokaaga nei ka hau he ‘magaaho nakai manatu ai e tautolu.’
‘Kia Mataala, Kia Tumau ke he Tua’
3. Fakakite fefe e Iesu e aoga he nonofo mataala, he fakaaoga e fakataiaga he tau fekafekau ne fakatali ke he liu mai he iki ha lautolu mai he mauhoana?
3 He tau kupu ne fakamau he Evagelia ha Luka, ne fakatatai e Iesu e tau Kerisiano ke he tau fekafekau ne leo ke he iki ha lautolu ke liu mai he mauhoana. Kua lata ia lautolu ke mataala tumau ti ka hau a ia ko lautolu hane aala, ke fakafeleveia ki a ia. Ke he puhala tatai, ne pehe a Iesu: “Ko e magaaho nakai manatu ai e mutolu, ke hau ai e Tama he tagata.” (Luka 12:40) Ko e falu ne fekafekau ki a Iehova ke he loga he tau tau kua liga galo e manamanatuaga fakamafiti ha lautolu hagaao ke he tau magaaho kua nonofo ai a tautolu. Kua maeke foki ia lautolu ke hokotia ke he manatu na mamao ligo agaia e fakaotiaga. Ka e maeke he manamanatuaga pihia ke takitaki a tautolu ke fuluhi kehe mai a tautolu he tau mena fakaagaga mo e haga atu ke he tau foliaga fakatino, ko e tau fakalavelave kua maeke ke fakaniniko fakaagaga a tautolu.—Luka 8:14; 21:34, 35.
4. Ko e heigoa e fakamaloloaga ka omoomoi a tautolu ke mataala, ti fakakite fefe e Iesu e mena nei?
4 Moua foki e tautolu e taha fakaakoaga mai he fakataiaga ha Iesu. Pete ni he nakai iloa he tau fekafekau e magaaho ka hoko mai e iki ha lautolu, ka e iloa e lautolu e po. Liga kua uka lahi ke ala he po katoa ia kaeke ke manatu a lautolu to liga hau e iki ha lautolu ke he falu po kehe. Ka e nakai, ne iloa e lautolu e po ka hau a ia, mo e mena ia kua age ki a lautolu e manatu malolo ke nonofo mataala ai. Ke he puhala pihia foki, ne fakakite maali he tau perofetaaga he Tohi Tapu kua nonofo a tautolu he vaha he fakaotiaga; ka e nakai talahau ki a tautolu e aho po ke magaaho ka fakaoti ai. (Mataio 24:36) Ko e taofiaga ha tautolu hane hoko mai e fakaotiaga kua lagomatai a tautolu ke nonofo mataala, ka e ka omoomoi a tautolu kua tata moli mai e aho ha Iehova, to ha ha ia tautolu e manatu malolo lahi ke mataala.—Sefanaia 1:14.
5. Maeke fefe a tautolu ke tali ke he tomatomaaga ha Paulo ke “mataala”?
5 Ko Paulo, ne tohi ke he tau Korinito, ne fakamafana: ‘Kia mataala, kia tumau ke he tua.’ (1 Korinito 16:13) E, ko e nonofo mataala kua matutaki ke he ha tautolu a mauokafua ke he tua faka-Kerisiano. Nonofo mataala fefe a tautolu? He moua e iloilo hokulo he Kupu he Atua. (2 Timoteo 3:14, 15) Ko e tau aga fakaako fakatagata mitaki mo e o tumau ke he feleveiaaga a tautolu ke fakamalolo e tua ha tautolu, mo e tokaloto fakatata e aho ha Iehova ko e vala kua aoga ke he tua ha tautolu. Ti ko e liu fakamanatu tumau ha tautolu ke he fakamoliaga faka-Tohiaga Tapu kua nonofo tata tuai a tautolu ke he fakaotiaga he fakatokaaga nei ka lagomatai a tautolu ke nakai galo e tau kupu aoga moli hagaao ke he hoko maiaga he fakaotiaga. * Nukua mitaki foki ke mailoga e tau mena tutupu kua kitia ke he lalolagi nukua fakamoli aki e perofetaaga he Tohi Tapu. Taha e matakainaga i Sihamani ne tohi: “He tau magaaho oti ka kitekite au ke he tau tala tutupu—ko e tau felakutaki, tau mafuike, favaleaga, mo e kiva he palaneta ha tautolu—kua peehi mai ki a au e tata lahi he fakaotiaga.”
6. Ko e heigoa e puhala ne fakatai e Iesu e aga ke galo e mataala fakaagaga ke he vaha loa?
6 Ia Mareko veveheaga 13, kua moua foki e tautolu e taha talahauaga he tomatomaaga ha Iesu ke he tau tutaki hana ke nonofo mataala a lautolu. Hagaao ke he veveheaga nei, ne fakatatai e Iesu e tuaga ha lautolu ke he tagata leoleo gutuhala ne fakatali ke he iki hana ka liu mai he fenoga mamao. Ne nakai iloa he tagata leoleo gutuhala e magaaho ka liu mai e iki hana. Kua lata ni a ia ke mataala. Ne hagaao a Iesu ke he fa e magaaho kehekehe ka liga liu mai e iki. Ko e magaaho ke fa aki ne leva ke he kavi hola tolu he magaaho pogipogi ke hoko ke he hakeaga la. Ke he magaaho fakahiku ia, kua mukamuka lahi e leoleo gutuhala ke fia mohe. Hokotaki ai, kua mailoga he tau kautau e magaaho ato matafatafaata ko e magaaho mitaki ke moua fakaofo e fi. Tatai ai, he magaaho mule nei, ka ha ha he tuaga fakaagaga kua pulumohea tuai e tau tagata he lalolagi ne viko takai ia tautolu, ti liga fakafelau a tautolu mo e taufetului lahi mahaki ke aala tumau. (Roma 13:11, 12) Ti, he hana fakataiaga, ne fakamafana tumau a Iesu: “Kia mataala a . . . Hanai, kia mataala a . . . Ko e mena kua tala atu e au kia mutolu, kua tala atu ai e au ke he tau tagata oti, Kia mataala a.”—Mareko 13:32-37.
7. Ko e heigoa e hagahagakelea moli ne tupu, mo e kitiaaga he mena nei, ko e heigoa e fakamaloloaga kua moua e tautolu he totou tumau e Tohi Tapu?
7 Loga e magaaho he hana fekafekauaga mo e he mole hana liu tu mai, ne peehi e Iesu e mautali. Moli ai, teitei ni he tau magaaho oti kua hagaao e tau Tohiaga Tapu ke he fakaotiaga he fakatokaaga nei, nukua moua e tautolu e hatakiaga ke nonofo mataala. * (Luka 12:38, 40; Fakakiteaga 3:2; 16:14-16) Maama ai, ko e fia mohe fakaagaga kua hagahagakelea lahi moli. Kua lata a tautolu oti mo e tau hatakiaga ia!—1 Korinito 10:12; 1 Tesalonia 5:2, 6.
Tokotolu e Aposetolo ne Nakai Maeke ke Mataala
8. He katene i Ketesemane, tali atu fefe e tau aposetolo tokotolu ha Iesu ke he ole hana ke mataala a lautolu?
8 Lahi atu e mena kua lata mo e nonofo mataala mai he tau amaamanakiaga mitaki, he kitia e tautolu mai he fakafifitakiaga ha Peteru, Iakopo, mo Ioane. Ko e tau tagata tane fakaagaga anei ne mumuitua fakamoli ki a Iesu mo e logona e fakaalofa hohofi ki a ia. Moha ia, he po Nisana 14, 33 V.N., ne kaumahala a lautolu ke aala tumau. He toka e poko tapa ki luga ko e matakavi ne fakamanatu e lautolu e Paseka, ne faihoani he tau aposetolo tokotolu a Iesu ke he katene ha Ketesemane. Ne tala age a Iesu i ai ki a lautolu: “Kua momoko lahi haku a loto ke hoko ke he mate; kia nonofo a mutolu i hinai, mo e mataala a mutolu fakalataha mo au.” (Mataio 26:38) Ne lagatolu e liogi fakamalolo ha Iesu ke he hana Matua he lagi, ti lagatolu e liu atu hana ke he tau kapitiga hana, mo e moua kua momohe tuai a lautolu.—Mataio 26:40, 43, 45.
9. Liga, ko e heigoa ne lafi ke he fia momohe he tau aposetolo?
9 Ko e ha e tau tagata tane tua fakamoli nei ne fakamamahi a Iesu he po ia? Ko e lolelole fakatino e mena ne tupu. Kua mule lahi tuai, liga kua mole e tuloto po, ti “kua mao ha lautolu a tau fifimata” he momohe. (Mataio 26:43) Liu foki, pehe a Iesu: “Kia mataala a mutolu mo e liogi, neke hoko mai e kamatamata kia mutolu; kua makai ni e loto, ka ko e tino kua lolelole.”—Mataio 26:41.
10, 11. (a) Pete ni hana lolelole, ko e heigoa ne lagomatai a Iesu ke mataala he katene i Ketesemane? (e) Ko e heigoa kua ako e tautolu mai he mena ne tupu ke he tau aposetolo tokotolu he magaaho ne ole a Iesu ki a lautolu ke mataala?
10 Nakai fakauaua ai, ne lolelole foki a Iesu he po aoga lahi ia. He nakai mohe ai, ne fakaaoga e ia e tau magaaho fakahikuhiku tokanoa ia ke liogi fakamalolo. Ko e tau aho gahoa fakamua, ne fakamafana e ia e tau tutaki hana ke liogi, he pehe: “Hanai, kia mataala a mutolu, mo e liogi nakai noa, kia talahaua a mutolu kua aoga ke hao mai ke he tau mena oti ia ka hohoko mai, ke tutu foki ki mua he Tama he tagata.” (Luka 21:36; Efeso 6:18) Ka omaoma a tautolu ke he tomatomaaga ha Iesu mo e muitua ke he fakafifitakiaga mitaki ke he puhala he liogi, to lagomatai he tau ole ha tautolu mai he tau loto ki a Iehova a tautolu ke mataala fakaagaga tumau.
11 Moli, ne maama e Iesu—ka e nakai maama he tau tutaki hana mogoia—to nakai leva ti tapaki mo e fakahala a ia ke he mate. Ko e tau kamatamata hana to hokotia ke he tapunu mamahi lahi ke he akau fakakikiveka. Ne hataki e Iesu hana tau aposetolo ke he tau mena nei, ka e nakai maama e lautolu e mena ne talahau e ia. Ti, momohe a lautolu ka e ala a ia ke liogi. (Mareko 14:27-31; Luka 22:15-18) Ha kua tupu moli ke he tau aposetolo, kua lolelole foki e tau tino ha tautolu ti ha ha ai e tau mena ne nakai la iloa e tautolu. Liu agaia, ka galo e tautolu e fakamafiti he tau magaaho ne nonofo a tautolu, to momohe a tautolu ke he tuaga fakaagaga. He mataala hokoia ka aala tumau a tautolu.
Tolu e Aga Aoga
12. Ko e heigoa e tau aga tolu ne fakamatutaki e Paulo ke he nonofo fakalatalata ha tautolu?
12 Maeke fefe a tautolu ke fakatumau e puhala fakamafiti? Kua fita he kitia e tautolu e aoga he liogi mo e lata ke mauloto e aho ha Iehova. Lafi ki ai, ne talahau e Paulo tolu e aga aoga kua lata ke feaki e tautolu. Pehe a ia: “Ko tautolu, ko e tau tagata he aho, kia nonofo fakalatalata a tautolu, kia tapulu ai a tautolu ke he ufikahokaho, ko e tua mo e fakaalofa haia, mo e potiki tau, ko e amaamanaki haia ke he fakamouiaga.” (1 Tesalonia 5:8) O mai la ke kitekite fakaku ke he matagahua he tua, amaamanakiaga, mo e fakaalofa he ha tautolu a fakatumau ke mataala fakaagaga.
13. Ko e heigoa e vala he tua kua taute ke fakatumau e mataala ha tautolu?
13 Kua lata ke moua e tautolu e tua nakai maueue na moui a Iehova ti “ko ia foki kua taui mai a lautolu kua kumi fakamakutu kia ia.” (Heperu 11:6) Ko e fakamoliaga fakamua he senetenari fakamua he perofetaaga ha Iesu hagaao ke he fakaotiaga kua fakamalolo e tua ha tautolu ke he fakamoliaga lahi atu he vaha ha tautolu. Ti taute he tua ha tautolu a tautolu ke fakatalitali fakamakai ke he aho ha Iehova, moli ai “[ko e fakakiteaga fakaperofeta] to hoko mai ni, nakai mule mai.”—Hapakuka 2:3.
14. Aoga fefe e amaamanakiaga kaeke ke nonofo mataala a tautolu?
14 Ko e amaamanakiaga moli ha tautolu kua tuga e ‘taula he solu’ kua fakamalolo a tautolu ke fakauka ke he tau mena vihi pete ni ka fakatali a tautolu ke he fakamoliaga pauaki he tau maveheaga he Atua. (Heperu 6:18, 19) Ko Margaret, ko e matakainaga fifine fakauku he agaga, ne molea e 90 e tau tau he moui, ne kua papatiso ke molea tuai e 70 e tau he mole, kua pehe: “He mate fai e tane haku he 1963 ha ko e kanesa, ne logona e au ko e homo ue atu ha ia ka hoko mafiti mai e fakaotiaga. Ka ko e mogonei kua mailoga e au ne manamanatu hokoia au ke he tau manako fakatagata haku. Nakai fai manatu au he magaaho ia ke he laulahi he gahua ka tupu ke he lalolagi katoa. Pihia mogonei, ha ha i ai agaia e tau matakavi loga ne hafagi la ia ke gahua. Ti fakaaue au ha kua fakagahuahua e Iehova e fakauka.” Kua fakamoli mai he aposetolo ko Paulo ki a tautolu: “Ko e fakauka kua [fua mai] e fakamoli, ko e fakamoli kua tupu ai e amaamanaki, ko e amaamanaki foki kua nakai fakamā ai.”—Roma 5:3-5.
15. Omoomoi fefe he fakaalofa a tautolu pete ni kua liga leva tuai e fakatali ha tautolu?
15 Ko e fakaalofa Kerisiano e aga kehe lahi ha kua ha ha ai e manatu aoga ma e tau mena oti kua taute e tautolu. Kua fekafekau a tautolu ki a Iehova ha kua fakaalofa a tautolu ki a ia, pete ni hana magaaho fakatoka. Ko e fakaalofa ke he katofia kua omoi a tautolu ke fakamatala e tala mitaki he Kautu, pete he liga tu leva e finagalo he Atua ke taute e tautolu mo e pete ni e loga e magaaho kua liliu a tautolu ke he tau kaina agaia. He tohi e Paulo, “kua tumau e tua, mo e amaamanaki mo e fakaalofa, ko e tolu e mena ia; ka ko e mena ne mua ke he tau mena ia, ko e fakaalofa haia.” (1 Korinito 13:13) Kua fakatumau he fakaalofa a tautolu ti lagomatai a tautolu ke mataala. “[Ko e fakaalofa] kua amaamanaki ke he tau mena oti, kua fakamanavalahi ke he tau mena oti. Nakai tuai oti e fakaalofa.”—1 Korinito 13:7, 8.
“Kia Taofi Mau e Tau Mena Ha Ha ia Koe”
16. Ke nakai fakalolelole, ko e heigoa e aga kua lata ke feaki e tautolu?
16 Kua nonofo a tautolu he tau magaaho aoga lahi ne kua fakatumau e tau mena tutupu ke fakamanatu ki a tautolu ko tautolu he matahiku he tau aho fakamui. (2 Timoteo 3:1-5) Nakai ko e magaaho anei ke fakalolelole ka ‘kia taofi mau e tau mena ha ha ia tautolu.’ (Fakakiteaga 3:11) He “mautali mo e liogi” mo e he feaki e tua, amaamanakiaga, mo e fakaalofa, to mautali a tautolu ke he magaaho he kamatamata. (1 Peteru 4:7) Lahi e gahua he Iki ke taute e tautolu. He lavelave ke he tau gahua he mahani Atua ka lagomatai a tautolu ke fakatumau e mataala katoatoa.—2 Peteru 3:11.
17. (a) Ko e ha e tau fakaita he falu magaaho kua nakai fakalolelole a tautolu? (e) Fifitaki fefe e tautolu a Iehova, ti ko e heigoa e tau monuina kua fakatali ki a lautolu kua taute pihia
17 “Ko Iehova ko e haku a tufaaga haia,” he tohi e Ieremia, “ko e mena ia ke amaamanaki ai au kia ia. Kua mahani mitaki a Iehova kia lautolu kua tatali atu kia ia, ko e tagata kua kumi kia ia. Kua mitaki ke amaamanaki mo e tatali fakatekiteki ke he fakamouiaga mai ia Iehova.” (Tagi Aue 3:24-26) Falu ia tautolu kua nakai la leva ia e fakatali. Ko e falu kua leva tuai e fakatali ke he loga he tau tau ke kitia e fakamouiaga ha Iehova. Ti ku ha ia, mogoia, e magaaho fakatali nei ka fakatatai ke he tukumalagi i mua! (2 Korinito 4:16-18) Ti hane fakatali a tautolu ke he magaaho fafati ha Iehova, maeke ia tautolu ke feaki e tau fua Kerisiano kua latatonu ti lagomatai e falu ke fakaaoga e fakauka ha Iehova mo e pipiki ke he kupu moli. Kia mataala oti, mogoia, a tautolu. Kia fifitaki a tautolu ki a Iehova mo e fakauka, he fakaaue ma e amaamanakiaga ne foaki e ia ki a tautolu. Ti, he mataala fakamoli a tautolu, kia taofi mau a tautolu ke he amaamanakiaga he moui tukulagi. Ati, ko e tau maveheaga fakaperofeta nei ka fakagahua moli ke he tuaga ha tautolu: “Ti fakamatalahi e [Iehova] a koe ke eke māu e motu; to kitia e koe e tau tagata mahani kelea kua mahakava.”—Salamo 37:34.
[Tau Matahui Tala]
^ para. 5 Liga lagomatai lahi ke liu fakamanatu e tau fakamoliaga ono ke fakamoli aki ko tautolu kua nonofo he “tau aho fakamui” ne fakamau he lau tohi 8-9 he fufuta he Ko e Kolo Toko ia Fepuari 1, 2000.—2 Timoteo 3:1.
^ para. 7 Vagahau ai ke he vepi Heleni ne fakaliliu “nonofo mataala,” kua fakamaama he tagata tohia tohi fakamaama kupu ko W. E. Vine na kakano ai ‘ke vega kehe he mohe,’ ti “fakakite nakai ko e ala noa ni, ka ko e mataala ha lautolu he amanaki ke he taha mena.”
To Tali Fefe e Koe?
• Fakamalolo fefe e tautolu e mauokafua ha tautolu kua tata mai e fakaotiaga he fakatokaaga nei?
• Ko e heigoa ka ako mai ai he tau fakafifitakiaga ha Peteru, Iakopo, mo Ioane?
• Ko e heigoa e tau aga tolu ka lagomatai a tautolu ke tumau e mautali fakaagaga?
• Ko e ha ko e magaaho anei ‘kia taofi mau e tau mena ha ha ia tautolu’?
[Tau Huhu he Fakaakoaga]
[Tau Fakatino he lau 31]
Lagomatai he tau feleveiaaga, liogi, mo e tau aga fakaako mitaki a tautolu ke mataala
[Fakatino he lau 32]
Tuga a Margaret, kia fakauka a tautolu mo e mataala nakai noa