Mafanatia ma Lautolu kua Matematekelea

KE HE tau senetenari kua mole, ko e huhu ke he kakano ne fakaata he Atua e matematekelea kua fakagogoa aki e tokologa he tau pulotu mo e tau fioloti. Ne fakapuloa he falu ha ko e Atua malolo ue atu, kua liga tukupau katoatoa a ia ha ko e matematekelea. Ko e tohia he The Clementine Homilies, ko e tohi fakavai he senetenari ke uaaki, ne talahau kua pule e Atua ke he lalolagi ke he ua e lima. He “lima hema” hana, ko e Tiapolo, kua fakatupu e ia e matematekelea mo e mamahi, mo e he “lima matau” hana, ko Iesu, kua fakahao mo e fakamonuina e ia.

Kua nakai maeke he falu ke talia na fakaata he Atua e matematekelea pete ni he nakai fakatupu e ia, kua fifili ke fakatikai e matematekelea kua tupu. “Kua fakavaia hokoia e kelea, ti nakai fai fakaveaga moli ai,” he tohi e Mary Baker Eddy. “Ka maama ke nakai ha ha i ai e agahala, gagao, mo e mate, to galo a lautolu.”—Science and Health With Key to the Scriptures.

Ke he fua he tau mena tutupu mamahi he fakamauaga tuai, mua atu ke he felakutaki fakamua he lalolagi ati hoko ke he vaha ha tautolu, tokologa kua hokotia ke fakahiku aki kua nakai maeke he Atua ke taofi e matematekelea. “Ko e Holocaust, he manatu e au, ne utakehe e ha fakaaoga mukamuka he malolo ue atu ko e fua nukua tutonu ke he Atua,” he tohi he pulotu Iutaia ko David Wolf Silverman. “Kaeke ke maama e Atua ke he falu puhala,” he lafi e ia, “ti kua lata e mitaki lahi Hana ke tatai mo e kitiaaga he kelea, ti moli ni e mena nei ka nakai malolo ue atu a Ia.”

Pete ia, ko e tau talahauaga ia na tuga ko e fai vala e Atua ke he matematekelea, ti nakai maeke ia ia ke taofi ai, po ke matematekelea ia ko e mena noa he manamanatuaga ha tautolu kua foaki e mafanatia tote ki a lautolu nukua matematekelea. Mo e mua atu e aoga, kua nakai felauaki e tau taofiaga pihia ke he Atua fakafili tonu, malolo lahi, mo e leveki ne kua fakakite mai he tau lau he Tohi Tapu. (Iopu 34:10, 12; Ieremia 32:17; 1 Ioane 4:8) Ti, ko e heigoa kua talahau he Tohi Tapu hagaao ke he kakano ne fakaata e matematekelea?

Kamata Fefe e Matematekelea?

Nakai tufugatia he Atua e tau tagata ke matematekelea. Kehe ai, ne fakamonuina e ia e hoa mau fakamua, ko Atamu mo Eva, aki e tau manamanatuaga mo e tau tino mitaki katoatoa, mo e tauteute e kaina fulufuluola ke eke mo kaina ha laua, mo e kotofa a laua ke he gahua fai kakano mo e makona. (Kenese 1:27, 28, 31; 2:8) Pete ia, ko e fakatumau he fiafia lahi ha laua kua falanaki ke he ha laua a mailoga he pule he Atua mo e hana tonuhia ke fifili e mena kua mitaki mo e mena kua kelea. Ko e poakiaga faka-Atua ia ne fakakite he akau ne fakahigoa “ko e akau ke iloa ai e mitaki mo e kelea.” (Kenese 2:17) To fakatata e Atamu mo Eva e omaoma ha laua ke he Atua kaeke ke omaoma a laua ke he hana poakiaga ke nakai kai mai he akau ia. *

Matematekelea ai, ne kaumahala a Atamu mo Eva ke omaoma ke he Atua. Ko e mena moui fakaagaga totoko, ne fakakite ki mui ko Satani ko e Tiapolo, ne omoomoi a Eva nakai ko e manako moli hana ke omaoma ke he Atua. Moli, kua tuga e utakehe he Atua mai ia  ia taha manako lahi mahaki: tu tokotaha, ko e tonuhia ke fifili ma hana e mena kua mitaki mo e mena kua kelea. Ne talahau e Satani kaeke ke kai e ia e fua he akau, ‘ti fakaala ai hana a tau mata; ti eke ai ni a ia ke tuga e Atua ke iloa ai e mitaki mo e kelea.’ (Kenese 3:1-6; Fakakiteaga 12:9) He fakavaia he amanakiaga he tu tokotaha, ne kai e Eva e fua akau fakatapu, ti nakai leva ne taute pihia foki e Atamu.

Ko e aho taha ia, ne kamata a Atamu mo Eva ke moua e tau fua he totokoaga ha laua. He fakaheu e pule faka-Atua, ne galo e laua e puipuiaga mo e tau monuina ko e omaoma ke he Atua nukua foaki ma laua. Ne vega he Atua a laua mai he Parataiso mo e tala age ki a Atamu: “Kua malaia ai e kelekele ha ko koe; to kai ai e koe mo e mamahi ke he tau aho oti he moui hau. To kai foki e koe hau a mena kai mo e kavakava he hau a mata, ato liu a koe ke he kelekele.” (Kenese 3:17, 19) Ne lauia ai a Atamu mo Eva he gagao, mamahi, fuakau, mo e mate. Kua eke e matematekelea mo mena ne tupu ke he tagata.—Kenese 5:29.

Fakatotoka e Matakupu

Kua liga huhu e taha tagata, ‘Ane maeke nakai he Atua ke fakaheu e agahala ha Atamu mo Eva?’ Nakai, ha ko e mena to fakatote hifo taha he mena ia e fakalilifuaga ma e hana pule, he liga fakaohooho e tau totokoaga anoiha ti fua ke he matematekelea lahi atu. (Fakamatalaaga 8:11) Lafi ai, ko e tokanoa he mahani liuliu pihia ka taute e Atua mo kau ke he mahani hepe. Kua fakamanatu he tohia ko Mose he Tohi Tapu ki a tautolu: “Kua katoatoa ni e mitaki hana gahua; ha kua tonu hana tau puhala oti ni? ko e Atua kua fakamoli, nakai ha ha ia ia ha mahani kelea, ko e mahani tututonu mo e mahani hakohako ni a ia.” (Teutaronome 32:4) Ke felauaki mo e aga hana, ne fakaata he Atua a Atamu mo Eva ke matematekelea ke he tau fua he ha laua a mahani liuliu.

Ko e ha ne nakai amanaki e Atua ti moumou e hoa mau fakamua fakalataha mo Satani, ko e punaaga nakai kitia he ha laua a totokoaga? Ha ha ia ia e malolo ke taute ai. Ane nakai moua ai e Atamu mo Eva e tau fanau kua ha ha ai he tuaga matematekelea mo e mate. Pete ia, ko e fakatataaga pihia he malolo faka-Atua ka nakai fakamoli e tonuhia he pule he Atua ke he tau mena momoui lotomatala hana. Lafi ki ai, ane mamate a Atamu mo Eva ka e nakai fai tama, to kakano e mena ia ke fakakaumahala e finagalo he Atua ke fakapuke e lalolagi aki e tau tagata mitaki katoatoa ha laua. (Kenese 1:28) Ti “nakai tatai e Atua ke he tau tagata . . . Ko e mena ni kua mavehe e ia, ti taute e ia; ne talahau e ia, ti taute e ia.”—Numera 23:19, Today’s English Version.

He hana pulotu mitaki katoatoa, ne fifili a Iehova ko e Atua ke fakaata e totokoaga ke fai magaaho ai. Ko e tau tagata totoko kua fai magaaho ke moua e tau lauiaaga he tu tokotaha mai he Atua. To fakakite fakamahino he fakamauaga tala tuai e lata he tagata ma e takitakiaga faka-Atua mo e takitaki he pule he Atua ke he tagata, po ko Satani. He magaaho taha, ne taute he Atua e tau lakaaga ke iloa moli ko e finagalo fakamua hana ma e lalolagi to fakamoli ai. Ne mavehe mai e ia to hau e [“tega,” NW] ka ‘tatuki a Satani ke he ulu,’ ati utakehe katoatoa ai hana totokoaga mo e tau lauiaaga fakahagahaga kelea.—Kenese 3:15.

Ko Iesu Keriso e Tega ia ne mavehe mai. Ia 1 Ioane 3:8, kua totou e tautolu “ne fakakite mai ai e Tama he Atua, kia moumou . . . e tau gahua he tiapolo.” Ne taute e ia e mena nei he poa e ia hana moui tagata mitaki katoatoa mo e totogi he lukutoto ke fakahao aki e tau fanau ha Atamu mai he agahala mo e mate. (Ioane 1:29; 1 Timoteo 2:5, 6) Ko lautolu ne tua fakamoli ke he poa ha Iesu nukua mavehe ki ai e totokaaga tukulagi mai he matematekelea. (Ioane 3:16; Fakakiteaga 7:17) To tupu e mena nei a fe?

 Ko e Fakahikuaga ke he Matematekelea

Ko e tiaki he pule he Atua ne fakatupu e tau matematekelea loga. Ti kua lata tonu mogoia, e lata he Atua ke fakaaoga e puhala pauaki he hana pule ke fakaoti aki e matematekelea he tagata mo e fakakatoatoa e finagalo fakamua hana ma e lalolagi. Ne totoku e Iesu e fakatokaaga faka-Atua nei he magaaho ne fakaako e ia hana tau tutaki ke liogi: “Ha mautolu a Matua na e, ha ha he lagi, . . . kia hoko mai hau a kautu. Kia eke hau a finagalo ke he lalolagi, tuga ne eke ke he lagi.”—Mataio 6:9, 10.

Ko e magaaho ne fakaata he Atua ma e tau tagata ke fakagahuahua e pule tutokotaha kua teitei fakaoti tuai. He fakamoli e perofetaaga he Tohi Tapu, ne fakatu e Kautu hana ke he lagi he 1914 ti ko Iesu Keriso e Patuiki i ai. * Nakai leva, to moumou mo e fakaoti e tau fakatufono he tagata.—Tanielu 2:44.

He fekafekauaga fakaku hana ke he lalolagi, ne foaki e Iesu e kamata tuai he tau monuina ka tamai he pule faka-Atua ke he tau tagata. Kua foaki he tau Evagelia e fakamoliaga ne fakakite e Iesu e fakaalofa hofihofi ma e tau tagata he kaufakalatahaaga ne kua mativa mo e onoono hifo ki ai. Ne fakamaulu e ia e tau tagata gagao, fagai e tau tagata hoge, mo e fakaliu tu mai e tau tagata mamate. Ti omaoma foki e tau gahuahuaaga he tufugatia ke he leo hana. (Mataio 11:5; Mareko 4:37-39; Luka 9:11-16) Manamanatu la ke he mena ka fakakatoatoa e Iesu ka fakaaoga e ia e tuaga fakamea he hana poa lukutoto ke aoga e tau tagata omaoma oti kana! Kua mavehe he Tohi Tapu mai he pule he Keriso, “to holoholo kehe he Atua e tau hihina mata oti mai he tau mata [he tau tagata]; ti nakai tuai fai mate, po ke fakatutuku, po ke tagi, ti nakai tuai fai matematekelea.”—Fakakiteaga 21:4.

Fakamafanaaga ma Lautolu ne Matematekelea

Ko e mafanatia ha ia ke iloa ko e ha tautolu a Atua fakaalofa mo e malolo ue atu, ko Iehova, kua fakaalofa a ia ki a tautolu mo e ku e magaaho to tamai e ia e totokaaga ke he tau tagata! Mahani ai, ko e tagata gagao lahi kua talia fiafia e tuluiaga ke fakamaulu a ia pete ni kaeke ke mamahi lahi. Ke he puhala taha, ka iloa e tautolu to tamai he puhala taute mena he Atua e tau monuina tukulagi, to fakatumau he iloilo ia a tautolu pete ne tau mena uka fakaku kua fehagai mo tautolu.

Ko Ricardo, ne totoku he vala tala fakamua, e taha ne ako ke moua e fakamafanaaga mai he tau maveheaga he Tohi Tapu. “He mole e mate he hoana haku, ne ha ha ia au e manako malolo ke nofo tokotaha,” he talahau e ia, “ka e nakai leva ti mailoga e au to nakai liuaki mai he mena nei e hoana haku mo e to fakaunu ni ki mua e kelea he tuaga he loto haku.” Ka e, fakatumau ni a Ricardo ke he fakaholoaga hana he fina atu ke he tau feleveiaaga Kerisiano mo e tutala e fekau he Tohi Tapu ke he falu. “He logona e au e lalagoaga fakaalofa ha Iehova mo e mailoga e puhala ne tali e ia e tau liogi haku ke he tau mena kua liga ikiiki, ne tata lahi atu au ki a ia,” he talahau e Ricardo. “Ko e mataala nei ke he fakaalofa he Atua ne fakamalolo au ke fakauka moli ke he kamatamata kelea lahi nukua fehagai laia mo au.” Talahau e ia: “Kua galo lahi agaia e  au e hoana haku, ka e talitonu mauokafua au mogonei to nakai fakaata e Iehova ha hagahagakelea tukulagi ke tupu ki a tautolu.”

Pihia nakai a koe, tuga a Ricardo mo e falu he tau miliona, kua manako ke he magaaho ka maeke e tau matematekelea he tagata mogonei ‘ke nakai tuai manatu ke he tau mena fakamua, ti nakai hake ai ke he loto e tau mena ia’? (Isaia 65:17) Kia mafanatia ko e tau monuina he Kautu he Atua kua maeke ke moua e koe ka muitua ke he hatakiaga he Tohi Tapu: “Kia kumi e mutolu a Iehova ka kua maeke he moua e mutolu a ia; kia tauui atu ā mutolu kia ia ka kua tata mai a ia.”—Isaia 55:6.

Ke lagomatai a koe ke taute e mena nei, taute e totou mo e fakaakoaga fakamitaki he Kupu he Atua mo mena mua he moui hau. Lali ke iloa e Atua mo ia ne fakafano mai e ia, ko Iesu Keriso. Tutuli ke moui fakatatau mo e tau tutuaga he Atua mo e fakakite kua makai a koe ke pipiki ke he hana pule katoatoa. Ko e puhala pihia ka tamai ki a koe e fiafia lahi he magaaho nei pete ne tau kamatamata ka fehagai mo koe. He vaha i mua, to fua mai ke he moui hau e moui fiafia he lalolagi nakai fai matematekelea.—Ioane 17:3.

[Tau Matahui Tala]

[Puha he lau 6, 7]

FAHIA FEFE A TAUTOLU KE HE MATEMATEKELEA?

“Kia tuku atu [ke he Atua] e tau mena oti kua fakaatukehe ai a mutolu.” (1 Peteru 5:7) Ko e tau logonaaga he fakagogoa, ita, mo e tiaki kua pauaki ni ka fakauka a tautolu ke he matematekelea po ke kitia taha tagata ne ofania e tautolu hane matematekelea. Kia iloa moli, agaia, kua maama e Iehova e tau logonaaga ha tautolu. (Esoto 3:7; Isaia 63:9) Tuga ni e tau tagata tua fakamoli i tuai, maeke ia tautolu ke hafagi e tau loto ha tautolu ki a ia mo e fakakite e tau fakauaua mo e tau kapaletu ha tautolu. (Esoto 5:22; Iopu 10:1-3; Ieremia 14:19; Hapakuka 1:13) To nakai utakehe fakamana e ia e tau kamatamata ha tautolu, ka e he tali e tau liogi mai he tau loto ha tautolu, kua maeke ia ia ke foaki ki a tautolu e pulotu mo e malolo ke fehagai ki ai.—Iakopo 1:5, 6.

“Aua neke ofo a mutolu ke he kamatamata[a]ga tuga e afi, kua hoko kia mutolu ke eke mo kamatamataaga kia mutolu, tuga ne hoko ha mena fou kia mutolu.” (1 Peteru 4:12) Ne tutala a Peteru anei ke he favaleaga, ka e hagaao tonu e tau kupu hana ke he ha matematekelea kua fakauka he tagata talitonu. Matematekelea e tau tagata ha ko e mativa, gagao, mo e mate. Kua talahau he Tohi Tapu na hohoko ke he tau tagata oti e “vaha mo e tau mena ke tutupu ai.” (Fakamatalaaga 9:11) Kua pihia e tuaga he tagata he magaaho nei. He mailoga e mena nei to lagomatai a tautolu ke fehagai ka tupu e matematekelea mo e mamahi. (1 Peteru 5:9) Mua atu ai, he manatu e fakamafanaaga ko e “tau fofoga a Iehova kua hagao ia kia lautolu ne tututonu, mo e hana tau teliga foki ke he kalaga ha lautolu” ka mahomo atu ke eke mo punaaga he mafanatia.—Salamo 34:15; Tau Fakatai 15:3; 1 Peteru 3:12.

“Kia fiafia ke he amaamanaki.” (Roma 12:12) He nakai takele ke he fiafia lahi kua mole, maeke ia tautolu ke manamanatu fakahokulo ke he maveheaga he Atua ka fakaotioti e tau matematekelea oti. (Fakamatalaaga 7:10) Ko e amaamanakiaga fakave mitaki nei ka puipui a tautolu tuga e potiki tau kua puipui e ulu. Kua fakatote hifo he amaamanakiaga e tau mamahi he moui mo e lagomatai ke fakakite moli kua nakai hagahagakelea ke he malolo fakaagaga, logonaaga, mo e manamanatuaga ha tautolu.—1 Tesalonia 5:8.

[Fakatino he lau 5]

Tiaki e Atamu mo Eva e pule faka-Atua

[Fakatino he lau 7]

Mavehe mai he Atua e lalolagi nakai fai matematekelea