Tau Huhu Mai he Tau Tagata Totou

Ko e ha ne talahau he Tohi Tapu kua lata he tagata ke fakatutu ka fakamatakutaku ke fakapilo pulenoa?

Ko e ha tagata ne nakaila hokotia fakatagata ia ke he mamahi he ekefakakelea he tagata fakapilo pulenoa kua nakai maeke ke maama moli e moumou he mena ia e moui he taha tagata. Ko e mena ia ne tupu kua matakutakuina ki a ia ne matematekelea ati liga fakaagitau ai a ia ke he moui katoa hana. * Ko e fifine Kerisiano fuata ne tapaki he tagata fakapilo pulenoa he fai tau kua mole ne talahau: “Kua nakai maeke he tau kupu ke talahau e matakutakuina ne logona hifo e au he po ia po ke mamahi ne lata au ke kautu au ki ai he tali mai he magaaho ia.” Maama ai, kua manako ni falu ke nakai manamanatu hagaao ke he matakupu matakutakuina nei. Pete ia, ko e fakamatakutaku he fakapilo pulenoa ko e mena tupu moli he lalolagi kelea nei.

Kua nakai maimaina e Tohi Tapu he talahau e falu a mena tutupu he fakapilo pulenoa mo e he lali ke fakapilo pulenoa ne hokotia ki ai he vaha kua mole. (Kenese 19:4-11; 34:1-7; 2 Samuela 13:1-14) Ka kua foaki ai e fakatonuaga ke he mena kua lata he tagata ke taute he magaaho ka fakamatakutaku aki e fakapilo pulenoa. Ko e mena ne talahau he Fakatufono hagaao ki ai kua moua he Teutaronome 22:23-27. Kua uufitia he mena nei ua e tutuaga. He mena fakamua, ne moua he tagata tane e fifine fuata he maga mo e mohe mo ia. Pete he pihia, ne nakai fakatutu e fifine po ke tagi lagomatai. Ko e mena ne tupu, ne fakafili a ia ke agahala “he nakai fakatutu ai a ia ke he maga.” Ane mai fakatutu a ia, liga to o mai e tau tagata ne tatatata mai ke laveaki a ia. He mena ke uaaki, ne moua he tagata tane e fifine fuata he maga i tua, ne “taofi ai he tane a ia mo e mohe mo ia.” He totoko, ne ‘fakatutu e tama fifine ka e nakai ha i ai taha ke laveaki a ia.’ He nakai tatai mo e fifine he mogo fakamua, kua kitia maali ai kua nakai talia he fifine nei e mena ne taute he tagata ne tapaki a ia. Ne fakamalolo e fifine ke totoko a ia, he fakatutu lagomatai, ka kua lolelole lahi a ia. Ne fakakite moli he fakatutu hana kua nakai manako a ia ke fakamatematekelea; ti kua nakai agahala a ia he hepe.

Pete ni kua nakai ha ha i lalo he Fakatufono faka-Mose e tau Kerisiano, kua foaki he matapatu fakatufono i ai e takitakiaga ma lautolu. Kua peehi he fakamauaga i luga e aoga he  totoko mo e fakatutu lagomatai. Ke fakatutu he magaaho ka fakamatakutaku ke fakapilo pulenoa, kua mailoga agaia mo puhala fakailoilo. Taha e tagata pulotu ke he utakeheaga he holifono, ne talahau: “Kaeke tapaki e fifine, ko e kanavaakau mitaki lahi hana ko e leo lahi ni hana.” Liga futia mai he fakatutu he fifine e falu tagata, ko lautolu ka lagomatai mogoia a ia, po ke liga fakaofo e tagata ne tapaki a ia mo e hola ai. Ne talahau he fifine fuata Kerisiano ne tapaki he tagata fakapilo pulenoa: “Ne fakatutu fakalahi au, ati liu tua a ia. He magaaho ne liu mai a ia ki a au, ne fakatutu au mo e poi. Ne fa manatu au he vaha tuai, ‘Maeke fefe he fakatutu ke lagomatai au ka tapaki he taha tagata tane makimaki au, mo e taha ni e foliaga he manatuaga hana?’ Ka e kua iloa tuai e au ko e mena lauia mitaki a ia!”

Pihia foki ke he mena momoko ne tupu ha kua lolelole e fifine ati fakapilo pulenoa ai, ko e taufetului mo e fakatutu lagomatai hana kua nakai fakateaga. Ka kua kehe mai, ha kua fakakite mai kua taute e ia e tau mena oti ne fahia a ia ke totoko e tagata ne tapaki a ia. (Teutaronome 22:26) Pete he fakafita ke he mena nei, kua ha ha agaia ia ia e loto manamanatu mea, lilifu fakatagata, mo e fakamoliaga kua mea a ia ke he tau mata he Atua. Ko e mena matakutakuina ne tupu ka liga toka ia ia e mamahi ke he manamanatuaga, ka e he iloa na taute e ia e tau mena ne fahia a ia ki ai ke totoko e tagata ne tapaki a ia, ka lagomatai lahi a ia ke maulu fakahaga.

He maama e hagaaoaga ia Teutaronome 22:23-27, kua lata ia tautolu ke mailoga kua nakai uufitia he fakamauaga ku nei e tau tutuaga oti kana. Ke fakatai ki ai, kua nakai tala ke he tuaga ne nakai maeke e fifine ne tapaki ke fakatutu ha kua kuhukuhu a ia, nakai alaala, po kua fakakulikuli he matakutakuina po kua nakai ni fakaata ke fakatutu ha kua pa he lima po kua pili aki e tepi e gutu hana. Ka e kua maeke a Iehova ke fuafua e tau mena oti, putoia ai e tau manako, ne fakafehagai a ia fakalataha mo e maamaaga mo e fakafili tonu ke he tau mena tutupu pihia, ha ko e mena “kua tonu hana tau puhala oti.” (Teutaronome 32:4) Nukua mataala a ia ke he mena ne tupu mo e ke he tau laliaga ne taute e ia ne matematekelea ke totoko ke he tagata ne tapaki a ia. Ko e mena ia, ko e tagata matematekelea ne nakai maeke ke fakatutu ka kua taute e ia e tau mena oti ne fahia a ia ki ai he tuaga ia, kua maeke ke toka e tau lekua ia ke he tau lima ha Iehova.—Salamo 55:22; 1 Peteru 5:7.

Pete he pihia, ko e falu fifine Kerisiano ne kua fakamatematekelea mo e fakapilo kua fakamamahi tumau he tau logonaaga he agahala. Ha ko e mena ne tupu, ne logona e lautolu kua lata ke lahi e mena ne taute e lautolu ke nakai tupu ha mena. Ka e, he nakai talahau ko e hepe ni ha lautolu, kua lata ia lautolu pihia ne matematekelea ke liogi ki a Iehova, ole lagomatai ki a ia, mo e mauokafua ke he fakaalofa totonu lahi hana.—Esoto 34:6; Salamo 86:5.

Ko e mena ia, ko e tau fifine Kerisiano nukua fahia he mogonei ke he tau mamahi he manamanatuaga ne fua mai he fakafehagao mo e tagata ne fakapilo pulenoa a ia, kua maeke ke mauokafua na maama katoatoa e Iehova e tau logonaaga mamahi ne fehagai a lautolu ki ai. Ne fakamafana he Kupu he Atua a lautolu: “Kua tata mai a Iehova kia lautolu kua loto malipilipi; kua fakamoui foki e ia a lautolu kua loto pehia.” (Salamo 34:18) Ko e falu mena foki ke lagomatai a lautolu ke fahia ke he tau mamahi, kua maeke ke moua ai he talia e tau maamaaga moolioli mo e tau lalagoaga totonu he tau katofia talitonu i loto he fakapotopotoaga Kerisiano. (Iopu 29:12; 1 Tesalonia 5:14) Mua atu, ko e tau laliaga hana ni ne matematekelea ke fakamahino atu ke he tau manatu ati hake ka lagomatai a lautolu ke logona hifo e “monuina foki mai he Atua kua mua ue atu ke he tau mena oti kua manamanatu ki ai.”—Filipi 4:6-9.

[Matahui Tala]