Favaleaga Fakalotu​—Ko e Ha?

MANATU nakai a koe kua lata ke favale ke he tau tagata ha ko e ha lautolu a lotu? Liga nakai—kaeke ni ke nakai fakatauhele e lautolu e tau tonuhia he falu. Ka e, ko e favaleaga fakalotu kua leva tuai ti tupu agaia. Ma e fakatai, tokologa e Tau Fakamoli a Iehova i Europa mo e falu vala he lalolagi nukua fofo tumau e tau tonuhia ha lautolu ti taute fakakelea ke he magahala he senetenari ke 20 aki.

He magahala ia, ne matematekelea e Tau Fakamoli a Iehova ha ko e favaleaga mamahi, fakatokatoka pauaki mo e leva i lalo hifo he tau pule okooko Europa. Ko e heigoa kua ako mai e tautolu he mena ne tupu ki a lautolu hagaao ke he favaleaga fakalotu? Ti ko e heigoa kua maeke ia tautolu ke ako mai he puhala ne fakafehagai atu a lautolu ke he matematekelea?

“Nakai ko e Tau Tagata he Lalolagi”

Kua lali e Tau Fakamoli a Iehova ke eke mo tau tagata muitua ke he matafakatufono, mafola, mo e mahani hakohako. Ne nakai totoko a lautolu ke he tau fakatufono po ke tutuli e tau taufetoko mo lautolu, po ke fakalagalaga e lautolu e favaleaga ha ko e manako ha lautolu ke mamate matulo. Ko e tau Kerisiano nei nukua tu uho fakapolitika ai. Kua tatai e mena nei ke he tau kupu ha Iesu: “Nakai ko e tau tagata he lalolagi [e tau tutaki haku], ke tuga foki au, nakai ko e tagata he lalolagi au.” (Ioane 17:16) Laulahi e tau fakatufono ke talahau e tuaga tu uho he Tau Fakamoli. Ka e tote e fakalilifu he tau pule okooko ma e poakiaga faka-Tohi Tapu nukua lata he tau Kerisiano ke nakai ko e tau tagata he lalolagi.

 Ko e kakano he mena nei ne fakamaama he fonoaga he University of Heidelberg, i Sihamani, ia Novema 2000. Ha ha i ai e matakupu he fonoaga ko e “Repression and Self-Assertion: Jehovah’s Witnesses Under the National Socialist and Communist Dictatorships.” Kua talahau e Dr. Clemens Vollnhals he Hannah-Arendt-Institute for Research Into Totalitarianism: “Kua nakai pa he tau pule okooko e tau gahua ha lautolu ke he tau mena politika. Ne peehi e lautolu e tau tagata takitokotaha.”

Nakai fakakaumahala he tau Kerisiano moli a lautolu “takitokotaha” ke he fakatufono he tagata, ha kua omonuo katoatoa a lautolu ki a Iehova ko e Atua hokoia. Ko e Tau Fakamoli ne nonofo i lalo he tau pule okooko kelea ne moua e tau peehiaga he Motu mo e tau poakiaga ke he ha lautolu a tua falu magaaho nukua totoko ki ai. Ko e heigoa kua taute e lautolu ka fehagai mo e taufetoko pihia? He tau tau loga kua mole, ne fakagahua he Tau Fakamoli a Iehova e matapatu fakaakoaga ke he tau momoui ha lautolu ne fakakite mai he tau tutaki ha Iesu Keriso: “Kua lata ni ke mua e omaoma ke he Atua ke he omaoma ke he tau tagata.”—Gahua 5:29.

Totou afe e Tau Fakamoli ne fakatumau ke mahani fakamoli ke he ha lautolu a tua mo e tu uho ke he tau mena fakapolitika, pete ni e tau favaleaga mamahi lahi. Fakauka fefe mogoia a lautolu? Moua mai i fe e lautolu e malolo ke taute pihia? Fakaata a lautolu ke tali. Ti o mai la tautolu ke kitia e tau tagata oti, Tau Fakamoli mo lautolu ne nakai ko e Tau Fakamoli, he ako mai he tau mena ne tutupu ki a lautolu.

[Blurb he lau 4]

Kua matematekelea e Tau Fakamoli a Iehova i Sihamani he favaleaga mamahi mo e leva i lalo hifo he tau pule okooko he senetenari 20 aki

[Blurb he lau 4]

“Ko e tau pule okooko ne nakai fakakaupa e tau gahua ha lautolu ke he tau mena politika. Ne poaki a lautolu ke he tau tagata takitokotaha.”—Dr. Clemens Vollnhals

[Fakatino he lau 4]

Kua galo he magafaoa Kusserow e tokanoaaga ha lautolu ha kua nakai fakahui e tua ha lautolu

[Fakatino he lau 4]

Ne tamate a Johannes Harms he fale puipui ha ko e hana a tau taofiaga