‘Kia Fakamalolo mo e Fakamanavalahi!’
‘Kia Fakamalolo mo e Fakamanavalahi!’
“Kia loto fakamalolo! Kua kautu a au ke he lalolagi.”—IOANE 16:33, NW.
1. Ko e onoonoaga ke he mena ne tatali e tau Isaraela i Kanana ki ai, ko e heigoa e fakamalolo ne moua e lautolu?
HE AMANAKI e tau Isaraela ke o atu he Vailele i Ioritana ke he Motu he Maveheaga, ne tala age a Mose ki a lautolu: “Kia fakamalolo a mutolu mo e fakamanavalahi; aua neke fakaatukehe a mutolu, ti ua matakutaku a mutolu ki mua ha lautolu; ha ko Iehova hau a Atua kua o fakalataha mo koe.” Ati hea e Mose a Iosua, ko ia ka takitaki e tau Isaraela ki Kanana, mo e fatiaki fakahako age e ia ki a ia e tomatomaaga ke fakamalolo. (Teutaronome 31:6, 7) Fakamui, ne fakamalolo e Iehova a Iosua he talahau: “Kia fakamalolo a koe mo e fakamanavalahi . . . Ka e fakamalolo a koe, ti fakamanavalahi ni.” (Iosua 1:6, 7, 9) Kua latatonu moli e tau kupu ia. Kua lata e tau Isaraela ke moua e malolo ke felauaki mo e tau fi malolo ne fakatali ki a lautolu he taha fahi ha Ioritana.
2. Ko e heigoa e tuaga ne moua e tautolu he vaha nei, ti ko e heigoa ne manako a tautolu ki ai?
2 He vaha nei, to nakai leva ti o atu e tau Kerisiano moli ke he taha fahi he lalolagi fou ne mavehe mai ti, tuga a Iosua, kua lata mo e fakamaloloaga. (2 Peteru 3:13; Fakakiteaga 7:14) Ko e tuaga ha tautolu mogoia, kua kehe mai ia Iosua. Ne tau a Iosua mo e tau pelu mo e tau tao. Kua tau a tautolu ke he male tau fakaagaga ti nakai fakaaoga ai ha kanavaakau tau. (Isaia 2:2-4; Efeso 6:11-17) Lafi ki ai, ne tau a Iosua ke he tau male tau vale loga pete ni he mole e huhu atu ke he Motu he Maveheaga. Ka e moua e tautolu e taufetului vale lahi mogonei—ato o atu a tautolu ke he taha fahi he lalolagi fou. O mai la tautolu ke fakatutala ke he falu tuaga kua lata mo e fakamaloloaga.
Ko e Ha kua Lata ia Tautolu ke Taufetului?
3. Ko e heigoa ne fakakite mai he Tohi Tapu hagaao ke he ha tautolu a tagata totoko ne mua?
3 Ne tohi he aposetolo ko Ioane: “Kua iloa e tautolu mai he Atua a tautolu; ka ko e lalolagi oti ha he pule hana kua mahani kelea.” (1 Ioane5:19) Kua fakakite he tau kupu ia e kakano aoga kua lata he tau Kerisiano ke taufetului ke fakatumau e tua ha lautolu. Ka fakatumau e Kerisiano ke he mahani fakamoli hana, kua ha ha ai e lakaaga ke kaumahala a Satani ko e Tiapolo. Ti, fano viko a Satani tuga “ne leona tagi” he lali ke fakamatakutaku mo e ke faiola ke he tau Kerisiano tua fakamoli. (1 Peteru 5:8) Moli, kua tau a ia ke he tau Kerisiano fakauku mo e ha lautolu a tau hoa. (Fakakiteaga 12:17) He tauaga nei, ne fakaaoga e ia e tau tagata kua iloa mo e nakai iloa ke muitua ki a ia. Kua lata ke fakamalolo ke tumauokafua he totoko a Satani mo e kau oti hana.
4. Ko e heigoa e hatakiaga ne foaki e Iesu, ka ko e heigoa e fua kua fakatata he tau Kerisiano moli?
4 He iloa e Iesu ko Satani mo e hana tau kau ka totoko fakalahi e tala mitaki, ati hataki e Ia hana tau tutaki: “Ati tuku atu ai e lautolu a mutolu ke he matematekelea, mo e kelipopo a mutolu; to vihiatia foki a mutolu he tau motu oti ha ko e haku a higoa.” (Mataio 24:9) Kua moli e tau kupu ia ke he senetenari fakamua, ti moli agaia he vaha nei. Moli, ko e favaleaga kua fakauka ki ai e falu he Tau Fakamoli a Iehova he vaha fou nei ne kua vale lahi tuga ni he tali mai he fakamauaga tuai. Pete ia, kua fakamalolo e tau Kerisiano ke he pehiaaga ia. Ne iloa e lautolu ko e “matakutaku ke he tau tagata ke hoko mai ai e matahele,” ti nakai manako a lautolu ke koto he hele.—Tau Fakatai 29:25.
5, 6. (a) Ko e heigoa e tau tutuaga nukua lata ia tautolu ke fakamalolo? (e) Tali atu fefe e tau Kerisiano tua fakamoli ka kamatamata mai e fakamaloloaga ha lautolu?
5 Ha ha i ai falu paleko kehe mai he favaleaga kua lata ke fakamalolo a tautolu ki ai. Ma e falu, ko e tutala ke he tau tagata nakai mahani hagaao ke he tala mitaki ko e paleko. Kua kamatamata e fakamalolo he falu fanau o aoga ka ui ki a lautolu ke fatiaki e omonuo ke he fakamoliaga he motu mo e matini. Ha ko e omonuo pihia kua lauia e fakakiteaga fakalotu, kua fifili fakamalolo e tau fanau Kerisiano ke taute e puhala kua fiafia e Atua ki ai, ti kua fiafia ke he fakamauaga mitaki ha lautolu.
6 Kua lata foki a tautolu ke fakamalolo ka fakalagalaga he tau tagata totoko e puhala uta tala ke fakaholofa aki e tau hokotaki kelea hagaao ke he tau fekafekau he Atua po ke ka lali a lautolu ke fakakaupa e tapuakiaga moli he pulega e “fakatufono ke fakamamahi.” (Salamo 94:20) Ma e fakatai, fefe e logonaaga ha tautolu ka hokotaki fakakeukeu po ke tau pikopiko moli he nusipepa, letio, po ke televisoni hagaao ke he Tau Fakamoli a Iehova? To ofo nakai a tautolu? Nakai. Amanaki a tautolu ke he tau mena pihia. (Salamo 109:2) Ti nakai ofo a tautolu ka talitonu e falu ke he tau tohi pikopiko mo e tau fakakeukeu, ha kua “talia he tagata goagoa e tau kupu oti.” (Tau Fakatai 14:15) Kua nakai talia agaia e tau Kerisiano fakamoli ke talitonu ha talahauaga kua talahau hagaao ke he tau matakainaga ha lautolu, ti nakai fakaata moli e lautolu e hokotakiaga kelea ke fakatupu ki a lautolu e fakato noa he tau feleveiaaga Kerisiano ha lautolu, ke fakamanou e fekafekauaga he fonua, po ke maueue ke he tua ha lautolu. Kehe ai, ne “kua fakakite e [lautolu] . . . ko e tau fekafekau he Atua. . . . Ke he lilifu mo e fakakelea, ke he talahaua mitaki, mo e [hagaao ke he tau tagata totoko] talahaua kelea; tuga he tau tagata fakavai, ka e [ke he mena moli kua] fakamoli ni.”—2 Korinito 6:4, 8.
7. Ko e heigoa e tau huhu kumikumi ke huhu hifo e tautolu ki a tautolu?
7 Ne tohi e Paulo ki a Timoteo, pehe: “Ha ko e mena nakai foaki mai he Atua kia tautolu e [a]gaga ke matakutaku ai, ka kia fakamalolo ai . . . Hanai, aua neke mā a koe ke he talahauaga ke he Iki ha tautolu.” (2 Timoteo 1:7, 8; Mareko 8:38) He totou e tau kupu ia, kia huhu a tautolu ki a tautolu ni: ‘Kua ma kia a au he tua haku, po ke fakamalolo au? Ke he gahuaaga haku (po ke fano he aoga), fakailoa nakai e au ke he tau tagata ne takatakai ia au ko au ko e Fakamoli a Iehova, po ke lali au ke fufu e mena moli? Kua ma kia a au ke kehe mai he falu, po ke matalahi au ke kehe mai ha ko e fakafetuiaga haku mo Iehova?’ Ka fai tagata kua ha ha i ai e tau logonaaga kelea hagaao ke he fakamatala he tala mitaki po ke taofiaga tokolalo, kia manatu e ia e tomatomaaga ha Iehova ki a Iosua: ‘Kia fakamalolo mo e fakamanavalahi.’ Kia nakai nimo, nakai ko e manatu he tau kapitiga gahua ha tautolu po ke tau kapitiga aoga ha tautolu kua aoga ka ko e manatu ha Iehova mo Iesu Keriso.—Kalatia 1:10.
Puhala ke Feaki e Malolo
8, 9. (a) He taha magaaho, kamatamata fefe e fakamaloloaga he tau Kerisiano fakamua atu? (e) Tali fefe a Peteru mo Ioane ke he tau fakamatakutaku, ti ko e heigoa ha laua mo e tau matakainaga ha laua ne moua?
8 Maeke fefe a tautolu ke feaki e vahega malolo ka lagomatai a tautolu ke fakatumau e mahani fakamoli ke he tau magaaho uka nei? Feaki fefe he tau Kerisiano fakamua e fakamalolo? Manamanatu la ke he mena ne tupu he tala age e tau ekepoa ne mua mo e tau patu i Ierusalema ki a Peteru mo Ioane ke oti e fakamatala ke he higoa ha Iesu. Ne nakai talia he tau tutaki ati fakamatakutaku mo e fakatoka mai ai. Ki luga he tau mena ia, ne liu a laua fakalataha mo e tau matakainaga ti liogi auloa a lautolu, he pehe: “Ma Iki na e, kia kitekite a koe ke he fakamatakutaku mai ha lautolu; mo e foaki mai e koe ke he hau a tau fekafekau, kia talahau atu e lautolu hau a kupu mo e fakamalolo ni.” (Gahua 4:13-29) He tali atu, ne fakamalolo e Iehova a lautolu aki e agaga tapu, ti fakahiku ne talahau he tau takitaki Iutaia, kua ‘fakapuke a Ierusalema’ ke he tau kupu ha laua.—Gahua 5:28.
9 O mai la tautolu ke fokifoki e mena ne tupu he magahala ia. He hagahagakelea e tau tutaki ha ko e tau takitaki Iutaia, ne nakai mahala a lautolu ke he peehiaga. Ka e, liogi e tau tutaki ma e fakamalolo ke fakatumau e fakamatala. Ti gahua a lautolu fakalagotatai ke he liogi ha lautolu, ti fakamalolo e Iehova a lautolu aki e agaga hana. Kua fakakite he mena ne tupu ki a laua e mena ne tohi e Paulo he falu tau fakamui ke he manatu kehe ne hagaao ke he tau Kerisiano he magaaho ne favale ki a lautolu. Ne pehe a Paulo: “Kua maeke ia au e tau mena oti kana ke he fakamalolo mai a Keriso kia au.”—Filipi 4:13.
10. Lagomatai fefe he mena ne tupu ki a Ieremia a lautolu ne mahani ma pauaki?
10 Fakalata ki ai, liga mahani ma pauaki ni e tagata. Maeke nakai a ia ke fekafekau ki a Iehova mo e fakamalolo pete ni e totokoaga? Moli! Manatu e tali ha Ieremia he magaaho ne fakauku e Iehova a ia mo perofeta. Ne pehe e tama fuata: “Ko e tama tote au.” Maaliali ai, ne logona e ia e maimaina. Ne fakamalolo agaia ni e Iehova a ia aki e tau kupu nei: “Aua neke pehe mai a koe, Ko e tama tote au; ha ko e mena fano ni a koe kia lautolu oti ke fakafano atu e au a koe ki ai, ko e tau mena oti foki ke poaki atu e au kia koe to vagahau atu ai e koe. Aua neke matakutaku a koe kia lautolu; ha ko e mena laveaki e au a koe.” (Ieremia 1:6-10) Ne ha ha ia Ieremia e mauokafua ia Iehova, ti ko e fua, he malolo a Iehova ne kautu a ia ke he maimaina hana mo e fakamatala fakamalolo lahi i Isaraela.
11. Ko e heigoa kua lagomatai e tau Kerisiano he vaha nei ke tuga a Ieremia?
11 Ha ha he tau Kerisiano fakauku he vaha nei e kotofaaga tuga ia ha Ieremia, ti lalago he “moto tagata tokologa” he ‘tau mamoe kehe,’ ne fakatumau a lautolu ke fakapuloa e tau finagalo ha Iehova, pete ni e fakateaga, vaiga, mo e favaleaga. (Fakakiteaga 7:9; Ioane 10:16) Ne moua e lautolu e fakamaloloaga he tau kupu ha Iehova ki a Ieremia: “Aua neke matakutaku.” Ne nakai nimo e lautolu kua kotofa he Atua a lautolu ti hane fakamatala e fekau hana.—2 Korinito 2:17.
Tau Fakafifitakiaga he Malolo kua Lata ke Muitua
12. Ko e heigoa e fakafifitakiaga mitaki lahi he fakamalolo ne foaki e Iesu, ti fakamalolo fefe e ia hana tau tutaki?
12 Maeke ia tautolu ke moua e lagomatai ke he tau laliaga ha tautolu ke feaki e fakamalolo kaeke ke muitua a tautolu ke he tau fakafifitakiaga he falu, tuga a Ieremia, ne gahua fakamalolo. (Salamo 77:12) Ma e fakatai, he kumikumi a tautolu ke he fekafekauaga ha Iesu, kua nava a tautolu ke he hana malolo he magaaho ne kamatamata e Satani a ia mo e he magaaho ne fehagai a ia ke he totokoaga malolo he tau takitaki Iutaia. (Luka 4:1-13; 20:19-47) He malolo ha Iehova, ne nakai maueue a Iesu, ti nakai leva ato hoko e mate hana, ne pehe a ia ke he tau tutaki hana: “I loto he lalolagi kua ha ha ki a mutolu e matematekelea lahi, ka e kia loto fakamalolo! Kua kautu a au ke he lalolagi.” (Ioane 16:33, NW; 17:16) Ane mai muitua e tau tutaki a Iesu ke he hana fakafifitakiaga, to eke foki a lautolu mo tau tagata kua kautu. (1 Ioane 2:6; Fakakiteaga 2:7, 11, 17, 26) Ka kua lata ia lautolu ‘ke fakamalolo.’
13. Ko e heigoa e fakamaloloaga ne foaki e Paulo ke he tau Filipi?
13 Falu tau he mole e mate a Iesu, ne tuku a Paulo mo Sila ke he fale puipui i Filipi. Fakahiku, ne fakamalolo e Paulo e fakapotopotoaga Filipi ke “tumau a mutolu mo e loto fakalataha, mo e manatu fakalataha, mo e fakamakamaka fakalataha ha ko e tua ha he vagahau mitaki. Kua nakai fakamatakutaku foki a mutolu ka he taha mena e lautolu kua totoko mai.” Ke fakamalolo a lautolu ke he mena nei, ne pehe a Paulo: “Ha [kua favale ke he tau Kerisiano] ko e fakamailoga ia he malaia kia lautolu [ko e tau tagata favale]; ka ko e fakamailoga he moui kia mutolu, mai he Atua foki a ia. Ha ko e mena kua foaki mai kia mutolu, ha ko Keriso, nakai ko e tua kia ia hokoia, ka kia mamahi foki a mutolu ha ko ia.”—Filipi 1:27-29.
14. Ko e heigoa e fua i Roma ha ko e fakamalolo ha Paulo?
14 He tohi a Paulo ke he fakapotopotoaga i Filipi, ne tuku foki a ia ke he fale puipui, mogonei i Roma. Ne fakatumau agaia a ia ke fakamatala fakamalolo ke he falu. Ti ko e heigoa e fua? Ne tohi e ia: “Ko e mena ia kua fakakite ai ia Keriso haku a tau liliaga ke he fale oti he kau leoleo, katoa foki mo e tau faoa oti; ko e tokologa foki e tau matakainaga ha ha he Iki, kua fakamanavalahi a lautolu ha ko e tau liliaga haku, kua au atu ai he fakamalolo ke talahau atu e kupu mo e nakai matakutaku.”—Filipi 1:13, 14.
15. Moua i fe e tautolu e tau fakafifitakiaga mitaki he tua ka mauokafua e fifiliaga ha tautolu ke fakamalolo?
15 Kua fakamalolo he fakafifitakiaga ha Paulo a tautolu. Ti pihia foki e tau fakafifitakiaga mitaki ne taute he tau Kerisiano he vaha fou nei ne fakauka ke he favaleaga he tau motu i lalo he tau takitakiaga pule kelea po ke vahega fakalotu. Ko e tau tala he tokologa ha lautolu nei ne tohi he tau mekasini Watchtower mo e Awake!, mo e he tau Yearbook of Jehovah’s Witnesses. He totou e koe e tau fakamauaga ia, manatu ko lautolu ne talahau e tau tala ko e tau tagata tuga ni a tautolu; ka ko e magaaho ne ha ha a lautolu he tau tutuaga uka lahi, ne foaki e Iehova ki a lautolu e malolo mua ue atu ti fakauka ai a lautolu. Maeke ia tautolu ke iloa moli to taute e ia e mena taha ia ma tautolu ka peehi mai e tau tutuaga.
Ha Tautolu a Tuaga Fakamalolo kua Fakafiafia mo e Fakalilifu a Iehova
16, 17. Maeke fefe a tautolu he vaha nei ke feaki e aga fakamalolo?
16 Ka tumauokafua e taha ma e kupu moli mo e tututonu, ko e fakamalolo a ia. Ka taute pihia he taha pete ni he matakutaku a ia he loto, kua lahi atu e fakamalolo ia. Moli, maeke he ha Kerisiano ke fakamalolo kaeke ke manako moli a ia ke taute e finagalo ha Iehova, kaeke ke fifili a ia ke fakatumau ke tua fakamoli, kaeke ke fakatumau a ia ke falanaki ke he Atua, ti to tumau a ia ke manatu ko Iehova ne fakamalolo e tau tagata tokologa fakamua tuga a ia. Lafi ki ai, ka mailoga e tautolu kua tu fakamalolo a tautolu ke fakafiafia mo e fakatokoluga a Iehova, kua mua atu e fifili ha tautolu ke nakai lolelole. Kua mautauteute a tautolu ke fakauka ke he va po ke fakakelea atu ha ko e fakaalofa hokulo ha tautolu ki a ia.—1 Ioane 2:5; 4:18.
17 Kia nakai nimo ka matematekelea a tautolu ma e tua ha tautolu, kua nakai kakano kua fai mena kelea ne taute e tautolu. (1 Peteru 3:17) Kua matematekelea a tautolu ha ko e taofi ki luga he pule katoatoa ha Iehova, he taute e mitaki, mo e nakai fai vala he lalolagi. He mena nei, ne pehe e aposetolo ko Peteru: “Kaeke kua mahani mitaki a mutolu ka e fakamamahi, ti kua fakauka a mutolu, ko e mena haia kua mitaki ke he Atua.” Ne pehe foki a Peteru: “Ko lautolu ni kua fakamamahi ha ko e finagalo he Atua, kia tuku atu mo e mahani mitaki ha lautolu a tau agaga kia ia, ko ia ne eke e tau mena oti, ko ia kua fakamoli.” (1 Peteru 2:20; 4:19) E, ko e tua ha tautolu kua fakafiafia ha tautolu a Atua fakaalofa, ko Iehova, ti tamai e lilifu ki a ia. Ko e kakano malolo lahi ha ia ke fakamalolo!
Vagahau mo e Tau Tui ne Mua
18, 19. Ka moua e tautolu e tu fakamalolo i mua he fakafili, ko e heigoa e fekau ia kua liga foaki e tautolu?
18 He magaaho ne tala age a Iesu ke he hana tau tutaki to favale atu ki a lautolu, ne tala age foki a ia: “Ko e mena tuku atu e [tau tagata] ke he tau fono, mo e fahi e lautolu a mutolu ke he tau sunako ha lautolu. Ke takitaki atu foki a mutolu ki mua he tau iki mo e tau patuiki ha ko au ni, ke eke mo talahau kia lautolu katoa mo e atu motu kehe.” (Mataio 10:17, 18) Ke tu i mua he fakafili po ke pule ha ko e tau talahauaga pikopiko kua lata ke fakamalolo. Pete ia, ka fakaaoga fakamalolo e tautolu e tau magaaho ia ke fakamatala ki a lautolu ia, kua fuluhi e tautolu e tuaga uka ke he magaaho ke fakamoli taha mena aoga. Lauia ai, kua tala age e tautolu ki a lautolu ia ne fakafili mai a tautolu e tau kupu ha Iehova, ne fakamau he Salamo 2: “Ko mutolu ko e tau patuiki na e, kia loto matala a mutolu; kia ako a mutolu ko e tau fakafili he lalolagi. Kia fekafekau kia Iehova mo e matakutaku.” (Salamo 2:10, 11) Mahani ai, ka talahau pikopiko hagaao ke he Tau Fakamoli a Iehova he hopoaga, kua tuku fakatokoluga he tau fakafili e ataina he tapuakiaga, ti loto fakaaue a tautolu ke he mena ia. Pete ia, ko e falu fakafili, ne ataina ke peehi mai he tau tagata totoko. Ki a lautolu ia, kua pehe e Tohiaga Tapu: “Kia ako a mutolu.”
19 Kua lata e tau fakafili ke mailoga e fakatufono tokoluga ue atu ha Iehova ko e Atua. Kua lata ia lautolu ke manatu ko e tau tagata oti kana, putoia e tau fakafili, nukua fai fakalagoaga ki a Iehova ko e Atua mo Iesu Keriso. (Roma 14:10) Ma tautolu, he moua e tautolu e fakafili tonu he tau lima he fakafili he tagata po ke nakai, ha ha ia tautolu e tau kakano oti ke fakamalolo ha kua lalago e Iehova a tautolu. Kua pehe e Tohi Tapu: “Uhoaki a lautolu oti kana kua tua kia ia.”—Salamo 2:12.
20. Ko e ha kua maeke ia tautolu ke uhoaki kaeke ke fakauka a tautolu ke he favaleaga mo e pikopiko?
20 He Lauga he Mouga, ne pehe a Iesu: “Uhoaki a mutolu ka faikupu kelea a lautolu, mo e favale kia mutolu, mo e tukumale pikopiko a lautolu kia mutolu ke he tau mena kelea oti ha ko au. Kia kolikoli a mutolu mo e fiafia ni; ha ko e ha ha he lagi ha mutolu a palepale kua lahi; ha ko e mena favale pihia a lautolu ke he tau perofeta ne mumua ia mutolu.” (Mataio 5:11, 12) Moli, nakai mitaki e favaleaga, ka ko e ha tautolu a tumauokafua pete ni e favale mai, putoia e tau hokotaki pikopiko he puhala uta tala, ko e fakatupuaga ma e fiafia. Ko e kakano kua fakafiafia e tautolu a Iehova mo e to moua ai e palepale. Ko e tu fakamalolo ha tautolu kua fakakite kua tua moli a tautolu mo e fakamoli mai ki a tautolu e taliaaga he Atua. Moli, kua fakakite ki a tautolu e falanaki katoatoa ha tautolu ki a Iehova. Ko e falanaki pihia kua aoga ma e Kerisiano, tuga he fakakite mai he vala tala ka mui mai.
Ko e Heigoa ne Ako e Koe?
• Ko e heigoa e tau tuaga he vaha nei kua lata mo e fakamalolo?
• Maeke fefe ia tautolu ke feaki e aga he fakamalolo?
• Ko hai falu fakafifitakiaga mitaki he fakamalolo?
• Ko e ha kua manako a tautolu ke fakamalolo?
[Tau Huhu he Fakaakoaga]
[Tau Fakatino he lau 20]
Ko Simone Arnold (mogonei ko Liebster) i Sihamani, Widdas Madona i Malaui, mo Lydia mo Oleksii Kurdas i Ukaraine ne fakakite e malolo mo e totoko a ia ne kelea
[Tau Fakatino he lau 21]
Nakai ma a tautolu he tala mitaki
[Fakatino he lau 22]
Ko e fakamalolo ha Paulo he fale puipui ne fakatolomaki atu e tala mitaki
[Fakatino he lau 23]
Ka fakamaama fakamalolo e tautolu e tuaga faka-Tohiaga Tapu ha tautolu ke he fakafili, kua foaki e tautolu e fekau aoga