Tau Huhu Mai he Tau Tagata Totou

Ko e kakano kia e hatakiaga he Atua ne fakamau ia Ieremia 7:16, kua nakai maeke e tau Kerisiano ke liogi hagaao ke he tagata nukua tuku kehe mai he fakapotopotoaga Kerisiano ha ko ia ko e tagata hala nakai tokihala?

He mole e fakapuloa hana fakafiliaga ki a Iuta nakai fakamoli, ne tala age a Iehova ki a Ieremia:“Ko koe foki, aua neke liogi a koe ha ko e motu nai, ti aua neke tagi a koe po ke liogi ha ko lautolu, ti aua neke ole mai e koe kia au, ha ko e mena nakai fanogonogo atu e au kia koe.”—Ieremia 7:16.

Ko e ha ne fakatapu e Iehova a Ieremia ke nakai liogi ma e tau Isaraela? Kua pihia ai, ha kua holitu kelea e lautolu hana Fakatufono. Kua taute moli mo e nakai ma a lautolu he ‘kaiha, keli tagata, faivao, omonuo pikopiko, huhunu e tau mena manogi kia Paala, mo e mumui atu ke he tau atua kehe.’ Ko e mena ia, ne tala age a Iehova ke he tau Iutaia nakai fakamoli:“To tiaki foki e au a mutolu, tuga ne tiaki e au ha mutolu a tau matakainaga oti, ko e fanau oti a Efaraimo.” Moli ai, kua nakai hako ia Ieremia, po ke ha tagata foki, ke liogi ki a Iehova ke liuaki e fakafiliaga Hana.—Ieremia 7:9, 15.

Ke fakatatai mo e mena nei, ne tohia he aposetolo ko Ioane hagaao ke he liogi kua tonu ke he Atua. Fakamua, ne fakamoli age a ia ke he tau Kerisiano:“Kaeke ke ole atu ai e tautolu ha mena ke lata mo e hana finagalo, ti fanogonogo mai ai a ia kia tautolu.” (1 Ioane 5:14) Ti, hagaao ke he liogi ma e falu, ne fakaholo atu a Ioane:“Kaeke kua kitia he taha tagata e matakainaga hana kua hala ke he hala nakai hoko atu ke he mate, kia olelalo atu a ia māna, ati foaki mai ai e moui kia ia ma lautolu kua hala nakai hoko atu ke he mate. Na fai hala ke hoko atu ke he mate; nakai tala atu au kia ole atu a mutolu mo e hala ia.” (1 Ioane 5:16) Ne vagahau foki a Iesu ke he agahala ka “nakai fakamagalo,” ko e agahala a ia ke he agaga tapu.—Mataio 12:31, 32.

Ko e kakano kia e mena nei, ko lautolu oti ne tuku kehe mai he fakapotopotoaga Kerisiano he hala mo e nakai tokihala kua taute e tau hala ne “hoko atu ke he mate” ti kua nakai lata ke liogi hagaao ki ai? Kua nakai lata ke taute pihia, ha ko e falu mena ne kua tutupu kua nakai eke e tau holitu pihia mo tau hala ke hoko atu ke he mate. Ka e moli, kua uka lahi ke iloa ko e pihia nakai. Ko e fakafifitakiaga ne mua ko e Patuiki ko Manase i Iuta. Ne feaki e ia e tau fatapoa ke he tau atua fakavai, foaki e tau tama tane hana mo poa, fakagahuahua e tau fakataulatua, mo e tuku e tau tupua ta i loto he faituga ha Iehova. Ti talahau mai e Tohi Tapu ne eke e Manase mo e tau tagata e “mahani ne mua he kelea ke he mahani he tau motu ne fakaotioti ai e Iehova ki mua he fanau a Isaraela.” Ha ko e tau mena oti nei, ne fakahala e Iehova a Manase he fakafano a ia ko e tagata fakapaea ne lili apa kula ki Papelonia.—2 Tau Patuiki 21:1-9; 2 Nofoaga he Tau Patuiki 33:1-11.

Kua kelea muitui kia e tau hala ha Manase ke hoko atu ke he mate? Nakai, ha kua talahau foki he fakamauaga hagaao ki a ia:“Kua matematekelea a ia, ti olelalo atu ai a ia kia Iehova hana Atua, mo e fakatokolalo lahi ni a ia ki mua he Atua he hana tau matua. Ne liogi foki a ia kia ia; ti fanogonogo mai a ia kia ia, mo e talia e ia hana a ole, mo e liuaki mai e ia a ia ki Ierusalema ke he hana kautu. Ti iloa ai e Manase, ko Iehova ko e Atua a ia.”—2 Nofoaga he Tau Patuiki 33:12, 13.

Ti kua nakai lata ia tautolu ke hopo loa ke talahau kua liga moua he tagata e hala ne hoko atu ke he mate ha kua tuku kehe mai a ia he fakapotopotoaga. Na fai magaaho la to fakakite e tuaga he loto fakamoli he tagata. Ka kua fa talahau ko e taha kakano he tuku ki tua ke fafagu aki e tagata ne hala mo e amanaki ni ke tokihala mo e mafoki mai.

Ha kua nakai tuai fakalataha e tagata ke he fakapotopotoaga, ko e ha hiki he loto mo e aga, kua liga kitia mua e lautolu ne tata ki a ia tuga e hoa he fakamauaga po ko lautolu he magafaoa. Ko lautolu ne kitia e tau hikihikiaga pihia ka liga talahau kua nakai taute he tagata ia e hala ne hoko atu ke he mate. Ti liga omoomoi ai a lautolu ke liogi to moua e ia e malolo mai he Kupu he agaga he Atua, mo e to fehagai a Iehova ke he tagata ne hala he fakatatai atu ke he finagalo Hana.—Salamo 44:21; Fakamatalaaga 12:14.

Pete kua kitia he falu e tau fakamailoga ke talitonu kua tokihala a ia ne hala, kua nakai putoia e mena nei ke he fakapotopotoaga katoa. Ko e mena to kapaletu, tupetupe, mo e fakalolelole a lautolu kaeke logona e lautolu taha tagata ne liogi hagaao ki a ia ne tuku ki tua. Ha ko e kakano nei, ko lautolu nukua omoomoi ke liogi hagaao ke he tagata ne hala, kua lata ke taute pihia takitokotaha, he toka e tau matalekua ne toe ke he tau lima he tau motua i loto he fakapotopotoaga.