Kaiaga Fakahiku​—Ko e Heigoa a Ia?

KO E heigoa kua manatu e koe he magaaho ka logona e talahauaga “kaiaga fakahiku”? Tokologa e tau tagata ka manamanatu ke he fakatino fulufuluola lahi he tagata vali ko Leonardo da Vinci (1452-1519), i Milan, i Italia. Ko e moli kua talahaua e matakupu Kaiaga Fakahiku ma e tau tagata atisi, tau tagata tohia, mo e tau tagata fakatagitagi leo kofe tali mai he tau senetenari.

Ko e heigoa mogoia e Kaiaga Fakahiku, ti ko e heigoa e kakano ma e tau tagata ne momoui he senetenari 21 aki? To tala atu he tau enesaikolopetia mo e tau tohi fakamaama kupu ki a koe e Kaiaga Fakahiku, na fakahigoa foki ko e Kaiaga he Iki, ko e kaiaga ha Iesu Keriso mo e hana tau aposetolo he afiafi ato hoko hana mate poa. Ha ko e kaiaga afiafi fakahiku ha Iesu mo e hana tau tutaki tua fakamoli, ne aga mau ai kua fakahigoa ko e Kaiaga Fakahiku. Ha kua fakatu ai he Iki ni ko Iesu Keriso, kua latatonu e higoa Kaiaga he Iki.

He tau senetenari, tokologa ne poa e tau momoui ha lautolu ke lata mo e tau mena ne manatu a lautolu kua uho lahi. Ko e falu he tau mamate nei ne aoga ke he falu tagata ke he leva he tau magaaho. He fakatatai ai, nakai fai he tau mamate foaki noa ia kua uho, ke tata atu e aoga lahi tuga ke he mate ha Iesu Keriso. Lafi ki ai, nakai fai mate he fakamauaga tuai muhu lekua he tagata kua maeke ke fai lauiaaga ke hokotia ke he lalolagi katoa. Ko e ha?

Ke tali e huhu ia mo e ke lagomatai a koe ke kumi e kakano he Kaiaga he Iki ma hau, kua uiina e mautolu a koe ke totou e vala tala ne mui mai.