Ma Tau Fuata​—Kua Taute Nakai e Mutolu e Tolomaki Fakaagaga?

“PETE kua finatu au ke he tau feleveiaaga Kerisiano, kua nakai ha ha ia au e manako lahi ke fekafekau ki a Iehova,” he talahau e Hideo, he liu manamanatu a ia ke he tau aho hana he aoga lotouho. “Ne fa kitia e au a au ke talahaua ke he tau kapitiga he haku a vahega mo e ke fano hemu he puhalatu mo e kapitiga fifine. Kua nakai fai foliaga au, mo e nakai fai manako au ke taute ha tolomaki fakaagaga.” Tatai mo Hideo, kua tokologa e tau fuata ne tuga ke pagea fano, he nakai fai manako ke moua ha foliaga mitaki po ke taute ha holo ki mua.

Kaeke ko e fuata a koe, fakalata kua fiafia ni a koe ka uiina ke fai vala he tau sipote po ke taha mena fakafiafia. Ka e, ka hoko atu ke he tau gahua fakaagaga, liga kua nakai fiafia pihia a koe. Ka kua maeke kia ke fiafia hagaao ke he tau foliaga fakaagaga? Manamanatu la ke he tau kupu nei he salamo: “Kua fakamoli e talahau a Iehova, kua fakailoilo a lautolu kua goagoa. . . . Kua meā e tau poaki a Iehova, kua fakamaama e tau mata.” (Salamo 19:7, 8) Kua maeke he Kupu he Atua ke takitaki “a lautolu kua goagoa” ke fakailoilo, ‘he fakamaama e tau mata hana.’ E, kua maeke he tau mena fakaagaga ke fakafiafia mo e fakahakehake a koe. Ka ko e heigoa kua lata ia koe ke pihia e logonaaga? Lata a koe ke kamata i fe?

Kia Omoomoi ke Fekafekau ke he Atua

Fakamua, kua lata ke omoomoi a koe. Manamanatu ke he mena ne tupu ke he patuiki fuata ko Iosia ha Iuta. He magaaho ne moua e tohi he Fakatufono ha Iehova i loto he faituga, ne poaki e Iosia ke totou ai ti kua aamotia ai he mena ne logona e ia. Ko e fua, “ti uta kehe e Iosia e tau mena fakalialia oti he tau motu oti ne toka ai ke he fanau a Isaraela.” (2 Nofoaga he Tau Patuiki 34:14-21, 33) Kua omoi ai he totouaga he Kupu he Atua a Iosia ke mahomo atu e mena ka taute ke fakatolomaki e tapuaki mea.

Kua maeke foki ia koe ke ati hake e manako ke fekafekau ki a Iehova kaeke totou tumau e koe e Tohi Tapu mo e manamanatu fakahokulo ke he mena ne totou e koe. Ko e mena haia ne omoi aki a Hideo. Ne kamata a ia ke lafi fakatata atu ke he paionia motua, ko e fekafekau gahua mau he Tau Fakamoli a Iehova. Ko e paionia ko e tagata fakaako makutu he Tohi Tapu mo e ukufeke ke fakagahuahua e tau fakaakoaga i ai ke he moui hana. He fakamafana lahi he fakafifitakiaga he paionia, ne kamata a Hideo ke taute pihia foki mo e feaki e manako lahi ke fekafekau ke he Atua mo e falu tagata. Ti fua mai he tolomaki fakaagaga hana e moui kakano mitaki.

Kua maeke foki e totouaga Tohi Tapu he tau aho takitaha ke omoomoi e tau tagata fuata. Ne fakamaama  e Takahiro: “He magaaho ka fano au ke mohe mo e mailoga kua nakai la taute e totouaga Tohi Tapu haku ma e aho, ne nofo hake au mo e totou ai. Ko e fua, ne logona hifo e au e takitakiaga a Iehova. Kua lagomatai lahi e totouaga Tohi Tapu he tau aho takitaha ke he holo ki mua fakaagaga haku. He manako lahi ke fakalataha fakalahi atu ke he fekafekau ha Iehova, ne kamata au ke gahua paionia mau he magaaho ku he mole e paase mai he aoga tokoluga. Ti kua olioli lahi e au e gahua paionia.”

Ke lafi ke he totouaga Tohi Tapu, ko e heigoa foki ka lagomatai a koe ke fakamalolo e omoiaga hau ke fakaheke a Iehova? Ne fakaako he matua fifine ha Tomihiro e kupu moli he Tohi Tapu ki a ia. Ne talahau e ia: “Ko e magaaho la ne fakaako fakamatutu au ke he tohi Life Does Have a Purpose he 19 e tau, ne logona hifo e au e hokulo he fakaalofa ha Iehova mo e poa lukutoto ha Iesu. Ko e loto fakaaue ia ma e fakaalofa he Atua ne omoi aki au ke fakalahi e fekafekauaga ki a Iehova.” (2 Korinito 5:14, 15) Ke tuga a Tomohiro, kua tokologa e tau fuata nukua fakamalolo ke taute e holo ki mua fakaagaga he tutuli e fakaako fakamakutu fakatagata ke he Tohi Tapu.

Pete he pihia, ka e kua ka kaumahala agaia a koe ke manako fakamoli ke fekafekau ki a Iehova? Fai tagata nakai ke kumi lagomatai a koe ki ai? Ne tohia he aposetolo ko Paulo: “Ko e Atua, kua gahua ki loto ia mutolu ke tupu ai e loto, . . . kia gahua foki ki ai.” (Filipi 2:13) Kaeke liogi lagomatai a koe ki a Iehova, to foaki fakamakai atu e ia ki a koe e agaga tapu hana, ke fakamalolo aki a koe ke nakai ni “kia gahua” ka e “ke tupu ai e loto” foki. Kakano he mena nei, to fakamalikiti he agaga tapu he Atua e manako hau ke taute e mena ne fahia ki ai a koe he fekafekauaga ha Iehova mo e lagomatai a koe ke tupu fakaagaga. Ka e ke he tau mena oti, kia falanaki ke he malolo ha Iehova mo e fakamalolo hau a loto!

Fakatokatoka Ni e Koe e Tau Foliaga Hau

He fifili agataha ai a koe ke fekafekau katoatoa atu ki a Iehova, kua lata ia koe ke fakatoka e tau foliaga fakatagata ke taute e tolomaki fakaagaga. Ko Mana, ko e tama fifine Kerisiano fuata, ne talahau: “Kua lagomatai lahi ki a au ke fakatokatoka e tau foliaga. He nakai liutua, kua maeke ia au ke unu ki mua mo e mafanatia. He tokaloto e tau foliaga haku, ne liogi fakamakai au ki a Iehova ma e takitakiaga, ti maeke ai ia au ke holo ki mua mo e nakai fakatauhele.”

Kua lata e tau foliaga hau ke moli mo e maeke ke moua. Ke totou e veveheaga he Tohi Tapu he tau aho takitaha to eke mo foliaga mitaki. Kua lata foki ia koe ke kamata ke taute e kumikumiaga. Ke fakataitai e mena nei ke he taha mena he vagahau Peritania, liga kumikumi a koe ke he tau fua ha Iehova ne tohi i lalo he “Qualities by Name” i lalo ia “Jehovah” i loto he Watch Tower Publications Index. Ha ha i ai ke kavi 40 e matakupu kua maeke ia koe ke kumikumi ki ai, mo e nakai fakauaua to fakatata fakalahi atu a koe ki a Iehova mo e fakalagalaga a koe ke gahua fakalahi ki a ia. Ko e falu a foliaga mukamuka ne kua lata ke fai tali he magahala he feleveiaaga Kerisiano ne lata ke tali he toloaga, ke iloa mitaki taha tagata mai he fakapotopotoaga Kerisiano he tau feleveiaaga takitaha, mo e nakai toka ke mole taha aho ka e nakai liogi ki a Iehova mo e vagahau hagaao ki a ia ke he falu.

Kaeke nakai la tohi a koe he Aoga Fekafekau Fakateokarasi, ko e foliaga mitaki a ia ma hau. Kua fakalataha nakai a koe he fekafekauaga ke he toloaga tagata? Ka nakai, liga manako a koe ke gahua atu ke eke mo tagata fakailoa nakai la papatiso. Ke manamanatu fakahokulo ke he fakafetuiaga hau mo Iehova mo e tukulele ne koe a koe ki a ia ka eke mo lakaaga pauaki ne toe. Tokologa e tau fuata ne ukufeke ke fakamoli e tukuleleaga ha lautolu he foli atu ke taute e fekafekauaga mau.

Pete he mitaki ke fai foliaga he moui hau, kia mataala neke feaki e agaga taufetoko. To moua e  koe e fiafia lahi ke he mena ka taute e koe kaeke nakai fakatatai atu a koe ke he falu.—Kalatia 5:26; 6:4.

Ka e logona hifo fakalata e koe kua nakai la iloilo lahi ia a koe ti uka lahi ke fakatoka e tau foliaga kua lata. Ti muitua ke he fakatonuaga he Tohi Tapu: “Kia haga mai ā e koe hāu a tau teliga, mo e fanogonogo mai a koe ke he tau kupu he tau tagata iloilo.” (Tau Fakatai 22:17) Kumi lagomatai ke he tau matua hau po ke he falu Kerisiano momotua foki. Moli, kua lata e tau matua mo e falu ke fakalatalata mo e fakamalolo ke he mena nei. He logona hifo e uka ke tutuli e foliaga ne fakatoka he falu ma lautolu ka utakehe aki e fiafia he tau fuata mo e liga fakateaga e kakano ne fakatoka ai e tau foliaga. Kua tupu e mena ia ke he taha tama fifine ne pehe: “Kua loga e foliaga ne fakatoka he haku tau matua ma haku, tuga e tohi he Aoga Fekafekau Fakateokarasi, fakalataha ke he fekafekauaga he fonua, papatiso, mo e eke mo paionia. Ne fakamakamaka lahi au ke fakakatoatoa takitaha a lautolu. He magaaho ne hokotia au ke he taha foliaga, ne nakai nava e tau matua haku ki a au, ka e, mai foki taha foliaga ki a au ke uku ki ai. Ko e fua, ne logona e au e uka lahi ke fakakatoatoa e tau foliaga ia. Ne lolelole au mo e logona hifo kua nakai fai mena ne tutuli ki ai.” Ko e heigoa ne hepe ai? Ko e tau foliaga oti kua aoga lahi, ka e nakai ko e hana. Ke kautu, kua lata ni ia koe ke omoomoi ke fakaaoga e manamanatuaga ke fakatoka ne koe e foliaga ma hau ni!

Manamanatu ki a Iesu Keriso. He magaaho ne hau a ia ke he lalolagi, ne iloa e ia e mena ne amanaki he Matua hana, ko Iehova, ki a ia. Ke taute e finagalo ha Iehova, nakai ni ko e foliaga a ia ma Iesu, ka ko e poakiaga ke fakakatoatoa. Fefe e onoonoaga ha Iesu ke he hana kotofaaga? Ne pehe a ia: “Ko e haku a mena kai hanei, kia eke e au e finagalo hana ne fakafano mai au, mo e fakaoti hana gahua.” (Ioane 4:34) Ne fiafia lahi a Iesu ke taute e finagalo ha Iehova mo e fakamoli e tau amaamanakiaga he Matua hana. Kua tuga ni e mena kai ki a Iesu—ne moua e ia e fiafia mo e makona he fakakatoatoa e gahua ne kua amanaki ki a ia. (Heperu 10:5-10) Maeke foki ia koe ke moua e fiafia he magaaho ka omoomoi fakamitaki a koe ke taute e tau mena ne fakamafana atu he tau matua hau ke taute e koe.

Aua Neke Fakalolelole he Taute e Mena Mitaki

Ka fai foliaga a koe he loto, ki a gahua fakamakutu ke moua ai. Ne talahau he Kalatia 6:9: “Aua neke fakalolelole a tautolu ke he mahani mitaki; ha ko e mena to helehele mai e tautolu ke he vaha ke lata ai, kaeke kua nakai fakalolelole a tautolu.” Kia nakai falanaki ke he malolo po ke iloilo ni hau. Ha ko e mena to hoko ni a koe ke fehagai mo e tau fakalavelave mo e liga moua foki e aga fakateaga ku he falu magaaho. Ka e fakamalolo he Tohi Tapu a tautolu: “Kia manatu e koe a ia [Atua] ke he hāu a tau puhala oti, ti fakahakohako ai e ia hāu a tau puhala.” (Tau Fakatai 3:6) To lagomatai e Iehova a koe he lali fakalahi a koe ke fakakatoatoa e tau foliaga fakaagaga hau.

Haia, he ati hake e manako ke fekafekau ki a Iehova mo e he foli atu ke he tau foliaga fakaagaga, to maeke ia koe ke taute e ‘mafiti hau ke kitia he tau tagata oti.’ (1 Timoteo 4:15) To olioli ai e koe e moui kakano lahi he fekafekau ke he Atua.

[Fakatino he lau 31]

He totou e Tohi Tapu mo e manamanatu fakahokulo ke he mena ne totou e koe ka omoi a koe ke fekafekau ki a Iehova

[Fakatino he lau 32]

Ne fakamoli e Iesu e tau amaamanakiaga he hana Matua