“Kia Ha Ha Ia Mutolu e Loto Manamanatu Hifo Mitaki”

TOKOLOGA e tau tagata ne manamanatu kua lata ia lautolu he fanogonogo ke he tau loto manamanatu ha lautolu kaeke fehagai mo e tau fifiliaga. Ka e ke fakagahuahua fakamitaki e loto manamanatu ha tautolu, kua lata lahi ke ako fakamitaki ke he tau mena kua hako mo e hepe, ti muitua fakalahi atu ai ke he puhala hana.

Manamanatu la e tala ke he tagata ne higoa ko Sakaio, he talahau he Tohi Tapu. Ko Sakaio, ne nofo ai i Ieriko, ko e telona ne mua mo e ko e tagata maukoloa. Mai he hana a kupu ni, kua moua e ia e tau koloa hana ke he puhala fakamamahi tagata—ko e puhala kua fakamatematekelea ai e falu. Ka e tupetupe nakai e loto manamanatu ha Sakaio ha ko e hana mahani hepehepe? Ka pihia, kua ufitia moli hana na mata ki ai.—Luka 19:1-7.

Ka e taha e mena ne tupu ke fakaohooho aki a Sakaio ke fakamaliu hana a loto. Kua haele age a Iesu ki Ieriko. Kua fia mamata e tagata ku ko Sakaio ki a ia, ka e nakai maeke a ia ke kitia a ia ha ko e moto tagata. Kua poi a ia ki mua mo e toli ke he akau ke kitia a ia. Nava ha ko e manako lahi a Sakaio, ne pehe age a Iesu ki a ia to aahi atu a ia ke he fale hana. Kua fiafia lahi a Sakaio ma e tagata talahaua nei ke finage ke he kaina hana.

Ko e tau mena ne kitia mo e logona e Sakaio ha kua feoaki mo Iesu ne amohia e loto hana mo e omoomoi a ia ke liliu hana tau puhala. Kua pehe age a ia: “Ko e Iki na e, kitiala, ko e veveheua ne fai e au haku a tau mena ke he tau tagata nonofogati; kaeke foki kua mamahi taha he tukumale age e au to taui atu ai lagafa e au.”—Luka 19:8.

Kua fakamaama e loto manamanatu ha Sakaio, ti fanogonogo a ia mo e oma ai. Kua mua atu e tau fua mitaki ne moua mai ai. Manamanatu la kua fefe e logonaaga ha Sakaio he pehe age a Iesu ki a ia: “Ko e aho nai kua hoko mai ai e fakamouiaga ke he magafaoa nai.”—Luka 19:9.

Ko e fakafifitakiaga mafanatia ha ia! Kua fakakite ai ko e pete ne tau puhala ne tutuli e tautolu he tau magaaho fakamua, kua maeke ia tautolu ke fakamaliu e loto. Tuga a Sakaio, kua maeke ia tautolu ke fanogonogo ke he tau kupu a Iesu—ne fakamau hifo ke he Tohi Tapu—mo e ako e tautolu e mena kua hako mo e hepe. Ati, tuga he fakamakamaka mai he aposetolo ko Peteru, kua maeke ke “ha ha ia [tautolu] e loto manamanatu hifo mitaki.” Maeke ia tautolu ke fanogonogo ke he loto manamanatu kua fakaako ha tautolu mo e taute e mena kua hako.—1 Peteru 3:16.