Tau Fuata ne Fakafiafia e Loto a Iehova
Tau Fuata ne Fakafiafia e Loto a Iehova
Kua taute pauaki e tau vala tala fakaako nei ma e tau fuata ne ha ha he Tau Fakamoli a Iehova. Ko e mena ia, kua fakamafana atu a mautolu ke he tau fuata ikiiki ke fakaako fakamatafeiga e vala tala nei mo e ke tali fakamakai ka fakaako ai he Fakaakoaga Kolo Toko he fakapotopotoaga.
“Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au.”—Tau Fakatai 27:11.
1, 2. (a) Fakamaama ko e kakano kia e manako ke he tau mena he lalolagi, kua nakai lata a koe ke eke mo Kerisiano. (Roma 7:21) (e) Ko e heigoa ne ako mai e koe he fakafifitakiaga ha Asafo? (Kikite puha, lau tohi 5.)
MANATU LA, ko koe hane fa e fakatau koloa tui. He onoono viko a koe, ne kitia e koe e mena tui ne manako agataha a koe ki ai. Ko e lanu mo e talagaaga kua lata tonu ni mo koe, ti fakakite he laupepa totogi ko e mena tau mukamuka moli anei. Ka e kikite fakamitaki mogoia a koe ki ai. Ti togi lahi a koe, he kitia e koe kua tuga e tuai e tau matapotu he ie, mo e fakateaga e puhala tuitui. Ko e mena tui, pete kua fulufuluola, kua fafafafa e tauteaga. To fakamole nakai e koe e tupe hau ke he mena tui nakai mitaki pihia?
2 Kia fakatai la e mena nei ke he tuaga ka liga fehagai mo koe ko e fuata Kerisiano. He onoonoaga fakamua, ko e tau mena he lalolagi nei—tuga ni e mena tui ia—kua liga fulufuluola lahi. Ke tuga anei, liga o e tau kapitiga aoga hau ke he fiafiaaga, kai tulaki, inu kava, fefakamahaniaki fakahanoa, mo e matutaki ke he mahani fakatane mo e fifine ka e nakaila mau. Kua futia atu nakai a koe he falu a magaaho ke he puhala moui pihia? Kua manako kia a koe ke lafi fakatote atu ke he ataina ha lautolu? Kaeke pihia, kia nakai mafiti ke talahau kua kelea pauaki e loto hau ti kua nakai ni lata ke eke mo Kerisiano. Ha ko e mena kua talahau he Tohi Tapu na malolo lahi e fakaohooho he lalolagi—pihia foki ke he tagata ne manako ke fakafiafia e Atua.—2 Timoteo 4:10.
3. (a) Ko e ha ne nakai aoga ai ke tutuli e tau mena he lalolagi? (e) Fakamaama fefe he taha Kerisiano e teao he tau tutuliaga fakalalolagi?
3 Mogonei fakamolemole kia kikite fakamitaki, tuga ni ke he taha mena tui ne fiafia a koe ke fakatau. Huhu hifo ki a koe ni, ‘Ko e mitaki fefe e ie mo e puhala tuitui he fakatokaaga nei?’ Ne talahau he Tohi Tapu “ha ne mole atu foki e lalolagi katoa.” (1 Ioane 2:17) Ko e ha fiafia ka moua mai i ai to ku ni. Mua atu foki, kua lahi e totogi he mahani nakai Atua. Moli ni kua nakai tau mukamuka. Taha e Kerisiano, ne fakauka ke he mena ne ui e ia ko e “mamahi he fakaaoga kelea e vaha fuata,” ne talahau: “Tuga kua fulufuluola mo e futia lahi e lalolagi. Ti manako ai ke talitonu a koe, kua maeke ia koe ke moua taha fiafia ne noa mo e mamahi. Ka e kua nakai moli e mena nei. To fakaaoga he lalolagi a koe, mo e he magaaho ka oti ai, ti tiaki a koe.” * Ko e moumou he ha e vaha fuata hau ke he puhala moui nakai mitaki pihia?
Puipui Mai ia “Ia ne Mahani Kelea”
4, 5. (a) Nakai leva ato hoko e mate hana, ko e heigoa ne ole e Iesu he liogi ki a Iehova? (e) Ko e ha ne lata tonu ai e ole nei?
4 He mailoga kua nakai fai mena mitaki e lalolagi nei ke foaki, kua eketaha e tau fuata ikiiki ne ha ha he Tau Fakamoli a Iehova ke nakai fekapitigaaki mo e lalolagi nei. (Iakopo 4:4) Ko koe kia taha he tau fuata tua fakamoli nei? Ka pihia, kua nava lahi atu ki a koe. Moli, kua nakai mukamuka ke totoko e peehiaga he tau kapitiga mo e ke kitia maali kua kehe, ka kua ha ha ia koe e lagomatai.
5 Nakaila leva e mate hana, ne liogi a Iesu ki a Iehova ke “leveki” hana tau tutaki mai ia “ia ne mahani kelea.” (Ioane 17:15) Ne taute e Iesu e ole nei ma e kakano mitaki. Iloa e ia to nakai mukamuka e puhala he loto fakamoli ma e tau tutaki hana, pete ko e fiha e tau tau ha lautolu he moui. Ko e ha? Ma e taha e mena, tuga ne talahau e Iesu, to fehagaiaki e tau tutaki hana mo e fi malolo lahi ne nakai kitia mata—ko “ia ne mahani kelea,” ko Satani ko e Tiapolo. Ne talahau he Tohi Tapu ko e mena moui agaga kelea nei “kua faifano a ia tuga ne leona tagi, kua kumi kia falu ke faiola ai e ia.”—1 Peteru 5:8.
6. Iloa fefe e tautolu kua nakai fai fakaalofa hofihofi noa a Satani ma e tau tagata fuata?
6 He magahala he fakamauaga tuai, kua fiafia fakalialia a Satani he tamai e ekefakakelea he tau kelea muikau ke he tau tagata. Mailoga la e tau matematekelea mahaki ne tamai e Satani ki a Iopu mo e magafaoa hana. (Iopu 1:13-19; 2:7) Fakalata kua manatu e koe e tau nusi ne fakakite e agaga vale ha Satani he magahala he moui hau. He hane faifano e Tiapolo, fakalataha mo e lali hana ke faiola, kua nakai fakakite e ia e fakaalofa hofihofi noa ma e tau fuata. Ke tuga anei, he kamataaga he senetenari fakamua V.N., ne taute e Herota e pulega ke tamate e tau tama tane oti i Petelehema ne ua e tau tau po ke tote hifo. (Mataio 2:16) Liga ni ko Satani ne fakaohooho a Herota—he lali ke kelipopo e tama ka eke he taha aho mo Mesia ne mavehe he Atua, mo e tamai e fakahala he Atua ki a Satani! (Kenese 3:15) Maaliali ai, kua nakai fai fakaalofa a Satani ma e tau tagata fuata. Ko e fatuakiloto hokoia hana ke tokologa e tau tagata ka faiola ki ai. Kua uhouho ai e moli he mogonei, ha kua liti mai he lagi a Satani ke he lalolagi, “kua ita lahi, ha kua iloa e ia kua tote e hana vaha.”—Fakakiteaga 12:9, 12.
7. (a) Mamao fefe e kehe katoatoa ha Iehova mo Satani? (e) Fefe e logonaaga ha Iehova he olioli a koe ke he moui?
7 He kehe mamao mo Satani, ne “kua ita lahi,” nukua ha ha ia Iehova e “fakaalofa hofihofi noa.” (Luka 1:78) Ko ia ko e fakataiaga ne mua he fakaalofa. Ko e moli, kua fakamailoga lahi he fua mua ue atu nei e Tufuga ha tautolu ati talahau e Tohi Tapu: “Ko e Atua ko e fakaalofa.” (1 Ioane 4:8) Ko e kehe a ia he vahaloto he atua he fakatokaaga nei mo e Atua ne kua monuina a koe ke tapuaki! Pete kua kumi a Satani ke faiola, ko Iehova kua “nakai finagalo a ia ke malaia taha.” (2 Peteru 3:9) Kua uho e tau momoui he tau tagata oti ki a ia—pihia foki hau. He tomatoma atu a Iehova ki a koe mai he Kupu hana ke nakai eke mo tagata he lalolagi, kua nakai lali a ia ke fakamate e fiafia hau ke he moui po ke fakakaupa e ataina hau. (Ioane 15:19) Ke he taha fahi, kua leveki e ia a koe ha ko ia ne mahani kelea. Kua manako hau a Matua he lagi ke fai mena mitaki lahi atu a koe mai he fiafia galo vave he lalolagi nei. Ko e manako hana ke moua e koe e “moui tukulagi”—ke he lalolagi parataiso. (1 Timoteo 6:17-19) Kua manako a Iehova ke kautu a koe, mo e kua hataki atu e ia a koe ke he foliaga ia. (1 Timoteo 2:4) Mua atu, kua foaki atu e Iehova ki a koe e uiina uho. Ko e heigoa e mena ia?
“Kia Fiafia ai Haku Loto”
8, 9. (a) Ko e heigoa e mena fakaalofa ka maeke ia koe ke foaki ki a Iehova? (e) Fakafiufiu fefe e Satani a Iehova, tuga ne fakakite he mena ne tupu ki a Iopu?
8 Kua fakatau nakai e koe e mena fakaalofa ma e kapitiga tata mo e kitia e mamali lahi he fofoga he hau a kapitiga he ofo mo e fiafia he moua ai? Fakalata kua lahi e manamanatu hau ko e heigoa la e mena fakaalofa ne kua lata ma e tagata ia. Mogonei kia manamanatu ke he huhu nei: Ko e heigoa la e mena fakaalofa ka foaki e koe ke he hau a Tufuga, ko Iehova ko e Atua? He magaaho fakamua, kua tuga e goagoa e manatu ia. Ko e heigoa ne manako e Mua Ue Atu mai he tau tagata? Ko e heigoa ka foaki foki e koe ki a ia ne kua fita he moua e ia? Ne tali he Tohi Tapu he Tau Fakatai 27:11: “Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au.”
9 Tuga kua liga iloa e koe mai he kumikumi hau ke he Tohi Tapu, na ko Satani ko e Tiapolo ne fakafiu a Iehova. Ne fakapuloa e ia ko e ha tagata ne fekafekau ke he Atua kua taute ai, nakai mai he fakaalofa, ka e ma e tau kakano fulukovi. Toka a lautolu ke mamahi ke he matematekelea, he talahau e Satani, to tiaki agataha e lautolu e tapuaki moli. Manamanatu, ke tuga anei, ke he mena ne talahau e Satani ki a Iehova hagaao ke he tagata tututonu ko Iopu: “Nakai kia pa takai ai e koe a ia, mo e hana fale, katoa mo e hana tau mena oti ke he tau faahi oti? kua fakamonuina e koe e gahua he hana tau lima, kua fakaloga ai foki hana tau manu ke he fonua. Ka kia fakaolo atu a e koe e lima hau mo e pipiki atu ke he hana tau mena oti, ti vagahau kelea ai a ia kia koe ki mua hau ni.”—Iopu 1:10, 11.
10. (a) Iloa fefe e tautolu na huhu toko atu a Satani nakai ni ke he loto fakamoli ha Iopu ka ke he falu foki? (e) Putoia fefe a koe ke he matakupu he pule katoatoa?
10 Tuga ne fakakite i loto he fakamauaga he Tohi Tapu, kua nakai ni huhu toko a Satani ke he loto fakamoli ha Iopu ka e ke he loto fakamoli he tau tagata oti foki ne fekafekau ke he Atua—pihia foki ki a koe. Ko e moli, he vagahau hagaao ke he tau tagata oti kana, ne tala age a Satani ki a Iehova: “Ko e tau mena oti foki ha ha he tagata [nakai ni ha Iopu ka e he ha tagata ni], to ta age e ia ke totogi aki hana moui.” (Iopu 2:4) Kitia nakai e koe e matagahua hau i loto he matakupu aoga lahi nei? Tuga ne fakakite he Tau Fakatai 27:11, kua tala atu a Iehova ki a koe kua fai mena kua maeke ia koe ke foaki ki a ia—ko e fakaveaga ke tali atu a ia ke he tagata fakafiu hana, ko Satani. Manamanatu—kua ui atu e Pule Katoatoa he Lalolagi mo e Lagi Katoatoa ki a koe ke fai vala ke tali atu ke he matakupu mua ue atu he tau magaaho oti. Ko e kotofaaga homo lahi mo e monuina ha ia hau! Maeke nakai ia koe ke fakamoli e mena ne ole mai e Iehova ki a koe? Kua maeke ia Iopu. (Iopu 2:9, 10) Ti taute pihia e Iesu mo e tau tagata tokologa foki he magahala he fakamauaga tuai, pihia foki e tau fuata tokologa. (Filipi 2:8; Fakakiteaga 6:9) Maeke ia koe ke taute pihia. Ka e taha e mena kua lata ia koe ke iloa moli, kua nakai fai tuaga tu kehe e mena nei. Ke he puhala gahua hau, to fakakite e koe kua lago a koe ke he fakafiu ha Satani po ke tali ha Iehova. Ha e fe e mena ka fifili e koe ke fakatokoluga?
Manatu e Iehova a Koe!
11, 12. Fai kehe nakai ki a Iehova ka fifili a koe ke fekafekau ki a ia po ke nakai? Fakamaama.
11 Kua aoga moli nakai ki a Iehova ko e heigoa e fifiliaga hau ka taute? Nakai kia kua tokologa e tau tagata ne fita he tua fakamoli ki a ia ke moua e tali kua lata ke foaki ki a Satani? Moli, na talahau he Tiapolo kua nakai fai tagata ke fekafekau ki a Iehova mai he loto fakaalofa, ko e talahauaga kua fakamoli tuai ke fakavai. Pete he pihia, kua manako agaia a Iehova ki a koe ke uta e fahi hana he matakupu he pule katoatoa ha kua manatu e ia a koe ko e tagata tokotaha. Ne talahau e Iesu: “Pihia foki ha mutolu a Matua ha ha he lagi, kua nakai finagalo a ia kia mate taha ia lautolu nai kua fakateaga.”—Mataio 18:14.
12 Kitia maali ai, kua fiafia lahi a Iehova ke he puhala ne fifili e koe. Mua atu ki ai, kua lauia a ia he fifiliaga ia. Kua fakamaama he Tohi Tapu na ha ha ia Iehova e tau logonaaga hokulo ne kua fakalagalaga he tau gahua mitaki po ke kelea he tau tagata. Ke fakatai ki ai, he magaaho ne fakafualoto tumau e tau Isaraela, nukua “fakahogohogo” ai a Iehova. (Salamo 78:40, 41) Ato hoko e Fakapuke he vaha ha Noa, he magaaho “kua lahi e mahani kelea he tau tagata,” ne ‘mamahi foki e finagalo ha Iehova.’ (Kenese 6:5, 6) Kia manamanatu ke he kakano he mena nei. Kaeke uta e koe e puhala hehe, to liga fakamamahi e koe e Tufuga hau. Kua nakai pehe e mena nei kua lolelole e Atua po kua falanaki ke he tau logonaaga. Ka e, kua ofania e ia a koe mo e manamanatu ke he levekiaga hau. Ke he taha fahi, ka taute e koe e mena hako, kua fiafia e loto a Iehova. Kua fiafia a ia nakai ni ha kua fai tali foki a ia ke foaki ki a Satani ka kua fiafia foki ha kua maeke a ia mo Taui hau he mogonei. Ti, ko e mena haia ne manako lahi a ia ki ai. (Heperu 11:6) Ko e Matua fakaalofa ha ia hau ko Iehova ko e Atua!
Tau Monuina Loga he Mogonei
13. Puhala fe ne tamai he fekafekau atu ki a Iehova e tau fakamonuina he magaaho tonu nei?
13 Ko e tau monuina ne moua mai he fekafekau ki a Iehova kua nakai ni ke olioli ki ai he vaha anoiha. Tokologa e tau fuata ne ha ha he Tau Fakamoli a Iehova kua fakamonuina aki e fiafia mo e makona he mogo tonu nei, mo e ma e kakano mitaki. “Kua tonu e tau fekau a Iehova, kua fakafiafia e loto,” he tohia he salamo. (Salamo 19:8) Mua atu ke he ha tagata, kua iloa e Iehova e mena mitaki ma tautolu. He puhala he perofeta ko Isaia, ne talahau e Iehova: “Ko au ko Iehova, ko e hau a Atua, kua fakaako atu kia koe ke he tau mena ke aoga ai, kua takitaki e ia a koe ke he puhala ke fano ai a koe. Ane hagao mai a koe ke he haku tau poaki, po kua tuga ne vailele hāu a monuina; mo e tuga ne tau peau he tahi hau a tututonu.”—Isaia 48:17, 18.
14. Maeke fefe he tau matapatu fakaakoaga he Tohi Tapu ke lagomatai a koe ke puipui mai he mamahi he kaitalofa?
14 He omaoma ke he tau matapatu fakaakoaga he Tohi Tapu ka lagomatai a koe ke puipui mai he tau mamahi loga mo e loto momoko. Ke fakatai ki ai, ne talahau he Tohi Tapu ko lautolu ne feaki e loto lahi ke he tupe “kua hoka e lautolu a lautolu ti ati ni ke he tau mena matematekelea loga.” (1 Timoteo 6:9, 10) Kua hokotia nakai ha kapitiga hau ke he kelea moli he loto lahi ke he tupe tuga ne talahau he kupu Tohi Tapu nei? Ko e falu fuata tane mo e fifine kua pehia he tau kaitalofa ha kua manako lahi a lautolu ke moua e tau mena tui ne tau ai e tau higoa talahaua mo e tau matini kehekehe fou. He hahamo e tau kaitalofa ne kua leva mo e tokoluga e muka ha ko e tau mena ne nakai maeke ia koe ke totogi, ko e taha vahega ia he fakatupa!—Tau Fakatai 22:7.
15. Ko e tau puhala fe kua puipui he tau matapatu fakaakoaga he Tohi Tapu a koe mai he mamahi ne fua mai he mahani feuaki?
15 Onoono foki ke he matagahua he mahani feuaki. He lalolagi katoa he tau tau takitaha, kua tokologa e tau tama fifine ne fatu. Ko e falu kua fanau e tau tama ne nakai manako ki ai po kua nakai iloa ke feaki. Falu ne putoia ke he fakatotama mo e moua e mamahi he fakaatukehe e loto manamanatu. Ti ha ha ai e tau fuata tane mo e tau fifine ne moua e gagao pikitia he mahani fakatane mo e fifine, tuga e AIDS. Ka e, ki a ia ne iloa a Iehova to lahi e mena ka tupu mai ai, ko e fakafetuiaga malona mo Iehova. * (Kalatia 5:19-21) Ma e kakano mitaki, ne pehe e Tohi Tapu: “Kia fehola kehe a mutolu he feuaki.”—1 Korinito 6:18.
Fekafekau ke he “Atua Fiafia”
16. (a) Iloa fefe e tautolu na manako a Iehova ki a koe ke olioli e vaha fuata hau? (e) Ko e ha ne fakatokatoka e Iehova e tau takitakiaga ke muitua a koe ki ai?
16 Ne fakakite he Tohi Tapu a Iehova ko e “Atua fiafia.” (1 Timoteo 1:11, NW) Kua manako a ia ke fiafia foki a koe. Ko e moli, ne talahau he Kupu ni hana: “Ko e tau fuata na e kia olioli a a koe ke he hāu a vaha tote, kia fiafia foki a koe ke he tau aho he hāu a vaha fuata.” (Fakamatalaaga 11:9) Ka kua molea atu e kitiaaga ha Iehova ke he magaaho fou nei mo e maeke ke kitia e tau mena tutupu he vaha loa he mahani mitaki mo e kelea. Kakano haia ne tomatoma atu a ia ki a koe: “Hanai, kia manatu a a koe ke he hāu a vaha fuata kia ia ne eke a koe, ka kua nakaila hohoko mai e tau aho kelea, ka kua nakaila fakatata mai e tau tau ke pehe ai a koe, Nakai tuai fiafia au ki ai.”—Fakamatalaaga 12:1.
17, 18. Fakakite fefe he taha Kerisiano fuata e fiafia hana he fekafekau ki a Iehova, mo e moua fefe e koe e fiafia pihia?
17 He vaha nei, kua tokologa e tau fuata hane fiafia lahi he fekafekau ki a Iehova. Ke fakatai ki ai, ne talahau e Lina ne 15 e tau tau he moui: “Kua moua e au e mauokafua mo e lilifu fakatagata. Ha ha ia au e tino malolo ha kua nakai ula mo e kai tulaki. Ha ha ia au e tau takitakiaga uho ne moua mai he puhala he fakapotopotoaga ne lagomatai au ke kautu ke he tau peehiaga kelea muitui ha Satani. Kua kikila fiafia e fofoga haku ha ko e fakalatahaaga ati hake ne moua he Fale he Kautu. Mua atu ki ai, kua moua e au e amaamanakiaga mitaki lahi ke moui tukulagi he lalolagi.”
18 Ke tuga a Lina, kua tokologa e tau Kerisiano fuata hane tau fakalahi ha koe tua, ti kua tamai he mena nei e fiafia ki a lautolu. Kua mailoga e lautolu ko e ha lautolu a tau momoui—pete he uka he falu magaaho—kua fai kakano mo e molioli e vaha anoiha. Ti, fakatumau a ke fekafekau ke he Atua ne fiafia moli ke he levekiaga hau. Kia fakafiafia e loto hana, mo e to fakafiafia e ia a koe he mogonei mo e ke he vaha tukulagi tukumuitea!—Salamo 5:11.
[Tau Matahui Tala]
^ para. 3 Kikite e vala tala “The Truth Gave Me Back My Life,” ne ha ha he fufuta he Awake!, Oketopa 22, 1996.
^ para. 15 Kua mafanatia ke iloa he magaaho ka tokihala e tagata, fakaoti ai e taute mena hehe, mo e talatalahau e tau hala hana, “to fakamagalo fakalahi” e Iehova.—Isaia 55:7.
Manatu Nakai e Koe?
• Ko e heigoa e hagahaga kelea ne fehagai ki ai a koe mai “ia ia ne mahani kelea,” ko Satani?
• Maeke fefe ia koe ke fakafiafia e loto a Iehova?
• Fakakite fefe he Tohi Tapu na manatu e Iehova a koe?
• Ko e heigoa falu a fakamonuinaaga ne moua mai he fekafekau ki a Iehova?
[Tau Huhu he Fakaakoaga]
[Puha/Fakatino he lau 5]
Fetamakina e Tagata Tututonu kua Tupetupe
Ko Asafo ko e Levi lologo talahaua he faituga ha Iehova i Isaraela i tuai. Ne fafati foki e ia e tau lologo ne fakaaoga he tapuakiaga he toloaga tagata. Ka e pete ni ko e tau kotofaaga monuina hana, ne manako atu a Asafo ke he tau mahani nakai Atua he tau kapitiga hana, ne kua kitia ke holitu e tau fakatufono he Atua mo e nakai fakahala. “[Ne] fetamakina kua tupetupe haku tau hui; toe tote ni ti heke haku tau hui,” he talahau fakamui e Asafo. “Kua mahekeheke na au kia lautolu ne goagoa; ne kitekite au ke he monuina he tau tagata mahani kelea.”—Salamo 73:2, 3.
Fakahiku, ne finatu a Asafo ke he faituga he Atua mo e liogi hagaao ke he lekua ia. Ha kua fakafou e onoonoaga fakaagaga, ne maama e ia na vihiatia e Iehova e tau mena kelea, fai magaaho, to helehele he tau tagata mahani kelea mo e tututonu e tau mena ne gana e lautolu. (Salamo 73:17-20; Kalatia 6:7, 8) Moli lahi ni, kua ha ha e tau tagata mahani kelea he tau mena momole. Ka e he fakahiku, to veveli a lautolu he magaaho ka moumou e Iehova e fakatokaaga nakai mahani Atua nei.—Fakakiteaga 21:8.
[Tau Fakatino he lau 7]
Ha ha ia Iehova e fiafia hau he loto, ka ko e foliaga ha Satani ke faiola ki a koe
[Fakatino he lau 8]
Kua moua he tau fuata tokologa e fiafia lahi he fekafekau ki a Iehova fakalataha mo e tau katofia Kerisiano